Yoni 10
10
Sipisipieʼmo aeno kalafefa gemo huno hapa paiʼniya gemae
1Yesuʼa hunoʼaeʼmo, alagi lama gemo lapa nepauve. Mago vekamoʼa sipisipi anagaʼmogi kegiʼya yuʼilagamo haleno haisiyafeʼmo hunoʼaeʼmo kipatetiʼmo uno ohaino kegiʼya afafafatiʼmo aeno haleno nehaisiya vekamo kumaya vekamo maiʼneno vayaʼmo apamagiteno kumayaʼmo neʼaliya vekamo maiʼniye. 2Kipatetiʼmo uno nehaiya vekamoʼmo sipisipileʼmo neʼyagaiya vekamo maiʼniye. 3Sipisipi anagaʼmogi kipateʼmo yagaiʼniya vekamoʼa kitamo yakino apateʼnigeʼa uʼa nehaiye. Haitenoʼaeʼmo agaiʼa sipisipiʼaeʼmo apaki nehigeʼapaeʼmo agemo neʼafiye. Hogoteno kumatega uno nelaminoʼaeʼmo apaki aeno apaki hulino uno nelamiye. 4#Yo 10:27Agaemo sipisipi anagaʼamo kumatega apavalelinuno hogoteʼnigeʼapaeʼmo sipisipi anagaʼamogi agemo afiʼa aeto nehayaʼmofeʼmo akame huʼa neʼvae. 5Sipisipi anagaʼmogi oʼageʼnaya vekamo afaʼa akame huʼa oʼugae. Oʼageʼnaya vekamoʼmo agemo afiʼa aeto osuʼnayaʼmofeʼmo apaune hegae, huno hapa paiʼniye. 6#Yo 16:25Yesuʼa mani gemo aeno kalafefa gemo huno hapa paiʼniyaʼmonanafa afiʼa aeto osuʼnae.
Yesuʼa alagepa vekamo sipisipileʼmo neʼyagaiya vekamo maiʼniya gemae
7Afiʼa aeto osuʼnayaʼmofeʼmo Yesuʼa halate hapa painoʼaeʼmo, alagi lama gemo lapa nepauve. Nagaemo sipisipi anagaʼmogi kipaʼapimo maiʼnove. 8#Yel 23:1-2; Iyi 34:2-3Nagaemo emiʼnoʼmeʼnogeʼapaeʼmo hogoteʼa kumayaʼmo alige vayaʼmo apamagiteʼa kumayaʼmo alige huʼnaya vayaʼmo eʼnayaʼmonanafa sipisipi anagaʼmogi apakemo afiʼa aeto osuʼnae. 9#Sam 118:20; Yo 14:6Nagaekeʼmo kipaʼapimo maiʼnove. Gotiʼa nagaetetikeʼmo kegiʼya yuʼilagamo eno hainesiya vekamo agufamo alino katino atesigeno alagepa huno maigiye. Eno haineteno uno lamiteno nehunoʼaeʼmo neʼyaʼmo neteno alagepa huno maigiye. 10Kumayaʼmo neʼaliya vekamoʼa kumayaʼmo alige sipisipimo apamagige alino hosu huno apatege hisiyafekeʼmo neʼe. Nagaemo sipisipimo magoʼe huʼa alagepa huʼa maige maige huʼa afaʼa maisayafeʼmo emiʼneʼnove. 11#Sam 23:1; Le 7:17Nagaemo alagepa vekamo sipisipileʼmo yagaiʼna neʼapatova vekamo maiʼnove. Alagepa huno yagaino neʼapateya vekamoʼa sipisipilefeʼmo agaiʼamo afaʼa maisiya yaʼamo ataleteno faligiye. 12#Ap 20:29Miyaʼmo alisiyafekeʼmo aliʼyaʼmo neʼaliya vekamoʼa sipisipileʼmo yagaino neʼapateya vekamo maige sipisipimo afoʼamoʼmo maige osuʼniyaʼmofeʼmo afela kalamo neʼegenoʼaeʼmo apataleno aune hetaleno uʼnigenoʼaeʼmo afela kalamoʼa hapaeno hanilino neʼvigeʼapaeʼmo ataleʼa atagu faeʼa uʼeʼa nehae. 13Miyaʼmo alisiyafeʼmo aliʼyaʼmo neʼaliya vekamoʼa miyaʼmo alisiyafekeʼmo agesa afiteno sipisipi anagaʼaifeʼmo agesamo noʼafiyaʼmofeʼmo ataleno aune hetaleno uʼniye. 