Jon 5
5
Jises amekes lahou tan, ma iy leheya iri mwan ma badih ta iri len tinan ta salom
(Kalan 5–10)
Gwa li Betesda
1Udu len sabe ano, Jises edek iu ili loken ili Jerusalem ta nyamon tinan ari tiri Juwis. 2Mirihik ta madasan tiri sipsip loboho Jerusalem doh badeh, gwa li ari udu aliy. Iri tahi beleheleh ma limeh na bek udu kabede gwa li nane doh. I boho kon tiri Hiburu, iri aloh Betesda. 3-4Lau solo-an labai amadin ado bahandra beleheleh udu kabede-e gwa li nane doh. Mada iri kaseu, kati iri ndra-in, ma ndruwi iri rayah badeh, ndramak.#(5:3) Iri lau rayah ta tanan abudon sahou ranah ale udu hawe tarou dah. Sahou ili buku doh: Iri lau marakon ado le ta atondrok gwa li nane dah ta tuburok. Len ra-on badeh, angelo eme andri bolo gwa li, bwidi gwa li tuburok. Buku are lau iy anuhun, iy sandroh ili bolo gwa li doh bwena, iy ndramak doh kameh sik tan udu badan kameh ano. 5Ndramak ari ibo sik in loboho doh badeh, winiya jaha ma tonoh ndru la-uh (38). 6Jises eme anyolom iy amadin in andri, eme iy i tanan iy ndramak kodo-oh ibo sik luluwen labai. Jises eme ndremenya iy, “Ou aso-ok ou amwenen deh?”
7Ndramak nane ibo sik dah asehek i buku doh, “Ndramak tinan, ari ndramak bado kada-ah ta aseben ta sariye jo ili bolo gwa, buku gwa tuburok. Jo none ta ili bolo gwa, arile ndramak ari ndrasandroh ndrala bwena.”
8Jises eme tiye i tan i buku doh, “Ou suri ou, ou andrei nyahan tam ma ou adek.” 9Udu se luwen bwe, iy ndramak nane dah ndramwenen ja. Iy eme bwese-ei nyahan tan, ma iy edek iu.
Idoh badeh, udu bolo len ta amunyau. 10Iri tinan tiri Juwis ame asehek sahou i ta iy ndramak nane ndrabwidi iy ndramwenen dah, “Ya idah len ta amunyau. Idah ba-en hamon ta kandriyen malen tahi mene Moses batanau bwe. Ou sabwese nyahan tam sado bolo len ta amunyau.”
11Ano iy asehek i toro, “Iy ndramak nane bwidi jo amwenen dah badeh, tiye jo ta bwese nyahan tek, ma iy tiye jo ta edek.”
12Oro ndremenya iy ja, “Are lau handru tiye tam ta bwese nyahan tam, ma ou adek?”
13Iy ndramak nane ndramwenen dah bala tanan are lau handru Jises. Lau ale solo-an labai ado loboho doh, eme bwidi Jises ndramai ndrala bolo iri lau.
14Ano Jises ndruni iy udu asiu tinan ta Kindrei, ma iy tiye i tan, “Ou anyolom, ou ndramwenen kede-eh, ou ka-iy abudon lomondra ndra-in. Bwe kameh lakou ndra-in labai ja asahan tam.” 15Iy eme ili asehek tiri Juwis, “Nane badeh, Jises bwidi jo amwenen.”
Nadu Ndramak Awas edeu kohan handru
16Jises amekes iri lakou doh udu bolo len ta amunyau tiri Juwis. Eme ma iri Juwis asilah madasan ta adi iy. 17Jises asehek ili toro i buku doh, “Tama badeh, iy ta amunyau bwe, iy ibo gok ili le ai. Jo ibo gok i buku le iy.” 18Idoh le badeh, bwidi iri Juwis abadok ta adai iy. Iri anya, “Ma bwena handru iy ba-en hamon ta len ta amunyau bwe, ano ja, iy anya, taman handru badeh, Kindrei. Iy amekes iy ja i buku le Kindrei.”
19Arile, Jises asehek i toro i buku doh, “Handru labai jo tiye tado, Nadu Kindrei winiyan bamekes lakou laleyah bwe. Iy winiyan amekes, buku iy atou taman amekes. Tasah, saba lakou taman amekes, nadun ale amekes. 20Tama aso-ok nadun labai ma iy leheyani iy ta iri lakou iy amekes. Handru, tama winiyan leheya nadun ta lakou laba tinan ja, ma mani ado kameh atur ta aliy. 21Tama mete-ei iri lau ndramak ma iy atehei kohan ili tiri. Nadun kameh amekes i buku le budon ta taman, iy ale edeu kohan ili tiri lau na le budon tan. 22Tama batehei ari ndramak bare ta mada sahou bwe. Tasah, gok marakon badeh, iy ndratehei ndrala mine nadun. 23Kindrei amekes i buku doh ta iri lau marakon kamasiye nadun, i buku le iri lau marakon masiye taman. Are lau bamasiye nadun bwe, iy ale bamasiye taman bwe le. Tasah, tama suni nadun ta eme.
24“Handru labai, jo katiye tado: Are lau iy anuhun sahou tek ma iy atehei budon in ta iy nane suni jo eme, kohan handru kameh winiyan bano bwe, iy kameh ta udu le buku doh. Iy winiyan bala ta mada sahou bwe. Iy ndrasakalawi imek, ma iy akohok kohan handru. 25Handru labai, jo katiye tado: Len hamon badeh, ndrasahan. Idah kameh iri lau ndramak anuhun boho Nadu Kindrei. Are lau iy anuhun, iy kameh akohok kohan handru. 26Tama badeh, kati kohan handru udu tan. Iy edeu boto-on ta kati kohan handru ili ta nadun ale. 27Ma iy ale ndratehei boto-on ndrala ta nadun ta edeu lau ala ta mada sahou, tasah iy Nadu Ndramak Awas.
28“Mani aha satur ta len eme. Iri lau ado bolo lek tiri kameh anuhun bohon, 29ma iri ame len ta bolo lek tiri. Are lau iri amekes mwasin kameh ales ta akohok kohan handru winiyan bano bwe. Iy are lau iy amekes kandriyen ndra-in, iy amak, ano iy ales udu ta mada sahou, ma iy kameh akohok maha-an ta iri kandriyen ndra-in nane iy amekes.
30“Jo winiyan bamekes lakou na budon tek le ari bwe. Jo edeu iri lau ala ta mada sahou in hamon ta sahou ta tama, iy asehek eme tek. Ma mada sahou tek badeh, amwenen, tasah jo bamekes lakou na budon tek amwenen bwe. Jo amekes lakou in hamon ta tama, iy nane suni jo eme.
Iri lau asehek Jises iy are lau
31“Buku jo kasehek jo kili tiri lau, idah kameh sahou jo asehek badeh, wendreya. 32Ndramak ari udu kede-eh atiye sahou tek ili tiri lau. Jo tanan sahou doh badeh, handru. 33Aha mene tiyani iri lau taha ala le hawe Jon. Iy badeh, anyolom ma asehek iri sahou handru. 34Jo amwenen, jo babudon ta sahou ta ari ndramak winiyan basihidi sahou mene jo asehek taha winiyan barih bwe. Jo asehek sahou dah ja, ta aha katehei budon taha ki-in ta sahou tek, ma Kindrei winiyan sebenei manyah taha udu mwasin. 35Jon badeh, buku sun anya lomadan tinan labai. Len sabe le badeh, aha sekesek ta lomada sun tan.
36“Jon asehek sahou anya, jo are lau, badeh, handru. Arile, lakou ari udu bwele-en labai ja ta sahou ta Jon, eme leheyani aha, jo are lau: Iri gok nane tama atehei eme tek ta jo kamekes ma jo kabwidi iri kano. Iri gok nane jo amekes doh, eme ma leheyani jo ili tiri lau mwan ma badih i buku tama badeh, suni jo eme kon munyak. 37Tama le amwenen atehei jo eme. Iy ndratiye taha ta nyala tekedek tek. Aha banuhun se bohon ma aha batou se badan bwe. 38Aha batawi sahou tan ba-en ndrine aha bwe, ma aha batehei budon taha bala ta iy are lau nane suni jo bwe. 39Aha abo gok ta asilah sahou iri torowenei udu bolo buk ndrabun, tasah budon taha anya, iri sahou doh kameh adeu taha kohan handru udu le buku doh. Idoh mwasin, arile sahou iri ndratorowenei badeh, nyarak udu aliy, ma kohan handru ale badeh, udu ndra hawek. 40Arile aha bwale aha ame hawek ta akohok taha kohan handru ta udu le buku doh.
41“Jo bwalek iri lau masiye jo. 42Jo ndratanan aha. Jo ndratanan, aha badeh, batehei tikisiy ta Kindrei bado ndrine aha bwe. 43Jo eme dah badeh, ta nyara tama. Arile aha baso-ok sahou tek bwe. Buku ari ndramak keme, iy kamasiye nyaran, idah kameh aha anuhun sahou tan ai. 44Aha marakon kede-eh, aha winiyan batehei budon taha bame tek bwe. Winiyan bwe en! Tasah, aha abudon boto-on labai ta akohok ndramas tiri lau taha amwenen. Eme ma aha baso-ok ta akohok ndramas nane Kindrei le ari edeu, bwe.
45“Aha satehei budon anya, jo tiye ta tama ta aha kameh ales ado ta sahou hawen. Ndramak ari ja udu kede-eh, iy kameh atehei aha a ta mada sahou. Aha anya Moses le kameh winiyan sebenei aha, arile bwe. Moses le kameh atehei aha a ta mada sahou. 46Buku aha atehei budon taha in ta sahou ta Moses, badeh aha katehei ki-in ta sahou tek ale. Tasah iri sahou ale ndratorowenei badeh, leheyani jo. 47Arile, aha batehei budon taha ba-en tiri sahou iy atorou bwe. Idah kameh aha winiyan batehei budon taha ba-en ta sahou tek bwe le.”
Aktualisht i përzgjedhur:
Jon 5: lidNTpo
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2001, Wycliffe Bible Translators, Inc. All rights reserved.