Ala Kalɔ Buse 17
17
Unwoti Úse Abram Kenye Kadi Úse
1Uwi ɔni na Abram ɔ́ƒɔ akwa liti ku aavlene-yaalenwi ni, Unwoti údie lɛlɔ ɔ́tina-nwu na ɔ́su-nwu ɔnini, “Ami ndi Katɔti Ɔyikune Ƒui. Mɔɔwia ka elie ngba sɛɛn ɔni na aláƒiɔ-mi. 2Na lɛla lɛni na muunyimiku-ɔ mɛni ni, ndubɔlɛ-ni ugyii lite-ɔ na adubɔwɔ bebi na bemomo kaduɛ.”
3Mmɔ ni, Abram ɔ́yu úbi kalɔ na Katɔti ɔ́su-nwu ɔnini, 4“Ami ni, lɛla lɛni na muunyimiku-ɔ ndi ka awɔ ndubɔbla kadi bekyuli pii ɔti. 5Ɔmɛni ɔsu ni, basɔ baaadubo-ɔ bɔlɔ banii Abram, ɔni kalɔ ndi Ati ɔni náƒɔ lɛnyi. Mmomu badubɔlɔ-ɔ banii Abraham, ɔsika líti-ɔ lɛ́bla kadi bekyuli pii ɔti. 6Na ndubɔya na ƒula bawɔ bemomo na benwini kadi pii bekyuli na badi benwini baga muedi. 7Ndubɔlɛ bunyimi bɔmɛni ugyii. Na amu ndubɔkya ami ku-ɔ ntɛ ku ƒula bawɔ ku kaba bekyuli bani ƒui masia-a kama uwi ƒui. Na ami ndi ƒula Katɔti na madi ama lɛnɔ Katɔti. 8Kanaan kalɔ kani lɛlɔ na adi ɔƒɔ mɛni ni, ndubuti-ka lite awɔ ku ƒula bawɔ na ami ndubɔbla bana Katɔti.”
9Ɔmmɔ kama ni, Katɔti ɔ́su Abraham ɔnini, “Awɔ ni, ɔlɛka adi mina bunyimi lɛlɔ, awɔ ku ƒula bawɔ ku kaba bekyuli bani ƒui masia-a kama. 10Ɔmɛni ndi bunyimi bɔni muute awɔ ku ƒula bawɔ bani masia-a kama na ɔdi ka bɛdi-mu lɛlɔ. Ɔnanabi biala na bina akɔ ni, ɔlɛka bekulo-nwu lego. 11Ago bukulo bɔmmɔ ndubɔtina bunyimi bɔni nkya ami ku-mii ntɛ. 12Na ƒula kaba bekyuli bani ƒui mebo ni, ɔnanabi biala na bana akɔ ɔni náƒɔ emeyi maane ni, ɔlɛka bekulo-nwu lego. Bananabi bani na báwɔ bákya bina kɔduli iye bani na bíye ku egulabi bɛ́siku baƒɔ kudɔ na baaadi bina bebi geen muedi ɔlɛka bikulo-ma ago. 13Bina kɔduli bebi badi o-o buye na biye-ma ku egulabi o-o ni, ɔlɛka bekulo-ma ago. Mina lɛla lɛni na línyimi ka bɛbla bina ɔlɔna ni, ɔdi bunyimi bɔni ndubɔkya uwi ƒui. 14Ɔnana biala na útekulo tɔ lego ni, ɔdubukulo kɔna kɔni nkya anwu ku mina bekyuli ntɛ, ɔsika útadi mina bunyimi lɛlɔ.”
15Katɔti ɔ́sɔ ɔ́su Abraham ɔnini, “Ƒ'ulekudi Sarai ni, ɔƒaamu badubɔlɔ-nwu Sara. 16Ndubute-nwu kusɛ kusɛ. Na ɔdi litemi geen ka anwu ɔlati ɔdubɔwɔ ɔnanabi ute-ɔ. Ndubute-nwu kusɛ kusɛ ɔni na ɔdubɔya na unwini kaba bekyuli pii uni. Na baga bani madi bekyuli lɛlɔ badubɔlɛ basiku-nwu lɛlɔ kemmo.”
17Mmɔ ni, Abraham ɔ́yu úbi kalɔ na úye lɛlɔ ɔnii, “Ami ɔnana ɔni náaƒɔ akwa eti anyɔ mɛni ku ukyuli ɔdi bɔdubɔkana ubi ɔdi bɔwɔ? Na Sara lɛnɔ ɔ́ɔƒɔ akwa liti ku aavlene. Ɔdubɔkana kaƒɔ bɔda?” Litemi lɛmɛni lɛ́da-nwu lɛma, na ɔ́ma. 18Amu na Abraham ɔ́su Katɔti ɔnini, “Si adubute Ismael kusɛ kusɛ na ulie ngba ni, nka ɔdia!”
19Mmɔ na Katɔti ɔ́su ɔnini, “Ɛɛn! Nsu ƒ'ulekudi Sara ɔdubɔwɔ ɔnanabi ute-ɔ. Na adubɔsia-nwu lɛnyi anii Isak. Ndubɔlɛ mina bunyimi ugyii ku anwu ɔmmɔ aani bunyimi bɔni makya ami ku-nwu ntɛ usela uwi ƒui ku nwuna bawɔ lɛnɔ ntɛ. 20Na Ismael anwu ni, línu lɛla lɛni na éye-mi. Sɔsɔ ni, ndubute-nwu kusɛ kusɛ na lɛya na ɔwɔ bebi pii na bemomo geen. Anwu ndubɔdi lɛlɔ badine leevu-inyɔ ɔti. Na ndubɔya na nwuna kadi bekyuli bakɛ ɔyikun geen. 21Nsu mina bunyimi ni, ami ku Isak bawɔ ntɛ na ndubɔlɛ-mu ugyii. Na anwu ndi ubi ɔni na Sara ɔdubɔwɔ ute-ɔ na lɛkwa lɛni ndubo aani uwi ɔmɛni kalɛ.” 22Na ka Katɔti ɔ́wɔlɔ Abraham bɔtɛmiku ni, ɔ́tɔlɔ úsie katɔ.
23Limeyi lɛmmɔ kani lɛlɔ ni, Abraham úkulo lego. Na ubidi Ismael ku bananabi bani nkya nwuna kaduli mmɔ ku bani mɔɔbla-nwu kabla ƒui lɛnɔ ni, békulo-ma ago aani kalɛ na Katɔti ɔ́su-nwu. 24Abraham ɔ́ƒɔ akwa liti ku aavlene-yaalenwi asa na úkulo lego. 25Na ubidi Ismael ɔ́ƒɔ akwa leevu-atɛ. 26Ɔmɛni ɔsu Abraham ku ubidi Ismael ƒui békulo ago limeyi linwi lɛmmɔ lɛlɔ. 27Na lɛni kani na bananabi bani ƒui nkya Abraham kaduli ku bani mɔɔbla-nwu kabla, anwu ku ama ƒui békulo ago.
Aktualisht i përzgjedhur:
Ala Kalɔ Buse 17: lef
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.