Vargje biblike të njohura nga Xhun 1

Ndaje

Pet jankʼalxh oʼ, uvaʼ qat kʼulun, tul qat quqeja kame u tiqleʼm. Aʼetz oʼe uvaʼ qat taqʼ qiqleʼm, tiʼ uvaʼ, oʼ vet kʼaol imeʼal quBʼaal Tiuxh.

Atichxh vet u Alol Inuqul u tatin quBʼaal Tiuxh uvaʼs ixeʼt tzaan u qʼij saq. Tul atichxh u Alol Inuqul u tatin quBʼaal Tiuxh s-kʼatza bʼenamen. Tul antichxh Tiuxh u Alol Inuqul u tatin quBʼaal Tiuxh.{*}

Aʼetz vet u Alol Inuqul u tatin quBʼaal Tiuxh qat alon inuqul xoʼl inqʼa xaol, eche itxiqun vaʼq txiqubʼal tu tokto. Tul yeʼletz inqʼa xaol, inqʼa bʼanol tetz yeʼbʼaʼn, qat oleʼv tiʼ imaqtxʼ talax u tatin quBʼaal Tiuxh s-xoʼl, eche yeʼ laʼ toleʼv u tokto tiʼ imaqtxʼ itxiqun u txiqubʼal.

Bʼenetz vet u Alol Inuqul u tatin quBʼaal Tiuxh s-vaʼl alam aanima. Tul atin vet s-quxoʼl. Tul tira motx qila uvaʼ mam yol u tatineʼ, tan, tiʼ uvaʼ, aʼ iqʼomal tzaan taʼn uvaʼ mam yol tatin u quBʼaal Tiuxh. Tul taʼn kuxhte invaʼl, yeʼxhabʼil vaʼt eche. Tul tira motx tal inuqul s-qe tiʼ u quBʼaal Tiuxh.{*}

Tan antxh quBʼaal Tiuxh alon iviinqixsal jankʼal inqʼa kam s-kaqaayil te u Alol Inuqul u tatineʼ. Aʼetz u Alol inuqul u tatin quBʼaal Tiuxh viinqixsan kaqaayil inqʼa kam. Tan yeʼl invaʼq kam ati uvaʼ jit koq aʼ viinqixsan. Tul aʼ u Alol Inuqul u tatin quBʼaal Tiuxh vixeʼal u qʼij saq. Tul aʼ qat ul kʼutxhun u tatin quBʼaal Tiuxh te inqʼa xaol uvaʼ, aʼe vinuqul, eche itxiqun vaʼq txiqubʼal qat ikʼutxht te inqʼa xaol.{*}

Echetz vet eqal, tul til Xhun taqʼbʼ Jesuus s-kʼatza. Tul ech tal Xhun s-eche: —Il naq u Vinaq jay tuleʼ, uvaʼ toq oksaloq vatz Tiuxh, eche nik toksal vaʼq chelem karneʼl vatz Tiuxh. Tan quBʼaal Tiuxh qat aqʼon tzaan tiʼ ikuyux vipaʼv inqʼa xaol, tul yeʼ laʼ bʼen vet tu kʼaxkʼo tiʼ itxhojt inqʼa ipaʼv, kʼuxh kamxh xaolil vatz txʼavaʼ.

Atz aʼe, uvaʼ viinqixsan jankʼal inqʼa kam vatz txʼavaʼ tixeʼtebʼal qʼij saq. Yaʼnetze ul vet u Txiqubʼal vatz txʼavaʼ. Kʼuxhetz eche, tan tira yeʼ motx bʼen te inqʼa xaol vatz txʼavaʼ u tiqleʼm u Txiqubʼal. Aʼetz ulk vatz u txʼavaʼ uvaʼ iviinqixsa s-tetz. Tul yeʼ kʼulux taʼn inqʼa imol s-tijaq imam Israeel.

Tan yaʼnaʼqich u Alol Inuqul u tatin quBʼaal Tiuxh laʼich ul vatz txʼavaʼ uvaʼ tzajnaʼq kʼatz quBʼaal Tiuxh uvaʼ laʼich ul alon vet vinuqul inqʼa yol tiʼ quBʼaal Tiuxh xoʼl jankʼal inqʼa xaol vatz txʼavaʼ, eche itxiqun vaʼq txiqubʼal xoʼl xaol laʼich tuleʼ.{*}

Bʼantan bʼaʼn inqʼa bʼekʼbʼal uvaʼ taqʼ ka Moisees te inqʼa kʼuy qumam uvaʼ taqʼ quBʼaal Tiuxh s-te. Petetz koq vet uvaʼ ul ibʼan JesuKriisto, tan palnaʼq vet s-tiʼ. Tan tira mam bʼaʼnil ul ibʼan JesuKriisto tiʼ ikuyux inqʼa qupaʼv. Tul tira ul tal vinuqul s-qe tiʼ u quBʼaal Tiuxh.