Iranian Azeri Bible

پاسخا دیئلن فطئر بایرامی یاخینلاشیردی. باش کاهئنلر و دئن عالئملری عئسانی اؤلدورمک اوچون بئر یول آختاریردیلار، چونکی خالقدان قورخوردولار. او زامان شیطان ائسکاریوتلو آدلانان یهودانین اوره‌یئنه گئردی کی، او اون‌ائکئلردن بئری ائدی. و او گدئب باش کاهئنلر و معبدئن موحافئظلرئنئن ریئسی ائله دانیشدی کی، عئسانی اونلارا نجه تسلئم اتسئن. اونلار سوئندئلر و اونا پول ورمه‌یه راضی اولدولار؛ او دا سؤز وردی و بئر فورصت آختاریردی کی، جاماعات اولمادیغی بئر یرده عئسانی اونلارا تسلئم اتسئن.


فطئر گونو گلدی کی، اوندا پاسخا قوزوسونو قوربان اتمک واجئب ائدی. عئسا، پطروس و یوحنّانی گؤندَ‌رئب ددی: «گدئن، یمک اوچون بئزه پاسخا یمه‌یئنی حاضیرلایین.» اونلار اونا ددئلر: «هارادا ائسته‌یئرسن حاضیرلیق گؤرک؟» عئسا اونلارا ددی: «باخین، شهره گئردئیئنئز زامان سهنگله سو داشییان بئر کئشی سئزه راست گله‌جک. اونون دالینجا گدئن و او گئرن اِوه گئرئن. و او اِوئن صاحئبئنه دیئن: ”اوستاد سندن سوروشور: قوناق اوتاغی هارادادیر کی، شاگئردلرئمله بئر یرده پاسخا یمه‌یئنی ییئم؟“ او سئزه بالاخانادا دؤشَنمئش بؤیوک بئر اوتاق گؤرسده‌جک. اورادا حاضیرلیق گؤرون.»
شاگئردلر گدئب هر شیی عئسانین اونلارا ددئیی کئمی تاپدیلار و پاسخانی حاضیرلادیلار. واخت یتئشنده عئسا اون‌ائکی حوارئسی ائله بئر یرده سوفره‌یه اوتوردو.
و اونلارا ددی: «چوخ آرزولامیشدیم کی، عذاب چکمه‌دن قاباق بو پاسخا یمه‌یئنی سئزئنله بئرلئکده ییئم. چونکی سئزه دیئرم؛ تارینین پادشاهلیغیندا پاسخا تکمئلئنه یتئشمه‌یئنجه، من بئر داها اونو یمیه‌جه‌یم.»
سونرا بئر پئیالا گؤتوروب شوکور اتدی و ددی: «بونو گؤتورون و آرانیزدا بؤلوشدورون. چونکی سئزه دیئرم؛ تارینین پادشاهلیغی گلمه‌یئنجه، اوزومون محصولوندان ائچمیه‌جه‌یم.»
سونرا چؤره‌یی گؤتوردو و شوکور ادئب پارچالادی و اونلارا ورئب ددی: «بو منئم بدنئمدئر کی، سئزئن اوچون فدا اولور. منی خاطیرلاماق اوچون بونو یرئنه یتئرئن.»
اله‌جه ده، آخشام یمه‌یئندن سونرا، پئیالا‌نی گؤتوروب ددی: «بو پئیالا قانیمدا اولان جدئد عهددئر کی، سئزدن اؤتری تؤکولور. آمّا باخین، منه خیانت اده‌نئن اَلی منئم اَلئمله بئرلئکده سوفره‌ده‌دئر. ائنسان اوغلو دوغرودان دا قاباقجادان موعیّن اولموش یولدان گدئر. لاکئن وای او آدامین حالینا کی، ائنسان اوغلو اونون واسئطه‌سی‌ائله تسلئم اولونور.»
شاگئردلر بئربئرئندن سوروشماغا باشلادیلار کی، اونلاردان کئم بو ائشی گؤره بئلر.

