Acakki 12
12
Lubaŋa olwogo Abram
1 #
Tic 7.2-3; Ibru 11.8 Rwot owaco bot Abram ni, “A woko ki i lobo tuwu, ki i kakawu, ki i paco pa woru, ci icit i lobo ma abinyutti. 2Abimiyi idoko rok madit, abimiyi gum bene, abimiyo nyiŋi bedo dit, pien ibibedo lakelgum. 3#Gal 3.8Abimiyo gum i kom jo ma leggi gum, abiceno ŋat mo ma biceni; dok piri en aye kaka ducu ma wi lobo bilimo iye gumgi.”
4Kit meno Abram ocako wot, macalo Rwot ocike; ki Lot bene owoto kacel kwede. Abram onoŋo doŋ tye ki mwaka me ditte pyerabiro wiye abic i kare ma en a kwede ki i Karan. 5Abram ocito ki dakone Carai, ki Lot latin pa ominne, ki lwak limgi ducu ma gucoko kacel, ki lwak jo ducu ma gucokke botgi ki i Karan; gutiŋo wot me cito i lobo Kanaan, Ka doŋ gutyeko o i lobo Kanaan, 6Abram obaro dye lobo obino i kabedo ma i Cekem, nio wa i te yat kworo me More. I kare meno onoŋo jo Kanaan aye gitye i lobo meno. 7#Tic 7.5; Gal 3.16Ci Rwot dok onen bot Abram kun wacce ni, “Abimiyo lobo man bot likwayi.” Ocano keno tyer kunnu pi Rwot ma onen bote-ni, 8Ka dok odak woko ki kunnu, okobo i te got ma tye yo tuŋ wokceŋ me Betel, oguro iye kemane, kun weko Betel yo tuŋ potoceŋ, ki Ai yo tuŋ wokceŋ; dok ocano keno tyer pi Rwot kunnu, ci olwoŋo iye nyiŋ Rwot. 9Abram dok okobo, omedde ki wotte yo tuŋ Negeb#12.9 Negeb en lobo ma yo tuŋ acuc me lobo Kanaan,.
Abram i lobo Ejipt
10Kec onoŋo opoto i lobo, omiyo Abram owoto piny i Ejipt, wek koŋ ebed kunnu, pien kec onoŋo doŋ lyet twatwal i lobo. 11I kare ma cok donyo i Ejipt, owaco bot dakone Carai ni, “Aŋeyo ni in i dako ma nen mwonya; 12ka Luejipt gibineni, ci gibiwacci, ‘Man dakone’; ci gibineka woko, ento gibiweki makwo. 13#Acak 20.2; 26.7Wac ni, in lamera, ci gibibedo kweda maber piri, miyo abikwo piri.” 14Ka Abram otyeko donyo i Ejipt, ci Luejipt guneno dako meno mwonya matek twatwal, 15Ka ludito ma i kal pa Parao#12.15 Parao en aya nyiŋ ma gilwoŋo ki kabaka me Ejipt. guneno, ci guboro pire bote, gutero dako wa i ot pa Parao. 16Ci omiyo Parao obedo maber ki Abram pi Carai: gikolle lim, romi, ki twoni; twoni kana, lwak opii ki aŋeca-gu, megi kana-gu, ki lwak kinaga-gu,
17Ento Rwot ocwalo cog two gemo mogo madoŋo i kom Parao ki jo ma i ode, pi Carai dako pa Abram. 18Omiyo Parao olwoŋo Abram bote, ci openye ni, “Itima kuman piŋo? Piŋo nene pe ititta atir ni en dakoni? 19Piŋo dok iwaco ni, ‘En lamera,’ omiya akwanyo, odoko dakona? Nen doŋ, dakoni ennu. Kwany icit kwede giri.” 20Parao ociko jone pire, ci gulwoke iyo, kacel ki dakone, ki lwak jami ducu ma yam tye bote.
Aktualisht i përzgjedhur:
Acakki 12: Aco85
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Acholi Bible © Bible Society of Uganda, 1985.