Mātiu Ko te talateú
Ko te talateú
Ko te Kōsipelí 'i tono Tohi 'e Mātiú ko te ongoongolelei ia kiā Sīsū ko te Fakama'uli ne'e tala'ofá, 'ia te Toko Taha 'ā ē 'e fakahoko mai ai 'ia te 'ū tala'ofa ne'e fai 'e te 'Atuá ki Tono kakaí 'i te Fuakava Matu'á. Kā neongo iá, ne kailoa ko te ongoongolelei pē ia ki te kakai Siú, 'a ē ne'e 'alo'i mai ai 'ia Sīsuú, pea ne'e tupu ake 'i aí, kā ko te ongoongolelei foki ia ki māmani kotoa pē.
Ko Mātiu kua maau 'aupito tono fokotu'utu'ú. 'Oku kamata pē ia mei te 'alo'i mai 'o Sīsuú, pea hoko ai ki Tono papitaisó mo Tono 'ahi'ahi'í, pea ki Tana malanga, mo faiako, mo fakama'uli mahaki 'i Kālelí. 'I te 'osi ange ko iá 'oku fakamatala'i 'e Mātiu ki te fononga 'a Sīsū mei Kāleli ki Selusalema, mo te 'ū me'a ne'e hoko 'i te uike faka'osi 'o te nofo 'a Sīsū 'i māmaní, 'o faka'osi ki Tono kalusefaí mo Tana toetu'ú.
'Oku fakahaa'i mai 'e te ongoongolelei nei ko Sīsuú ko te Faiako fungani, 'a ia 'oku Ina fakamatala'i 'ia te 'uhinga totonu 'o te Lao 'a te 'Atuá, pea ako'i foki 'e Ia ki te kakaí 'ia te 'ulungāanga 'o te Pule'anga 'o te 'Atuá. Ko Tana 'ū akonakí 'oku tānaki ia 'o fakamā'opo'opo ki te konga 'e nima:
1. Ko te Malanga 'i te Ma'ungá, 'ā ē 'oku kau ki te 'ū 'ulungāanga, fatongia, tāpuaki, mo te kaha'u 'o te kakai 'o te Pule'anga 'o Hēvaní (vahe 5-7);
2. Ko te 'ū fakahinohino ki Tana kau ako 'e toko hongofulu mā uá fekau'aki mo te notou ngāué (vahe 10);
3. Ko te 'ū talanoa fakatātā fekau'aki mo te Pule'anga 'o Hēvaní (vahe 13);
4. Ko te fakahinohino fekau'aki mo te anga 'o te kau ako 'a Kalaisí (vahe 18);
5. Ko te 'ū fakahinohino fekau'aki mo te ngata'anga 'o te kuonga lolotongá pea mo te foki mai 'a Kalaisí (vahe 24-25).
Ko te kakano 'o te tohí
Ko te tohi hohoko mo te 'alo'i mai 'o Sīsū Kalaisí (1:1—2:23)
Ko te ngāue 'a Sione Papitaisó (3:1-12)
Ko tono papitaiso mo te 'ahi'ahi'i 'o Sīsuú (3:13—4:11)
Ko te ngāue 'a Sīsū 'i Kālelí (4:12—18:35)
Ko te fou 'ia Sīsū mei Kāleli ki Selusalemá (19:1—20:34)
Ko te uike faka'osi 'o te nofo 'a Sīsū 'i māmaní 'i Selusalema (21:1—27:66)
Ko te toetu'u mo te hāhā holo 'a Sīsuú (28:1-20)
Aktualisht i përzgjedhur:
Mātiu Ko te talateú: Niua
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023 Misiona Tonga 'a e Uikilifi (Wycliffe Tonga Missions)