Banɔkpɛkpɛ Axɔ̃ɛ 5
5
Anania Nɛ̀ Safira
1Anyɛ teli azã gɛ bezekulu yɛasɛ Anania nɛ̀ yɛedzini Safira tsyɛ adɛ balɛ ahɔɛmɛ kɛdɔ̃ tuli. 2Yɛedzini enyi kibui odenɔ kɛlɛ shu asɛ ebu ehoeyiɛ teli gɛ babuia akɔ alɛ shu kɛlɛ alɔkɔ agɔgɔɛ nɔ amana banɔkpɛkpɛ.
3Petro ebisi yɛasɛ, “Anania, kiɖeso pɛ Abosam etsoku wɔ kitúɔ mɛ pɛ ɔsɛ asɛnɛ otseɖe Ɔfɔfuĩa Gbangbã pɛ ɔlɔkɔ ehoeyiɛ teli balɛ ɔkɔ wɔshu nɛ kesiakpa gɛ ɔdɛɛ mɛ dza? 4Gɛnɛ wɔayɛ kenu flogo pɛ ɔdɛ kalɛ dza? Kɛlɛ gɛɔdɛ kalɛ obekeɛ, gɛnɛ wɔahɔɛ mɛ ehoeyiɛ azã dza? Kiɖuwoe gɛkɔ ɔsɛ tɛ̀ ɔbhɛtɛ ekpeɖekpeɖe alɛ nɛidi mɛ? Gɛnɛ banɔ wɔwɔɛ pɔ Owusoso Akaa wɔwɔɛ.
5Gɛ Anania elũ kibui lɛ koɔ, eglebe adɔ kesiakpa pɛ etsi. Kɛlɛ kifù hohoe ba bagɛ belũ kɛgɛ ba ɛlɛ mɛ abha popopo. 6Kɛlɛ bayisɔ̃ abamànà kɛpɔtɛ nɛishu pɛ balɔkɔ yɛ adɛvɔbɔ.
7Ɔmɔasɛ ɔɖa tatá tɛtá edeɛ, yɛedzini tsyɛ ebeyì, gɛ etinyi kɛgɛ ba ɛlɛ mɛ soɔ, 8Petro ebisi yɛasɛ, “Tseɖe mɛ, ehoeyi alɛ ete wɔnɛ woenyineɛ ɔmɔ odenɔ kesiakpa tɛdɛdɛ̀ mɛ dza?
Ebuiliulũ asɛ “Ee, kedziɛ niaalɛ.”
9Petro ebisi yɛasɛ, “Kiɖuwoe gɛkɔ ɔsɛ wɔnɔ olugbũ ɔshɔ̃ pɛ nofeke Apaleteɛ Ɔfɔfuĩa nɔ oɖi? Ɖio! Banyɛ ɛtsɛɖɛ gɛdɛ vɔbɔ wɔenyineɛ akashɛ nɛ kedulũɔ, kliso babà lɔkɔ wɔ tsyɛ avɛnɔ.”
10Odunu ɔlɛ koɔ, awɔlɛ adɔ nɛ Petro otugbà pɛ etsí. Kɛlɛ gɛ bayisɔ̃ abamɔ asɛ etsíɛ, bamanà kɛpɔtɛ nɛitsyɛ shu adɛ vɔbɔ nɛ yɛenyine ɔbha. 11Kifù gbagbla yí ɔhaa nɛ̀ banɔ bhlatɔ pete gɛelũ ebui alɛ gɛ laba ɛlɛ mɛ.
Banɔkpɛkpɛ Ebú Banyã Akɔ Banɔ Kpekpè
12Banɔkpɛkpɛ abhɛtɛ atsyindzye ebui gelee, nɛ̀ ebui gɛ labhɛtɛ kibì nɛ banunɔ nɛishi bamɔ. Kɛlɛ bayɛyɛkɛŋã petee ezeshogò nɛ Salomo Kagbaa mɛ. 13Anɔ nanà agɛ kpɛ kemi pɛ etsoku balɛishi, pɔ banunɔ nyɔ̃ɔ azakpɛ kɛtakpu esi kɔ alɛ flogo. 14gɛ kɛzã kɛlɛ mɛ ana tsyɛ elo, banyɛ nɛ̀ badzɛ kpekpèɛ azayɛkɛ Apalete nabha aŋã, kɛlɛ balɔkɔ balɛ tɛkakalà mɛ̀ aplɛnɔ. 15Nɛ balɛ axɔ̃ɛ wɔawɔa shu soɔ, banɔ agbana balɛ banyanyã amana betipɔ nabha pɛ belu balɛ nɛ bapã nɛ̀ iputso nabha. Sɛ tɛ Petro kɛtɔwuiɛ ete dɔ balɛ banɔ teli abha gɛ onupɛ abafala. 16Banɔaza ezeshogò nɛ ɛmaa gɛlɛ Yerusalem ɔbha mɛ̀, pɛ bagbana balɛ banyanyã nɛ̀ bagɛ ɛfɔfuĩa kpa zɛkpɛ balɛ buhũɔ amana, kɛlɛ bebu banyã kɔ balɛ.
