Luka 22
22
Zang tɔ̀ng zɔɔ nɛɛ zang nyɔ Yeesɔ vɔrɔ
(Mat 26:1-5; Mar 14:1-2; Yɔh 11:45-53)
1Ka ɓɔɔ diki nyaalaa borodi ɓɔɔ zang tɛ̃ɛ yisi kagn kpang, ɓɔɔ zang ɓaa nɛɛ pasika a naabm tɔ. 2Rɛɛ kpanti zang ɓɔɔ ri dɔɔ vuu ka Gãa Laa, nɛɛ rɛɛ zang ɓɔɔ ri tusu zang labeenang Laa, ri kãa gbalang ɓɔɔ nɛɛ ri nyɔ wu vɔrɔ nɛɛ nwĩiri ɓɛɛ. Ka ruu ɓɔɔ, ri kaa vɔrɔ zang ɓɛɛ.
Yahuda mãlɛ́ yuu Yeesɔ
(Mat 26:14-16; Mar 14:10-11)
3A Sheetang naa nwãarɛ Yahuda ɓɔɔ zang ɓaa wu nɛɛ Isikariyoti, ɓɔɔ ka teteng zang kopi tu ziti ɓɔɔ ri mantɛ vuu ka bii Yeesɔ ɓɛɛ. 4A Yahuda daa tɔ̀ng zɔɔ nɛɛ rɛɛ kpanti zang ɓɔɔ ri dɔɔ vuu ka Gãa Laa, a ɓɔɔ rɛɛ zang bang bang ɓɔɔ ri gã Gãa Laa ɓɛɛ, naa ɓɔɔ wu nyɔ ri yuu Yeesɔ ɓɛɛ. 5Ɓɔɔ ri tãa naa weɓe, ri tãa tĩnang dɔɔli, a ri mã zɔɔ nyaa nɛɛ ri a wu saka. 6A kasɛ ri nyaa, a kãa gbalang ɓɔɔ wu nyɔ ri yuu Yeesɔ bɛ̀ɛ́ zang ka nɔng kpang ɓɛɛ.
Yeesɔ kpalɛ bii vuu shaanang pasika shaanang
(Mat 26:17-25; Mar 14:12-21; Yɔh 13:21-30)
7Diki nyaalaa pasika ɓɔɔ zang shaa borodi ɓɔɔ yisi kagn kpang, ɓɔɔ zang yele mɛ̀ɛrɛ́ nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ kagn ɓɛɛ naa arɛ. 8Yeesɔ shɔng rɛɛ Bituru nɛɛ Yɔhana, a kɔɔ ri nɛɛ, “Nɔɔ daayi, nɔɔ daa shĩili ruu vuu shaanang nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ. Naa ɓɔɔ ruu naa shaa ɓɛɛ.”
9A ri hɛ̃ɛ wu nɛɛ, “Ruu daa shĩili ka niya?”
10Kɔɔ ri tɔɔ, “Nɔɔ nɛɛ hãa nyaa tɔ, ka yeti gari, nɔɔ daa ɓee yuu nɛɛ zang varɛ, tuu mii ka bɛng. Nɔng dũng wu, nɔɔ hãa nyaa nɛɛ wu ka gãa ɓɔɔ wu hãa nyaa ɓɛɛ. 11Nɔɔ hɛ̃ɛ dabang gãa kaɓa nɛɛ, ‘Maalang, tɔɔ jaka ɓɔɔ wu naa shaa vuu shaanang nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ kagn, nɛɛ zang ɓɔɔ ri mantɛ vuu ka bìí ɓiɓɛ kiya?’ 12Tusu nɔɔ naa ka jaka ka gãa lapa, shĩili vuu tɔ ka nɔng piti. Nɔɔ shĩili vuu shaanang bìí ka nɔngkɔ.”
13A ri daayi, ri daa ĩi naa ɓɔɔ wu kɔɔ ri ɓɛɛ, a ri shĩili vuu shaanang nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ.
Yeesɔ shaa vuu shaanang Pasika
(Mat 26:26-30; Mar 14:22-26; 1Kor 11:23-25)
14Ka ɓɔɔ làá vuu shaanang nyaalaa bìí naa raa bii, Yeesɔ daa nwang ka nɔng vuu shaanang, a zang ɓɔɔ ri mantɛ vuu ka bii ɓiɓɛ ri naa nwang kaa jong. 15A kɔɔ ri tɔɔ, “Bii shaa m tɔ gbãng gbãng nɛɛ diki keɓe wu arɛ. N shaa vuu shaanang nyaalaa keɓe nɛɛ nɔɔ nɔng gbete tɔɔ zang naa dang m jĩng kati. 16N kɔɔ nɔɔ tɔ, n shaa vuu shaanang nyaalaa keɓe ɓɔɔ takpang. N naa shaa ka ɓɔɔ niizang ɓɔɔ zang naa shaa kaa ɓɔɔ Laa naa roo Kpanti ɓɛɛ.”
