Iranian Azeri Bible

رب نوحا ددی: «سن بوتون عایئلَنله بئرلئکده گمئیه گئر، چونکی بو بشر نسلی ائچئنده آنجاق سنی نظرئمده صالح گؤردوم. هر پاک حیوانین اِرکَک و دئشئسئندن یدّی جوت، هر نجئس حیوانین اِرکَک و دئشئسئندن بئر جوت گؤتور. هم ده گؤیده‌کی هر قوشون اِرکَک و دئشئسئندن یدّی جوت گؤتور کی، نسلی بوتون یر اوزوندن کَسئلمه‌سئن. چونکی یدّی گون سونرا یِر اوزونه قیرخ گون-قیرخ گجه یاغیش یاغدیراجاغام و یاراتدیغیم بوتون جانلی‌لاری یر اوزوندن محو اده‌جیم.» رب نوحا نجه امر اتمئشدی، او دا هر شیی اِله‌جه یرئنه یتئردی.
یِر اوزونه سل گلنده نوحون آلتی یوز یاشی وار ائدی. نوح، اوغوللاری، آروادی، و گلئنلری بئرلئکده گمئیه مئندئلر کی، سل سولاریندان آمانلیقدا قالسینلار. پاک و نجئس حیوانلارین، قوشلارین، بوتون یرده سوروننلرئن اِرکَک و دئشئسی، جوت-جوت نوحون یانینا گمئیه گلدئلر؛ نجه کی، تاری نوحا امر اتمئشدی.
یدّی گون سونرا یِر اوزونه سل گلدی. همئن گون-نوحون عؤمرونون آلتی یوزونجو ائلئنده، ائکئنجی آیین اون یدّئنجی گونو درئن درئنلئکده اولان بوتون سو قایناقلاری پارتلادی و گؤیون پنجره‌لری آچیلدی. یِر اوزونه قیرخ گون-قیرخ گجه یاغیش یاغدی.
اِله همئن گون نوح، اوغوللاری سام، خام، یافِت، آروادی، و اوچ گلئنی گمئیه مئندئلر. اونلارلا بئر هر جور وحشی حیوان، هر جور مال-حیوان، هر جور یرده سورونن، هر جور گؤیده اوچان جانلی و هر جور قوش، اؤز جئنسلرئنه گؤره گمئیه گئردی: حیات نَفَسی اولان بوتون جانلی‌لاردان جوت-جوت، نوحون یانینا گمئیه گلدی. تارینین نوحا امر اتدئیی کئمی بوتون جانلی‌لاردان اِرکَک و دئشی حیوانلار گمئیه گئردئلر. اونلارین دالینجا رب قاپینی اؤرتدو.
یِر اوزونده قیرخ گون سل گلدی و سو چوخالیب گمئنی یردن یوخاری قالدیردی. سولار چوخ یوخاری قالخیب یِر اوزونو آلدیلار و گمی سویون اوزونده اوزمَیه باشلادی. سولار یِر اوزونو اِله توتدولار کی، گؤیون آلتیندا اولان بوتون اوجا داغلار سولارین آلتینا گتدی. سولار داغلارین باشیندان اون بش قول-‌آچ قالخدیلار و اونلاری اؤرتدولر. یِر اوزونده حرکت ادن جانلی‌لارین هامیسی؛ قوشلار، مال-حیوانلار، وحشی حیوانلار، یرده سوروننلر و بوتون ائنسانلار محو اولدو. قورودا یاشایان حیات نَفَسی بورنوندا اولان جانلی وارلیقلارین هامیسی اؤلدو. رب یِر اوزونده اولان بوتون جانلی‌لاری محو اتدی: ائنسالاردان توتموش، حیوانلارا، سوروننلره و گؤیده‌کی قوشلارا قدر، هر شی یِر اوزونده محو اولدو. آنجاق نوح و اونونلا بئر، گمئده اولانلار صاغ قالدیلار. سولار یِر اوزونو یوز اَلّی گون بورودولر.

Slušaj یارادیلیش 7