اونلارین آراسیندا بئر موباحئثه دوشدو کی، اونلاردان کئم لاپ بؤیوک ساییلمالی‌دیر. لاکئن عئسا اونلارا ددی: «مئلّتلرئن پادشاهلاری اونلارین اوستونه حؤکم سورورلر و بو حؤکمدارلیق ادنلره نعمت صاحئبی دیئلئر. آمّا سئز گرک بله اولمایاسینیز. آرانیزدا لاپ بؤیوک اولان، لاپ کئچئک کئمی اولسون و ریئسلئک ادن، خئدمتکار کئمی اولسون. کئم داها بؤیوکدور: سوفره‌ده اوتوران، یوخسا خئدمت ادن؟ مگر سوفره‌ده اوتوران دیئل؟! لاکئن من سئزئن آرانیزدا خئدمتکار کئمی‌یَم. و سئز او آداملارسینیز کی، کچئرتدئیئم ائمتاحانلاردا منئمله دایاندینیز. نجه کی، آتام منه بئر پادشاهلیق ورئب، من ده سئزه بئر پادشاهلیق ورئرم. اِله کی، منئم پادشاهلیغیمدا سوفرَمده ییئب ائچه‌سئنئز و تختلرده اوتوروب، ائسرایئلئن اون‌ائکی قبئله‌سئنه حؤکم اِده‌سئنئز.
شمعون، شمعون! شیطان طلب اتمئشدی کی، بوغدا کئمی سئزی خَلبئرله‌سئن. آمّا من سنئن اوچون دوعا اِتمئشم کی، ائمانین آزالماسین؛ تکرار دؤندویون زامان، سن ده اؤز قارداشلارینا قووّت ور.»
شمعون عئسایا ددی: «یارب! سنئنله زئندانا دا، اؤلومه ده گتمه‌یه حاضیرام.»
لاکئن عئسا اونا ددی: «پطروس، سنه دیئرم کی، بو گون خوروز بانلامامیش، سن منی تانیدیغینی اوچ دفه ائنکار اده‌جکسن.»
و اونلارا ددی: «او زامان کی، سئزی کئسه‌سئز، تورباسیز، و آیاق قابیسیز گؤندَ‌ردئم، آیا بئر اَسکئیئنئز اولدو؟»
شاگئردلر جاواب وردئلر: «هچ بئر شیئمئز.»
او زامان عئسا اونلارا ددی: «آمّا ائندی کئسه‌سی اولان اونو گؤتورسون، توربا دا گؤتورسون. قیلینجی اولمایان دا پالتارینی ساتیب قیلینج آلسین. چونکی سئزه دیئرم: بو یازیلمیش اولان سؤز کی، دیئر ”او، گوناهکارلارلا بئر ساییلدی“، گَرَک منئم طرفئمدن ائجرا اولسون. چونکی منئم باره‌مده دیئلن سؤز عنقرئب یرئنه یتئشه‌جک.»
اونلار ددئلر: «یارب! باخ، بورادا ائکی قیلینج وار.»
عئسا دا اونلارا ددی: «کئفایتدئر.»


عئسا چیخیب عادتئنه گؤره زیتون داغینا گتدی و شاگئردلری ده اونون دالینجا گتدئلر. او یره چاتان زامان، عئسا اونلارا ددی: «دوعا ادئن کی، ائمتاحانا دوشمه‌یه‌سئنئز.» و اؤزو بئر داش آتیمی قدر اوزاقلاشدی و دئز چؤکوب دوعا اتدی: «ای آتا، اگر راضیسان، بو پئیالا‌نی مندن اوزاقلاشدیر، آمّا گئنه ده منئم ائسته‌دئیئم یوخ، سنئن ائسته‌دئیئن اولسون.» گؤیدن بئر ملک عئسایا گؤرونوب، اونا قووّت وردی. شئدّتلی ائضطئراب ائچئنده عئسا داها چوخ دوعا اتدی، اِله کی، تری قان دامجیلاری کئمی یره تؤکولوردو. دوعادان قالخیب شاگئردلرئن یانینا گلدی، و اونلاری قوصّه‌دن یاتمیش تاپدی. و اونلارا ددی: «نه اوچون یاتیرسینیز؟ قالخین و دوعا ادئن کی، ائمتاحانا دوشمه‌یه‌سئنئز.»