17A tuu juwa, zãa Laa, a kɔɔ ri nɛɛ, “Nɔɔ ta juwa keɓe ta, nɔɔ ɓooro nɛɛ zɔɔ. 18N kɔ̀ɔ́ nɔɔ, n ɓoo mii inabi ɓɔɔ takpang, diki ɓɔɔ Laa naa roo Kpanti kagn nɛɛ a tɔ, n naa ɓooyi.”
19A tuu borodi zãa Laa, a sharɛ, a á ri, kɔɔ ri tɔɔ, “Wee bii mɛɛ ɓɔɔ n a zang, zang nyɔ vɔrɔ ka ruu manɛ ɓɛɛ kɔ. Nɔɔ palɛ vuu keɓe diki diki nɔɔ kpaa danggn mɛɛ kaa nɛɛ mani.” 20Ɓɔɔ ri hangsɛ vuu shaanang, a tuu juwa ɓɔɔ mii inabi kagn naa ɓaasi ɓɛɛ tɔɔ, “Juwa keɓe, ɓi nyaa shɔɔ ɓɔɔ Laa a ɓɛɛ. Ɓi zĩi mɛɛ ɓɔɔ n naa tɛ̃ɛyi kɔ naa hansɛ nyaa shɔɔ keɓe.
21“Nɔɔ zi karɛ, zang ɓɔɔ nyɔ yuu mɛɛ kagn nɛɛ n, ka nɔng kɔ ruu shaa vuu shaanang ɓɛɛ. 22Jaa Shɔnzang vɔ ɓi katɔ, naa ɓɔɔ Laa kɔɔ nɛɛ naa nwang ɓɛɛ, a jĩng dannang ɓi kagn yuu zang ɓɔɔ nyɔ yuu ɓiɓɛ ɓɛɛ.” 23A ri gaayu zɔɔ hɛ̃ɛlɛnang ka naa ɓarɛ nɛɛ, ɓu wi naa palɛ vuu keɓe wiya?
Nyaa laanang ka yuu bannang
24A ri ti gaayu nyaa laanang nɛɛ zɔɔ, ka yuu zang ɓɔɔ wukɔ zang bang ka teteng ɓarɛ ɓɛɛ. 25A Yeesɔ kɔɔ ri tɔɔ, “Kpanti zang ɓɔɔ ri zi Laa kpang, ri roo kpanti ka yuu zang ɓarɛ nandon. Ri kasɛ nɛɛ zang ɓaa ri nɛɛ zang ɓɔɔ palɛ zang tɔ̃ɔ ɓɛɛ. 26Ɓɔɔ manɛ ɓi nɔngkɔ kpang. Zang ɓɔɔ wukɔ bang ka teteng manɛ, wukɔ wu nwáng naa zang wujaa ɓɔɔ shong nɔɔ ɓɛɛ. 27Zang ɓɔɔ nwang ka tipi, zang a wu vuu shaanang, nɛɛ zang ɓɔɔ a wu vuu shaanang, wi bang wiya? Wu zang ɓɔɔ nwang ka tipi, zang a wu vuu shaanang kɔ bang kpang ya? Wee n ka teteng manɛ ɓee, nkɔ shong nɔɔ jong.
28“Nɔɔ yáa m ka ɓɔɔ n dang jĩng kpang. 29Naa ɓɔɔ Daa mɛɛ a m naa, nɛɛ n nwang kpanti, n a nɔɔ doo nɔngkɔ doori. 30Tɔ̀ɔ, nɔɔ naa shaa vuu shaanang, nɔɔ ti ɓoo nɛɛ n ka nɔng vuu shaanang mɛɛ ka ɓɔɔ n naa roo kpanti ɓɛɛ. N ti shing nɔɔ, nɔɔ nwang ka yuu laa nwannang kpanti, nɔɔ jɛ̃ɛ zang zɔ̃ng Isirela ɓɔɔ kopi tu ziti ruu.
