Blackfoot Blackfoot people are found in Canada and the USA: the Blackfoot Confederacy is in southern Alberta and consists of Siksika, Blood, and Pikani (North Peigan); the South Peigan occupy the Blackfeet Indian Reservation in Montana, USA. The language is called Siksiká which means Blackfoot. Parts of the Bible were first published in Blackfoot in 1890.
Gospel of John The Blackfoot Gospel of John called Annaahk John Manistsitsinikatahpi Jesus Manistsipaitapiihpiai was translated by Wycliffe Bible Translators and Blackfoot people and published by the Canadian Bible Society in 1979. A slight revision was made in 2025-2026 to both the text and audio.

Translated by Wycliffe Bible Translators. Reviewed by Blackfoot people with help from Wycliffe/SIL and the Canadian Bible Society. Published by the Canadian Bible Society, 1979, 2026.

Annaahk John Manistsitsinikatahpi Jesus Manistsipaitapiihpiai

Óóki. Omííksi Pharisees sotámohtsimatsiiyaawa Jesus manistákaitapiiyihpi otáíssksinimáatsaaiksi, ómohtatoaʼpistotoaiksi aohkííyi. Itóʼtsitskakitapiiyaawa omíi John omííksiska otátoaʼpistotoaaiksi. (Óóki. Kíka. Omáa Jesus máátokamawaatoaʼpistotoyiiwaatsiksaiksi. Ománikapiimiksi ánnikskaoʼkiaawa áwaatoaʼpistotakiiyaawa.) Óóki. Kitsínaaiminnoona áíʼssksinoyiiwa omiiksi Pharisees manístohtsimáyihpiaiksi. Ki ánniayii itsístapaatooma omii Judea. Ákohtomaanistohtsspiwoowa Samaria mááhkohtsitapikiʼtawoohsi omii otáítapoohpi Galilee. Otsaomáíkiʼtawáatoohsi amii ksááhkoyi, Samaria, itsitóʼtoowa omii akáítapisskowa Sychar. Istakáítapisskowa Samaria. Itóʼtsatsstsiiwa omii ksááhkoi Jacob ótohkotahpi ohkóyi Joseph.
Óómayii atánakioksískomma. Niitsínihkatoohpa Jacob otoksískommiima. Kii ánnaoʼka omáa Jesus itóʼtssikópiiwa omii maksísskommi. Stámitssistsikaatooma otáwattoohsini. Áahkíkaihtatsikawa.
Óóki. Ánnayii itóʼtoowa omáa aakííwa. Istáákiiwa Samaria. Itóʼtotáakisiwa. Otsítanikka omíi Jesus, “Noohkóttakookit.” (Ki omáa Jesus otohpokóomokiksi ománikapiimiksi mátsitaʼpaitapiiwaiks. Ííkaisstsootóowahsoohpommaayaawa.)
Óóki. Omáa aakííwa áánistsiiwa Jesus “kitánistapssi Jew. Niistówa nitsítsitapiiyi annóo Samaria. Iiksípisataʼpiiwa kitaníkkssi kááhkottakoohsi.” Ómohtanikkayi, omííksi Jews ómohtáísstsimissitapiissaawa óóhkoʼsoaawaists amííksi istsitapííksi Samaria. Ánnihkayi iihtsipisátsiʼtakiwa omáa aakííwa.
Jesus itsipóʼtanistsiiwáyi “Kimátssksiniihpa Áʼpistotookiwa otsiksísstoohkotahpi matápiiksi. Ki kimátssksinookihpa nitámihpi niistówa kitáóhkóiʼnaakato aohkíí. Kítssksinííhtopiaawa kitákókamaanikki. Ki kááhkstaʼohtohkotohtopi áwaawakoyi aohkííyi iihtóʼtsipaitapiiyoʼpi.”
Omáa aakííwa itanííwa “Ki mátsitsstsííhpa kááhkohtottakihpi ki áámo maksísskommi iksípisttanisstsiiwa. Tsimáa kitákohtsitottákihpa áámohka áwaawakoyi aohkíí? Kitsístapaahkóaahsinnoona Jacob iihpsskíkkiwa áámo maksísskommi. Oostóyi áwattohtaottakaawa, ki niʼtóyi ohkóyiiksi, ki iihtáísimíípiiwa otápotskinaamiksi. Kiistówa kimátoʼtsitsksspipoyimawa Jacob.”
