Хьунухь 22
22
Аллагьди Ибрагьиман иман синагъ авун
1И вакъиаяр кьиле фейи са кьадар вахтундилай Аллагьди Ибрагьим синагъ авуна.
«Ибрагьим!» – эверна Аллагьди. «Гьай!» – жаваб гана Ибрагьима.
2Аллагьди лагьана: «Жуван хва, авай сад тир, рикӀ алай хва, Исакьни къачуна Мурия чилел алад. Ана, За ваз къалурай дагъдал, вуна адакай кунуг ая».
3Пакамахъ Ибрагьима ламраз къалтахар яна, вичихъ галаз кьве лукӀни къачуна, Исакьни къачуна, кунуг патал кӀарасарни кукӀварна рекье гьатна – вичиз Аллагьди лагьай чкадиз. 4Рекье авай пуд лагьай юкъуз адаз яргъай хьиз и чка акуна. 5«Ламни галаз инал акъваз, – лагьана ада лукӀариз. – Зунни гада фена, Аллагьдиз икрам авуна куь кьилив хкведа».
6Ада кунуг авун патал гьазурнавай кӀарасар Исакьан къуьнел эцигна. Ахпа чахмахни чукӀул къачуна рехъ давамарна – Исакьахъ галаз санал.
7Исакьа эверна: «Буба!» «Гьай, бала?» – жаваб гана Ибрагьима.
«Чав чахмахни гва, кӀарасарни гва, амма кунугдин лапаг гьина ава?» – жузуна хци.
8«Хва чан, – лагьана Ибрагьима, – кунугдин лапаг гьина аватӀа, Аллагьдиз аквазва». Абуру кьведани мад чпин рехъ давамарна.
9Вичиз Аллагьди лагьай чкадив агакьайла, Ибрагьима къурбанган туькӀуьрна ва адан винел кӀарасар эцигна. Ада Исакь кутӀунна, ам кзурбангандал кӀарасрин винел йикъалдар авуна, 10чукӀул акъудна ва хва тукӀун патал хкажна. 11И арада цаварай Реббидин Малаикди эверна: «Ибрагьим, Ибрагьим!» «Гьай!» – жаваб гана ада. 12«Адал гъил хкажмир, – лагьана Малаикди, – адаз са затӀни ийимир! Гила Заз ваз Аллагьдихъай кичӀе тирди чизва – ваз Зун патал жувахъ авай са хвани вахкун гьайиф атанач!»
13Ибрагьимаз, килигайла, крчар къалин кул-кусда аруш хьанвай гьер акуна. Ада патав фена а гьер кьуна ва ам хцин чкадал кунуг авуна.
14Вири и вакъиаяр кьиле фейи чкадиз Ибрагьима Ягьве-Ире, яни «Реббидиз аквазва» лагьана тӀвар гана.
«ГьикӀ жедатӀа, Реббидин дагъдал чир жеда» мисални гьа идахъ галаз алакъада ава.
15Реббидин Малаикди цаварилай Ибрагьимаз мад эверна:
16«Жувалди кьин хьуй, – гаф я им лугьузвай Реббиди, –
вуна и кӀвалах авунай –
авай са хва бахш авун гьайиф атанач –
17За ваз хийир-дуьа ийида!
За ви несилар гзаф ийида,
кьадардал атайла – цава авай гъетер кьван,
гьуьлуьн къерехда авай къумадин тварар кьван.
Ви несилрин виликни ярх жеда
Душмандин варар!
18Ви несилар чилел алай вири халкьар патал хийир-дуьа жеда –
вун зи чӀалаз килигунай».
19Ибрагьим вичин лукӀар алай чкадал хтана, абурухъ галаз санал Беэр-Шебадиз хтана – ва Беэр-Шебада уьмуьр тухуз хьана.
Нахаран – Ибрагьиман стхадин несилар
20-22И вакъиаяр кьиле фейи са кьадар вахтарилай Ибрагьимав адан стха Нахаран паб Милкади рухваяр: Ус (им сифте хва я), Буз, Къемуил (им Араман буба я), Кесед, Гьазу, Пилдаш, Йидлаф ва Бетуэл, – ханва лагьай хабар агакьнай. 23Ибур Милкади Ибрагьиман стха Нахараз хайи муьжуьд хва я.
Бетуэлаз Рефикъа тӀвар алай руш хьана.
24Идалай гъейри Нахаран кьвед лагьай паб Реумади адаз Тебах, Гагьам, Тахаш ва Магьах хана.
Aktualisht i përzgjedhur:
Хьунухь 22: ЛезПК
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Институт перевода Библии, 2010-2024