Vargje biblike të njohura nga Matius 6

Ndaje

Mar yang paleng panting tu, usaha biar Allah pegang parenta jadi Raja dalang kamong pung hidop deng biar kamong iko Antua pung mau, la Antua nanti kasi samua yang kamong parlu tu jua par kamong.

Jadi jang balisa soal eso, tagal eso tu akang pung susa sandiri lai. Susa sahari cukup par sahari sa.”

Yesus bilang lai kata, “Tagal itu, dengar Beta bilang par kamong! Jang balisa soal kamong pung hidop, soal apa yang nanti kamong makang ka minong. Ka, jang balisa soal kamong pung badang, soal apa yang nanti kamong pake. Masa kamong seng tau kalo hidop tu labe panting dari makanang deng badang tu labe panting dari pakiang?

Mar kalo kamong sombayang, maso dalang kamar, tutu pintu, la sombayang par kamong pung Bapa yang kamong seng bisa lia tu. La kamong pung Bapa yang lia apa yang kamong biking yang orang seng lia tu, Antua nanti balas akang par kamong.

Jadi kalo kamong sombayang, sombayang bagini: Sio katong pung Bapa di sorga. Katong minta biar samua orang taru hormat par Bapa. Katong minta biar Bapa pegang parenta jadi Raja par samua orang deng biar Bapa pung mau jadi di dunya ni, sama deng yang jadi di sorga.

Katong minta biar Bapa kasi makanang yang katong parlu hari ini.

Sio Bapa e! Tolong kasi ampong katong pung dosa-dosa jua, sama deng katong jua kasi ampong orang-orang yang biking sala par katong.

La jang kasi tinggal katong dapa coba par biking dosa. Mar, kasi salamat katong jua dari Setang pung Raja pung kuasa. [Tagal Bapa tu Raja, deng yang pung kuasa par samua-samua, deng yang pantas par dapa puji tarus-tarus. Amin.]

Kalo kamong kasi ampong orang yang biking sala par kamong, kamong pung Bapa di sorga jua kasi ampong kamong pung dosa-dosa lai.

Coba lia burung-burung di langit. Akang seng bakabong, seng ambe hasil, deng seng simpang makanang dalang gudang, mar kamong pung Bapa di sorga kasi makang akang. Masa kamong seng tau kalo par Antua kamong labe panting dari burung-burung tu?

Yesus bilang lai kata, “Jang kumpul harta par kamong di dunya ni, tagal nanti mai-mai deng karat biking rusak akang deng pancuri datang pancuri akang. Mar yang batul tu, kumpul harta par kamong di sorga, tagal mai-mai deng karat seng bisa biking rusak akang, deng pancuri jua seng bisa datang pancuri akang. Barang, kalo kamong pung harta ada di mana, kamong pung hati ada di situ lai.

Seng ada satu orang lai yang bisa karja par dua bos, tagal dia nanti binci satu la sayang yang laeng ka dengar-dengarang satu la seng dengar-dengarang yang laeng. Bagitu lai deng kamong. Kamong seng bisa hidop par Allah deng jua hidop par harta dunya!”

Jadi, kalo rumpu liar yang hari ini ada mar eso su dapa bakar tu sa Allah kalesang akang, apalai kamong? Antua pasti kalesang kamong labe dari rumpu liar tu, hoe orang-orang yang kurang parcaya e!

Mar, kalo kamong kasi apapa par orang kasiang, jang orang tau. Akang macang deng apa yang tangang kanang kasi, tangang kiri seng tau. Kasi akang tado-tado. La kamong pung Bapa yang lia apa yang kamong biking yang orang laeng seng lia tu, Antua nanti balas akang par kamong.”

Yesus bilang lai kata, “Basudara e, inga bae-bae! Jang biking apa yang batul di muka orang deng maksud biar dong lia kamong. Kalo kamong biking bagitu, jang harap kamong pung Bapa di sorga nanti balas apa yang kamong su biking tu.

Yesus bilang lai kata, “Kalo kamong puasa, jang biking muka kasiang macang deng orang munafik biasa biking biar orang tau kalo dong ada puasa. Dengar bae-bae tagal apa yang Beta bilang ni batul! Orang yang biking macang bagitu su dapa dong pung bagiang. Mar kalo kamong puasa, kamong musti basu muka barsi-barsi deng kalesang kamong pung rambu, biar orang seng tau kalo kamong ada puasa. Cuma kamong pung Bapa yang kamong seng bisa lia tu yang tau. La kamong pung Bapa yang lia apa yang kamong biking yang orang seng lia tu, Antua nanti balas akang par kamong.”