℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

這時，信徒个數目日日增加；該兜講 希臘 話个 猶太 人對講 希伯來 話个 猶太 人發怨言，講：在供給逐日个生活這件事頂高，佢等當中个寡婦受忽略。 十二使徒就召集全體信徒，對佢等講：「喊𠊎等放下傳上帝道理个工作，去料理生活个事務，係毋著个。 所以，各位兄弟，請對你等當中選出七個有名望、被聖靈充滿、又有智慧个人來，𠊎等好喊佢等管這兜事。 論到𠊎等，𠊎等愛專心祈禱㧯傳道。」
使徒个建議得到全體个贊成。所以大家選 司提反 ，一個信心堅定、被聖靈充滿个人；又選出 腓利 、 伯羅哥羅 、 尼迦挪 、 提門 、 巴米拿 ，㧯入過 猶太 教个 安提阿 人 尼哥拉 ， 請佢等企在使徒个面前；使徒祈禱以後，就㧯佢等行按手禮。
上帝个道理越傳越闊；在 耶路撒冷 个信徒，數目增加盡多，好多祭司也接受這個信仰。

司提反 滿有上帝个恩賜㧯能力，在民間行大奇事㧯神蹟。 總係有兜人反對佢；這兜人係所謂「自由人」會堂个會員，包含對 古利奈 㧯 亞歷山大 來个 猶太 人。佢等㧯其他對 基利家 並 亞細亞 來个 猶太 人，全部同 司提反 辯論。 聖靈賜智慧給 司提反 ，所以佢等無法度反駁佢所講个話。 佢等就教唆一兜人出來告佢講：「𠊎等識聽這個人講過譭謗 摩西 㧯褻瀆上帝个話！」 佢等用恁樣來煽動眾人、長老㧯經學教師，就來捉 司提反 ，帶佢到議會去。 佢等所教唆个假證人出來講：「這個人常常講話攻擊𠊎等个聖殿㧯 摩西 个法律。 𠊎等識聽佢講過：這個 拿撒勒 人耶穌愛拆掉聖殿，愛改變 摩西 傳給𠊎等个風俗習慣！」 所有在議會中坐等个人就注目看 司提反 ，看到佢个面貌像天使个面貌一樣。

Slušaj 使徒 6