14-15#Mt 11:27; Yo 10:27; 15:13; 2 Ti 2:19; 1 Yo 3:16Nagaemo alagepa vekamo sipisipileʼmo yagaiʼna neʼapatova vekamo maiʼnove. Afoʼnimoʼmo nageʼnigeʼna afoʼnimoʼmo ageʼnova kava huʼna nagaemo sipisipi anagaʼnimo apakeʼnogeʼa nagaemo nageʼnae. Ani kava huʼna sipisipi anagaʼnilefeʼmo afaʼa maisuva yaʼnimo ataleʼna faliguve. 16#Aiy 56:8; Yo 11:52; 1 Pi 2:25; Iyi 34:23; 37:24Mago nagae sipisipimo mani kegiʼyafiʼmo hai eʼa oʼmaiʼnae. Nagaemo apakaemo apavaleliʼna egauve. Nagemo aisugeʼapaeʼmo afiʼa aeto huteʼa eʼa magoke sipisipi anagaʼmo maisageno magoke vekamo sipisipileʼmo yagaino apatesiya vekamo maigiye. 17#Fl 2:8-9Afaʼa maisuva yaʼnimo alisuvafeʼmo afaʼa maisuva yaʼnimo atalegauvaʼmofeʼmo Afoʼnimoʼmo nagaefeʼmo hau ayamopafiʼmo hauʼniye. 18#Yo 5:26; 14:31; 19:11Mago vekamoʼmo afaʼa maisuva yaʼnimo nayapatiʼmo naha faleno oʼatalegaiyaʼmonanafa nagaiʼnimo nagesa afiteʼna atalegauve. Afaʼa maisuva yaʼnimo ataleteʼna halate alisuvafeʼmo himamuʼnimo ago aliʼnove. Afoʼnimoʼa ani kavaʼmo huvo huno naha paiʼniyaʼmofeʼmae, huno hapa paiʼniye. 19#Yo 7:43Ani gemo afiʼnagenoʼaeʼmo halate alino fako huno apateʼniye. 20#Yo 7:20; 8:48Asole vayaʼmogi huʼapaeʼmo, hosu aune vekamo aipafiʼmo maiʼnigenoʼaeʼmo negi gemo nehiye. Na kava higetapaeʼmo geʼamo neʼafiye, huʼa huʼnageʼapaeʼmo 21mago vayaʼamogi huʼapaeʼmo, hosu aune vekamo aipafiʼmo maiʼnisiya vekamoʼa ani agufa gemo afaʼa osugiye. Hosu aune vekamoʼa aulagamo ali huʼnisiya vekamo aulagamo afaʼa alino ayakeno oʼategaiye, huʼa huʼnae.
Yesuʼmo apakameʼyamo amiʼnaya gemae
22-23Yulusalemu taonifiʼmo hopa afinaʼmo alopa mono no kitamo yakiʼnaya afinafeʼmo apakesamo afisayafeʼmo hopa afinaʼmo afole aiʼniye. Ani afinaʼmo yasimo neʼaliya afinaʼmogeno Yesuʼa ani alopa mono noʼmo kapaʼamo osuʼnaya noʼmo agiʼamo Salomoni hiyato nopiʼmo uneno huno maiʼniye. 24#Ap 3:11; 5:12; Lu 22:67Uneno nehigeʼapaeʼmo Yu vayaʼmogi faiʼa ku aiʼa ateʼneʼapaeʼmo, lole lagesa neʼafunagi na magi afinaʼmo laha opaika afaʼa maigane. Kalaisi vekamo maiʼnisanana huka haleka laha paiyo, huʼa ha paiʼnagenoʼaeʼmo, 25#Yo 4:26; 5:36; 10:38ago lapa paiʼnovana oʼafiʼnae. Afoʼnimo agiʼalefeʼmo nehuva kavaʼmoʼa nagaefeʼmo faigoko geʼnimo huno naha maeno nehiya gemo nehiye. 26#Yo 6:64; 8:45Ge nehiyaʼmonanafa lapakaemo sipisipi anagaʼnimo oʼmaiʼnayaʼmofeʼmo lapakesamo afita fatago nosae. 27#Yo 8:47; 10:3Nage neʼaugeʼapaeʼmo sipisipi anagaʼnimogi nagemo neʼafiye. Apakeʼna aeto huʼnogeʼa nakame nehae. 28#Yo 3:16; 6:39; 18:9Nagaemo maige maige huʼa maisaya yaʼmo aliʼna neʼapamuvanageʼa alagi ofaligae. Mago vayaʼmogi eʼa nayapatiʼmo aliʼa naha faleʼa oʼapatalegae. 