Markus 11
11
Ihz keui saanyz seuz meuz Yesuhz kut tuhz weng Yerusalem
(Matthe 21:1-11, Lukas 19:28-40, Yohn 12:12-19)
1Meuz keuh ngaz phraeoz weng Yerusalem, naeh rim pruh Betphake boh pruh Bethani, naeh teungz rang Olip ne Yesuhz cao teu paez Daehz keu aarz lan aacz rae daz, 2“Lan cu pruh aacz ngaai paarz, beuk a wa phraeoz kaw paarz te awlz mahz liz kyehz, an yaeh maat ti tumz seu pawk ne, khawz leh nuarz, botz truz a niz. 3Beuk ihz maanyz, ‘Kawp naehz cih ceun ni a?’ daz kaw, ‘Tahz ehz lo, ehz mial truz phuhz aez luat, daz ceun ni naz.’”
4Kaar kaw lan awlz mahz liz tukz boh rim keu lawrz ne kaar kaw khawz leh nuarz.
5Ihz teur ka an ceng boh a diz ne maanyz kaar, “Cih naehz paarz khawz nuarz mahz liz a?”
6Kaar kaw tawpz daz ceun Yesuhz lao mok ne, keuh kaw aez botz lan. 7Kaar botz truz cu Yesuhz, paelz kreung kaai butz mahz liz ne, Yesuhz kaw raw tumz. 8Ihz keui leh kreung daehz paelz tawiz reung dengz, teur ka kaw mak kaakz khaehz, leh lahz paelz tawiz reung dengz. 9Ihz an lan aacz boh ihz an tawiz thaz puatz keui raak daz, “Hosanna. Ihz an truz kawp mus Tahz ne aez maang reung dengz rak se kamz. 10Prih Khunz Dawit, ihz keu daehz keu daepz ehz, an ngaz tae ne aez Phraz Pen Caoh aez reung dengz rak se kamz. ‘Lupz phrawz Phraz Pen Caoh an naeh lang kaang raaoz.’”
11Meuz Yesuhz phraeoz weng Yerusalem ne kut tuhz wat, khahz yawt sirz sirz. Meuz seu ngihz ngaz keutz ne, Hnhz boh teu paez seu kawlz aarz keui lae lan thaz pruh Bethani.
Yesuhz kin teungz laangz wah
(Matthe 21:18-19)
12Ceun kap siz, keuh lae truz thaz pruh Bethani ne Yesuhz kaw a wa coh. 13Meuz Hnhz moh teun yaan teuk soz awlz teungz laangz wah, lahz thaangz heungz baaiz ne, doz caang maang plaehz rae lan yawt thatz thatz. Keuiz daz kawp maat anz kraao plaehz rae nam maang plaehz, awlz taw lahz hnhz pan. 14Hnhz kin teungz laangz wah daz, “Yak aez yaeh bawnz suamz plaehz mih seu pawk.”
Teu paez Hnhz kaw ngarz.
Yesuhz wah thengz ihz saz, ihz yal tuhz wat
(Matthe 21:12-17, Lukas 19:45-48, Yohn 2:13-22)
15Meuz keuh phraeoz weng Yerusalem ne, Yesuhz kut tuhz wat wah thengz ihz saz, ihz yal, reuk euz teuk taz pheunz ihz teur yal paekz, boh tangz keu dez ihz saz ploiz keui. 16Lao tang yak aez yaeh leh kreung datz mial datz lan tawiz teu laangz wat. 17Daz thaengz tang keuh nahz, “Tuhz kyaamz lik daz, ‘Kaang Ohz ne naeh ti ihz keui suz tawngz,’ daz kaw pehz a wa cih aez hnhz penz tham conz.”#Isaiah 56:7, Yeremiah 7:11
18Ihz mawz kyaamz boh beunz caangz keui ngarz Hnhz cih ceun diz rae, kyaam piamz Hnhz. Keuh doz Hnhz kawp daz ihz keui sangz baaiz an Hnhz sawnz aez. 19Meuz prih reu nyeum ne, Yesuhz boh teu paez Hnhz keui lae thaz nawk weng.
Mony pung taek teungz laangz wah wiatz
(Matthe 21:20-22)
20Meuz keuh datz lan thaengz seu ngup ne, teu paez Hnhz awlz teungz laangz wah wiatz hawngz tae leh kaanz rias. 21Petros tang rae daz Yesuhz nahz, “Yawt luz Tahz ehz, teungz laangz wah an Mih kin ne a wa wiatz hawngz.”
22Yesuhz kaw daz keuh nahz, “Pehz yum Phraz Pen Caoh lah. 23Ohz daz mawn pehz nahz, yak maang reung dengz thaang pleung, yum mawn rae pehz daz rang mawh ne nahz, ‘Kraai klaez sapz tuhz omz paang laai raez,’ daz ceun ni kaw te klaez mawn. 24Kawp ceun diz Ohz daz pehz nahz, ‘Maang reung dengz yum, ceun pehz maanyz ne tiunz bawnz.’ 25Meuz pehz suz tawngz ne, beuk maang ihz kawi pehz kaw, lo plawiz lawt aez. Beuk cih ceun diz Paz pehz an naeh prih kaang raaoz kaw te plawiz lawt pehz.” 26“Beuk pehz nam plawiz lawt aez reung dengz kawi ihz kaw, Paz pehz an naeh prih kaang raaoz ne nam plawiz aez pehz lawt.”
Ihz mawh yio keui maanyz Yesuhz bawnz a na yaeh
(Matthe 21:23-27, Lukas 20:1-8)
27Meuz keuh phraeoz truz mial weng Yerusalem, Hnhz yeung nuar boh tuhz wat ne, beunz caangz, ihz mawz kyaamz boh ihz peur aacz keui truz cu Hnhz. 28Keuh maanyz Hnhz daz, “Mih leh a na a naez cih keu ni? Yaeh aez Mih nahz a na keu ni cih ceun ni?”
29Yesuhz tawpz daz keuh nahz, “Ohz maanyz pehz seu meoz. Tawpz raez. Beuk pehz tawpz kaw Ohz te lao, Ohz leh a na yaeh cih keu ni ne. 30Teuk sruz an Yohn aez ne penz truz thaz Phraz haz, thaz ihz haz? Pehz tawpz an ni raez?”
31Keuh wonz tuhz phawmz daehz daz, “Beuk ehz tawpz, penz truz thaz Phraz daz kaw Hnhz te maanyz thaengz, cih naehz pehz paw nam yum Yohn hoh? 32Beuk ehz tawpz penz truz thaz ihz daz kaw, ehz bawnz doz ihz. Ihz mok Yohn naeh ihz taangz phraz mawn.” Keuh wonz tuhz phawmz daehz rae, tawpz daz, 33“Ehz nam mas.”
Yesuhz kaw daz, “Ohz kaw cih ceun diz laai. Ohz nam lao pehz, leh a na yaeh cih keu ni a.”
Aktualisht i përzgjedhur:
Markus 11: ril
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2022, Wycliffe Bible Translators, Inc. All rights reserved.