Yeesɔ kɔɔ naa ɓɔɔ Bituru naa laa nyaa ɓiɓɛ
(Mat 26:31-35; Mar 14:27-31; Yɔh 13:36-38)
31“Siman, ɓaa shoo, zang a Sheetang naa tɔ, nɛɛ wu gãsɛ nɔɔ, tɔ̀ɔ, wu shɛ̃ɛrɛ zang tɔ̃ɔ, wu yaa zang shi kpang, naa ɓɔɔ zang hãlɛ zee ɓɛɛ. 32Siman, n gàa mɔɔ Laa tɔ, ka ruu ɓɔɔ, mɔɔ nɛ̀ɛ́ yaa danggn shinnang ka n ɓɛɛ. Mɔɔ nɛɛ a tɔ ka bii mɛɛ tɔkn, mɔ́ɔ yi rɛɛ ɓaazung ɓɔɔ nɔɔ mantɛ vuu nɛɛ ri ka bìí mɛɛ ɓɛɛ naa ka bii, ri shing danggn waasɛ̃.”
33Siman kasɛ wu nyaa tɔɔ, “Dabang, n kasɛ tɔ, n daa nɛɛ mɔɔ ka sãa, ruu vɔ ka nyaa zɔɔ.”
34Yeesɔ kɔɔ wu tɔɔ, “Bituru, n kɔɔ mɔɔ, lɛ̀ɛ́kɔ nɛɛ zĩi keɓe, mɔɔ laa nyaa nɛɛ mɔɔ zi m nung kpang dakn taati ka gbongkarɛ, tɔ̀ɔ, kn wu ɓaa nyaa.”
Yeesɔ shàarɛ̀ zang ɓɔɔ ri mantɛ vuu ka bìí ɓiɓɛ nyaa
35Yeesɔ hɛ̃ɛ ri tɔɔ, “Ɓɔɔ n shong nɔɔ, nɔɔ tuu duku saka nɛɛ duku ɓɔɔ nɔɔ ti tɛ̃ɛ vuu kagn ka naa kpang, nɔɔ ti hãa koodoo kpang ɓɛɛ, vuu ɓɔɔgn nɔɔ walɛ kpang ya?” Ri kasɛ wu nyaa nɛɛ, “Kpang.” 36A kɔɔ ri tɔɔ, “Ɓɔɔ kãntang keɓe, zang ɓɔɔ duku saka ɓiɓɛ nɛɛ kagn, wu tuu ka naa ning, nɛɛ duku ɓɔɔ nɔɔ tɛ̃ɛ vuu kagn piti. A zang ɓɔɔ yere bang ɓiɓɛ nɛɛ kagn kpang, wu mãlɛ́ fɔ̃ɔrɔ bii zuunang ɓiɓɛ, wu hooyi. 37N kɔ̀ɔ́ nɔɔ, vuu ɓɔɔ labeenang kɔɔ nɛɛ, ‘A zang ɓakɛ wu nɛɛ zang ɓɔɔ ri ta nyaa dannang ɓɛɛ.’ Nwang ditɔ niizang ka yuu mɛɛ. Ka ruu ɓɔɔ, vuu ɓɔɔ zang kɔɔ ka yuu mɛɛ nwáng kana niizang ɓɛɛ.”
38A ri kɔɔ wu nɛɛ, “Zirɛ Dabang, yere bang kɔ ziti ka naa ɓuru ɓee.” A kasɛ ri nyaa tɔɔ, “Daa tɔ nɔngkɔ.” Ruu rang nɔɔ yee keɓe tɔkn kpang.
Yeesɔ gaa Laa ka yuu Kɔpɔ Zeetung
(Mat 26:36-46; Mar 14:32-42)
39A nwang nɛɛ yeti gari daa ka yuu kɔpɔ ɓɔɔ zang ɓaa nɛɛ Zeetung naa ɓɔɔ wu daarɛ diki diki ɓɛɛ. Zang ɓɔɔ ri mantɛ vuu ka bii ɓiɓɛ, ri dũng wu ka knti. 40A ɓɔɔ shɛ̃ɛ nɔng bìí, kɔɔ ri tɔɔ, “Nɔɔ gaa Laa, ka ruu ɓɔɔ, zang nɛɛ gãsɛ nɔɔ ɓɛɛ.” 41A yaa ri daa kaa nɔng ɓɔɔgn, naabm, tang nɛɛ gutu ka nɔngkɔ, a gaa Laa kati nɛɛ, 42“Daa mɛɛ, mɔɔ nɛɛ kasɛ tɔ, kɔsɔ m jĩng dannang keɓe jong. Palɛ vuu ɓɔɔ mɔɔ kasɛ ɓɛɛ, wu vuu ɓɔɔ n kasɛ ɓɛɛ kpang.” 43Zang nyaa shonang Laa ɓɔɔ ka lapa ɓɛɛ, a ka bii ɓiɓɛ, a mã wu danggn kati. 44Rɛ̃rɛnang jĩng dannang keɓe, shing wu, gaa Laa kaa gbãng gbãng nɛɛ gn ɓiɓɛ gbete. Ka ruu nɔngkɔ, yannang sɔ̃lɔ nɛɛ nyaating ɓiɓɛ, mɔɔ kɔɔ nɛɛ zĩi sɔ̃lɔ.
