Text: © New Life Computer Institute Audio: ℗ 2020 Hosanna

Ravula NLCI (NT) Non Drama

Ravula NLCI (NT) Drama

“നീങ്ക നല്ലകാരിയമൊന്റുമു മയിച്ചെരക്കു കാട്ടുവബേണ്ടി ചെയ്യദിപ്പ നോക്കിക്കോമി. അങ്ങാണെ ചെയിവായിത്തെങ്കി ചൊറുഗത്തില നിങ്കട അപ്പെന്റ കയിലിന്തു നീങ്ക ചെയിദെങ്കു പഗേരമാച്ചു നിങ്കക്കു ഒന്റുമു കിട്ടയ്. അയിനെകോണ്ടു നീങ്ക പാവപട്ടെരക്കു ദരുമ കൊടുപ്പടെക്കു മയിച്ചെര നിങ്കളെ ബലിയെരളെന്റു പറേവബേണ്ടി നാങ്ക ഏനയിനൊക്ക ചെയിദ എന്റു ബടായി പറേവ പാടുകാണി. ബുളേവിലി ഈച്ചിരനെ തൊവുന്റെരളാന്റു താങ്ക ചെയിന്റ നല്ലകാരിയത്തിനെപറ്റി പള്ളിലിമു മാരിഗത്തിമൊക്ക ബുളിച്ചു പറേഞ്ചൊ നടാക്കിന്റെയെയ്. എന്റെങ്കി അയിരണ്ട കൂലി അയിരക്കു കിട്ടിനയ് എന്റു നാനു നേരാച്ചുമു നിങ്കടൊന്റ പറേന്റെയ്. അയിനെകോണ്ടു നീങ്ക പാവപട്ടെരക്കു ദരുമ കൊടുപ്പടെക്കു ആരുക്കുമു അറിയദെ ദരുമ കൊടുമി. എന്നെഗെന്റെങ്കി ആരുക്കുമു അറിയദെ നീങ്ക ദരുമ കൊടുത്തെനൊക്ക നിങ്കട അപ്പെനാന ഈച്ചിര മെലേന്റു. അദു നീങ്ക ചെയിദ കാരിയത്തെക്കു പഗേര തരുവു.”

“നീങ്ക പുറാത്തിപ്പടെക്കു ബുളേവിലി ഈച്ചിരനെ തൊവുന്റെരളെപല്ലെ പുറാത്തിപ്പനാഗയ്. എന്നെഗെന്റെങ്കി അങ്ങാണത്തെര പള്ളിലിമു മാരിഗത്തിമൊക്ക നിന്റൊണ്ടു മയിച്ചെര മെലേവബേണ്ടി പുറാത്തിപ്പനാന്റു അലാക്കിന്റെയെയ്. എന്റെങ്കി അയിരണ്ട കൂലി അയിരക്കു കിട്ടിനയ് എന്റു നാനു നേരാച്ചുമു നിങ്കടൊന്റ പറേന്റെയ്. അയിനെകോണ്ടു നീങ്ക പുറാത്തിപ്പടെക്കു അഗാത്തെക്കു അത്തിച്ചു ബായെലു അടേച്ചൊണ്ടു ആരുക്കുമു അറിയദെ പുറാത്തിമി. ആരുമു മെലേയക്കിമു നിങ്കളെ മെലേന്റ ഈച്ചിര നിങ്കക്കു പഗേര തരുവു.
