Jenesesi 10
10
Muselu wa ana Nowe
1Ula gu muselu wa anapongwe araru a mulombwana Nowe anno anafwanyeya kagali Semi, Kami na Jafeti. Tempu ya mahindje madjindji yagavirile ana Nowe ale kohabala ahimiwa.
Ahima a mulombwana Jafeti
2Mulombwana Jafeti aabanle anapongwe ala: Gomeri, Magogi, Madayi, Javani, Tubali, Mexeki na Tirasi. 3Gomeri aabanle anapongwe ala: Asekenazi, Rifati na Togarima. 4Mulombwana Javani aabanle anapongwe ala: Elixa, Tarisi, Kitimi na Dodanimu. 5Atu atene anna kakumile mwa mulombwana Jafeti. Aliwa kohomwadeyela vilambo nnafwanyeya wandamelana bara eto kohokana iwongelo yewa na maziza ewa na ilambo yewa yakala atu.
Ahima a mulombwana Kami
6Mulombwana Kami aabanle anapongwe ala: Kuxi, Ijipitu, Pute na Kana. 7Mulombwana Kuxi aabanle anapongwe ala: Seba, Havila, Sabita, Rama na Sabiteka. Rama aabanle anapongwe ala: Saba na Dedani. 8Kuxi eto ohombala mwana mmohiwa aitaniwa Nimirode wenno ali mutu oroma okana kopolo dotonga mwilamboni ya vati. 9Eto Nimirode ali namasaya mundimuwa okamihediwa na Yehova. Nona iwongiwagave ante peno ira: <<Nnga mulombwana Nimirode, namasaya mundimuwa wenno akamihediwa na Yehova.>>#10:9 Nona iwongiwaga: Va inatapulela ira malambo a mundulrimu atu kamuona mutu owanda yengo, kawongetcha ira: Nnga mulombwana Nimirode, namasaya mundimuwa wenno akamihediwa na Yehova. Ku wonga mutu ira awande yengwele, akamihediwa na Mulugu nnga Nimirode. 10Liye aromaga wene umwene waye, atongetcha sidadi da Babeli, Ereki, Akade na Kaline. Sidadi dedo dafwanyeya mwilamboni mwa Sinari. 11-12Agakumile ilambo yenne, ohodowa roma tonga ilambo ya Asiriya. Atongaga wewule, ohomangawo sidadi ya Ninive, Rehoboti-Iri, Kala na Reseni. Sidadi ya Reseni tchi sidadi indimuwa inafwanyeya wu Ninive, wu sidadi ya Kala, vari viwa.
13Mulombwana Ijipitu gu nikolo na akuda Ludi, aAnami, aLeyabimi, aNafetumi, 14akuda Paturusimi, aKafitori, na aKasuluwimi anno kaabanle aFilistewu. 15Mulombwana Kana aabanle anapongwe ambinli. Oroma gu Sidoni, ogomiheda gu Eti. 16Muwari mwa mulombwana Kana puzile baliwa akuda Jebuzi, aAmore, aJirigazi; 17aEvi, aArika, aSine; 18aArivada, aZemare na aAmate. Vasogolro viwa mahimo a ana Kana ala kohomwadeya. 19Ilambo yakala akuda Kana madilriwa karomile ilambo ya Sidoni, dowaga pandi da Jerari ante Gaza, dowaga pandi ya Sodoma na Gomora, Adima na Zeboyimi fiyeda Laza. 20Kukala anapongwe a mulombwana Kami. Aliwa kohogaweya aliwa kana malogwiwa na viwongelo diwa na vilambo diwa na tatamo yakala atu.
Ahima a mulombwana Semi
21Mulombwana Semi, wenno unafwanyeya agali Jafeti mbalaye wa mulukuluwa, na liyene ohabala ahima aye. Liye ali nikolo na aEberewu atene. 22Mulombwana Semi aabanle anapongwe ala: Elamu, Asuri, Arifaxade, Ludi na Arani. 23Mulombwana Arani aabanle anapongwe ala: Uzi, Huli, Jeteri na Maasi. 24Mulombwana Arifaxade ohombala Sela eto Sela ohombala Eberi. 25Eberi aabanle anapongwe ambinli. Mwana mmohi ali Pelegi [ku wonga gaweya]. Avahiwe nzina nenne mwasiwa tempu yenne ilambo ya vati yohogaweya. Mwana mmohiwa aitaniwa Jotani. 26Jotani ohombala Alumoda, Selefi, Hazarimave, Jera, 27Hadorawu, Uzali, Dikela, 28Obali, Abimayeli, Saba, 29Ofiri, Havila na Jobabe. Atene anna kali anapongwe mulombwana Jotani aabanle liye. 30Aliwa kakala ilambo ya Mesa fiyeda Sefari, ilambo ya mwango didjindji pandi ya makumelo wa nzuwa. 31Kukala ahima a anapongwe a mulombwana Semi nnga mwakalele atu. Kohokana malogo ewa, viwongelo diwa, vilambo diwa, na pandi yewa yakala atu.
32Atene anna ba malogo a ahima a mulombwana Nowe nnga mwakalele atu, na vilambo dewa. Mwa atu anna pukumile malogo matene a ilambo ya vati romela tempu yavirile mahindje madjindji.
Aktualisht i përzgjedhur:
Jenesesi 10: iLolo
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2018 Visão Integral