Apa 6
6
Apa vayaʼmo hapa maesaya vayaʼmo lekana paiʼa apateʼnaya gemae
1 #
Ap 4:35
Yesu geʼamo neʼafiya vayaʼmo magoʼe huʼa asole vayaʼmo afole aiʼnageʼapaeʼmo Galiki apakemo neʼaiya Yu vayaʼmogimo Himulu apakemo neʼaiya Yu vayaʼaifeʼmo huʼapaeʼmo, Kogu aʼnetimo muki afinaʼae afinaʼaeʼmo aliʼa fako huʼa neʼapamiya monifatiʼmo noʼapamiye, huʼa ge hapauʼnae. 2Inagi tuolofuʼa apa vayaʼmogi muki geʼamo neʼafiya vayaʼaifeʼmo ge huʼnageʼa eʼnageʼapaeʼmo, Lagaemo fiku Goti geʼamo aeta hakalo huta hapa nepauna aliʼyatimo ataleta monimo alita fako huta apamisunana kanale osugiye. 3#1 Ti 3:7Vayatimogitapae, huʼa, Lapakaitapigeʼmo lapakaepati mago seveniʼa vayaʼmo lekana paitapa apateyo. Kanale vayaʼmo Goti Aunemeʼamoʼmo apaipafiʼmo havai teʼnisiya vayaʼmogi alagepa huʼa apakesa neʼafiya vayaʼmo lekana paita apateteta aliʼa fako huʼa apamisaya aliʼyaʼmo apamigune. 4Lagaemo magoke aliʼyaʼageke alita maiʼnetaeʼmo muki afinaʼmo nunumuʼmo huge Goti gemo aeta hakalo huta hapa paige huta maigune, huʼa hapa paiʼnae. 5#Ap 8:5Hapa paiʼnageʼapaeʼmo muki vayaʼmogimo amuse huteʼapaeʼmo, kanalene, huʼa huteʼa Sitiveniʼa Gotifeʼmo alagepa huno agesamo afino fatago huʼnigeno Goti Aunemeʼamoʼmo aipafiʼmo havai teʼniya vekagi Filipiʼagi Polokolasiʼagi Naikenaʼagi Taimoniʼagi Pamenasiʼagi Nikolasiʼagi huʼa lekana paiʼa apateʼnae. Nikolasiʼa Atiyoki kotega vekamo Yu vayapati vekamo oʼmaiʼniyaʼmonanafa Yu mono gemo afiteno Yu vayapiʼmo eno maiʼniya vekamae. 6#Ap 13:3; 14:23Apakaemo apavaleliʼeʼa apa vayaʼai apaulagaleʼmo he tiʼnageʼa apakufaleʼmo apayaʼmo maleʼneʼa nunumuʼmo huʼa apateʼnae.
7 #
Ap 2:41; 16:5 Inagi Goti geʼamoʼmo muki haopalegamo aino atagu faeno uneno huʼniye. Yulusalemu taonifiʼmo maiʼnaya vayapatiʼmo Yesu geʼamo neʼafiya vayaʼmo magoʼe magoʼe huʼa afole aiʼnae. Mono huʼa neʼapataya vayaʼmo asole vayaʼmogimo apakesamo afiʼa fatago huteʼa akame huʼnae.
Sitiveniʼa kalavusi huʼa ateʼnaya gemae
8 #
Ap 2:43
Sitiveniʼa agesamo afino fatago huʼniya kavaʼe lokiyaʼaʼeʼmo aipafiʼmo havai teʼnigeno noʼagaya agufa lokiya aune kavaʼmo Yu vayaʼaitegamo huʼniye. 9#2 Ti 1:15Mago vayaʼmo Yu vayaʼai mono nopiʼmo aliʼa anupa huʼa maiʼnae. Ani mono noʼmo agiʼamo vayaʼmo kalavusi aliʼyaʼmo neʼaligeʼapaeʼmo hatu maeʼa apateʼnageʼa afaʼa uʼnaya vayaʼai mono none, huʼa agi ateʼnae. Ani vayaʼmo Yu vayapatiʼmo Sailini kotega vayaʼe Alekasani kotega vayaʼeʼmo maiʼnae. Apakaegi Silisiya kotega vayanagi Esiya kotega vayanagi huʼa Sitiveniʼa huʼniya geletiʼmo he tiʼa ge vaiʼnae. 10#Lu 21:15Goti Aunemeʼamoʼmo alagepa agesa afi yaʼmo amiʼnigeʼa Sitiveniʼa huʼniya geleʼmo ge huʼa aeʼa oʼagaseʼnae. 11#Mt 26:59-61Apakaemo mago vayaʼmogi eʼa aigofe gemo hisayafeʼmo kesi katetiʼmo uʼa aliʼa he tiʼa apateʼnageʼa eʼa hapa paiʼapaeʼmo, Ago afiʼnonana Moseseʼe Gotiʼefeʼmo huno faipa huno anateʼniye, huʼa hapa paiʼnageʼa 12afiteʼapaeʼmo muki vayanagi yagaiʼa neʼapataya vayatama vayanagi keʼaepa gemo aliʼa apaya neʼmalaya vayanagi huʼa he ti uʼa Sitiveniʼmo atafauʼa kanisole vayaʼaitegamo avaleliʼa uʼnae. 13#Yel 26:11Apakaemo mago vayaʼmogimo aigofe faigoko gemo hisayafeʼmo apavaleliʼeʼa apateʼnageʼapaeʼmo, Mani vekamoʼmo lagae mono noʼe keʼaepa geeʼmo huno faipa huno ateʼniye. 14Geʼamo afiʼnonana ani Nasalasa taonifi vekamo Yesuʼa alopa mono notimo heno halagape vaiteno Mosese keʼaepa gemo alino ataleteno alu gemo malegaiye, huno huʼnigeta afiʼnone, huʼa hapa paiʼnae. 15Kanisole vayaʼai nopiʼmo maiʼnaya vayaʼmogimo aulu haeʼa ageʼnayana Sitiveni augosamoʼmo enisole vekamo augosagana huʼnigeʼa ageʼnae.
Aktualisht i përzgjedhur:
Apa 6: kyg2013
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2013, Wycliffe Bible Translators, Inc. All rights reserved.