Jesus itanístsiiwayi. “Óóki, omáa matápiiwa ikkámohtsimisi amii aohkííyi ákaisksaiʼnakiwa. Omííksi nitáóhkotaiksi áwaawakoyi aohkii mátakattónoaiʼnakiwaiksi. Áámohka nitáóhkotahpiaawaihka aohkííyihka ákaissksohpipaaitapiiyaawa. Amííksi nítohkotaiksi amohka aohkííyihka ákohtsawónoaissiksipaitapiiyaawa.”
Omáa aakííwa otsípahtsootsistapiʼtoahsi Jesus iihtanístsiiwáyi “Ki noohkohkókkit áámohka kómohtaiʼpoyiihpihka aohkíí, ki ánnikayii tákohsitsawónoaiʼnaki. Tákohtsitsawónowayípioʼtotáakissi.”
Jesus itanístsiiwayi “Matóóʼtoosa kóóma ki támohpoksskoʼtoomisa.” Itanííyinai “Nimátomihpa.” Jesus Itanístsiiwayi, “Kitsíímanii kitsawáyomissi. Kitsííkayoomi nisitsíítapiiyi, ki annááhka kítohpokáópiimahka annohka kimátoomaatsiksi. Kitsíímanistoohpa áámohka.”
Omáa aakííwa itanííwa “Kitssksiníssi áámohka kómohtanistsiksimsstato kááhkatoaʼpitapiiʼssi. Óóki. Kitáksopoahtsiiʼsato. Niistónnaana tsítsitapiiyihpinnaani Samaria, nitsíístapaahkoaahsinnaaniksi itohkítatsímoihkaayaawa áámoi mistáki. Kii kiistóaawa kanistapsspoayi Jews kitawaaniihpoaawa áksstsinaiʼtatsimoihkaaoʼpa omii Jerusalem. Taáatapoohta íímaniiwa.”
Jesus itanístsiiwayi “Óóki aakííyi. Amáíʼtsit kitáánistohpi. Ákawáístaihtsiiwa kitsítaakatsímoihkaamahpi kínnoona mátaakohkoikiwa. Ánni ákaomatapanistaisiwa. Kiistówaawa kitsítsitapiiyihpoaayi Samaria kimátaotsistapimmawaawa omáa kitáwaatsímoihkaamawaawa Áʼpistotookiwa. Niistónnaana, tanistápsspinnaani Jews, nítssksinoannaana táwaatsímoihkaamannaana Áʼpistotookiwa. Takaa Áʼpistotookiwa ákohtohkoikiwa niistonnaani mááhksikamotsíípiaahsi matápiiyi. Ánnohka áístaihtsiwa mátakohkoikiwa itákatsímoihkaamahpi kinnoona. Niitáakatsímoihkaamahpi ánnihkaoʼka oʼtotámaʼpiwa. Ákohkottohtatsimoihkaaoʼpa Natowáttaka. Ákohkottómanistoʼpa kitátsímoihkannooni. Ámokska áokamoʼtawaatsímoihkaaiksi, ki ánniayii ákanistawaatsímoihkaayaawa ki ánnohka ákaomatapanistaisi Ánnoohka Aʼpistotookiwa áyiikaʼkimaawa mááhkitsstsissi ánni anistápawaatsimoihkaai mááhkatsimoihkaamiyissi. Nínna Áʼpistotookiwa anistápssiwa mottáka. Ánnihkayii komohtanisto amííksiska otáókamoʼtatsímoihkaamokiksi aksstsinaohtatsímoihkaayaawa Natowóttaki kii ákstamómaanistooma otátsimoihkaanoawaistsi.”
Óóki. Omáa aakííwa sotámaniiwa. “Ki nítssksiniihpa Áʼpistotookiwa anniisk ómohtakohkoikiihpiska áakoʼtóoyinai.” (Óóki omáa aakííwa áániiwa, Áʼpistotookiwa anniiska ómohtakohkoikiihpiska, ki áamo niʼtoi anistapanioʼsina “Christ.”) Itanííwa omáa aakííwa, “Ostóyi ákoʼtooyinai, kii aáóʼtóosayi ákohtsitohkanaissksinimáatsookiyinai kátaiʼssksiniihpistsi natoáʼpistsi.”
Jesus itanístsiiwayi “Annohka kitáyisstsiiwawa. Niisto ánnaoʼka annaahka kómohtaiʼpoyiihpahka.”