നീങ്ക പുറാത്തിപ്പടെക്കു ജാദിയളാന നെരേയളെപല്ലെ താങ്ക പറേന്റെയെയ് എന്നെയെയ് എന്റുബരെ ഗൊത്തുകാണദെ ബലാബരി കാരിയമൊക്ക പറേഞ്ചൊണ്ടു പുറാത്തിപ്പനാഗയ്. അങ്ങാണെ പുറാത്തിപ്പടെക്കു അയിരണ്ട ദേവരുവ കേട്ടിപ്പൊരു എന്റാന്റു അയിര നിനേക്കിന്റെയെയ്. നീങ്ക അയിരളെപല്ലെ ആവനാഗയ്. എന്നെഗെന്റെങ്കി നിങ്കക്കു എന്നെനൊക്ക ബേണെന്റു നീങ്ക കേളുക്കിന്റെങ്കു മുല്ലെതന്നെ നിങ്കട അപ്പെനാന ഈച്ചിരങ്കു ഗൊത്തുകീന്റൊയ്.
അയിനെകോണ്ടു നീങ്ക പുറാത്തിപ്പടെക്കു ഇങ്ങാണെ പുറാത്തിമി:
ചൊറുഗത്തികീന്റ എങ്കട അപ്പാ,
ചുദ്ദത്തികീന്റ ഇഞ്ഞെ ഒക്കായിമു ബിലേബെക്കൊട്ടു.
നീ ബരിക്കിന്റ നാടു ബരോട്ടു.
ഇഞ്ച ഇട്ട ചൊറുഗത്തി നടാക്കിന്റപല്ലെ ബൂമിലിമു നടാക്കൊട്ടു.
എങ്കക്കു തിമ്മ ആവെച്ചകീന്റെനൊക്ക ഇന്റു തരോണു.
എങ്കടൊന്റ തെറ്റു ചെയിന്റെരണ്ടൊന്റ നാങ്ക പൊറുക്കിന്റപല്ലെ
എങ്കട തെറ്റൊക്ക എങ്കടൊന്റമു പൊറുക്കൊണു.
ചോദണെ ബരുവടെക്കു തെറ്റുക്കു ബൂന്തുപോഗദെ എങ്കളെ കാക്കൊണു.
ചുടേലെപേയിന്റ കയിലിന്തു നീ എങ്കളെ കാക്കൊണു.
നിങ്കടൊന്റ തെറ്റു ചെയിന്റ മയിച്ചെരണ്ടൊന്റ നീങ്ക പൊറുത്തെങ്കി ചൊറുഗത്തികീന്റ അപ്പെയ് നീങ്ക ചെയിദ തെറ്റുമു നിങ്കടൊന്റ പൊറുപ്പു. എന്റെങ്കി നിങ്കടൊന്റ തെറ്റു ചെയിന്റെരണ്ടൊന്റ നീങ്ക പൊറുഗക്കി ചൊറുഗത്തികീന്റ നിങ്കട അപ്പെയ് നീങ്ക ചെയിദ തെറ്റുമു നിങ്കടൊന്റ പൊറുഗ.
നീങ്ക നോമ്പെടുപ്പടെക്കു ബുളേവിലി ഈച്ചിരനെ തൊവുന്റെരളെപല്ലെ ബാടിന മുഗാറു കാട്ടുവ പാടുകാണി. എന്നെഗെന്റെങ്കി താങ്ക നോമ്പെടുത്തുകീന്റെരളെന്റു ബേറെകീന്റ മയിച്ചെരക്കു കാട്ടുവബേണ്ടി അയിര ബാടിന മുഗാറു മാടിന്റൊരു. അയിരണ്ട കൂലി അയിരക്കു കിട്ടിനയ് എന്റു നാനു നേരാച്ചുമു നിങ്കടൊന്റ പറേന്റെയ്. എന്റെങ്കി നീങ്ക നോമ്പെടുപ്പടെക്കു തിലേക്കു എണ്ണെ ചേച്ചൊണ്ടുമു മുഗാറു കവുഗികോണ്ടുമു നോമ്പെടുമി. ആരുക്കുമു അറിയദെ ഈച്ചിരന്റ മുല്ലെലക്കെ നോമ്പെടുക്കിന്റ നിങ്കളെ മെലേന്റ ഈച്ചിര അയിങ്കൊക്ക നിങ്കക്കു പഗേര തരുവു.”