29Afoʼnimoʼa sipisipi anagaʼamo apavalelineno neʼnamiya vekamoʼmo muki vayaʼaina ago aeno apakaseʼniyanageʼa muki vayaʼmogi Afoʼnimo ayapatiʼmo afaʼa aliʼa ha ofalegae. 30Nagaeʼe Afoʼnimoʼeʼmo magoke aiyaya vekalaʼmo maiʼnoʼae, huno hapa paiʼnigeʼapaeʼmo 31#Yo 8:59Yu vayaʼmogimo halate yafa kayotetiʼmo amagisayafeʼmo huʼnae. 32Yesuʼa hunoʼaeʼmo, Nagaemo asole alagepa kavaʼmo Afoʼnimoʼmo huvo, huno naha paiʼniya kavaʼmo huʼna lapave liʼnove. Muki nehuva kavapatiʼmo haiya agufa kavatefeʼmo lapakesa afitetapaeʼmo namagisayafeʼmo nehae, huno apafi geʼnigeʼapaeʼmo, 33#Mon 24:16; Mt 26:65; Yo 5:18alagepa kavaʼmo huʼnanaʼmofeʼmo kamagisunafeʼmo nosunaʼmonanafa Gotifeʼmo huka faipa huka neʼatanaʼmofeʼmo kamagisunafeʼmo nehune. Ina agufa vekamo maiʼnanaʼmonanafa Gotiʼnamo maiʼnove, huka nehanaʼmofeʼmae, huʼa ha paiʼnagenoʼaeʼmo, 34#Sam 82:6Gotiʼa lapakae keʼaepa gemo avoʼmo kae maleʼniya mukufiʼmo huʼniya gemoʼa hunoʼaeʼmo, gotikana hutapa maiʼnae, huno huʼniye. 35#Mt 5:18Ago afiʼnonana Goti mukufi haneʼniya gemo alagi lama gemo hanege hanege huno haneʼneno hano osisiya agufa gemo haneʼniye. Goti mukufiʼmo haneʼniya gemoʼa Goti geʼamo alino apamiʼniya vayaʼaifeʼmo, gotikana hutapa maiʼnae, huno hapa paiʼniye. 36Gotiʼa ani gemo ma mopafi vayaʼaifeʼmo huʼniyaʼmonanafa nagaemo huʼnaeʼmo, Goti mafaʼneʼamo maiʼnove, huʼna huʼnovaʼmofeʼmo muki yaʼmo Afoʼamoʼmo aote vekamo lekana paino ateʼnenoʼaeʼmo alino ateʼnigeno emineʼniya vekaeʼmo, Gotifeʼmo huka faipa huka neʼatane, hutapa nehafiye. 37Nagaefeʼmo Afoʼnimoʼmo huvo huno naha paiʼniya kavaʼmo nosisuvana nagaefeʼmo aigofe gemo nehiye, hutapa hiyo. 38#Yo 14:10-11Nehisuvana nagaefeʼmo alagi lama gemo nehiye, hutapa hiyo. Nagaefeʼmo lapakesa afita fatago nosayaʼmonanafa Gotiʼa nehiya agufa kavaʼmo nehisuvana Afoʼamoʼa agaepiʼmo maiʼnigeno agaemo agaepiʼmo maiʼniye, hutapa hisayafeʼmo nehuva kavafeʼmo lapakesa afita fatago hiyo, huno hapa paiʼnigeʼapaeʼmo 39#Lu 4:30; Yo 8:59halate atafausayafeʼmo huʼnayaʼmonanafa ago faino kasalo paeno uʼniye.
40 #
Yo 1:28
Yesuʼa apataleno atagi neno uno Yoneni aniʼmo lakaeno mugagayaga faligamo Yoniʼa aniʼmo faleno apateʼniya yategamo magoʼe afinaʼmo maiʼniye. 41Maiʼnigeʼapaeʼmo asole vayaʼmo agaetegamo eʼa apakaemo huʼapaeʼmo, Yoniʼa noʼagona agufa aune kavaʼmo osuʼniyaʼmonanafa muki geʼamo ani vekaeʼmo ava gemo huʼniya gemo alagi lama gemo huʼniye, huʼa huʼnae. 42#Yo 7:31Inagi ani haopalegatiʼmo asole vayaʼmogi agaefeʼmo apakesamo afiʼa fatago huʼnae.
Aktualisht i përzgjedhur:
Yoni 10: kyg2013
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2013, Wycliffe Bible Translators, Inc. All rights reserved.