If you have would like a copy of this version please contact info@davaraudiobibles.org

The Gofa Bible, CC-BY-SA-4.0, The Word for the World International and The Word for the World Ethiopia. (Text). Gofa Audio Bible, CC-BY-SA-4.0, Davar Partners International, 2018. (Audio).

ጌሻ ማፃፋ

The Word for the World International and The Word for the World Ethiopia

የሱሲ ባ ታማረታኮ፥ “አሰ በድ ናጋራን ገልስያባይ ዮና አገና። ግዶሽን፥ ናጋራን ገላና መላ ኦያ ኡራ አየ!” ያግስ። ሄ ኡራይ ካሎታፐ እሱዋ ባለናፐ ዎፃ ባ ቆን ቃችድ አባን ዉልኮ እያዉ ሎኦ። ሄሳ ግሾ ናገትተ።
“ነ እሻይ ናጋራ ኦኮ ሀንቀታ፤ ቂሮትድ ማሮተን ስምኮ፥ እያዉ አቶ ያጋ። እስ ጋላሳን ላፑን ቶሆ ቆህድ፥ ላፑን ቶሆ፥ ‘ታኒ ታ ናጋራ ኤራስ ታና ማራ’ ያግድ ኔኮ ዪኮ እያዉ አቶ ጋ።”
ሀዋረት ጎዳኮ፥ “አማኖ ኑስ ጉጃርክ” ያግዶሶና።
ጎዳይ፥ “ጋሸ አይፈ መላ አማኖይ ህንተዉ ደእኮ ‘ሀይሳ ዎላ ሾደታዳ አባ ግዶን ቶከታ’ ያግኮ ህንተዉ ኪተታና” ያግስ።
ጉጅድካ የሱሲ፥ “ህንተ ግዶፈ እሱዋስ ጎሻንቾይ ዎይኮ ዶርሰ ሄምያ አይለይ ደእኮ ኦሶ ጋደፐ ዎይኮ ዉደፐ ሶ ስምያ ዎደ፥ ‘ኤለ ሃያዳ ካ ማናዉ ኡታ’ ያገይ ደኢ? ዴና፥ ‘ታዉ ካሆ ጊግሳ፤ ታኒ ማዳ፥ ኡያዳ አጋና ጋካናዉ ኤቃዳ ሙዛ። ሄሳፈ ጉየ፥ ኔኒ ቃስ ማሳነ ኡያሳ’ ያገነዬ? ህዛ፥ ጎዳይ፥ አይለይ ኪታ ፖልዳ ግሾ አንጅዬ? ሄሳ ግሾ፥ ህንተካ ኪተቶይሳ ኡባ ፖልዳ ዎደ፥ ‘ኑ ፓና አይለታ፤ ኦናዉ በሲያ ኦሱዋ ፖልዳ’ ያግተ” ያግስ።

የሱሲ የሩሳላመ ብሸ ሳማርስነ ጋልላስ ግዶራ ካንድ አስ። እስ ጉታ ገልያ ዎደ ባሮ ሀርገን ኦይከትዳ ታሙ አሳት እያ ደምዶሶና። ኤንትካ ሃሆን ኤቅድ፥ “ጎዳ የሱሳ፥ ኑስ ቃታርክ” ያግድ ዋስዶሶና።
እ ኤንታ በእዳ ዎደ፥ “ብድ ህንተናተ አይሁደ ካህነ በስተ” ያግስ። ኤንቲ ኦግያ ቦላ ብሸ ፓፅዶሶና።
ኤንታፈ እሶይ ባ ፓፁዋ በእዳ ዎደ ቁ ግዳ ቃላን ፆሳ ቦንችሸ የሱሳኮ ስምስ። እ፥ ሳማረ ቢታ አስ፥ ሽን የሱሳ ቶሆ ቦላ ጉፋንድ እያ ጋላትስ።
የሱሲ፥ “ፓፅዳይ ታሙ አሳታ ግዶኮናዬ? ያትን፥ ኡዱፉናት አዉ ብዶና? ሀ አላጋ ኡራፐ አትሽን፥ ሀር ስሚድ ፆሳ ጋላተይ ዴና ጉሰዬ?” ያግድ ኦይችስ። ኡራኮ፥ “ነ አማኖይ ነና ፓስ፤ ደንዳዳ ባ” ያግስ።


