Torah 3
3
Manušor omainnota
1 Mabud Allaye banaiyede zobinor hár fahari zandar zanuwar okkolottuwaro beši salak aššilde oilde haf, toi hite mayafuwaware hodde, "Allaye ki hãsa hoiye, 'Tũwara baganor hono gasor gula no háiyo'?"
2Mayafuwawaye hafware hodde, "Ãra baganor gas okkol beggunor gula hái fari; 3kintu baganor maze ze gas ase, hibar gular babute Allaye hoiye, 'Tũwara hibattu no háiyo, hin no suiyo, hen gorile moriba.'"
4Toi hafe mayafuwaware hodde, "No, tũwara no moriba, 5kiyollahoile Allaye zane ze, ze din tũwara hibattu háiba, hedin tũwarar suk kuli zaiboide edde neki bodi aholor giyan fai tũwara Allar ḍoil oizaibagoi."
6Toi mayafuwawaye dekedde, he gasor gulawa háite bala oibo, ar hiba suke saite o šundor, hin bade giyan faibolla hoi oile o hon sa. Toi hibaye ho uggwa gula fari loi háiye, ar fũwati aššilde hibar zamai, hibare o diye, hibaye o háiye. 7Henot hitara dunizonor suk kuli giyeoi, ar hitara ulongode hiyan buzi faijje; toi hitara ḍũir fata gãtiyore ga guijje.
8Bade hazinnar ṭanḍa hawar ṭaimot Mabude bagonot gurafira goredde abaz hitara fuinne, toi manušwa edde hibar bou Mabud Allar sarmottu baganor gas okkolor butore lukai taikke. 9Kintu Mabud Allaye manušware ḍaki hodde, "Tui hoṛe?"
10Manušwaye hodde, "Ãi baganot tũwar abas fuinni, edde ãi ḍoraiyi; kiyollahoile ãi ulongo, ar ãi lukaiyi."
11Toi Mabud Allaye hodde, "Tui ze ulongo iyan tore hone hoiye? Ze gasottu no háibolla mana goijjilam, tui ki hibattu gula háiyos?"
12Henot manušwaye hodde, "Ze mayafuware tũi eṛe ãr fũwati diyo, hibaye ãre gasottu diye, ar ãi háiyi."
13Toi Mabud Allaye he mayafuware hodde, "Tui in ki goijjos?"
Mayafuwawaye hodde, "Hafe ãre dúha diye, edde ãi háiyi."
14Bade Mabud Allaye hafore hodde, "Tui ei ham goijjosde hetolla,
"Hár górowa zanuwar, edde fahari zandar zanuwar okkolor butore
bodduwa tore!
feṭ loi tor sola fira,
ar háibi tui dúil
tor zibonor hár din okkolot.
15Ãi tui edde mayafuwar maze,
tor bonšo edde hibar bongšor maze,
dušmonai golai diyum;
hite tor mata fiši dibo,
ar tui hitar formurit kuṭ maribi."
16Hibaye mayafuwaware hodde,
"Ãi tui hamilor ṭaimot mosibot baraidiyum.
tui beši zontrona loi fuwa biyaibi.
Ar tor zamair uzu tottu issa oibo
Ar hite tor uwore šašon solaibo."
17Ar hibaye manušware hodde, "Tui tor bouwor hota doijjos, edde ze gasor babute ãi tore hokum dilam, 'Tui hibattu no háis,' hibattu gula háiyos,
"Tor zoriya zobinore bodduwa;
beši duk hošto gori, hiyanottu há foribo.
tor zibonor hár din okkolot.
18ar hiyane keṛa edde agasa okkol tolla fuṛaibo,
ar maṛot zin baribo hin tui háibi.
19mukottu gam zóraiyore,
haiddo háibi
meṛit firi nu aiyos foijjonto,
tore to hentu lowa oiye,
Kiyollahoile tui oilde dúil,
ar dúilot tui firizaibi."
20Bade manušwaye hibar bouwor nam diye Hawa, kiyollahoile hiba hár zinda okkolor ma oiye.
21 Mabud Allaye Adom edde hibar bouwolla samrar hor banaiye edde hitarare findai diye. 22Tarfore Mabud Allaye hodde, "So, neki bodi aholor giyan fai manuš ãrar ekzonor ḍoil oiye, bala edde horaf zaner. Ebar hite zene hat barai diyore zibon gasor gula háiyore azibon basi tai no fare." 23Toi Mabud Allaye manušware zentu lowa oil, Eden baganottu he meṛit saš goribolla niyolai diye. 24Endilla gori hibaye manušware hentu niyolai diye, edde zibon gasor heṛe zaibar fõtot fahara dibolla Eden baganor fuk ḍakottu Karubi firista okkolore raikke, ar he fũwati heṛe ekkan zolonto toluwar raikke ziyan azibon guri guri taikke.
Aktualisht i përzgjedhur:
Torah 3: rhgB
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Wycliffe Norway