“ചിദേലു തിമ്മനുമു തുരുമ്പു പുടിപ്പനുമു കള്ളെയ് കട്ടൊണ്ടു പോവനുമു ചെയിന്റ ഈ ബൂമിലി നീങ്ക ചൊത്തുമൊദേലു ചങ്കെരുത്തി ബെപ്പനാഗയ്. എന്റെങ്കി ചിദേലു തിന്നത്തെനുമു തുരുമ്പു പുടിഗത്തെനുമു കള്ളെയ് കട്ടൊണ്ടു പോഗത്തെനുമാന ചൊറുഗത്തി നിങ്കക്കുബേണ്ടി ചൊത്തുമൊദേലു ചങ്കെരുത്തി ബെയിമി. നീങ്ക ചൊത്തുമൊദേലൊക്ക ചങ്കെരുത്തി ബെച്ചുകീന്റവുടെയായിപ്പൊയ് നിങ്കട മനാമു കീന്റെയെയ്.
കണ്ണു ഒരു ബുളാക്കുപല്ലെയാന്റു. കണ്ണു നല്ലെനാനെങ്കി മേലൊക്ക ബുളാങ്കുവൊയ്. എന്റെങ്കി കണ്ണു നല്ലെനല്ലക്കി മേലൊക്ക കാവുളഗെട്ടു പോവൊയ്. ഇഞ്ച മേലിലികീന്റ ബെളിച്ചതന്നെ കാവുളമായിപോനെങ്കി ആ കാവുള എത്തെനെ ബലിയെനായിപ്പൊയ്!
ഒരു പണിക്കാറെങ്കു രാണ്ടു ഉടേയക്കാറെരണ്ട കാരിയമൊക്ക നോക്കിമാടിടുവ പറ്റയ്. അയിനു ഒരുത്തെനെ ബെറുപ്പനുമു ബേറൊരുത്തെനെ ചിനേഗിപ്പനുമു ചെയിവൊയ്. അല്ലക്കി അയിനു ഒരുത്തെന്റൊന്റ കൂടുവനുമു ബേറൊരുത്തെനെ ബേണ്ടെന്റു ബെപ്പനുമു ചെയിവൊയ്. അങ്ങാണെതന്നെ നിങ്കക്കു ഈച്ചിരനെമു ലോഗത്തില മൊദേലുനെമു ഒരേപല്ലെ ചിനേഗിപ്പ പറ്റയ്.
അയിനെകോണ്ടു നാനു നിങ്കടൊന്റ പറേന്റെയ്: എന്നെനെ തിന്റുകുടിച്ചിട്ടൊണ്ടു ബദുക്കുവെരി എന്റൊണ്ടുമു ചിന്തെകുപ്പെയ കാണത്തെനെകോണ്ടു എന്നെനെ ഇട്ടൊണ്ടു നടാപ്പെരി എന്റൊണ്ടുമു ചങ്കടപ്പടോണ്ടമി. എന്നെഗെന്റെങ്കി തിന്റുകുടിച്ചിണ്ടെനെമുകാട്ടി ബലിയെയ് നമിന്റ ഉഗിരുമു ചിന്തെകുപ്പെയത്തിനെമുകാട്ടി ബലിയെയ് നമിന്റ മേലുമാന്റു. മോടത്തില പുള്ളുവളെ മെലേനോക്കുമി, അയിര ബുദേപ്പനോ കൊയിവനോ അറേലി കൂട്ടിബെപ്പനോ കാണി. എന്റദെമു ചൊറുഗത്തികീന്റ നിങ്കട അപ്പെനാന ഈച്ചിര അയിരളെ ചാക്കിന്റു. അയിരളെമുകാട്ടി എത്തെനെയോ ബിലേകീന്റെരളാന്റു നീങ്ക. നിങ്കട ഉഗിരുനെപറ്റി നിനേച്ചൊണ്ടു ചങ്കടപട്ടിച്ചു എന്ന കാരിയ? നിങ്കട ഉഗിരുനെ ഒരു ജിനാമെങ്കില അദിഗമാക്കുവ ആരുക്കു പറ്റുവൊയ്?
ചിന്തെകുപ്പെയത്തിനെപറ്റിമു നീങ്ക നിനേച്ചു ചങ്കടപണ്ടെയെയ് എന്നെഗു? കാടില പൂവു എങ്ങാണെ ഗേരിന്റെന്റു നീങ്ക മെലേനോക്കുമി. ആ പൂവു പണി ചെയിവനുമുകാണി കുപ്പെയചിന്തെ മാടുവനുമുകാണി. എന്റെങ്കി നാനു നിങ്കടൊന്റ പറേന്റെയ്: ബലാബരി ചൊത്തുമൊദേലിന്ത ചലോമോനു റാജാവുക്കുബരെ ഈ പൂവുന്റത്തെനെമു അണിഞ്ചൊരുങ്കുവ പറ്റുവകാണി. ഇന്റു കാണിന്റെനുമു നാളെ ഒലേഗുണ്ടുക്കിട്ടു ചുണ്ടെനുമാന പുല്ലുനെ ഈച്ചിര ഇങ്ങാണെ അണിയിച്ചൊരുക്കുവായിത്തെങ്കി ഇത്തിനിമാത്തിര നമ്പെലുകീന്റെരളേ, നിങ്കളെ അയിങ്കിന്തദിഗമായി ഈച്ചിര അണിയിച്ചൊരുക്കദിപ്പോ?
അയിനെകോണ്ടു എന്നെനെ തിന്റുകുടിച്ചിടുവെരി എന്റുമു എന്നെനെ ഇടുവെരി എന്റുമു നിനേച്ചൊണ്ടു നീങ്ക ചങ്കടപ്പടോണ്ടമി. ഈച്ചിരനിലി നമ്പെലുകാണദെ ബദുക്കിന്റ ഈ ലോഗത്തില നെരേയളാന്റു ഇങ്ങാണത്ത കാരിയമൊക്ക തടാക്കികോണ്ടു നടാക്കിന്റെയെയ്. എന്റെങ്കി ഈ കാരിയമൊക്ക നിങ്കക്കു ആവെച്ചകീന്റൊയ് എന്റു ചൊറുഗത്തികീന്റ നിങ്കട അപ്പെനാന ഈച്ചിരങ്കു ഗൊത്തു. ഈച്ചിരന്റ നാടിലെരളാവബേണ്ടിമു അദുന്റ മുല്ലെലക്കെ നേരുകാറെരളായി ബദുക്കുവബേണ്ടിമു മുല്ലെലായി അലാമി. എമ്മടെക്കു അയിന്റൊന്റ ഏനൊക്ക നിങ്കക്കു കിട്ടുവൊയ്.
അയിനെകോണ്ടു നാളെക്കുകീന്റ കാരിയത്തിനെപറ്റി നിനേച്ചൊണ്ടു ഇന്റു നീങ്ക ചങ്കടപ്പടോണ്ടമി. നാളെക്കുകീന്റ കാരിയത്തിനെ നിനേച്ചൊണ്ടു നാളെ ചങ്കടപട്ടെങ്കി മദി. ഓരോ ജിനാത്തെക്കുമു അയിന്റയിന്റ ബുദ്ദിമുട്ടുകീന്റൊനില്ല.”

Slušaj മത്തായി 6