عئسا حله دانیشیردی کی، بئر جاماعات گلدی. اونلارین قاباغیندا اون‌ائکئلردن یهودا آدلانان بئری گلئردی. یهودا، عئسانی اؤپمک اوچون یاخینلاشدی. عئسا اونا ددی: «یهودا، ائنسان اوغلونو اؤپوشله تسلئم ادئرسن؟!»
عئسانین یانینداکی‌لار نه اولاجاغی آنلایان زامان اونا ددئلر: «یارب، قیلینجلا ووراق؟» و اونلاردان بئری باش کاهئنئن قولونو ووروب، صاغ قولاغینی کسدی.
لاکئن عئسا ددی: «بوراخین، بسدئر.» و قولون قولاغینا ال قویوب، اونو صاغالتدی. سونرا طرفئنه گلن باش کاهئنلره، معبدئن موحافئظلرئنئن ریئسئنه، و آغساقّاللارا ددی: «قولدور اوستونه چیخان کئمی قیلینجلار و دینکلرله اوستومه گلئبسئنئز؟ هر گون معبدده سئزئنله بئر یرده ائدئم، منه ال اوزاتمادینیز. لاکئن ائندی سئزئن واختینیزدیر، و ظولمتئن ائقتئدارینین زامانی‌دیر.»

عئسانی توتوب آپاردیلار و باش کاهئنئن اِوئنه گتئردئلر. پطروس اوزاقدان اونلارین دالینجا گدئردی. اونلار حیطئن اورتاسیندا اود یاندیریب یانیندا بئرلئکده اوتوران زامان، پطروس دا اونلارین آراسیندا اوتوردو. کنئزلردن بئری اونو اود ائشیغیندا اوتورموش گؤردو. دئقّتله اونا باخیب ددی: «بو آدام دا عئسا ائله ائدی.»
لاکئن پطروس ائنکار ادئب ددی: «من اونو تانیمیرام، آی آرواد.»
بئر آز سونرا اؤزگه بئری اونو گؤروب ددی: «سن ده اونلاردانسان.»
آمّا پطروس ددی: «دیئلم، آی کئشی.»
تقرئبن بئر ساعات کچمئشدی کی، اؤزگه بئرئسی تأکئدله ددی: «دوغرودان بو آدام دا اونونلا ائدی. چونکی او دا جلئل اهلئدئر.»
لاکئن پطروس ددی: «آی کئشی، نه ددئیئنی آنلامیرام.» و اله او آندا، او حله دانیشیردی کی، خوروز بانلادی.
رب دؤنوب پطروسا باخدی و پطروس ربّئن اونا ددئیی سؤزو خاطیرلادی کی، «بو گون خوروز بانلامامیش، سن اوچ دفه منی ائنکار اده‌جکسن.» و اورادان چیخیب آجی-آجی آغلادی.
عئسانی توتوب ساخلایان آداملار اونا رئشخند ادئب اونو دؤیوردولر. اونون گؤزلرئنی باغلادیلار و اوندان سوروشوردولار: «نبئلئک ات، ده گؤرک سنی کئم ووردو؟» و اونون ضئدّئنه بئر چوخ کوفرلر ده دانیشیردیلار.


سحر آچیلاندا خالقین آغساقّاللاری، باش کاهئنلر و دئن عالئملری بئر یره ییغیلیب، مجلئس قوردولار و عئسانی اونلارین حوضورونا آپاردیلار. اونلار ددئلر: «اگر مسئحسن، بئزه ده.»
عئسا جاواب وردی: «اگر سئزه دِسَم، ائنانمایاجاقسینیز. و اگر سئزدن سوروشام، منه جاواب ورمه‌یه‌جکسئنئز. لاکئن بوندان سونرا ائنسان اوغلو قادئر تارینین صاغیندا اوتوراجاق.»
او زامان اونلارین هامیسی ددئلر: «دمه‌لی، سن تارینین اوغلوسان؟»
عئسا اونلارا جاواب وردی: «بلی، منم.»
و اونلار ددئلر: «داها شهادته نه احتئیاجیمیز وار؟ چونکی اؤزوموز اونون آغزیندان اشئتدئک.»

Slušaj لوقا 22