ፋርሳወት፥ “ፆሳ ካዎተይ አዉደ ያኔ?” ግድ የሱሳ ኦይችዶሶና። እ፥ “ፆሳ ካዎተይ በንትያ ማላን ዬና። ቃስካ እያ፥ ‘ሀንና ዎይኮ ህንና ያጋናዉ ዳንዳኤና። አይስ ጊኮ፥ ፆሳ ካዎተይ ህንተ ግዶን ደኤስ’ ” ያግድ ዛርስ።
የሱሲ ባ ታማረታኮ፥ “አሳ ናአ ጋላሳታፐ እሱዋ በአናዉ ህንተ አሞትያ ዎደይ ያና፥ ሽን ህንተ በኤከታ። አሳይ፥ ‘እ ያን ደኤስ’ ዎይኮ፥ ‘ሀይሳን ደኤስ’ ያጋና፥ ሽን ኤንታና ካልድ ቦፕተ። ዎልአን ዎልአምድ ሳሎ ጋፃፐ ጋፃ ፖእስያ መላ አሳ ናኣ ዩሳ ጋላሳይ ሄሳዳ ሀናና። ሽን ሄስ ሀናናፐ ስን አሳ ናአይ ዳሮ ዋያናዉነ ሀ የለተን እፀታናዉ በሴስ። ኖሄ ዎደ ሀንዳይሳ መላ አሳ ናአ ዎደን ሄሳዳ ሀናና። ኖሄይ ማርካብያን ገልዳ ቃማ ጋካናዉ አሳይ ምሸነ ኡይሸ፥ ኤክሸነ ገልሸ ደእሽን ዮ ሃይ ይድ ኡባ ይስስ። ሎፀ ላይንካ ሄሳ ሀንስ። አሳይ ምሸነ ኡይሸ፥ ሻምሸነ ባይዝሸ፥ ቶክሸነ ኬፅሸ፥ ጋምእዶሶና። ሎፀይ ሶዶመፐ ከይዳ ጋላስ ዲነ ጌተትያ ፁግያባይ ሳሎፐ ቡክድ ኡባ ይስስ። አሳ ናአይ ቆንጭያ ዎደካ ሄሳዳ ሀናና።
“ሄ ጋላሳን ካረን ደእያ ኦንካ ኬ ግዶን ደእያባ ኤካናዉ ሶ ገሎፖ። ሄሳዳካ፥ ጋደን ደእያ አስ አይኮስካ ሶ ስሞፎ። ሎፀ ማችዉ አኬክተ፤ ባ ሸምፕዉ አሻናዉ ኮይያ አስ ኦንካ ይሳና፤ ባ ሸምፕዉ አድ እምያ ኦንካ እ አሻና። ታ ህንተዉ ኦዳይስ፤ ሄ ጋላሳን ናምኡ አሳት እስ አርሳን ዝንአና፤ እሶይ ኤከታና፥ ሀንኮይ አታና። ናምኡ ማጫሳት ዎላ ጋጭሽን ኢስያ ኤከታና፥ ሀንክያ አታና። ናምኡ አሳት ዎላ ጋደን ጎየይሳታፐ እሶይ ኤከታና፥ ሀንኮይ አታና” ያግስ።
ኤንቲ፥ “ጎዳዉ አዉ ኤከታኔ?” ያግድ ኦይችዶሶና።
እ፥ “ባዉት ደእያ በሳን አንኮት ሺቆሶና” ያግስ።

Dëgjoj ሉቃሳ 17