創世記 7
7
發大水
1上主對挪亞講：「你㧯全家愛入大船去，因為𠊎發現在這世代中，只有你在𠊎面前係正直个人。 2宗教禮儀定做淨浰个各種動物，你愛帶七公七乸；各種無淨浰个動物，愛帶一公一乸。 3飛鳥也愛帶七公七乸，俾它兜保命留種在全地； 4因為再過七日，𠊎愛落大水四十日夜，將𠊎所創造个一切生物攏總對地上除滅。」 5挪亞就照上主所吩咐个去做。
6 挪亞六百歲个時，大水氾濫在地上。 7挪亞就㧯厥𡜵娘、孻仔、心舅進入大船閃大水。 8淨浰㧯無淨浰个動物、飛鳥、㧯地上一切个爬蟲， 9攏總一對一對，有公有乸，跈挪亞入大船，係照上帝吩咐挪亞个。 10七日後，大水氾濫在地上。
11 挪亞六百歲該年，二月十七該日，深淵所有个大水源裂開來，天頂个水門也打開來， 12大雨落在地上四十日夜。 13就在該日，挪亞㧯厥𡜵娘、厥孻仔閃、含、雅弗，並三個心舅攏總進入大船。 14佢等㧯各種各類个野獸、頭牲、地上个爬蟲、並飛鳥全部進入大船。 15一切有生命、有血氣个生物，攏總一對一對跈挪亞進入大船。 16該兜入去个動物，全部有公有乸，係照上帝吩咐挪亞个。然後上主代挪亞關門。
17地上做大水四十日。水漲起來，大船在水面上浮起來。 18水在地上越漲越高，大船在水面上漂來漂去。 19地上个水越來越大，將天下一切个高山沒在水底。 20大水超過山頂七公尺，所有高山沒在水底。 21地上所有个動物，就係飛鳥、頭牲、野獸、爬蟲，並所有个人攏總死淨淨。 22所有在地上鼻孔有氣个生物攏總死掉。 23地上所有个生物，對人到頭牲、爬蟲、㧯飛鳥，攏總對地上除滅；只有留下挪亞並該兜㧯佢共下在大船肚个。 24大水沒掉大地一百五十日。
Aktualisht i përzgjedhur:
創世記 7: THV12Hdb
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© The Bible Society in Taiwan, 2012
All rights reserved
© 台灣聖經公會版權所有 2012