If you have would like a copy of this version please contact info@davaraudiobibles.org

The Gofa Bible, CC-BY-SA-4.0, The Word for the World International and The Word for the World Ethiopia. (Text). Gofa Audio Bible, CC-BY-SA-4.0, Davar Partners International, 2018. (Audio).

ጌሻ ማፃፋ

The Word for the World International and The Word for the World Ethiopia

ሄሳፈ ጉየ፥ የሱሲ ፅብራዶሳ ጌተትያ ጋልላ አባፈ ሄፍን ፕንስ። እ ሀርጋንቾታ ፓሶን ኦዳ ማላታ በእዳ ግሾ፥ ዳሮ አሳይ እያ ካልዶሶና። የሱሲ ዙማ ቦላ ከይድ፥ ያን ባ ታማረታራ እስፈ ኡትስ። አይሁደት ቦንችያ ፓስካ ባኣለ ጋላሳይ ጋክስ። የሱሲ ዳሮ አሳይ ባኮ የይሳ በእድ ፍልጶሳኮ፥ “ሀ አሳ ኡባ ሙዛናዉ ግድያ ካ አዉፐ ሻማኔ?” ያግስ። እ ሄሳ ፍልጶሳ ፓጫናዉ ግስፐ አትሽን፥ እ ባ ሁጰን አይ ኦነኮ ኤሬስ።
ፍልጶስ ዛሪድ የሱሳኮ፥ “ሀር አቶሽን፥ ሁጰን ሁጰን፥ እስ እስ ባርስ ጋናዉ፥ ናምኡ ፄቱ ድናረን ኡይ ሻምንካ ግደና” ያግስ።
ቃስ የሱሳ ታማረታፐ እሶይ፥ ስሞን ጰፅሮሳ እሻይ እንድርያስ፥ “እቻሹ ባንጋ ኡይነ ናምኡ ሞሎ ኦይክዳ እስ ናአይ ሀይሳን ደኤስ፥ ሽን ሀ አሳ ኡባስ ሄስ አይ ማዳኔ?” ያግስ።
የሱሲ ባ ታማረታኮ፥ “አሳ ኡትስተ” ያግስ። ሄ በሳን ዳሮ ማት ደኤስ፤ አሳ ኡባይ ኡትስ። አደ አሳ ታይቦይ እቻሹ ሙኩሉ ግዳና። የሱሲ ኡይ ኤክድ ፆሳ ጋላት ስሚድ ያን ኡትዳ አሳስ ግሽስ። ሞሉዋካ ኤክድ ሄሳዳ ኦድ እምን፥ አሳይ ባ ኮይዳይሳ መላ ምስ። ኤንቲ ኡባይ ካልዳፐ ጉየ፥ የሱሲ ባ ታማረታኮ፥ “እስባይካ ኢቶና መላ አትዳ ቲፍያ ሺሽተ” ያግስ። ሄሳ ግሾ፥ ኤንቲ ኡባ ሺሽዶሶና። አሳይ ምን አትዳ ባንጋ ኡይ ቲፍያ ሺሽድ ታማነ ናምኡ ጋይታ ኩንዶሶና።
አሳይ የሱሲ ኦዳ ማላታታ በእዳ ዎደ፥ “ሀይስ ቱማ ሀ አላምያ ያና ጌተትዳ ናብያ” ያግዶሶና። የሱሲ ኤንቲ እያ ኦይክድ ዎልቃን ካዎ ኦናዉ ሀነይሳ ኤርድ፥ ባርካ ዙማ ቦላ ዛሪድ ከይስ።


ሳአይ ኦማርስዳ ዎደ የሱሳ ታማረት አባኮ ዎዶሶና። ሳአይ ቃምዳ ግሾነ የሱሲ ቡሮ ኤንታኮ ይቦና ግሾ እያ ታማረት ዎጎሎን ገልድ አባ ፕንድ ቅፍርናሆማ ባናዉ ደንድዶሶና። ዎልቃማ ጫርኮይ ጫርክዳ ግሾ አባይ ቃፄስ። እቻሹ ዎይኮ ኡሱፑን ክሎ ምትረ ግደይሳ መላ ኤንቲ አባ ፕድ ብዳፐ ጉየ፥ የሱሲ አባ ቦላራ ሄመትሸ የይሳ በእድ ያይዶሶና። ሽን እ፥ “ባቦፍተ፥ ታና” ያግስ። ኤንቲ ኡፋይትድ እያ ዎጎሉዋን ገልስዶሶና፤ ኢራካ ዎጎሎይ ኤንቲ ብያ አባ ጋፃ ጋክስ።

