Luke 1
1
1လေးစားလောဒ့်ခေါမ် သော်ဖိလု၊ ကေးမီးဆုမ်သပ့်ကာလ် ဖုလော်ရှင်နား စိုင်းဟိလ့်ခေါမ်လှီ့ 2အစိပ်ဟိုဝေါလ်ကထု မျက်မြင်သက်သေ ရိုး ထောလ်တိ လှီ့လား အမှုတော်ဆောင်လှီ့နား အာမ်ဟောဟိလ့်ခေါမ်ဘော် ခေါင်လှီ့နား အာမ်ဖော်ပြဟိလ့်။ 3အမ်(င်) ဘော်ခန်းနောလ် ဖြစ်ပျက်ဟိလ့်တိလှီ့ကိမ်ကိမ် ကေးမီးနား ဂရုတစိုက် စုံစမ်းထေ့နား 4နာ(င်)မီး ဆောင်ငယ်ဟိလ့် လောဒ့်ခေါမ် နီအကြောင်းရာလှီ့ အမှန် နောက်ခေါမ် စုတ်(င်)ဟိုင်ရိုး နာ(င်)မီးစငေါလ် နီဘော် အစီစဉ်တကျ ရောခ့်လောဒ့်အောလ်ထောလ်။ သွီးဓေါလ်သန့်စင်မင်္ဂလာပက်တိဆလော်ယောဟန် မွေးဖွားဟိုင်အကြောင်း ကြိုတင်ငယ်နား ဟောခေါမ် 5ယုဒဘီ ဆောင်ဖလောင်ဟေရုဒ် အုပ်စိုးချိန်ငေါလ် cဇာခရိ မိန်နိုးတိ ဂျူးပုရောဟိတ်ခေါမ် အဘိယတိရို ဟောင်ခေါမ် ပုရောဟိတ် အဖွဲ့ဝင် ပွလ်ဟှတ်တောလ် အထောလ်။ အပီဟာ ဧလိရှဗက်ခါ အာရုန်တိရို ဟောင်ခေါမ် ပုရောဟိတ်မျိုးရိုးဝေါလ်ကိ ဆင်းသက်လူးတိရို အထောလ်။ 6အင်(မ်)ဟွဒ်ပွလ်နှိနောက်ခေါမ် ဖုလော်ရှင်ပညတ်တော်လှီ့ အမှား မယ်ယဟနောလ် အဟီလိုက်နာခန်းနောလ် ဖုလော်ရှင်မော်ဟုအောလ် ဖြောင့်မတ်တိအောလ် အဟီထောလ်။ 7ဧလိရှဗက်နားနောက်ခေါမ် အစိုးမယ် ထေ့ယခန်းနောလ် စိုးနောင်(င်)တောဝေကော်ဝေါလ် ပွလ်နှိဓေါလ် အဟီစာန်လူးဟိလ့်။ 8နှိုပ်ဟှတ်တောလ် ပုရောဟိတ်ဇာခရိခေါမ် eဗိမာန် တော်ဒုလ့်ကာလ် နှိုပ်တိုင်တာဝန်ဆောင်ရွက်ဟိုဝေါလ်။ 9ပုရောဟိတ်လှီ့ ထုံးစံဘော်တိုင်ငေါလ် ဗိမာန်တော်ဝေါလ် အမွှေးနံ့သာလှီ့ ပူဇော်ဟိုင်ရိုး မဲနှိုက်ထေ့နား အာမ်ရွေးချယ်ဟိုဝေါလ် အင်(မ်) အရွေးချယ်ခံလောဒ့်။ 10အင်(မ်)ခန်းနောလ် ဇာခရိနား အမွှေးနံ့သာလှီ့ ထွန်းညှိအပူဇော်ချိန်ငေါလ် ခေါင်လှီ့ ခြံအပြင်ငေါလ် ဆုအာမ်တောင်း။ 11အင်(မ်)ပါလ်နောလ် ဖုလော်ရှင် နား စေလွှတ်လူးခေါမ် fနောတ်ဒေဝါနား အမွှေးနံ့သာလှီ့ တော်နောက် ပလ္လင်ခလမ်းလာမ်းမာလ် ဇာခရိအော် ကိုယ်ထင်ဓေါင်ဗာန် အတုလ်ခေါမ်။ 12အမှူးဟိုဝေါလ် အင်(မ်)နား အကိအယ်တောင်လှလ်။ 13အင်(မ်)ဝေါလ် နောတ်ဒေဝါနား အင်(မ်)နောလ် “ကိကော့အား၊ ဇာခရိ။ နာ(င်)ဆု တောင်း(င်)ခေါမ် ဖုလော်ရှင်နား အယှောက်ပါလ်။ နာ(င်)ပီးဟာ ဧလိရှဗက်နား နာ(င်)တွက် စိုးပုတောစောပွလ်ဟှတ် အဇောနောက်ကိုက်။ အင်(မ်)ဒိပ်စိုးမိန် ယောဟန်တိရို ပက်လောဒ့်အိုက်။ 14အမ်(င်)ဒိပ်စိုး အမယ်လူးဟိုဝေါလ် နာ(င်)မီး နမ်ပျော်လောဒ့်ဘော် ခေါင်လှီ့ခါ အာမ် ဝမ်းမြောက်လောဒ့်အိုက်။ 15ယောဟန်ခေါမ် ဖုလော်ရှင်မော်ဝေါလ် ကြီးကျယ် မြင့်မြတ်တိအောလ် အထောလ်နိုက်။ အင်(မ်)နား အီဟိုဝေါလ်ခါ ဝိုင်လား အူလောက်လှီ့ အူးဟိုင်ဆီးယော်။ အင်(မ်) အမယ်လူးဟာမ်းယ ဟိုဝေါလ် ကထု ဉာဏ်အလင်းတော်ခေါမ် အင်(မ်)ဓေါလ် ဟှတောလ် အမယ်ရိုက်။ 16အမ်(င်)နား အစ္စရေးခေါင်ယှီလှီ့ နောင်တသံဝေဂ လောဒ့်ထေ့နား အင်(မ်)လှီ့ အရှင်ငေါလ်ထောလ်တိ ဖုလော်ရှင်လာမ်းမာလ် အမောင်(င်) ဆောက် ဘွာလ်ဝိုက်။ 17ယောဟန်ခေါမ် ပရောဖက် ဧလိယဘော်ဝေါလ် အခွင့်အာဏာလား တန်ခိုးလှီ့မယ်ထေ့နား အရှင် မော်ဈာတ်တိအောလ် အထောလ်နိုက်။ အင်(မ်)နား နူးပေါလ်လှီ့လား စိုးနောင်(င်)လှီ့ ညီညွတ် ဘွာလ်ထေ့နား နာခံမှုမယ်ယတိလှီ့ရိုခါ အသွန်သင်ပက်တိုက်။ အင်(မ်)ခန်း နောလ် ခေါင်လှီ့ခ ဖုလော်ရှင် အကြွလူးဟိုဝေါလ် အဆင်သင့်အာမ်ထောလ် နိုက်" တိရိုအဟောင်။ 18အင်(မ်)ပါလ်နောလ် ဇာခရိနားခါ အမ်(င်)နောတ် ဒေဝါဝေါလ် “နီဘောင်အဖြစ်အပျက်လှီ့ ထောလ်လူးဝိုက်နောက်ခေါမ် ကေးမီးနား ဟီဘော်ကေစုတ်(င်)ခွတ်ကိုက်။ ကေးဟီ ပုတောလားပီးဟာ ပွလ်နှိဓေါလ် ကေဟီစိုင်(င်)ဟိလ့်” တိရိုအဟောင်ဘွာလ်။ 19အမ်(င်) ဟိုဝေါလ် နောတ်ဒေဝါနား အင်(မ်)နောလ် “ကေးခေါမ် ဖုလော်ရှင် မောလ်ဝေါလ် ခစားလောဒ့်တိ ဂါဗြေလယောင်။ နာ(င်)ငေါလ် နီဆီးတင်းပွန် ဟောင်ဟိုင်ရိုး