Mwanduso 4
4
Kaini na Abeli
1Abaho Adamu kamuwasa mwehe wake, na heyo kagoga inda na kalela mwana wa kimbigalo. Hawa kalonga, “Kwa kutazigwa na Mndewa Imulungu mhata mwana wa kimbigalo.” Na heyo kamkema Kaini. 2Abaho Hawa kalela mwana iyagwe wa kimbigalo, twaga jake Abeli. Abeli kakala msusilaji, lakini Kaini kakala mulimaji. 3Siku dimoja Kaini kasola vinhu vidodo mna ivinhu viyasengile, kamulavila Mndewa Imulungu. 4Abaho Abeli kamulavila Mndewa Imulungu nyama zinonile za ng'hondolo wa chaudele yawachinjile kulawa mna ifugo yake. Mndewa kanogezwa na Abeli hamoja na nhunza yake, 5lakini Kaini hanogeligwe hamoja na nhunza zake. Avo Kaini kagevuzika ng'hani na kihanga chake kikala filufilu. 6Abaho Mndewa Imulungu kamulongela Kaini, “Habali kugevuzika na habali kihanga chako cha filufilu? 7Maza utendile kinhu kinogile, wahatogoligwe, lakini kwavija kutenda gehile, nzambi yokusepasepa hana ulwivi lwako, yokusulukila, lakini kolondigwa uihume.”
8Abaho Kaini kamulongela mdodo wake Abeli, “Tuchole kumgunda.” Avo viwakalile kumgunda, Kaini kamvamila ndugu yake kamkoma.
9Mndewa Imulungu kamuuza Kaini, “Ndugu yako Abeli kakwahi?”
Kaini kamwidika, “Niye sijuwa bule, vino niye ayo mkalizi wa ndugu yangu?” 10Abaho Mndewa kalonga, “Gweye kutenda choni? Damu ya ndugu yako yonililila kulawa mwiisi. 11Gweye sambi kuduwiligwa mwiisi yuukala, ifonzile damu ya ndugu yako yuumkomile. 12Kamba wahalima, isi honda ikulelele ndiya yoyose. Kokuwa tanga nzulule mwiisi.”
13Kaini kamulongela Mndewa Imulungu, “Nhaguso ino ng'hulu ng'hani kumwangu, niye siidaha bule. 14Lola, lelo koniwinga kulawa mwiisi inogile kutali na meso gako. Nokuwa tanga nzulule mwiisi, na munhu yoyose yahanyona kong'homa.”
15Lakini Mndewa Imulungu kamwidika, “Bule! Munhu yahakukoma gweye Kaini kobwezeligwa miyanza saba.” Avo Mndewa kamwikila Kaini kilaguso cha kumzuma munhu yoyose yonda yamone sikuyamkome. 16Abaho Kaini kasegela mgameso ga Mndewa Imulungu na kakala mwiisi ikemigwe, “Nodi,” ikalile mwambu wa kudilawila zuwa wa Edeni.
Ulelo wa Kaini
17Kaini kamuwasa mwehe wake, na imwehe kagoga inda, kamulela Henoki. Abaho Kaini kazenga buga, kadikema buga dijo twaga da imwana Henoki.
18Henoki kamulela Iladi, na heyo Iladi kamulela Mehuyaeli, na heyo Mehuyaeli kamulela Mesushaeli, na heyo Mesushaeli kamulela Lameki. 19Lameki kasola wehe wabili, imoja twaga jake Ada na iyagwe twaga jake Sila. 20Ada kamulela Yabali, yakalile muhenga wa wanhu wakalile ofuga na okala mvibanda. 21Ndugu yake kakemigwa Yubali, ayo kakala tata wa wanhu wose wakalile otowa bango na filimbi. 22Sila nayo kamulela Tubali Kaini, yakalile yotenda kila viya va shaba na mizuma. Lumbu jake Tubali Kaini kakala Naama.
23Lameki kawalongela wehe zake,
“Ada na Sila, nhegelezeni,
tegelezeni zinilonga mweye wehe zangu.
Niye nimkoma munhu imoja kwavija kandumiza,
nimkoma mbwaga ayo kwavija kanilumiza.
24Kamba munhu yomkoma Kaini kobwezeligwa miyanza saba, avo munhu yonikoma niye
kobwezeligwa miyanza malongo saba na saba.”
Seti na Enoshi
25Adamu kamuwasa kabili mwehe wake, kalela mwana wa kimbigalo, kamkema Seti, akuno kolonga, “Imulungu kangwaa mwana hanhu ha Abeli, yakomigwe na Kaini.” 26Seti nayo kalela mwana, twaga jake kamkema Enoshi. Kipindi acho wanhu wasonga kumtambikila Mndewa Imulungu.
Aktualisht i përzgjedhur:
Mwanduso 4: King'hutu
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
NT: © 2014 Pioneer Bible Translators and The Word for the World
OT: © 2019 Pioneer Bible Translators