1 i Mbretërve 15:1-8
1 i Mbretërve 15:1-8 Bibla Shqip "Së bashku" 2020 (me DK) (AL1)
Në vitin e tetëmbëdhjetë të mbretërimit të Jeroboamit, birit të Nebatit, Abijami u bë mbret i Judës dhe mbretëroi në Jerusalem për tre vjet. Nëna e tij ishte e bija e Absalomit dhe quhej Maka. Abijami bëri të gjitha mëkatet që kishte bërë edhe i ati para tij. Zemra e tij nuk ishte e përkushtuar plotësisht ndaj ZOTIT, Perëndisë së tij, siç kishte qenë zemra e Davidit, paraardhësit të tij. E megjithatë, për hir të Davidit, ZOTI, Perëndia i tij, i dha një pasardhës për të sunduar në Jerusalem, që familja e Davidit të mos shuhej si pishtari e që Jerusalemi të mos binte. Davidi kishte bërë çka ishte e drejtë në sytë e ZOTIT dhe gjatë gjithë jetës nuk i ishte shmangur asnjërit prej urdhërimeve të tij, përveç rastit të Urjahut, hititit. Mes Rehoboamit dhe Jeroboamit pati luftë gjatë gjithë jetës. Bëmat e tjera të Abijamit e gjithçka bëri janë të shkruara në librin e Kronikave të Mbretërve të Judës. Edhe mes Abijamit dhe Jeroboamit pati luftë. Abijami u preh me paraardhësit e tij dhe e varrosën në qytetin e Davidit. Pas tij mbretëroi i biri, Asai.
1 i Mbretërve 15:1-8 Bibla Shqip 1994 (ALBB)
Në vitin e tetëmbëdhjetë të mbretërisë së Jeroboamit, birit të Nebatit, Abijami filloi të mbretërojë mbi Judën. Ai mbretëroi tre vjet në Jeruzalem. E ëma quhej Maakah dhe ishte bijë e Abishalomit. Ai kreu mëkatet që i ati kishte bërë para tij dhe zemra e tij nuk iu shenjtërua plotësisht Zotit, Perëndisë së tij, ashtu si zemra e Davidit, atit të tij. Megjithatë për dashurinë që ushqente për Davidin, Zoti, Perëndia i tij, i la një llambë në Jeruzalem, dhe e ngriti të birin mbas tij dhe e bëri të qëndrueshëm Jeruzalemin, sepse Davidi kishte bërë atë që është e drejtë në sytë e Zotit dhe nuk ishte larguar nga ajo që Zoti i kishte urdhëruar të bënte gjatë gjithë kohës së jetës së tij, me përjashtim të rastit të Uriahut, hiteut. Midis Roboamit dhe Jeroboamit pati luftë sa qe gjallë Roboami. Pjesa tjetër e bëmave të Abijamit dhe të gjitha ato që ai bëri a nuk janë të shkruara vallë në librin e Kronikave të mbretërve të Judës? Pati luftë midis Abijamit dhe Jeroboamit. Pastaj Abijamin e zuri gjumi bashkë me etërit e tij dhe e varrosën në qytetin e Davidit. Në vend të tij mbretëroi i biri, Asa.