ဖုလော်ရှင်နား အစေလွှတ်လူးယောင်။ 20အင်(မ်)ခန်းနောလ် ကေးဟောင်ခေါမ်လှီ့ နာယုံယခန်းနောလ် နီအဖြစ်ပျက်လှီ့ ထောလ်လူး ဟာမ်းယဝေ့ နာ(င်) ခေခွတ်ကောဝေါလ် နာမောင်ငိုက်။ ကေး ခေခေါ အချိန်တန်ဟိုဝေါလ်စေး အထောလ်လူးဝိုက်" တိရို အဟောင်။ 21ဇာခရိလား နောတ်ဒေဝါ ဗိမာန်တော်ဒုလ့်ကာလ် အဟီခေဝေဟိုဝေါလ် ခြံအပြင်ငေါလ် ခေါင်ထုပရိတ်သတ်လှီ့နား ဇာခရိခေါမ် အမ်စောင့်။ အမ်(င်)လှီ့နား ဇာခရိ ဗိမာန်တော်ဒုလ့်ကာလ် ဟိဘော်ဟိုင်ရိုး အဓီနောက်ခေါမ် အမ်စိတ်ဝင်စား။ 22ဇာခရိ အပြင်ငေါလ် ထွက်လူးဘွာလ် ဟိုဝေါလ် အခေခွတ်တိယခန်းနောလ် ဗိမာန်တော်ဒုလ့်ကာလ် အမယ်ဟိုဝေါလ် ဇာခရိနား နိမိတ်လက္ခဏာ ပွလ်ဟှတ် အမုဟိလ့် တိရို ခေါင်လှီ့နား အာမ်ယှောက်စုတ်(င်)။ အင်(မ်) အမောင်ခန်းနောလ် ကွတ်လှီ့ ခူလှီ့အောလ်ယောင် ဆက်ကယ်နား အမူအရာ အဓေါင်။ 23အင်(မ်)ပါလ်နောလ် ဇာခရိနား ဗိမာန်တော်ဝေါလ် ဆောင်ရွက် လောဒ်ဟိုင် အမှုတော်လှီ့ ဆောင်ရွက်ပါလ်နောလ် အမာလ် အဈာတ်ဘွာလ်။ 24အချိန်ဓီပါလ်နောလ် ဇာခရိပီးဟာ ဧလိရှဗက်နား အဟြွလ်အလောဒ့် အယ်လူးခန်းနောလ် အင်(မ်)မုတော အဟြွလ်ခိုးပိုဟိုးဓီဝှေ့ ခေါင်မော်ဝေါလ် ဈာတ်ရော့ခ်ယော်။ 25အင်(မ်)မုတောနား "အရှင်နား ကေးရို စိုးပွလ်ဟှတ် အပက်ဟိလ့်ပါလ်၊ အင်(မ်)အလိုတော်ဝေါလ် ခေါင်လှီ့အထင်သေးခေါမ် အခိတ်ဟိလ်ပါလ်" တိရို အပုန်းဟို့နား
အပုန်းဟို့အဟောင်ဝေး။ 26ဧလိရှဗက် ဟြွလ်ခေါဆော့မယ်လူးဟိုဝေါလ် ဖုလော်ရှင်နား နောတ်ဒေဝါ ဂါဗြေလ ဂါလိလဲဘီရိုးကိ နာဇရက်လုအောလ် အစေလွှတ် ထေ့နား 27အင်(မ်)ပါလ်နောလ် ဖုလော်ရှင်နတ်ဒေဝါဂါဗြေလခေါမ် ဆောင်ဖလောင်ဒါဝိဒ် မိသားစုအင်(မ်)ကိ ဆင်းသက်လူးတိ ယောသပ်တောလ်စေ့စပ်အယ်တိ မာရိတိရိုဟောင်ခေါမ် အပျိုစင်မုတောစောစငေါလ် ဈာတ်ထေ့နားခေါမ်းမယ်ယေ။ 28နောတ်ဒေဝါနား မာရိအောလ် “ဖုလော်ရှင် ခေါမ် နာ(င်)ဓေါလ်ဟှတောလ် မယ်ထေ့နား