Luk 8
8
Abaka ba ajɔ na Jisɔs
1Sa akan na mbe bifa Jisɔs ajɛn amo ka ebe baka, bɛ ɛfangfang na bɛ ɛsɛbsɛb, arag nyɛbɛ ɔka oton Ɔsɔwɔ. Asɔgba ɛyɛ wobo na aba ajɔ fa nanɛ, 2na abaka bantingi ba Jisɔs atab mbɔ ka abibi atughu na aya: Meri ya abengɛ si Magdalin yi Jisɔs ayighɛ abibi atughu asimma; 3Jɔana nka Kusa, nnɛ a isi ka ɛbɔngɔ abɔanju a Ɛrɔd Susana na ebe anɛ baga. Abaka ba ajɔ akɔ akpugha mbɔ ago mbe bi Jisɔs na asɔgba ɛyɛ asɛbɛ.
Ɛbɛɛ Mbɔmmɛ Ɛgbɛ
(Mat 13:1-9; Mak 4:1-9)
4Anɛ aru ka baka baka amayɛ Jisɔs tɛtɛ anɛ atuu, atuu ɛbɛɛ ji: 5“Ofo bibi mbɔmmɛ ɛgbɛ amo sa ama wuru amog a mbe, sa awuru, yantingi agbɔ ka mba anɛ anyɛggɛ ka ajaa, ososok ɛsang ɛnɛ. 6Yamɔng agbɔ akomo ka atan, nsɛrɛ si ɛtam narama, eko akpab akpɔ atebsi arifɔ alab abenge mbɔ. 7Yantingi agbɔ anam ka ajɔjɔngɔ, ajɔjɔngɔ aram na mbe bi ama akpa na atɛ. 8Ka yamɔng agbɔ ka nnɔbɔ a nsisi. Aram ama kab ebe amog, ka mkpɛ atanarɔn aga ya abɔmmɔ.”
Ngara yi Jisɔs arag wɔɔ atɔ mbɔ gbogbo “Nnɛ ya akpe atɔng ayog.”
9Asɔgba ɛyɛ abɔmmɛ ɛbɛɛ jifa erunang. 10Jisɔs atɔ mbɔ, “Ɔsɔwɔ amiribi mbe abibi atɔngɔ war sa ɛjɛn afe anɛ a ɛbɛ, ka anɛ baga ntuu ɛbɛɛ, ‘ɛjɔghafa aragha yɛ, na wɔ si arama yɛ;
Aragha yogho ka mbɔ erimiribi.’
11“Ɛbɛɛ ji erusi: Amog ayim akɛ ano Ɔsɔwɔ. 12Amog ya agbɔ ka mba ayim akɛ anɛ ba ayog nono Ɔsɔwɔ, ka nnam amayu ano ya ka nte mbɔ, sɔng aki tama afɛnɛ afɔ nanagha. 13Amog ya agbɔ ka atan ayim akɛ anɛ ba ayog nono Ɔsɔwɔ na ɛyɛbɛ nete ka aruk arifɔ. Atama ano Ɔsɔwɔ ka nkokoma ngara, si nagara ɛba agbɔ. 14Amog ya agbɔ ka ajɔjɔngɔ ayim akɛ anɛ ba ayog ano Ɔsɔwɔ, ka si nekpen emogho isi efegheayɔ eying, afang na bɔnɔb ene mbɔ ariyimi nkoronkoro. 15Ka amog ya agbɔ ka nnɔbɔ a nsisi ayim akɛ anɛ ba ayog ano Ɔsɔwɔ akag ka nete mbɔ ka nnɔbɔ na ɛdɛdɛghɛ, ka ayimi nkoronkoro ka ano Ɔsɔwɔ. Ajɔ ka nekpen nɛkɔrɔ Ɔsɔwɔ.
Ɔmɔnɔ Ka Ɛkono Ɔmɔnɔ
(Mak 4:21-25)
16“Nnɛ wawi arem ya amɔnɔ ɔmɔnɔ akag ka nsɛ sɛ abar ka nɔyɔ ntefeghe. Erising, akono ka ɛkono ɔmɔnɔ, sɔng kpere nnɛ ya aba ayɛ ɛfɔngɔ. 17Ejo abibi jaji erem ji Ɔsɔwɔ arijɔ aribi, jaji erem ji abonobono ji anɛ arighi gbɛrɛ. 18Ba gbɛrɛ sɛ eyongo atɔng nnɔbɔnnɔbɔ. Nnɛ ya akpekpe akiɛ agana; ka nnɛ ya ari fɔ, araggasi ji akana sa akpe ataba mbɔ taba.”
Nnyɛ na Abɔannyɛ Jisɔs
(Mat 12:46-50; Mak 3:31-35)
19Munu nnyɛ Jisɔs na abɔannyɛ aba amayiɛ, ka arima akperɛ ateb ɛbɔngɔ. 20Nnɛ wiwi ama tɔɛ, “Nnaja na abɔannaja ayim ga ka ifi asɛb si ayia.”
21Jisɔs akpɛ, “Nnajaa na abɔannajaa are anɛ ba ayog nono Ɔsɔwɔ afɛnɛ anene.”
Jisɔs Ane Ebɔk ɛnaa
(Mat 8:23-27; Mak 4:35-41)
22Ofo bibi Jisɔs atɔ asɔgba ɛyɛ, “Nɔngɔ emo ka njam ɛtɔ yiga.” Ka anam ka ɔgbaa amogho. 23Sa amogho, Jisɔs anan. Nkora nsɛmmɛ aba, alab ajam nanama ka ɔgbaa, ɔbɔn ene mbɔ si ɔgbaa ɛkpɛsɛmɛ.
24Ka amo ama nyimɛ, atɔɛ, “Ntaa, Ntaa, ɛkpatan:” Atam ayimi agbanga nsɛmmɛ na ebɔk, ebɔk ɛsɛnɛ, mfo anaa. 25“Ntama ɛyɛrɛ ma?” Abɔmmɔ asɔgba ɛyɛ.
Ɔbɔn ene mbɔ biji ɛkpɔ mbɔ abɔmmɔ nimbɔ, “Bagha nagana nnɛ yɔna.? Atɔ nsɛmmɛ na alab ayoghɛ.”
Jisɔs Ayighi nnɛ abibi Atughu
(Mat 8:28-34; Mak 5:1-20)
26Jisɔs na asɔgba ɛyɛ afii amasi ka ɛjɛbɛ ja abeng si Garasa, ka njam ɛtɔ yakɔn na Galili. 27Ngara yi Jisɔs aru ka egbok nnɛ ya akpe abibi atughu ya aru ka ɛjɛbɛ ji. Ka munnu yɔ ɛnɛmɛ arijɔ yɔbɔ, ajɛn ejughu mba arab, si ka nju arama jɔ, ajɔ ka anam. 28Ngara ya ayɛ Jisɔs anan gbogbo agbɔɛ ka ata, abengɛ ka nyara ntɔng, “Jisɔs, Mmɔ a Ɔsɔwɔ bi Agagaga, ɔsɛbjɛ ka biji ɛba? Mmagɔrɔ, kim kɛ niyiri!” 29Ka Jisɔs amɔtɔghɔ tɔ abibi atughu sa aru ka biji munnu yɔ. Ebe ngara ebibi etughu ɛboɛ, ka afanggasi agbangɛ mgbɔkɔbɔ ka abɔ na ata anɔngɔ yababɛ, akɛbbɛ agbɔkɔbɔ abibi atughu akamɛ akag ka awɛn.
30Jisɔs abɔmmɛ, “Wɔ abenga nang?” “Etutu,” akpɛ, atebsi ebe abibi atughu amɛ nam. 31Ka abibi atughu ajɔ agɔrɔ Jisɔs si aki mbɔ kama akag ka nsɛbɛ a nebe ya arifɔ nkannisi.
32Ɛwɛmɛ si ebe akok ajɔ anɛ mbenɛnɛghɛ akpere ata nkonkon. Abibi atughu agɔrɔ Jisɔs si anɔngɔ mbɔ anam akok, ka anɔngɔ mbɔ anam. 33Ngara yi abibi atughu aru asighi munnu yɔ, amanam akok, ka akok abɛ asɛnɛ anam ka ɛtɔ atan.
34Anɛ ba ababa akok ayɛ ji ɛwɛmɛ abɛ ama tɔrɔ atɔ anɛ ka ɛjɛbɛ Garasa na akpeghe ya re akpere Garasa, 35ka anɛ aru amayɛ ji ɛmɛwɛmɛ. Ngara ya aba ka mfo a Jisɔs, ayɛ munnu ya abibi atughu amɛ ru ka biji, ajig alagha Jisɔs, alebe si nnɛ a mber; ka ɔbɔn ene mbɔ. 36Anɛ ba ayɛ ji ɛwɛmɛ atɔ anɛ baga si munnu ya akpe abibi atughu amɔnɔb. 37Anɛ wɔɔ ba aru ka Garasa atɔ Jisɔs si atamasighi mbɔ, ateb ɔbɔn. Ka Jisɔs anam ka ɔgbaa amo.
38Ka munnu ya ayighɛ abibi atughu ka biji agɔrɔ sa atɔngɛ, ka Jisɔs atɛn, atɔɛ, 39“Sɔng kru ka etek ɔmɔtɔ anɛ ji Ɔsɔwɔ ame ne akia.” Ka munnu yɔ akru ka etek ama tɔ anɛ wɔɔ ji Jisɔs ame ne akiɛ.
Iku Ngɔnganɛ na Manka ya Ayaya
(Mat 9:18-26; Mak 5:21-43)
40Ngara si Jisɔs akru, ɛbɔngɔ ekperɛ, atebsi amar mbɔ are ka mba. 41Ka munnu wiwi ya abengɛ si Jarus, nnɛ isi ka nju a mfa Jus, aba amagbɔ Jisɔs ka ata, agɔrɛ sa aba ka nju ɛyɛ 42atebsi mmɔ a nka wiwi nanting ya akpe, ngɔnganɛ ya amisi nnya wobo na ɛba, akpɔkpɔ.
Si Jisɔs are ka mba amogho, ɛbɔngɔ ɛtɔɔngɛ ka kpɛjara. 43Manka ajɔ ka ɛbɔngɔ ya anɔng ajɔ aruɛ ka nnya wobo na ɛba, nnɛ wawi arima atabɛ. 44Aruɛ ka njam akɔmɔ nnyɔ iwuru, naosunosu anɔng akɛbɛ.
45“Yɛnnɛ akɔmɔm”? Jisɔs abɔmmɔ.
Mbɔ wɔɔ agɛbbɛ, Fita akpɛ, “Ntaa, ɛbɔngɔ ɛmabono esibi ya jara.”
46Ka Jisɔs arag, “Nnɛ akɔmɔm ateb ejo; Nnyinyi si nsam ɛmimru ka biji.”
47Ngara si eribi manka yɔ si Jisɔs amɛ gbɛrɛ ja ane akam amagbɔɛ ka ata. Ka nibri anɛ kpakpa, atɔrɔ jɛsɛrɛ ka akɔmɛ, na si anɔb naosunosu. 48Jisɔs atɔɛ, “Mmɔwaayɔka, ntama ɛya ama tab. Sɔng ka nanaa.”
49Si Jisɔs akpagha aragha na manka yɔ, nrɔghanoto ya aru ka nju a Jarus, nnɛ isi ka nju a mfa Jus aba. “Mmɔwayɔka amɔkpɔ,” atɔɛ. “Kikpɛ feghe nkpekpene ayɔ.”
50Ngara yi Jisɔs ayog oteb bi, atɔ Jarus. “Ɔbɔn ekia ne; tama, si ɛnɔnɔb.”
51Ngara yi Jisɔs asi ka nju, aritama nnɛ wawi atɔngɛ anam, erising Fita, Jɔn, Jemsi, Nsɛ na nnyɛ mmɔ, 52Anɛ wɔɔ ba ajɔ ka nju anan mmɔ ya akpɔ. Jisɔs atɔ mbɔ, “Ba kikpɛ nan, akaghakpɔ, anannan.”
53Ayɔnɛ, atebsi anyinyi sa amɔkpɔ. 54Jisɔs afenɛ ka ɔbɔ arag gbogbo, “Mmɔwaa, tam yimi:” 55Etughu ɛjɛ ɛfɛnɛ, naosunosu atam. Atɔ mbɔ sa akiɛ ejonɛnɛghɛ ya anɛ. 56Nnyɛ na nsɛ ɛkpɔ mbɔ biji, ka atɔ mbɔ si aki tɔ nnɛ wawi ji ɛmɛwɛmɛ.
Aktualisht i përzgjedhur:
Luk 8: NDD Nta
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©️2022 Luke Initiative for Scripture Translation