Matta 5
5
Wa'azi tazwa ntsok
1Yesu na̱ bu ryi ba̱nyet ba̱gingang ba tung, na̱ wrak a̱ swrang an tsok. Na̱ bu swrang, na̱won pfong nu na a̱ nyyai a̱ bu tung a̱ ku krang. 2Na̱ nwa ba̱ zzek a̱ hywa,
Ba̱gwai ka̱ryong
(Luka 6:20-23)
3“Ba̱nyet ba a̱ bvwo di ba byyi dizot a ndya mba ni a̱ shyi bu ba̱gwai,
rot Dityok Tazwa ti yet ti mbaa!
4Ba̱nyet ba a̱ shyi i ka̱nak i a̱ byyi ba̱gwai,
rot Ka̱za a̱ ni ba̱ wram!
5Ba̱nyet ba a̱ wi yet a̱ccu mba ni a̱ byyi ba̱gwai,
rot ba ni san kyang a Ka̱za ka rop a̱ sak a̱ ni ba̱ ryi ni!
6Ba̱nyet ba a̱ tyyi ndya mba i yya kyang a Ka̱za ka cat da̱ mba ni, ba shyi bu ba̱gwai,
rot Ka̱za a̱ ma̱ ni ba̱ yya kyang a ba cat i sa̱rei!
7Ba̱nyet ba a̱ pfong dizot ba̱nyet i a̱ byyi ba̱gwai,
rot Ka̱za a̱ ma̱ ni hok dizot mba!
8Ba̱nyet ba a̱ byyi dizizrak a ndya ni a̱ byyi ba̱gwai,
rot ba ni ryi Ka̱za!
9Ba̱nyet ba a̱ tyyi ndya mba i jyi swat ba̱nyet i a̱ byyi ba̱gwai,
rot Ka̱za a̱ ni ba̱ yei na̱won nka!
10Ba̱nyet ba ba yya da̱ mba rot ba yya kyang a Ka̱za ka cat da̱ mba ni a̱ byyi ba̱gwai,
rot Dityok Tazwa ti yet ti mbaa!
11“Ka̱ram ka ba̱nyet ban ya pfwei a̱ yya da̱ nyin a̱ ya bvei kozan diraa rot yi n tssup ni, yi gwai. 12Yi gwai i shyi bu shok, rot yi shyi ba̱ a̱gba̱dang nzang Tazwa. A̱mi ba yin yya bu ba̱nyet tyyei ba̱ryat Ka̱za ba a̱ yin ya tason ni.”
Ntwak bu fitila
(Markut 9:50; Luka 14:34-35)
13“Yi ryi di ntwak ni ka̱yat ba̱nyet ka̱sa ba. Ma ki ntwak a tyak ryen nna na na bo yet ntwak ba, seko ba na̱ weyang, ba̱nyet a̱ shai a̱ swrap.
14“Yi ryi di fitila ni i ka̱sa ka. Ka̱nkrang ka ba nok a̱za̱ a̱gut i a̱ shyi i nyat ba. 15A̱yin a̱n tyyi rong an fitila a̱ sook ryei a̱n kup ba, seko na̱ za̱ yrek a̱ sak tebur zi gi sai ba̱nyet ka̱ryi ba sa̱rei. 16A̱mi meyang yi ma̱ nin tyyi ka̱bvwa sai i ba̱nyet ba ba ga ryi a̱tsatsak nkyang u yi yya ni a̱ dyep A̱tyyi nyin nu a̱ shyi Tazwa ka ni.”