အင်(မ်) မဟာကရုဏာခေါမ် နာ(င်)အပေါ်ဝေါလ် အဓေါင်ဟိလ့်ပါလ်”တိရို အဟောင်။ 29အင်(မ်) ဘော်နားခါ မာရိနား နောတ်ဒေဝါ ဟောင်ခေါမ်ခေခေါလှီ့ အယှောက် ဟိုဝေါလ် လုန်ရှုပ်ထေ့နား ဟအီဟောင်ဟိုင်အလီနောက်ခေါမ် အစဉ်း စားယေ။ 30အင်(မ်)ပါလ်နောလ် နောတ်ဒေဝါနား မာရိအောလ် “ကိကော့အာ၊ မာရိ။ ဖုလော်ရှင်နား နာ(င်)ငေါလ် မျက်နှာသာ အပက်ပါလ်။ 31နာ(င်)နား ဟြွလ်မယ်ထေ့နား စိုးပုတောစော နာစောနောက်ကိုက်။ အင်(မ်)အမိန်ခေါမ် ယေရှု တိရို မိန်နာဆူလ်လောဒ့်အိုက်။ 32အင်(မ်)နီခေါမ် ကြီးမြတ်တိ ပွလ်ဟှတ်တောလ်ထောလ် လူးထေ့နား အမြင့်မြတ်ဆုံးတိ ဖုလော်ရှင်နား အစိုးတိရို အာမ်ဟောင်ခေါမ် ခံလောဒ့်အိုက်။ ဖုလော်ရှင်နား အင်(မ်)နောလ် အဆွားဆောင်ဖလောင်ဒါဝိဒ်ဘော်ဝေါလ် အင်(မ်)ခေါင်ယှီလှီ့ အုပ်ချုပ်ခွတ်ခေါမ် အခွင့်အပက်တိုက်။ 33အင်(မ်)နား အစ္စရေးခေါင်ယှီလှီ့ ဆောင်အဖြစ် ထာဝရအုပ်စိုးထေ့နား အင်(မ်)နန်းဆက်ခေါမ် အီဟိုဝေါလ်ခါ ပျက်သုန်းဟိုင်ဆီးယော်" တိရို အဟောင်။ 34အင်(မ်)ဟိုဝေါလ် မာရိနား "ကေးနောက်ခေါမ် အပျိုစင် ပွလ်ဟှတ်တောလ် ကေထောလ်ခန်းနောလ် နီလှီ့ ဟဘော် အထောလ်ခွတ်ကိုက်" တိရို နောတ်ဒေဝါဝေါလ် အဟောင်။ 35နောတ်ဒေဝါနားခါ “ဉာဏ်အလင်းတော် နာ(င်)စငေါလ် ဆင်းသက်လူး ထေ့နား ဖုလော်ရှင်တန်ခိုးခေါမ် နာ(င်)စငေါလ် အလွှမ်းမိုးလူးဝိုက်။ အင်(မ်)ခန်းနောလ် နာ(င်) စိုးခါ ကြီးကျယ်မြင့်မြတ်တိ ဖုလောရှင်နားအစိုး တိရို အာမ်ဟောင်ခေါမ် ခံလောဒ့်အိုက်။ 36နာ(င်) ယှီမို့ ဧလိရှဗက်ခေါမ် စာန်လူးထေ့နား ဒိပ်စိုး ဇောနိုးခွတ်ယော်တိရို ခေါင်လှီ့နား အာမ်ခိန်နားခါ တုအောလ် အဟွလ်မယ်ခေါမ် ခေါ့ဆော့အမယ်ပါလ်။ 37ဖုလော်ရှင်နား ကိမ်ကိမ် အစိုင်းခွတ်” တိရို အဟောင်ဘွာလ်။ 38အင်(မ်) ဟိုဝေါလ် မာရိနား “ကေးနောက်ခေါမ် ဖုလော်ရှင် အစေခံပွာလ်ဟှတ်ဓေါလ် ကထောလ်။ ကေးရိုး နာ(င်)ဟောင်ခေါမ် ခေခေါတိုင်( ဖုလော်ရှင် အလီမယ်ဘော် ထောလ်ဆက်” တိရို အဟောင်။ အင်(မ်)ပါလ်နောလ် နောတ်ဒေဝါခါ မာရိ စငေါလ်ကိ အဈာတ်ဘွာလ်။ 39အင်(မ်)ပါလ်နောလ် မာရိခေါမ် အသင့်ပြင်ထေ့နား ဇာခရိမယ်နောက် ယုဒလုအောလ်ကိ တောင်ပေါ်ဒေသအောလ် အရင်ငေါလ်အဈာတ်။ 40အင်(မ်) ဓိလ်နောလ် အခိုက်ယဟိုဝေါလ် ဇာခရိ မာလ် ဝင်(င်)ထေ့နား ဇာခရိပီးဟာ ဧလိရှဗက် အဘစ်တယ်ယေ။ 41မာရိနား အဘစ်တယ်ခေါမ် ဧလိရှဗက်နား အယှောက်လား အဟြွလ်တုံ ဒုလ့်ကာလ်ကိ ဒိပ်စောနောက်ခေါမ် အစိုက်(က်) ကာလ်ဗာန် ဧလိရှဗက်ခါ ဉာဏ်အလင်းတော်ဓေါလ် ဝမ်းမြောက်ရွှင်လန်း ထေ့နား ဖုလော်ရှင်ဂုဏ်တော် အချီးမွမ်း။ 42ဧလိရှဗက် နား မာရိအောလ် “ဖုလော်ရှင်နား အစွာမုတောလှီ့ ကိမ်ကိမ် ထက်ကာလ် နာ(င်)ငေါလ် ပိုဝေနား မင်္ဂလာမယ်ဆောက်ထေ့နား နာ(င်)နား နစောနောက်ဟိုင် ဒိပ်စိုးခါ မင်္ဂလာအမယ်။ 43အရှင်နား အနူးစေး ကေးစငေါလ် ဟိဘော်ဟိုင်ရိုး အကြွလူးလောဒ့်။ ဟိဘောင် ကြောင်းငေါလ် နီဘောင် အခွင့်ထူး ကေးနား ကေခံစားလောဒ့်။ 44နာ(င်) ဘစ်တယ်ခေါမ် ကေယှောက်လောဒ့်နား ကေး ဟြွလ်တုံ ဒုလ့်ကာလ်ကိ ဒိပ်စောခေါမ် ပျော်ရွှင်ဗာန် အစကာလ်လူး။ 45“ဖုလော်ရှင် စငေါလ်ကိဆတင်းခေခေါ အမှန်တကယ်အထောလ်လူးဝိုက်နောက်ခေါမ် နာ(င်)နား နာယုံခန်းနောလ် ကောင်းချီးမင်္ဂလာ အပက်ယောင်” တိရိုအဟောင်။ 46အင်(မ်)ပါလ်နောလ် မာရိနားခါ "ကေးနား ဖုလော်ရှင်ဂုဏ်ကျေးဇူး ကေချီးမွမ်း။ 47ကေး လုန်ဝိညာဉ်ခေါမ် ကယ်တင်ရှင် ဖုလော်စငေါလ် အပျော်ရွှင်လောဒ့်။ 48ကေးနောက်ခေါမ် ကိုယ်တော်တွက် နိမ့်ကျတိ အစေခံရိုး ထောလ်နားခါ နီချိန်ငေါလ် ကထုစအယ်နား မျိုးဆက် တိုင်းငေါလ်ကိ ခေါင်လှီ့ကိမ်ကိမ်နား ကေးခေါမ် ကောင်းကြီးမင်္ဂလာ ပက်ခေါမ် ခံလောဒ့်တိ တိရို အာမ်ဟောင်ဝိုက်။ 49တန်ခိုးလန်တိဖုလော်ရှင် ခေါမ် ကေးအပေါ်ဝေါလ် မြင့်မြတ်တိလှီ့ သက်ရောက်ဟိလ့်ပါလ်။ 50ဖုလော်ရှင်နား ခေတ်အဆက်ဆက်ရိုး အပုန်းဟိုး ကိုးကွယ်တိ ခေါင်တိုင် ငေါလ် မဟာဂရုဏာမေတ္တာတော် ထင်ရှားဟနောလ် အဓေါင် နယ်ဆိုလ်။ ။ 51ဖုလော်ရှင်နား မာန်မာနထောင်လွှားတိ ခေါင်လှီ့ အတန်ခိုး တော်ဝေါလ် အဖယ်ရှားရိုက်။ 52ဖုလော်ရှင်နား အာဏာဝေါလ် အုပ်စိုးတိ ဆောင်ဖလောင်လှီ့ အင်(မ်)လှီ့ ပလ္လင်ခုံငေါလ်ကိ ဆွဲချထေ့နား နိမ့်ချအယ်နား မယ်တိ ခေါင်လှီ့ အချီးမြောက်ကိုက်။ 53အင်(မ်)နား ဆာလောင်တိလှီ့ အောလ် ပွန်တိအရာလှီ့ ပက်ထေ့နား ကြွယ်ဝတိလှီ့အောလ် အီခါ ပက်ကော အတိဘွာလ်ဝိုက်။ 54အင်(မ်)နား အပုန်းဟို့မဟာဂရုဏာ အမှတ်လောဒ့် အနေရိုး အမှုတော်ဆောင်ရွက်တိ အစ္စရေးခေါင်ယှီလှီ့ ကယ်တင် အစောင့်ရှောက်ပါလ်။ 55“ဖုလော်ရှင်နား ကေး ဆွားကိုင်လှီ့အောလ် ထောလ်တိ iအာဗြဟံယှီယောင်လှီ့အောလ် တောဒ့်ခေါမ် ကတိဘော် အစောင့်လျှောက်ဆိုလ်” တိရို ဖုလော်ရှင် ဂုဏ်တော် အချီးမွမ်း။ 56မာရိခေါမ် ဧလိရှဗက်ဓေါလ် ဟှတောလ် ခိုးထုမ်ဘောင် ဟှတောလ် မယ်ဟိလ့်ထေ့နား အမယ် အဈာတ်ဘွာလ်။ 57အင်(မ်)ပါလ်နောလ် ဧလိရှဗက် အညှာယေဟိုင် အချိန်ခိုက် လူးဟိုဝေါလ် စိုးပုတောစိုး အဇောနောက်။ 58ဧလိရှဗက် စင်ပွီလှီ့လား ယှီယောင်လှီ့နား အင်(မ်)မုတောအပေါ်ဝေါလ် ဖုလော်ရှင် မေတ္တာတရား ကြီးမားခေါမ် အာမ်မုယှောက်ခန်းနောလ် အင်(မ်)ဓေါလ် ဟှတောလ် အာမ်ပျော်လောဒ့်။ 59ဒိပ်စော အမယ်ပါလ်နောလ် အဆာတ်နှိုပ်ပါလ် အရေးဖျားလှီးမင်္ဂလာဘော် စိုင်း(င်)လောဒ့်ခေါမ် ဝတ္တရားလှီ့ စိုင်း(င်)ဟိုင် ခေါင်လှီ့ အာမ်ခိုက်လူးဟိုဝေါလ် အင်(မ်)လှီ့နား ဒိပ်စောအမိန်ခေါမ် အပေါလ် ဇာခရိ မိန်ငေါလ် ဆူလ်ဟိုင် အာမ်လီ။ 60အင်(မ်)ဘော်နားခါ အနူးနား “ အင်(မ်)မိန်စေး ယောဟန်တိရို ဆူလ်လောဒ့်အိုက်” တိရိုအဟောင်။ 61ခေါင်လှီ့နားခါ အင်(မ်)မုတောဝေါလ် "နာ(င်) ယှီယောင်ဒုလ့်ကာလ် နီဘောင်မိန် မယ်ယော်" တိရို