Romanos 6
6
Ya beusidꞌa kꞌazhiruaitara
1¿Mawũẽ kꞌasia adꞌaipe? ¿Kꞌazhiruadꞌe bꞌeaika Daizezeba izhi biaba kꞌãbãẽã sozuburiamarẽã? 2¡Mawũã ẽã! Kꞌazhiruara odꞌa ẽãba dazhira ya beusia kꞌazhiruaitara. ¿Mawũẽ sãwũã wadꞌi kꞌazhiruadꞌe bꞌeaipe? 3¿Kꞌawuadꞌa ẽka buru kꞌoedꞌadꞌeba bꞌeta Jesucristodꞌebemata, aramaʉ̃ne duanu ẽka izhi ũme beudꞌata? 4Buru kꞌoedꞌadꞌeba dazhira izhi ũme jou kꞌobꞌadꞌe wãsia, mawũẽ Cristo beudꞌata zhi Zezeba izhi zareaba piradrʉbidꞌa kĩrãkꞌa dazhisidꞌa piradrʉbisia zokꞌai nimibamarẽã zhiwidꞌidꞌe.
5Dazhira Cristo ũme beudꞌaba izhi piradrʉdꞌa kĩrãkꞌa zokꞌai bꞌai zhiwidꞌidꞌe bꞌeaya. 6Maʉ̃ta kꞌawuaidꞌera dazhita na bꞌadꞌara izhi ũme cruzdꞌe kꞌachibʉrʉba kꞌakua kꞌazhiruadꞌebemata beasia. Mawũẽ dazhira wueta kꞌazhirua nezokꞌa ẽã. 7Mawũã beudꞌara ẽdrʉsia kꞌazhiruadꞌebara. 8Dazhira Cristo ũme beudꞌaba ĩjã bꞌea duanaĩta izhi ũme. 9Kꞌawua bꞌea Cristo beudꞌata piradrʉdꞌara ya beu ẽã, bebura wueta zarea ne ẽã izhi ʉ̃rʉ̃rã. 10Beuma abꞌa beudꞌaba kꞌazhiruara jõma edre bꞌʉsia. Idꞌidꞌe bꞌʉra Daizezeita bꞌʉa. 11Marãsidꞌa aramaʉ̃ kĩrãkꞌa bꞌeta kꞌazhiruara odꞌa ẽãba ya beusita bꞌeaudua kꞌazhiruaitara, aramaʉ̃ne Daizezeita zokꞌai bꞌeaudua Jesucristo dazhirã Nokꞌodꞌeba.
12Kꞌazhiruaa idu kꞌabꞌaribirãũdua marã kꞌakua beubarita, aramaʉ̃ne orãũdua bia ẽãta obi krĩñabʉrʉra. 13Marã kꞌakuara idu kꞌazhiruaa chãbꞌarirãũdua bia ẽãta oita. Awuarabʉrʉ marã Daizezea chãbꞌariudua zokꞌai duaĩnaba kꞌazhiruadꞌe beu bꞌeadꞌata, aramaʉ̃ne marã kꞌakuara Daizezea chãbꞌariudua biata oita. 14Kꞌazhiruabara marã kꞌabꞌari nʉmaĩne bꞌʉ ẽã. Marã Moisé ũrãgꞌa edre nʉmeba ẽdrʉita nʉmʉ ẽã, awuarabʉrʉ ẽdrʉya Daizezeba izhi biaba ẽdrʉbidꞌa edre nʉmeba.
Duanena biata odꞌaita
15¿Mawũẽ sãwũãpe? ¿Kꞌazhiruara odꞌaika Moisé ũrãgꞌa edre duanu ẽbaera, mawũã odꞌaika Daizezeba izhi biaba ẽdrʉbidꞌa edre duanu baera? ¡Mawũã ẽã! 16¿Kꞌawuadꞌa ẽka marãta zhãrã edre nezokꞌata nʉmebʉrʉdꞌera maʉ̃ bedꞌeata aribꞌae nʉmebari ẽka, aramaʉ̃ kĩrãkꞌa nʉmʉ ẽka kꞌazhirua nezokꞌara aduaita beuita, waya Daizeze bedꞌeata aribꞌae bꞌʉra nʉmʉ ẽka bia nʉmaĩ kꞌarea? 17Mʉã Daizezea zhibia ji bꞌʉra kꞌazhirua nezokꞌata bꞌeasimina marãbara soidꞌu aribꞌae bꞌea Daizeze ũrãgꞌa jaradiadꞌapeadꞌata. 18Kꞌazhiruadꞌebara ẽdrʉdꞌape Daizeze nezokꞌarãta duanesia biata odꞌaita. 19Mʉãrã mawũã nezokꞌadꞌebemata jara nʉmʉã mʉã jara bꞌʉta marãbara sãwũãta kꞌawuadꞌa ẽãba. Nawedꞌara marã kꞌakuara bia ẽã chãbꞌarisidꞌa ne mitiata dazhi perata odꞌaita. Waya idꞌidꞌera marã kꞌakuara Daizezea chãbꞌariudua biata odꞌaita.
20Marã kꞌazhirua nezokꞌata bꞌeasidꞌera kĩrãẽpa biata odꞌa ẽbasia. 21¿Bia ẽãta obꞌeadꞌadꞌebara kꞌãrẽ biata jidasidꞌa, maʉ̃nebara idꞌidꞌera marã pera duanu ẽka? Maʉ̃nebara aduaita beuya. 22Mawũãmina idꞌidꞌera kꞌazhiruadꞌebara ẽdrʉdꞌape Daizeze nezokꞌata bꞌeba izhiita nʉmeã, mawũẽ izhi ũme bꞌai jõ ẽã bꞌeaya. 23Kꞌazhiruata obꞌʉdꞌebara aduaita beuya. Mawũãneba Daizezebara izhi ũme bꞌai jõ ẽãta bari dia bꞌʉa Jesucristo dazhirã Nokꞌodꞌeba.
Aktualisht i përzgjedhur:
Romanos 6: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.