Zzek tazwa Truwang Musa
17Yesu a̱ ya ka̱son a̱ bo hywa da̱ mba, “Yi ryok hwa di n ba n bu byyan Truwang Musa ji bu zzek ba̱nyet tyyei ba̱ryat Ka̱za na ba. Kaai, n ba a̱mi n ga bu tyyi zzek mba na i ba ba̱cicrak. 18Ka̱ryong n ya tyyei: ko dinyyi tiyring i zzek Truwang na byyi tyak ba, se ka̱ram ka sa̱rei nkyang a shyi ka̱yat Truwang ji ni na ba cicrak, Tazwa ji bu ka̱byen i si wa bvwa i tyak. 19Rot a̱mi a̱yin nu a̱ rak tssup ka̱bacincong a̱tsak Truwang ka ni a̱ si bo zzek ba̱nyet ba rak ka̱ tssup a, nu a̱mi a̱ ni yet ka̱baan ka sa̱rei i Dityok Tazwa ti. A̱mi meyang a̱yin nu a̱ tssup Truwang ji ni a̱ si bo zzek ba̱nyet ba za̱ tssup i, nu a̱mi a̱ ni yet a̱gba̱dang i Dityok Tazwa ti. 20Nkpa n ya tyyei: ki yi ni nwa Dityok Tazwa ti, dolet yi ra̱u ba̱malam Truwang ba bu ba̱nyet Farisa na di ntyyi rya bu yya kyang a Ka̱za ka cat da̱ nyin ni.”
Zzek tazwa diryen
21“Yi hok ba yin tyyei ba̱nyet ndoson a̱ hywa, ‘Ryok hywat a̱yin ba, a̱yin nu a̱ hywat a̱yin ni ba ni ku tyyi an shirya.’ 22Ma naani n hywa: a̱yin nu a̱ yya diryen ba̱ a̱yaan ni, ba ni ku tyyi an shirya; a̱yin nu a̱ yei a̱wumba nu ‘a̱kpam a̱yin’ ni, ba ni ku sak a̱ta̱ssi ba̱nyet shirya; a̱yin nu a̱ ma̱n yei a̱wumba nu ‘a̱bvwon a̱yin’ ni a̱ ni nwa rong. 23Rot a̱mi ki a naat bu za̱nang nwan ka̱bvwa ba̱hyum, i si yring a byyi hywak ba̱ a̱wumba nwan, 24se a wwon za̱nang nwan ji ka̱ yemi brek bu shya a̱wumba nwan nu yi jyi, a si brek nat ka̱bvwa ba̱hyum ka.
25“Ka̱ a̱yin a̱ na̱ breng i hywak nkyang, a̱ na̱ kwak a̱ naat i i bat shirya, an tyyi ka̱ssi yi jyi nyyai yi ka̱n nwa ka̱bvwa shirya ka ba; ki a rak na̱ si na̱ tyyi mbvak ba̱nyet shirya, ba ma̱ na̱ brak a̱ tyyi mbvak ba̱dogari, ba na̱ ra a̱ tyyi a jaru. 26Ka̱ryong n na̱ tyyei: a byyi wruk ka̱ yemi ba, se a tan sa̱rei kyang a ba na̱ tssup ni.”
Zzek tazwa kan-a̱naan
27“Yi yin hok ba hywa, ‘Ryok kan-a̱naan ba.’ 28Ma naani n ya tyyei: a̱yin nu a̱ cyang a̱ra̱mbyring a̱ ku cat ka̱tak mpfwa nu ni a̱ wa ka̱n tyak kan-a̱naan ba̱ nu ka̱yat mpfwa nu ka. 29Rot a̱mi ki dissi mbvak yak nwan ni na̱ tyyi a nwa a a̱ka̱tukyya, goma a ta̱ tun jing. Ku ran a wai ka̱bvwa i rwam nwan, di a nwa ka̱yat ndong bu rwam nwan ba̱cicrak. 30Ki bvak yak nwan ni tyyi a nwa a a̱ka̱tukyya, a kpo tyet jing. Ku ran a jing kap yring nwan, di a nwa ka̱yat ndong bu rwam nwan na cicrak.”
Zzek tazwa kam nyreng
(Matta 19:9; Markut 10:11-12; Luka 16:18)
31“Ba bo yin hywa, ‘Ki a̱yin a̱ ni gang nyreng ba̱ a̱mbyring nu, dolet na̱ jem kpa gang nyreng a a̱ ku ryi.’ 32Ma naani n ya tyyei, ka̱ a̱yin a̱ kam ba̱ a̱mbyring nu na̱ kan-a̱naan ba, se na̱ bvwo a̱ tyyi a̱mbyring nu kan-a̱naan ki a̱mbyring u a̱ bo drok a̱ si yreng a̱yanyet; a̱yin nu a̱ bo ku bvwa ni a̱ swat i kan-a̱naan ba̱ nu.”