အာမ်ဟောင်။ 62အင်(မ်)ခန်းနောလ် အင်(မ်)လှီ့နား ဒိပ်စောနား အပေါလ် ဇာခရိအောလ် ဟိဘောင်မိန် ပက်ဟိုင်နာလီ တိရို ခြေဟန်လက်ဟန်ရိုး အာမ်ဟိ့။ 63ဇာခရိနား ဆောင်းဖုန်း ချပ်ဟှတ် တောင်ထေ့နား အစိုးမိန်ခေါမ် ယောဟန် တိရို အရော့။ အင်(မ်)ဟိုဝေါလ် မှူးတိခေါင်လှီ့နား အာမ်စါစ်နောက်လှလ်။ 64အင်(မ်) ပါလ်နောလ် ချက်ချင်းကုံး ဇာခရိ ခေဘွာလ်ခွတ်ထေ့နား ဖုလော်ရှင် ဂုဏ်တော် အချီးမွမ်းလှလ်။ 65အိမ်(မ်)စဉ်းပွီလှီ့လား ခီပွီလှီ့နား အင်(မ်) ဖြစ်ပျက် အာမ်မှူးဟိုဝေါလ် အကိအယ်တောင်လှလ်။ ခေါင်လှီ့ကိမ်ကိမ်နား အင်(မ်)ဆီးတင် ယုဒဘီရိုးကိ ကုန်းဟြှလ်ဒေသ ဓိလ်တိုင်း(င်)ငေါလ် အာမ် ဟောင်ရောခ့်လှာယ်။ 66အင်(မ်)ဆီးတင် ရောလောဒ့်တိလှီ့ ခေါင်တိုင်နား "အင်(မ်)ဒိပ်စိုး အလန်လူးနားစေ့ ဟိဘော်ခေါင်ငေါလ် အထော်လူးဝိုက်" တိရို စိတ်ဝင်တစား အာမ်ဟောင်။ အမှန်ကုံ့ငေါလ်ခါ ဖုလော်ရှင်တန်ခိုး တော်ခါ အင်(မ်)ဒိပ်စိုးဓေါလ် ဟှဓေါလ်အမယ်ဟာ့။ 67အင်(မ်)ပါလ်နောလ် ဉာဏ်အလင်းတော်ခေါမ် ဇာခရိအပေါ် ဝေါလ် အသက်ရောက်ထေ့နား အင်(မ်)နား 68"အစ္စရေးခေါင်ယှီ လှီ့ကိမ်ကိမ် အရှင်သခင်ငေါလ်ထောလ်တိ ဖုလော်ရှင် ဂုဏ်ကျေးဇူး ကေချီးမွမ်း။ အင်(မ်)နား အပုန်းဟို့ ခေါင်ယှီလှီ့ကိမ်ကိမ် ကယ်တင်ဟိုင် အကြွလူးပါလ်။ 69ဖုလော်ရှင်နား အပုန်းဟို့ အစေခံဒါဝိဒ်ရိုးကိ ဆင်းသက်လူးတိ တန်ခိုးအာဏာလန်တိ ကယ်တင်ရှင် ကေးမီးကိမ်ကိမ် တွက်ကာလ် မာနယ်ထေ့နားအပက်ပါလ်။ 70ဟမာလ် ဖုလော်ရှင်နား သန့်ရှင်းမြင့်မြတ်တိ ပုရောဖက်လှီ့အောလ် အမိန့်ဟိလ့်ခေါမ်ဘော် 71နီတန်ခိုးလန်တိ ကယ်တင်ရှင်နား ကေးမီးရန်သူလှီ့စငေါလ်ကိ ကယ်တင်ဟိုင်အပြင် မုတောင်တိ ခေါင်လှီ့ ဘေးအန္တာရာယ်ရိုးကိခါ အကယ်တင်အိုက်။ 72ဖုလော်ရှင်နား ကေးမီးခေါင်လှီ့ကိမ်ကိမ် မဟာဂရုဏာတော်ဓေါလ် ခစ်ထေ့နား