Óóki. Ki ánnimayii itsskóʼtapsstsisooyaawa Jesus ománikapiimiksii. Iiksípisatsimmiiyaawa anniiska Jesus otáíʼpoatahsi aakííyi. Ki ináóʼksawaniiyaawa, “tsá anistápiwa kómohtaiʼpoyihpa” ki “kimáʼkáísitsipssatahsi.”
Ki ánniayii omáa aakííwa sotámssksstsisóowa. Sotámitsskitsiiwa ómohtawáakisspi óóhki. Kii óómahkaoʼka stámsstsisóowa. Ááʼnistsiiwa omííksi matápiiksi, “Okíh. Ááhkonotoinoáwa annááhkayii nínaawa. Nitáánikka nítohkanawánisttsiihpists. Ááhkstaʼmiiwahtaoʼtsinayi Áʼpistotookiwa anniiska ómohtakohkoikiihpiska.”
Kii óómikskaoʼkiaawa itomátapsaʼkapóóyaawa. Áíʼtapóoyaawa Jesus. Óóki. Óómiksimaoʼkiawa Jesus ománikapiimiksi otáwaanikkaiksi, “Áíssksinimaatstohki, kitákoohkíítsoyi.” Kii itanístsiiwaiksi, “Nikááoyi. Kiistóaawa kimátssksiniihpoaawa naanístsoyihpi.” Omííksi ománikapiimiksi itawáánisttsiiyaawa, “Mátakohkottsitsstsiihpa mááhkikaoʼtsiisooki.” Sotámaniiwa omáa Jesus, “Nitáwaanisttotsiihpa otsitsííhtaanistsi annaahka nitóʼtsskoohkahka, annaahka Áʼpistotookiwahka, kii nitáakohkanaiksistaʼpoʼtsiihpa otáʼpoʼtakssini. Áámohka nitáwanisttotsiihpihka, ki ánnihkayii nimííksístsoahsini.
Kitsípahtsiiksimsstaahpoaawa mátakstsinaoʼniʼtsííhpa kitáʼpoʼtakssinnooni. Kanistsíksimsstaahpoaawa, ákstsinaʼyoohkimaaoʼpa ánni ainsímaayi mánsapipommaayi. Ákstsinaʼyookimaawa niisoyímmi naatóʼsi. Ákitsípohkimaawa. Kitáʼpoʼtakssinnooni ánni máátanistsííwaatsi. Issámmoka óómiiksika matápiiksika áístawaawahkaaiksika. Niʼtóyi niitssííyaawa ánni naapayííninssimaani ákaiʼtsiiyi. Iksíkkamo manistsíksistaʼpsspiaawa ksistónnoona ááhkitomoipiaahsaawa. Kitáʼpoʼtakssoaayi ákaomatsstsiiwa. Kimííksistsíkaohtaiponihtattspoaawa kitáʼpoʼtakssoaayi. Ánnohka kitákohkottsíkayaisiikoʼtomookihpoaawa matápiiksi. Kimáátsistotsspoaawa aiʼnssimaaiksi. Ánnoohka kanáípaitapiiyoʼpi ánnihkayii iihtáómoipohtoohpi naapayííninssimaanistsi. Kiistówaawa kitákohtssiikoʼtakihpoaawa matápiiyi mááhkaissksipaitapiʼssi. Ki ánnimayii amáa sapipómmaawa ákitohpokiiʼtamssiimiwa amííksi áípohkimaaiksi. Matápiiksi áíssksawaaniiyaawa, omáa tókskamma ákssapipommaawa kii omíi noohkíítssimi ákitamitomoipohtoomaistsi. Ki ánniayii niitsiiwa kitáʼpoʼtakssinnooni. Kiistóaawa kitsítapsskoohpoaawa kááhkitomoipihtakssoaawayi ánnima kikátaoʼmiitaʼpaoʼtakihpoaayi. Noohkíítssimmiksi ákaitaʼpoʼtakiiyaawa, kii kiistóaawa kitákohtohkoyiiʼpoaawa otáʼpoʼtakssoaawaistsi.” Ánniayii áánistsiiwa Jesus omííksi ománikapiimiksi.
