Ruth 1
1
Nakata
Elimelekun Moabmun aullaktun
1Kangagaaluk Israelmiuni uktuktit atannektuktillugit nunangat nekaekpiangman, inuk Bethlehemiutak Judea ilagiyauvlunilu nuliyaminun engniminunlu Moabmiun nunanganungaktun naiyukuvlugit talvani. 2Tamna inuk atikaktuk Elimelegmik aipangalu taiyauyuk Naomimik engningiklu Maklonmik Kilionmiklu. Tapkua Judeami Bethlehemiuni ilauvaktugaluit Efrethamiunun. Tamangmik Moabmiun nunangaanun tikitugit naiyuinakpaktun. 3Elimelegli Naomium uinga tukuman, angnak avaliektuk engningik kihimi. 4Talva nukagik tamangmik nulianiktuk Moabmiunik atikaktunik Orpamik Ruthmiglu. Taikani ukivakaakhutiklunin kulinik. 5Maklon Kilionlu tukuinangmaniktauk, angnak tamna ilaekpaktuk engniminnik uiminiglu.
Naomi Ruthlu Bethlehemungauyuk
6-7Naomi Moabmiuniuvluni tuhaagami Atangum inungni ikayukpangmagik nekihainik Moabmiun nunaanin kimagahualekpaktaa. Talva tamna aullagahualegami ukuangik mallaugumayuk tamangmik aullakhutik Judeam nunaanun. 8Tapfumani Naomi ukuaminun ukaktugaluak, “Takki uteyyavutik tamaptik ilaptingnun Atangum ikayungniagaatik iliptik nagutpiagaptik uvamnun ilaptingnuntauk inutillugit. 9-10Ataneglu pipkaili tamaptik uinikikuvlutik munagiyaulutiglu.”
Talva Naomium ukuani kimagahualegmatik kunikhugik, tamangmik kialektuk ukakhutik, “Immanak, aullakatauluk ilingnun nuakatingnun.”
11Naomi kiuyugaluak utiuyyavutik ilaa, “Hug mallauyumainalekpitik uvamnun? Engninignianahugilekpitinga uikhaptingnik? 12-13Aigiagittik akuakpallaagama uinigiamnik aiyungnaktuk. Unukpanlunin uinikumali uvanga engninikuvlunga utakihimaniakpitik uinikuvlutik takkuninga uiniktaililutiglu allanik? Immanak aiyungnakpiaktuk. Atanek ikayugunaegunakhingman naglingnaktutiglu.” 14Kialengmiyuk talva Orpaumlu hakini kunikhugu angilgaktuk, Ruthimli kimagumangitagaluanga. 15Naomiumlu Ruth ukallautimiyaa, “Takki, nukaungun nunakatiminun godiminunlu utiulengman aigiagin, malingnaglugu tamna.”
16Ruthli kiuyugaluak ukakhuni, “Kimaktailiyyavangma ilingnihimakuvlunga. Namungauguvinlunin mallauniaktunga. Nanilikiak naiyuguvin, taikani naiyungniaktungalu uvanga. Nunakatillu ilvin, uvanga nunakatigihunguyatkalu tapkua, Godinlutauk Godiginiaktagalu talva. 17Nanilunin tukuguvin tukuniaktunga taikanilu iluvektauhunguyungatauk. Antangum kapiahuktiyyavanga avipkaiguma ilingnin umatillunuk.”
18Naomi ilihimagami Ruthium kimagunaimani ukaguektuk.
19Aullakatigiktuk Bethlehemun tikitutik. Tikinmanik Bethlehemiun tamangmik kuglukpiaktun angnait ukakhutik, “Naomiuva una?”
20Kiuyulli, “Taitailiyyavapfinga Naomimik (imaatun – kuvianaktumik) Maramik (kuvianaitumik) kihimi, Godim Aiyukhaitum aiyukaktitpangmanga. 21Kangayyuak aullakpagama hamanga ilagivaktatka uiga engnikkalu tayyali Atangum utektitaanga ilaektillunga ihagiahukpiagaluakhungalu. Hug taivipfinga Naomimik ihuigiyautillunga aiyukaktitauvlungalu Atanengmun Aiyukhaitumun?”
22Talva taimaitumik Naomi Moabmiun nunanganin utekpaktuk ilagivlugu ukuani Moabmiutak Bethlehemun, tikimanik inuit katitiginahualektun mukpauyakhainik nauthimayunik.
Aktualisht i përzgjedhur:
Ruth 1: Sperry
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©1972 Canadian Bible Society