Ligji i Përtërirë 31:1-8
Ligji i Përtërirë 31:1-8 Bibla Shqip "Së bashku" 2020 (me DK) (AL1)
Pastaj Moisiu i tha mbarë Izraelit këto fjalë: «Tashmë jam njëqind e njëzet vjeç e nuk udhëtoj dot. Edhe ZOTI më tha se nuk do ta kaloj Jordanin. Por, vetë ZOTI, Perëndia yt, do të kalojë para jush. Ai vetë do t'i shkatërrojë këto kombe para jush, që t'i pushtoni. Do t'ju prijë Jozuehu, sikurse tha ZOTI. ZOTI do të sillet me këto kombe siç u soll me Sihonin e Ogun, mbretër të amoritëve, e me vendet e tyre. Ai i zhbiu ata. Kur ZOTI t'jua dorëzojë, veproni me ta siç ju urdhërova. Tregohuni trima e të guximshëm, mos kini frikë e mos u dridhni para tyre, sepse vetë ZOTI, Perëndia juaj, do të ecë me ju. Ai nuk do t'ju lërë e as nuk do t'ju braktisë». Atëherë Moisiu thirri Jozuehun e i tha në sy të gjithë Izraelit: «Bëhu trim e guximtar, sepse ti do ta çosh këtë popull në tokën, për të cilën ZOTI iu betua etërve të tyre se do t'ua jepte. Ti do t'ua japësh si trashëgimi. ZOTI vetë do të ecë me ty e do të jetë me ty. Ai nuk do të të lërë e as nuk do të të braktisë, prandaj mos ki frikë e mos u tremb».
Ligji i Përtërirë 31:1-8 Bibla Shqip 1994 (ALBB)
Moisiu shkoi dhe u drejtoi edhe këto fjalë tërë Izraelit, dhe u tha banorëve të tij: "Unë jam sot njëqind e njëzet vjeç, nuk mundem më të hyj dhe të dal; përveç kësaj Zoti më ka thënë: "Ti nuk do ta kalosh Jordanin". Zoti, Perëndia yt, do të kalojë ai vetë para teje, dhe do të shkatërrojë para teje këto kombe, dhe ti do t'i shpronësosh; vetë Jozueu do të kalojë para teje, siç e ka thënë Zoti. Dhe Zoti do t'u bëjë atyre atë që u bëri Sihonit dhe Ogut, mbretit të amorenjve, dhe vendit të tyre, kur i shkatërroi. Zoti do t'i kalojë në pushtetin tuaj dhe ju do t'i trajtoni sipas të gjitha urdhrave që ju kam dhënë. Tregohuni të fortë dhe trima, mos kini frikë, mos u trembni prej tyre, sepse Zoti, Perëndia yt, është ai vetë që ecën me ty; ai nuk do të të lërë dhe nuk ka për të të braktisur". Pastaj Moisiu thirri Jozueun dhe i tha në prani të të gjithë Izraelit: "Qofsh i fortë dhe trim, sepse ti do të hysh bashkë me këtë popull në vendin që Zoti u betua t'u japë etërve të tyre, dhe ti do t'ua japësh atyre si trashëgimi Përveç kësaj Zoti vetë ecën para teje; ai do të jetë me ty; nuk do të të lërë dhe s'ka për të të braktisur; mos u tremb dhe mos u tmerro".