45“Yupaa nɛɛ nɔng ɓɔɔ wu gaa Laa ɓɛɛ, a ka bii rɛɛ zang ɓɔɔ ri mantɛ vuu ka bii ɓiɓɛ ɓɛɛ, a ĩi ri, hingro yiki ri tɔ, ka ruu ɓɔɔ, yeti ɓarɛ lasɛ dɔɔli ɓɛɛ. 46Hɛ̃ɛ ri nɛɛ, ‘Nɔɔ roo ka ruu viya? Nɔɔ yupaa, nɔɔ gàa Laa, ka ruu ɓɔɔ, zang nɛɛ gãsɛ nɔɔ ɓɛɛ.’ ”
Yahuda a zang Yeesɔ
(Mat 26:47-56; Mar 14:43-50; Yɔh 18:3-11)
47Ɓɔɔ bɛ̀ɛ́ rang yee doo ka nyaa, zang dɔɔli nwang nyaa. Zang gbete ka teteng rɛɛ zang kopi tu ziti, ɓɔɔ ri mantɛ vuu ka bii ɓiɓɛ, ɓɔɔ zang ɓaa wu nɛɛ Yahuda ɓɛɛ, wukɔ sɔɔ ri tĩng. A ka bii Yeesɔ naabm nɛɛ wu kɔ̃ng wu katɔ. 48Yeesɔ hɛ̃ɛ wu nɛɛ, “Yahuda, mɔɔ a zang Jaa Shɔnzang nɛɛ kɔ̃ngnang ɓɔɔ mɔɔ kɔ̃ng m ɓɛɛ ya?”
49A ɓɔɔ zang ɓɔɔ ri mantɛ vuu ka bii ɓiɓɛ nimbang ri zi vuu ɓɔɔ zang keɓe ri kasɛ nɛɛ ri palɛ ɓɛɛ, ri hɛ̃ɛ Yeesɔ nɛɛ, “Dabang ruu ku ri ta nɛɛ yere bang ya?” 50Zang gbete ka teteng ɓarɛ ku jaafoo kpanti rɛɛ zang ɓɔɔ ri dɔɔ vuu ka Gãa Laa nɛɛ yere bang, wɔng wu shoo nakn ka tipi.
51Yeesɔ kɔɔ ri nɛɛ, “Nɔ́ɔ palɛ vuu keɓe takpang.” A lee shoo yɔɔ nɛɛ naa, a màsɛ́ yɔɔ shoo.
52A Yeesɔ hɛ̃ɛ rɛɛ zang bang bang zang ɓɔɔ ri dɔɔ vuu ka Gãa Laa ɓɛɛ, nɛɛ rɛɛ zang bang zang ɓɔɔ ri gã Gãa Laa ɓɛɛ, a ɓɔɔ rɛɛ zang bang zang Yahudi nɛɛ, “Nɔɔ a ka bii mɛɛ kɔ nɔngkɔ nɛɛ yere bang, a ɓɔɔ labasaa mɔɔ kɔɔ nɛɛ n zang ɓɔɔ shing zang nɛɛ ri haa nyaa ya?” 53N nwáng nɛɛ nɔɔ diki diki ka yeti Gãa Laa, nɔɔ tɔɔ kpang nɛɛ nɔɔ yi m kpang. Lɛɛkɔ làá manɛ kɔ arɛ, nɛɛ làá zang ɓɔɔ ri nwang ka nɔng tĩiri ɓɛɛ.