Zzek tazwa si-ssing
33“Yi hok ba yin tyyei ba̱nyet nnyyai ba, a̱ hywa, ‘Kyang a a̱yin na̱ rop a̱ sak a̱ ni yya ni, na̱ bo ryok byyik ba. Ma kyang a a̱yin na̱ rop a̱ sak a̱ ni yya A̱gwam Ka̱za mi ni na̱ kwan a̱ kpo yya.’ 34Ma nzuk n ya tyyei da̱ a̱yin a̱ ryok shyi-shyi ba ma ka̱ram ka na̱n dop a̱ sak a̱ ni yya kyang ni, ko di Tazwa rot ka̱ryi Ka̱za a̱mi, 35ko di ka̱byen rot ka̱bvwa saai a̱tak A̱gwam Ka̱za a̱mi, ko kyi Urushalima rot ka̱nkrang a̱gba̱dang A̱gwam ka a̱mi. 36Ryok shyi di diccu nwan ba ma, rot a maai i shei dicat tiyring diccu nwan ti sai ko ti tyyi dindying ba. 37Kyang a maai yi hywa ‘Ee’ ni yi hywa ‘Ee’, ki ku ma̱n yet ‘Kaai’ yi hywa ‘Kaai’. Kyang a seyak a̱mi ni yet nying Ka̱ta̱nyrang.”
Yi ryok ya yya na̱kpot ba
(Luka 6:29-30)
38“Yi hok ba yin hywa, ‘Ki a̱yin a̱ na̱ tun dissi, a ma̱n ku tun ni; ki a̱ na̱ tun dinyyi, a ma̱n ku tun ni’. 39Ma nzuk n ya tyyei: Ryok yya a̱yin nu a̱ na̱ yya na̱kpot ni na̱kpot ba. Ki a̱yin a̱ na̱ zzu i shok yring a bu ku brak yring a na̱ zzu. 40Ki a̱yin a̱ nat ba̱ nwan ka̱bvwa shirya a̱ ga san a̱godo nwan, a ku ryi a̱tro nwan nu nta̱mak. 41Ki a̱tuba a̱yring ka̱yat nsoja a̱ na̱ tyyi cot kilometre a̱yring, an ku brang a̱mel a̱mba̱hwa. 42Ki a̱yin a̱ na̱ naai kyang, a ku ryi; ki a̱ ma̱n cat kwap, a ryok n ku bvwo ba.”
Yi gwai ba̱nyet ba a̱ ya rak i
(Luka 6:27-28, 32-36)
43“Yi hok ba yin hywa, ‘Gwai a̱wumba nwan nu i rak a̱ra̱ndwan nwan nu.’ 44Ma nzuk n hywa da̱ nyin, yi gwai ba̱ra̱ndwan nyin, ba̱nyet ba a̱ yya da̱ nyin ni yi ba̱ yya a̱duwa. 45Nkpa ni tyyei ka̱sak ka yin yet na̱won A̱tyyi nyin na a̱ shyi Tazwa ka ni. Rot nu a̱ na tyyi nom a a̱ sai tazwa a̱tsatsak bu ba̱ka̱tuk ba̱nyet sa̱rei, a̱ bo wwon za zi bvwa ba̱nyet ba a̱ yya a̱tsatsak ni bu ba̱nyet ba a̱ yya a̱ka̱tuk i. 46Zang a̱nzan Ka̱za ka ni ya ryi ki yi gwai bu ba̱nyet ba a̱ ya gwai ni? Ba̱nyet ssang diga̱ndu ma a̱ yya a̱mi! 47Ki bu ba̱wumbeyang nyin yi byei ba̱ mba, a̱nzan kyang yi yya ku bvwon bu kpikpit ba̱nyet a? Ba̱nyet cyi Ka̱za ma a̱ yya a̱mi! 48Dolet yi yet ba̱jyem ba̱nyet da̱ A̱tyyi nyin nu a̱ shyi Tazwa ka na̱n yet a̱jyem ni.”
Aktualisht i përzgjedhur:
Matta 5: kaj
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2011, Wycliffe Bible Translators, Inc. All rights reserved.