Kititilɔlɔ Nɛ Banɔkpɛkpɛ shu
17Kɛlɛ banɔlũazazã gbagbla nɛ̀ yɛɔbhialɛ gɛenu Zadukianɛ kɛza mɛ anunɔ, balɔkɔ kabhã wɔawlɔakɛ. 18Bevũ banɔkpɛkpɛ kɛlɛ balɔkɔ alɛ adɛkpɛ nɛ balɛ ɔɖavũɔ ɔkpɛkɔ. 19Pɔ gɛ elishiɛ anaa, Apaleteɛ yɛaxɔ̃ɛdɛ teli adɛ dalɛ ɔɖavũɔ budulũɔ kɛlɛ agbanà alɛ ekoeyì. 20Etseɖe balɛ asɛ, “Nɔvɛ ɔdɛ lɔ kititì nɛ Owusoso Akaavũɔ shu tɛ̀ nɔɖɔ ɛkpã vɔvɔ ɛlɛ shu ebui otseɖe banunɔ.”
21Kelizaza nɛvɔlɔɔ, banɔkpɛkpɛ avɛ Owusoso Akaavũɔ shu kɛlɛ bakpà banunɔ bɔdɔ̃ ɔkasɛ asɛ gɛ betseɖe alɛ ana.
Gɛ banɔlũazazã gbagbla nɛ̀ yɛɔbhia alɛ ebekuɔ, bekulu ɔhamɛesheshèɛ, gɛinu banɔ sheshè kɛzaa petee nɛ Israel, kɛlɛ bakpɛ banɔ nɛ banɔkpɛkpɛ gɛbakpɛ nɛ ɔɖavũɔ ɔkɔ. 22Pɔ gɛ bavɛ ediku ɔɖavũɔ shuɔ, ɔɖavũabha eɖiɖieleteɛ agɛ damɔ banɔkpɛkpɛ nɛuvũɔ mɛ, kliso betsyina avɛ edɛkɔ tititì, 23“Bɔdɛmɔ ɔsɛ budulũɔ pete dãa piapii, kɛlɛ bagɛ epo kɛlɛ tsyɛ eli kititì nɛ budulũɔ, pɔ gɛbɔ dalɛ̃ buvuɔ̃, bagɛmɔ ananà nɛ bɔlɛ mɛ̀.” 24Gɛ belũ kibui ɛlɛ, kɛbhɛtɛ agɛ eɖi akaavũɔ nabha nɛ̀ banɔlũazazã gbagbla nɛibi, gɛ begilũ kɛlɛ esi kɛlɛ bazã nɛ̀ ɔwɔ̃nyɔnɔ nɛ kɛgɛ badekoeyì nɛ kibui ɛlɛ mɛ.
25Kɛlɛ anɔ teli aba ebetseɖe balɛ asɛ, “Noɖio, banyɛ gɛ novũ ɔkpɛ ɔɖavũɔ, nɛ alɛ balɛ eli akaa vũɔ shu pɛ baakasɛ banunɔ ɔdɔ̃.” 26Klisoɔ, agɛeɖi akaavũɔ nabha ɔplɛnɔ yɛaxɔ̃ɛwɔaa avɛ adɛgbana banɔkpɛkpɛ amana. Bagɛ gbanà balɛ nɛ tɛgagalĩ mɛ, ɔmɔsɛ beesi kifù asɛ bagɛ akpasɛ bɔdɔ̃ ebehu alɛ aklagbu.
27Gɛ bagbana banɔkpɛkpɛ amana, bakɔ balɔɛititi nɛ ɔhamɛesheshèɛ namɛ tɛ banɔlũazazã gbagbla ebisi balɛ ebui. 28Etseɖe alɛ asɛ, “Bɔkpɛ ɔsha kɔ wɔnɔ gagalĩ ɔsɛ nɔtɔkɔ kasɛ bɔdɔ̃ nɛ kinye ɛlɛ mɛ, pɔ, nɔkɔ wɔnɔ bɔdɔ̃ kakasɛ tsyɔa Yerusalem kɛlɛ nɔpɛ ɔsɛ tɛ̀ bɔŋã kɛpɔ nɛ anyɛ alɛ dzyosu nɔ shu.”