Óóki. Kii omííksi istsitapííksi Samaria ánni akáítapisskoyii itáópiiksi, itakáítapiiyi iimáíʼtoyiiksi Jesus. Iihtomáíʼtakiiyaawa omíi aakííyi otánissayi “Nitánikka nítohkanawanisttsissiistsi.” Ki ánniayii omííksi istsitapííksi Samaria ánniksaoʼkiaawa sotámitoʼtooyaawa amíi Jesus. Áwaanistsiiyaawayi mááhkitaopissayi, ki omáa Jesus itanístsisamitopiiwa amóstsi nátoʼkiiksistsikoistsi. Kii mattsitákaitapiiyi omííksi i imáíʼtoyiiksi Jesus. Amíístsi otaníssistsi iihtsitómatapomaiʼtakiiyaawa. Itawáánistsiiyaawa omíiskaaakííyiska, “Ánnohkayii nítawattomaiʼtoannaana Jesus. Nitsííkaohtomaiʼtakihpinnaana kiistówa kitáániihpi. Ánnoohk nítawattoohtoannanna, kii nómohtssksiniihpinnaana ostóyi ánnahkaoʼka áaksikamotsiipiiwa kanáomiaʼnistsitapiiyi annóo ksááhkom.”
Óóki. Ánnika otáíʼksistaʼpissii amóstsi nátoʼkiiksistsikoists omáa Jesus itsíístapitapóowa omii otsítsitapiiyihpi, Galilee. Áísksawanistoohpa omáá áwaatoyiʼpoyiiwa mátsitomahkimmáwaatsi otsítsitapiiyihpi. Omáa Jesus noohkáttawaanistoomayi.
Óóki. Omííksi matápiiksi omiim Galilee, noohkáttsitapooyaawa Jerusalem anníístsiska ómahksisksistsikoistska. Ánnimayi itsítsinimiaawa Jesus otánisttsiihpistsi. Kii ánnihkayi iihtsitsíksimatsinoyiiyaawa Jesus otáíʼsskoʼtoohsayi. Ki ánnikayii máttsitoʼtóowa omiim Cana. Ánnihkayii istakáítapisskowa omiim Galilee. Ánnimaoʼka otsítsipiʼkanisttotsiihpii anniihk aohkiiyi, mááhkitanistapssayi mííniaohkii. Ki óómiayii omíi ománikapiimi isttsíípihkinínaawa, ki ohkóyi itsísttsiistominayi. Itáópiiyinayi omiima Capernaum. Ki Ostóyi itohtsímatsiiwa omíi Jesus ómohtoʼtsitapoohsai omii Judea omii Galilee. Kii itsitápoowayi. Itanístsi iwáyi ikkámohpoʼkiitapoosayi mááhkohkottotoahsayi ohkóyi. Imatáíʼniyinayi. Jesus sotámanistsiiwayi, “Kiistóaawa sayinímminoainiki pisátaistamatstohkssiistsi ki piʼkanísttsissiistsi, kimátaakomaiʼtookihpoaawa. Mátoohksokaʼpiiwa.” Omáa nínaawa sotámaniiwa “Kii, noohkohpóʼkiioota mááhkoohksayiʼnssi nókoʼsa.” Jesus itanístsiiwáyi, “Stámomatapoot! Áaksaakiipaitapiiwa kohkówa.” Óóki. Omáa matápiiwa itomáíʼtoyiiwa Jesus otáániihpiayi. Sotámomatapoowa.
Óóki. Amííhka otsáákioohtawaawahkaani ótsskaaaka anníkskayii otáʼpaoʼtomookiksi. Otsítanikkaiksi okáísokaʼpssáyi amíiska ohkóyiska. Ki ánniai itanístsiiwaiksi “Tsá anistsííwa itomátapsokaʼpssiwa?” Osótamanikkáíksi “Ki matónni otáíʼtoʼtóohsi tókskai. Ítssiksiksistoʼsimma.” Ki ánnimayii omáa nínaawa itsskótsistapiʼtsima ánni áíʼtoʼtoowa otsítaníyihpi omíi Jesus “Áksaakiipaitapiiwa kohkówa.” Ki ánniayii ostóyi ki ótohkanáohpokitáópiimokiiksi omii okóóaayi i ihtomáiʼtakiiyaawa.
Áámohkayii áʼohtsistoʼkaawa Jesus otáohtsskitóʼtoohsi omii Judea omiima Galilee ki ítsskonatsipiʼkanisttsiiwa.

Slušaj John 4