ကေးမီးဆွာကိုင်လှီ့အောလ် ကတိအပက်ဟိလ့်ခေါမ်အတည်ရိုက်။ 73ဖုလော်ရှင်နား ကေးမီးဆွားကိုင်(င်)ရိုးထောလ်တိ အာဗြေဟံဓေါလ် စိုင်းဟိလ့်ခေါမ်ကတိဘော်တိုင်း 74ကေးမီးရိုး ဘေးအန္တရာယ်ပြုတိ ရန်သူလှီ့ကွတ်တောလ်ကိ ကယ်ထေ့နား ကေးမီးခါ ဆောက်မယ်ဝေ့ ကိအယ်ခေါမ်လှီ့ကင်းထေ့နား ဖုလော်ရှင်အမှုတော် ဆောင်ရွက်ခွတ်ဟနောလ် အစိုင်းရိုက်။ 75အင်(မ်)ဘော်ခန်းနောလ် ကေးမီးခါ အင်(မ်)မော်ဝေါလ် ဖြောင့်မတ် စင်ကြယ်ထေ့နား ကျန်တိဘဝအသက်တာ ကုန်ဆုံးလောဒ့်အိုက်" တိရို အထောလ်။ 76အင်(မ်)ပါလ်နောလ် ဇာခရိနား အစိုးဝေါလ် "ကေးစိုးဝြား၊ နာ(င်) အမြင့်မြတ်ဆုံးတိ ဖုလော်ရှင်နား ပရောဖက် တိရို ဘစ်တယ်ထေ့နား ဖုလော်ရှင်မော်ဝေါလ်ဈာတ်တိ ဖုလော်ရှင်လာမ်း ကြိုတင်ထေ့နား စိုင်းပက်တိအောလ်ခါ နာထောလ်နိုက်။ 77နေဟြွလ်နောလ်ကိ ခုနီ ထွန်းလင်းအ တောက်ပဘော် ဖုလော်ရှင် ဂရုဏာခေါမ် ကေးမီးစငေါလ် ထွန်းလင်းထေ့နား 78နေဟြှလ်နောလ်ကိ ခူနီခေါမ် ထွန်းလင်းအတောက်ပဘော် ဖုလော်ရှင်ဂရုဏာခေါမ် ကေးမီးစငေါလ် ထွန်းလင်းထေ့နား 79နီအဝြာနား ဘာလ့်ခေါမ်ဓေါလ် ရင်ဆိုင် လောဒ်တလှီ့ အပြစ် တောလ်ကိ လွတ်ကင်းထေ့နား အေးချမ်းတိ ဘဝအောလ် လာမ်းဓေါင်ဗာန် အထောက်ပက်တိုက်" တိရို အဟောင်။ 80တုအောလ် ယောဟန်ခေါမ် လန်လူးထေ့နား ဉာဏ်အလင်းတော်ခေါမ် အင်(မ်)ဓေါလ်ဟှတောလ် မယ်ဟိလ့်ခန်းနောလ် ဖုလော်ရှင်နား အင်(မ်) နောလ် ဟှတောလ် အမယ်။ဖုလော်ရှင်နား အင်(မ်)နောလ် အစ္စရေး လှီ့ခေါင်ယှီလှီ့ မော်ဝေါလ် အမှုတော် စအယ်နား ဆောင်ရွက်ဆောက်ခေါမ် နှိုပ် ခိုက်ဟာမ်းယဝေ့ တောကန္တာရဒုလ့်ကာလ် အကျင်လည်ဟိလ့်။
Aktualisht i përzgjedhur:
Luke 1: ctpv-rv
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
This translation of the Chin-Songlai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.