29Petro nɛ̀ banɔkpɛkpɛ gɔgɔɛ ebuiliulũ asɛ, “kɛlɛ ɔsɛ bulũ batɔ̃ ɔkɔ Owusoso Akaa ɔdɛ banɔdzyrame! 30Bɔlɔ akaalɛ Owusoso Akaa, yɛefeke Yesuɔ edenɔ bekpuɔ mɛ, anɔ gɛ nɔkpiisɔ̃ nɛ busi shu pɛ noyii. 31Owusoso Akaa akpii nɛitití pɛ alɔkɔɛ edzu yɛŋã mɛ asɛ Ekusi nɛ̀ anɔ gɛ ebe Bhui banɔ ebù asɛ tɛ akɔ Israelanɛ etsyina etúɔ mɛ, tɛ balɔkɔ balɛ ebui kpa etsye alɛ. 32Bɔlɔ nɛ̀ Ɔfɔfuĩa Gbangbã gɛ Owusoso Akaa akɔ bagɛ elũ yɛatɔɔ̃ bɔlɔ zãmɔ ebui alɛ.”
33Gɛ belũ kibui ɛlɛ, ɔmɔpɔɛ oyí alɛ, kɛlɛ bapɛ asɛ tɛ beyi alɛ. 34Pɔ Farisieyi teli gɛ bezekulu asɛ Gamaliel gɛ edzì ɔshadɔkasɛ pɛ banɔ adɛmɛ nɛ yɛɛ, aba alɔɛtití nɛ ɔhaesheshèɛ namɛ kɛlɛ akɔ ɔsha asɛ bebù banɔkpɛkpɛ eyinɔ ɔtɔ̃ ɛbɔɛ. 35Kɛlɛ aɖɔ etseɖe alɛ asɛ, “Israelanɛ, noɖi piapii nɛ kɛgɛ nɔɔtɔɖɔ ɔsɛ tɛ nɔbhɛtɛ nɛ̀ banɔ alɛ shu mɔ. 36Nɛ kibe tili gɛtɛ bafala mɛɛ, Teuda abekoeyì, aɖɔ asɛ anɔ gbagbla teli idi yɛenu, kɛlɛ banɔ tikpekpè mɛ asɛ akpã talɛ ibe balɛ azã yiede. Beyii, kɛlɛ bapɔ̃ɛ yiedeazazã petee akanà, pɔ kɛlɛ petee gɛ bhɛtɛ kɛnanà. 37Nɛ yiedeɛ, Galilea eyì teli tsyɛ gɛ bezekulu asɛ Yuda ebekoeyì, nɛ ewui alɛ mɛ gɛ bazakalà banunɔ kɛlɛ agbana banɔ kpekpè aplɛnɔ yɛishu pɛ bagalĩ batɔ̃ mɛ. Beyii tsyɛ, kɛlɛ bɔpɔ̃ɛ yiede azazã petee tsyɛ akanà. 38Klisoɔ kibui ɛlɛ otsiɛ nɔ, ihu buluhũ ɔkɔ wɔnɔ ɔsɛ, Nɔshɛnɛ ahɔɛ nɛ banɔ alɛ shu! Nɔkɔ bagavɛ! Ɔmɔsɛ onupɛ kɛgɛ batɔɖɔ nɛ̀ balɛ ebui bhɛbhɛtɛ mɛ enu banɔdzyrame ayɛɛ, latɛ bamɔ otugbà vɛvɛ. 39Pɔ, onupɛ Owusoso Akaa ɔkɔ ledeɛ xɔnɔɔ, nɔtɛ bɔlà ɔbhɛtɛ ɔsɛ banɔ alɛ bazɔkɔ yɔlɔ eɖi, pɔ nɔbɔmɔ wɔnɔ ishu ɔsɛ nɔgɔlɛ̃ iboe nɛ̀ Owusoso Akaa.”
40Yɛibui ɖɔɖɔ kɔ belũ ebui esi, klisoɔ bekulu banɔkpɛkpɛ amana kɛlɛ bakɔ behuisi alɛ. Kɛlɛ bakpɛ ɔsha akɔ alɛ ɔsɛ batɛ aɖɔaɖɔ nɛ Yesu yɛinyeɛ mɛ, kɛlɛ bashɛnɛ ahɔɛ nɛ balɛishu pɛ bashɛ.
41Banɔkpɛkpɛ ashɛ nɛ kebhu okulukɔ nɛ̀ same, ɔmɔsɛ bakalà balɛ asɛ banɔ gɛ bashɔnɔ asɛ bamɔ bɔtɔ nɛ̀ awuĩ nɛ Yesu yɛinyeɛ nɛ takpu. 42Keliza, elizaa mɛɛ, banɔkpɛkpɛ azã bɔdɔ̃ kakasɛ nabha nɛ akaavũɔ shu, nɛ̀ odenɔ bɔpã mɛ ɔvɛnɔ bɔpã mɛ, kɛlɛ bagɛ zɔkɔ yɔlɔ nɛ̀ balɛ bɔdɔ̃ kakasɛ nɛ̀ kibui gbangbã tɛɖɔɖɔ ɔsɛ Yesu yɛenu Kristoɔ.
Aktualisht i përzgjedhur:
Banɔkpɛkpɛ Axɔ̃ɛ 5: nyb
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© (Active), Ghana Institute of Linguistics, Literacy and Bible Translation. All rights reserved.