Bituru laa nyaa Yeesɔ
(Mat 26:57-58, 69-75; Mar 14:53-54, 66-72; Yɔh 18:12-18, 25-27)
54Zang yi wu, zang daa nɛɛ wu, zang atɛ wu ka gãa kpanti rɛɛ zang ɓɔɔ dɔɔ vuu ka Gãa Laa ɓɛɛ. Bituru dũng ri ka knti katara. 55Zang dɔɔ waa ka dàbang, a ri nwang ka nyaa waa ka nɔngkɔ ka nyaa zɔɔ. Bituru naa sɔ̃ jong ka teteng ɓarɛ. 56Jaa zang soro ɓɔɔ palɛ shonang ka gãa kaɓa, zi wu ka nyaa waa ka nɔng ɓɔɔ wu sɔ̃ ɓɛɛ. Jaa bii pɛ̃ɛrɛ wu, a tɔɔ, “Zang keɓe bɛ̀ɛ́ doo nɛɛ Yeesɔ kɔ doori.”
57A Bituru laa nyaa tɔɔ, “Jaa soro, n zi zang keɓe m kpang.”
58Ɓɔɔ zang nwang naa gbete hn, zang varɛ ɓɔɔ zi wu, a kɔɔ wu nɛɛ, “Mɔɔ doo zang ɓarɛ kɔ.” Bituru kasɛ wu nyaa tɔɔ, “Jèe, n wu zang ɓarɛ kpang.”
59Ɓɔɔ zang tɔɔ zang wu nwangnɛ knti wu bee tɔkɔlɔng, zang ɓɔɔgn yi tĩng tɔɔ, “N suu sèé kpang, yɔɔ keɓe nɛɛ wu ning, ka ruu ɓɔɔ, yɔɔ keɓe doo zang tipi Galili kɔ ɓɛɛ.”
60A Bituru kasɛ nyaa tɔɔ, “Jèe, n zi vuu ɓɔɔ mɔɔ kɔɔ keɓe m kpang.” Bɛ̀ɛ́ rang yee doo naa nyaa, kn ɓaa nyaa. 61A Kpanti Yeesɔ raa jĩng pɛ̃ɛrɛ Bituru. A Bituru kpaa danggn yee Yeesɔ naa ɓɔɔ kɔɔ wu tɔɔ, “Ɓɔɔ kn ɓaa nyaa lɛ̀ɛ́kɔ nɛɛ zĩi, mɔɔ laa nyaa mɛɛ dakn taati.” 62A nwang ka biling, kaa zɛ̃ɛzɛ̃ɛ.
Zang kpaa Yeesɔ a zang ti nyɔ wu
(Mat 26:67-68; Mar 14:65)
63Zang ɓɔɔ ri gãng jĩng ka wu, ri kpaa wu, ri ti nyɔkɔ wu. 64Ri mã wu jĩng nɛɛ sɛ̃ɛ fɔ̃ɔrɔ, a ri hɛ̃ɛ wu nɛɛ, “Kɔɔ ruu ta, wi nyɔ mɔɔ wiya?” 65Ri ràngkɛ̀ ruu ka yuu ɓiɓɛ dɔɔli, ri ti dãlɛ wu.
Yeesɔ ka tĩng zang ɓɔɔ ri jɛ̃ɛ zang ruu ɓɛɛ
(Mat 26:59-66; Mar 14:55-64; Yɔh 18:19-24)
66Nɔng naa gãntɛ tɔ, a rɛɛ zang bang Yahudi nɛɛ zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang ɓɔɔ tusu zang labeenang Laa ɓɛɛ, ri kpalɛ zɔɔ, a zang atɛ Yeesɔ kati. 67A ri hɛ̃ɛ wu nɛɛ “Mɔkɔ nɛɛ Kirisi mɔɔ kɔɔ ruu.” A kɔɔ ri tɔɔ, “Naa n kɔɔ nɔɔ, nɔɔ kasɛ kpang. 68Naa n ti hɛ̃ɛ nɔɔ ruu, nɔɔ kasɛ m nyaa kpang. 69Vuu ɓɔɔ yi nɛɛ lɛɛkɔ keɓe, Jaa Shɔnzang nwang ɓi kaa nakn Laa ɓɔɔ wukɔ palɛ vuu piti ɓɛɛ.”
70A ri hɛ̃ɛ wu nɛɛ, “Mɔɔ kɔɔ ɓu nɛɛ mɔkɔ Jaa Laa ya?” A kasɛ ri nyaa nɛɛ, “Nn, naa ɓɔɔ nɔɔ kɔɔ ɓɛɛ.”
71A ri kɔɔyi nɛɛ, “Ruu kàsɛ̀, ruu tãa vi tɔkn ka nyaa zang ɓɔɔ viya? Ruu tãa nyaa ɓɔɔ wu kɔɔ ɓɛɛ tɔ nɛɛ shoo ɓuru.”
Aktualisht i përzgjedhur:
Luka 22: mzmNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust