Luki 18
18
Kogu aʼe agoti gemo neʼafiya vekaʼefeʼmo huʼniya gemae
1 #
Lo 12:12; Kl 4:2; 1 Te 5:17 Agaemo vayaʼmogimo muki afinaʼmo nunumuʼmo hisaya kavafeʼmo alagaʼmo hapaesigeʼa oʼatalesaya kavafeʼmo ani agufa gemo huno aeno kalafefa gemo huno hapa paiʼniye. 2Agaemo hunoʼaeʼmo, mago agoti gemo neʼafiya vekamo mago taonifiʼmo maiʼniya vekamoʼmo Gotifeʼmo koli osuge muki vayaʼaifeʼmo koli osuge huno maiʼniye. 3Maiʼnigenoʼaeʼmo ani taonifiʼmo mago kogu a kanomoʼmo muki afinaʼaeʼmo ani vekalegamo uno ha painoʼaeʼmo, kame huno neʼnateya vekamoʼmo nagaetegamo hosu kavaʼmo nehiyanagi alika fako huka laʼato, huno ha paige ha paige huno maiʼniye. 4Hogoteno ha oʼmaeʼniyaʼmonafa henagaʼamo aipafiʼmo agesamo afinoʼaeʼmo, Gotifeʼmo koli osuge vayaʼaifeʼmo koli osuge huʼnovaʼmonanafa 5#Lu 11:7-8mani kogu a kanomoʼmo lusi kava huno alagaʼmo neʼnahaeya agufa gemo nehiyanageʼna afaʼa aliʼna fako huʼna ategauve. Aliʼna fako huʼna oʼatesuvana muki afinaʼmo ege ege huno maisigeno magoʼe huno lusi kava huno alagaʼmo nahaegaiye, huno agesamo afiʼniye. 6Ala kava neʼmoʼa hunoʼaeʼmo, hosu vekamoʼmo agoti gemo neʼafisiya vekamo geʼamo afiyo. 7Gotiʼa lekana paino apateʼniya vayaʼmogi muki felugaʼaʼe haniʼilagaʼaʼeʼmo aukaya huʼa ge huʼa afige afige nehisagenoʼaeʼmo ani kavaʼmo huno afiteno alino fako huno apateteno afaʼa hapa oʼmaegaifiye. Yatala afinaʼmo apakava maisiyaʼmoʼmo afaʼa hapa maegaiye. 8Lama gemo lapa nepauve, huʼna, malage huno alino fako huno apateteno hapa maegaiyaʼmonanafa Vemo Mafaʼnemo emineno apakesamo afiʼa fatago nehaya vayaʼaina kahauya huno apakesifiye, huno hapa paiʼniye.
Falasi vekaʼe takesi monimo neʼaliya vekaʼefeʼmo huʼniya gemae
9Mago vayaʼmogi Gotifeʼmo apakesamo oʼafiʼa apakaiʼapiyekeʼmo aliʼa amufa apamiʼapaeʼmo, lagaemo alagepa vayaʼmo maiʼnonageʼa alu vayaʼmo afaʼa ina agufa vayaʼmo maiʼnae, huʼa nehaya vayaʼaifeʼmo Yesuʼa ina gemo huno aeno kalafefa gemo huno hapa paiʼniye. 10Lole vekalaʼmoganimo nunumuʼmo hisaʼafeʼmo Yu vayaʼai alopa mono nopiʼmo uʼana haiʼnaʼae. Mago vekamo Falasi vekamo maiʼnigeno alu vekamo takesi moni neʼaliya vekamo maiʼniye. 11#Lu 16:15Falasi vekamoʼmo he tino maiʼneno agaiʼaeʼmo nunumuʼmo huʼniye. Nunumuʼmo hunoʼaeʼmo, Gotiyo, huno, muki alu vayakana huʼna oʼmaiʼnovaʼmofeʼmo kahao keʼmo nehove. Mago kanale kavaʼmo osuge aigofe gemo huteʼa kumayaʼmo alige kumai kavaʼmo huge nehaya vayakana huʼna oʼmaiʼnove. Ani takesi monimo neʼaliya vekagana huʼna oʼmaiʼnove. 12#Aiy 58:2-3; Aep 14:20; Mt 23:23Nagaemo muki saleʼae saleʼaeʼmo neʼyaʼmo neteʼna lole afinaʼmo oʼneʼna mo siʼnove. Nagaemo muki aliʼnova yapatiʼmo naeniʼa yaʼmo aliteʼna magoke yaʼmo nekamuve, huno nunumuʼmo huʼniye. 13#Sam 51:1Huʼniyaʼmonanafa takesi monimo neʼaliya vekamo afagiʼaleʼmo he tino maiʼneno alino maku huno oʼageʼneno haifiʼyaleʼmo neʼamaginoʼaeʼmo, Gotiyo, huno, alagi hosu vekamo maiʼnovanagi kaipamo lanitani huka nateteka kahau huka nato, huno nunumuʼmo huʼniye. 14#Mt 23:12Lapa nepauve, huno, Gotiʼa takesi moni neʼaliya vekaeʼmo hunoʼaeʼmo, naulagaleʼmo fatago vekamo maiʼnane, huno ha paiʼnigeno noʼalegamo fatago vekamo uno maiʼniyaʼmonanafa alu vekamo mago yaʼmo oʼalino afaʼa uʼniye. Gotiʼa muki vayaʼmogimo apakaiʼapi apakiʼapileʼmo aliʼa asaga huʼa neʼatesaya vayaʼai apakiʼapileʼmo alino afepi apategaiyaʼmonanafa Gotiʼa apakaiʼapi apakiʼapileʼmo aliʼa afepi neʼatesaya vayaʼai apakiʼapileʼmo alino asaga huno apategaiye, huno hapa paiʼniye.
Yesuʼa aise mafaʼne anagaʼmo alino auleno apateʼniya gemae
(Mt 19:13-15; Mk 10:13-16)
15Yesuʼa aise mafaʼne anagaʼai apakufaleʼmo ayaʼmo malesiyafeʼmo apavaleliʼa eʼnageʼapaeʼmo geʼamo neʼafiya vayaʼmogi apaketeʼapaeʼmo ge hapauʼnae. 16Ge hapauʼnayaʼmonanafa Yesuʼa aise mafaʼne anagaʼaifeʼmo hunoʼaeʼmo, nagaetegamo eyo, huno huteno, ka akanita apateteta nagaetegamo oʼmeyo, hutapa osiyo. Gotiʼa yagaino neʼapateya kegiʼyafiʼmo ani agufa mafaʼnegana vayaʼmo uʼa haiʼa maigae. 17#Mt 18:3Lama gemo lapa nepauve, huno, vayaʼmogi Gotiʼa yagaino neʼapateya yaʼmo aise mafaʼnemogi neʼaliya kava huʼa noʼalisayana Gotiʼa yagaino neʼapateya kegiʼyafiʼmo afaʼa uʼa ohaigae, huno hapa paiʼniye.
Asole kagemi yaʼamo haneʼniya vekamo Yesutegamo eʼniya gemae
(Mt 19:16-30; Mk 10:17-31)
18 #
Lu 10:25
Mago yagaino neʼapateya vekamoʼmo Yesufeʼmo hunoʼaeʼmo, alagepa tisao, huno, alagepa huʼna maige maige huʼna maisuva yaʼmo alisuvafeʼmo na agufa kavaʼmo hisuve, huno ge huno afi geʼnigenoʼaeʼmo, 19na kava higekaeʼmo nagaefeʼmo alagepa tisao, huka nehane. Ma mopafi vayapatiʼmo mago alagepa vayaʼmo oʼmaiʼnafa Gotikeʼmo magokeʼageʼmo alagepa vekamo maiʼniye. 20#Hat 20:12-16; Loa 5:17-20Goti keʼaepa geʼamo ago afiʼnanana,
kumai kavaʼmo osuvo, vayaʼmo kamitimo apamagigeʼa ofaliyo, kumayaʼmo oʼaliyo, aigofe gemo osuvo, itakaʼafokalaʼmogani anaiyafiʼmo maiʼneka geʼanimo afiyo,
huno ha paiʼnigenoʼaeʼmo, 21mafaʼnemo maiʼnova afinatetiʼmo muki ani keʼaepa gemo akame hume hume eʼna hemeniʼeʼmo akame nehuve, huno ha paiʼnigeno 22Yesuʼa ani gemo afitenoʼaeʼmo, magoke kavaʼatokamo aeka aga seʼnane. Muki kagemi yakamo alika maketi hugeʼa miya faitesageka alisana monimo alika fako huka kagemi yaʼapimo ohaneʼnisaya vayaʼaina apamigenoʼao alagepa yakamo kokuʼnapiʼmo haneno. Ani kavaʼmo hutekaeʼmo eka nakame huvo, huno ha paiʼnigeno 23ani gemo afitenoʼaeʼmo asole kagemi yaʼamo haneʼniyaʼmofeʼmo lusi kava huno aipamoʼmo kana huʼnigeno 24hosu augosamo kaliʼnigeno Yesuʼa agetenoʼaeʼmo, 25kamo afugefamoʼmo nekaya kapiʼmo faleno uno haisiyafeʼmo aiseʼamo lokiya vaiʼniya agufa kavaʼmo haneʼniyaʼmonanafa mago kagemi yaʼe vekamoʼmo Gotiʼa yagaino neʼapateya kegiʼyafiʼmo uno haisiya kavaʼmoʼmo magoʼe huno lusi kava huno lokiya vaiʼniya kavaʼmo haneʼniye, huno ha paiʼnigeʼa 26afiteʼapaeʼmo, ina lagimo maige maige huʼa maisaya yaʼmo afaʼa aligae, huʼa ge huʼa afigeʼnagenoʼaeʼmo, 27#Mk 14:36vayaʼmogimo alagi afaʼa osisaya agufa kavaʼmo Gotiʼa afaʼa hugiye, huno hapa paiʼnigeno 28Pitaʼa hunoʼaeʼmo, afiyo, huno, lagaemo muki yatimo ago ataleta eta kakame nehune, huno ha paiʼnigenoʼaeʼmo, 29lama gemo lapa nepauve, huno, muki vayaʼmogi Gotiʼa yagaino neʼapateya kavatefeʼmo noʼapigi aʼneʼapigi konagaʼapigi itaʼapi afoʼapimogimo mafaʼneʼapigi huʼa apataleʼeʼa maiʼnisaya vayaʼmo 30ma mopafi maiʼnagenoʼaeʼmo Gotiʼa lusi kava huno magoʼe yaʼmo fikumo neʼapamiyanageno henagaʼamo afole aisiya afinaʼmo alagepa huʼa maige maige huʼa maigae, huno hapa paiʼniye.
Yesuʼa napa tali afinaʼmo, faliteʼna he tiguve, huno hapa paiʼniya gemae
(Mt 20:17-19; Mk 10:32-34)
31 #
Lu 24:44
Yesuʼa tuolofuʼa vayaʼmo apaote apavalelinunoʼaeʼmo, afiyo, huno, Yulusalemu taonifiʼmo neʼvisunagenoʼaeʼmo akeyaʼvilagamo Gotitegati gemo alini eʼa aeʼa hakalo huʼa hapa nepaiya vayaʼmogimo Vemo Mafaʼneeʼmo ava gemo huʼa avoʼmo kae maleʼnaya kavaʼmo afole aigiye. 32#Lu 9:22,44Avaleli uʼa alu vayaʼai apayapiʼmo apamisageʼapaeʼmo hosu kigi huʼa atege huʼa faipa huʼa atege apavenatuʼnaʼmo heʼa atege 33nofi kayotetiʼmo amagige huteʼa kamitimo amagisageno faliteno loleʼe magoʼe afinaʼmo utesigeno halate he tigiye, huno hapa paiʼnigeʼapaeʼmo 34#Mk 9:32afiʼa aeto osuʼnae. Ani gemo aepaʼamo afiʼa aeto osisaya agufa gemo fala kiʼniya gemo haneʼniyaʼmofeʼmo alagepa huʼa oʼafiʼnae.
Yesuʼa aulagamo ali huʼniya vekamo alino ayakeno ateʼniya gemae
(Mt 20:29-34; Mk 10:46-52)
35Yesuʼa Yeliko taonimo haopaleʼmo neʼegenoʼaeʼmo mago aulaga ali huʼniya vekamo ka agiʼnaleʼmo maiʼnenoʼaeʼmo muki vayaʼaifeʼmo monieʼmo aukaya huge huge huno maiʼniye. 36Asole vayaʼmo eʼa aiʼa aga seʼa ute ute huʼnageno apaiya gemo afitenoʼaeʼmo, na agufa kavaʼmo nehae, huno ge huno apafi geʼnigeʼapaeʼmo, 37Yesuʼa Nasalasa taonifi vekamo neʼe, huʼa ha paiʼnageno afitenoʼaeʼmo 38#Mt 15:22alopa gefatiʼmo hunoʼaeʼmo, Neviniʼa ala kini vekamo aginagomo Yesuvo, huno, kahau huka nato, huno ge huʼnigeʼa 39hogoteʼa eʼnaya vayaʼmogimo huʼapaeʼmo, ge osuka afaʼa maiyo, huʼa ge hauʼnayaʼmonanafa magoʼe huno ge hunoʼaeʼmo, Neviniʼa ala kini vekamo aginagomo, huno, kahau huka nato, huno ge huʼnigeno 40Yesuʼa eno he tino maiʼnenoʼaeʼmo, avalelita eyo, huno hapa paiʼnigeʼapaeʼmo avaleliʼa eʼnagenoʼaeʼmo, 41kagaemo na kavaʼmo huʼna katesuvafeʼmo nehane, huno ge huno afi geʼnigenoʼaeʼmo, Ala kava nene, huno, naulagaʼnimo alika ayakeka nato, huno ha paiʼnigeno 42#Lu 7:50Yesuʼa hunoʼaeʼmo, kaulagamo afa ageka ayako. Nagaefeʼmo kagesa afika fatago huʼnana kavakamoʼmo alino ayakeno kateʼniye, huno ha paiʼnigeno 43malage huno aulagamo ageno ayaketeno akame huno neʼunoʼaeʼmo Goti agiʼaleʼmo alino asaga hume hume uʼnigeʼa ageteʼapaeʼmo muki vayaʼmogimo Goti agiʼaleʼmo aliʼa asaga huʼa ateʼnae.
Aktualisht i përzgjedhur:
Luki 18: kyg2013
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2013, Wycliffe Bible Translators, Inc. All rights reserved.