ዎንተ ጋላስ አባፈ ሄፍንን አትዳ ዳሮ አሳይ እስ ዎጎሎ ፃላል ደኤይሳ በእዶሶና። የሱሲ ባ ታማረታራ ዎጎሉዋን ገልድ፥ ኤንታራ ቦናይሳነ ኤንቲ ባንታርካ ብዳይሳ አኬክዶሶና። ሽን ፅብራዶሳፐ ሀራ ዎጎሎት የሱሲ ፆሳ ጋላትን፥ አሳይ ኡይ ምዳ በሳ ይዶሶና። አሳይ የሱሲ ዎይኮ እያ ታማረት ያን ባይናይሳ በእድ፥ የሱሳ ኮያናዉ ዎጎሎታን ገልድ ቅፍርናሆማ ብዶሶና።
አሳይ የሱሳ አባፈ ሄፍንን ደምዳ ዎደ፥ “አስታማርያዉ፥ ሃ አዉደ ያዲ?” ያግስ።
የሱሲ ዛሪድ፥ “ታኒ ህንተዉ ቱማ ኦዳይስ፤ ህንተ ታና ኮየይ ኡይ ምድ ካልዳ ግሾሳፈ አትሽን፥ ማላታ በእዳ ግሾሳ ግደና። ሳምያ ካስ ኦፍተ፥ ሽን መርና ደኦ እምያ ካስ ኦተ። ፆሳ አዋይ እ ኦና መላ እያዉ ማታ እምዳ ግሾ ሄ ካ አሳ ናአይ ህንተዉ እማና” ያግስ።
ያትን ኤንቲ፥ “ኑኒ ፆሳ ኦሱዋ ኦናዉ አይ ኦኔ?” ያግድ የሱሳ ኦይችዶሶና።
የሱሲ ዛሪድ፥ “ህንተ ኦና መላ ፆሳይ ኮይያ ኦሶይ ሀይሳ፦ እ ኪትዳይሳ አማንተ” ያግስ።
ኤንቲ ዛሪድ፥ “ኑኒ በእድ፥ ነና አማናና መላ አይ ማላታ ነ በሳኔ? ነ አይ ኦኔ? ጌሻ ማፃፋን፥ ‘ኤንቲ ማና መላ ኡይ ሳሎፐ እሚስ’ ጌተትድ ፃፈትዳይሳዳ ኑ አዋት መላ ቢታን ማና ምዶሶና” ያግዶሶና።
የሱሲ፥ “ታኒ ህንተዉ ቱማ ኦዳይስ፤ ህንተዉ ሳሎፐ ቱማ ኡይ እምዳይ ታ አዋፐ አትሽን፥ ሙሰ ግደና። ህዛ፥ ፆሳይ እምያ ኡይይ ሳሎፐ ዎዳይስ አላምያስ ደኦ እመይሳ” ያግስ።
ኤንቲ ዛሪድ፥ “ጎዳዉ፥ ኑስ ሄ ኡይ ኡባ ዎደ እማ” ያግዶሶና።
የሱሲ፥ “ታኒ ደኦ እምያ ኡይ፤ ታኮ ያ ኦንካ ኡባራካ ኮሻተና። ቃስ ታና አማንያ ኡራይ ኡባራካ ሳሞተና። ሽን ታኒ ህንተዉ ኦዳስ፤ ህንተ ታና በእደታ፥ ሽን አማነከታ። ታ አዋይ ታዉ እምያ ኡባይ ታኮ ያና፤ ቃስ ታኮ ያ ኦናካ ካረ የድከ። ታኒ ታ ኮያባ ኦናዉ ግዶናሽን ታና ኪትዳይስ ኮያባ ኦናዉ ሳሎፐ ያስ። ታና ኪትዳይስ ኮየይ ሀይሳ፦ ታኒ እ ታዉ እምዳ ኡባታካ ዉርሰ ጋላስ ሀይቆፐ ደንና መላፐ አትሽን፥ እሱዋካ ይሳና መላ ኮየና። ህዛ፥ ታ አዋይ ኮየይ ሄሳ፦ ናኣ በእድ አማንያ ኡባይ መርና ደኡዋ ኤካና፤ ታኒ ሄ ኡባ ዉርሰ ጋላስ መርና ደኦስ ሀይቆፐ ደንና” ያግስ።
የሱሲ፥ “ታኒ ሳሎፐ ዎዳ ኡይ” ግዳ ግሾ፥ አይሁደት እያ ቦላ ዙዙምዶሶና። ኤንቲ፥ “ሀይስ ኑኒ እያ አዋነ እያ አይዉ ኤርያ ዮሰፋ ናኣ የሱሳ ግደኔ? ያትን፥ እ ዋንድ፥ ‘ታኒ ሳሎፐ ዎስ’ ጋናዉ ዳንዳኢ?” ያግዶሶና።
የሱሲ ዛሪድ፥ “እሶይ እሱዋራ ዙዙን አግተ። ታና ኪትዳ ታ አዋይ ታኮ ኤህያ አሳፐ አትሽን፥ ታኮ ያናዉ ዳንዳእያ ኦንካ ባዋ። ታኒ ዉርሰ ጋላስ እያ መርና ደኦስ ሀይቆፐ ደንና። ናበት፥ ‘ፆሳይ አሳ ኡባ ታማርሳና’ ያግድ ፃፍዶሶና። አዋ ስኤይስነ እያፐ ታማርያ ኦንካ ታኮ ዬስ። ፆሳ ማታፐ ይዳይሳፈ አትሽን፥ አዋ በእዳይ ኦንካ ባዋ፤ እያ ፃላል አዋ በእስ።
“ታኒ ህንተዉ ቱማ ኦዳይስ፤ ታና አማንያ ኦደስካ መርና ደኦይ ደኤስ። ታኒ ደኦ እምያ ኡይ። ህንተ አዋት መላ ቢታን ማና ምዶሶና፥ ሽን ሀይቅዶሶና። ሳሎፐ ያ ኡይይ ሀይሳ፤ ሄ ኡይ ምያ ኦንካ ሀይቀና። ሳሎፐ ይዳ ደኦ ኡይይ ታና። ኦንካ ሀ ኡይ ሚኮ መርናዉ ዳና። ቃስ ሀ አላመይ ደኦን ዳና መላ ታኒ ህንተዉ እማና ኡይይ ታ አሹዋ” ያግስ።
አይሁደት፥ “ሀ አደይ ባ አሹዋ ኑ ማና መላ ኑስ ዋትድ እማናዉ ዳንዳኢ?” ያግድ ባንታ ግዶን ፓላምዶሶና።
ሄሳ ግሾ፥ የሱሲ ኤንታኮ፥ “ታኒ ህንተዉ ቱማ ኦዳይስ፤ አሳ ናኣ አሹዋ፥ ህንተ ሞና እፅኮ፥ ቃስ እያ ሱ ህንተ ኡዮና እፅኮ፥ ህንተዉ ደኦይ ባዋ። ታ አሹዋ ምያ ኡራስነ ታ ሱ ኡያ ኡራስ መርና ደኦይ ደኤስ። ታኒ ዉርሰ ጋላስ እያ ሀይቆፐ ደንና። ታ አሾይ ቱማ ካ፤ ታ ሱይካ ቱማ ኡሹ። ታ አሹዋ ምያ ኡራይነ ታ ሱ ኡያ ኡራይ ታናን ደኤስ፤ ታካ እያን ደአይስ። ደኦ አዋይ ታና ኪትን፥ ታኒ እያ ባጋራ ደኦን ደኤይሳዳ፥ ታና ምያ ኡራይካ ታ ጋሶን ደኦን ዳና። ሳሎፐ ዎዳ ኡይይ ሀይሳ፦ ህንተ አዋት ምድ ሀይቅዳ ማና መላ ግደና፤ ሀ ኡይ ምያ ኡራይ መርናዉ ዳና” ያግስ።
የሱሲ ቅፍርናሆማ ካታማን አይሁደ ዎሳ ኬን ሀይሳ ታማርስስ።

የሱሳ ታማረታፐ ዳርያ ባጋይ ሄሳ ስእዳ ዎደ፥ “ሀይስ ገሎና ትምርተ፤ ሀይስ ኦደስ ገሊ?” ያግዶሶና።
የሱሲ ባ ታማረት ሄሳስ ዙዙምዳይሳ ኤርድ፥ “ሀይስ ህንተና ቢ? ያትን፥ አሳ ናአይ ካሰ ደእያሱዋ ፑደ ከይሽን ህንተ በእድ ዎይጋንደቲ? ጌሻ አያናይ ደኦ እሜስ፤ አሳ ዎልቅ አይኮካ ማደና። ታ ህንተዉ ኦድያ ቃላይ ደኦ እምያ ጌሻ አያናፐ ዬስ። ሽን ህንተ ግዶን አማኖናይሳት ደኦሶና” ያግስ። አማኖናይሳት ኦናንተኮ የሱሲ ኮይሮፐ ዶምድ ኤሬስ። ቃስ ባና አድ እማናይ ኦነኮ ኤሬስ። ቃስካ የሱሲ፥ “አዋይ ባ ጎና ኦንካ ታኮ ያናዉ ዳንዳኤና ጋዳ ታኒ ኦድዳይ ሄሳ ግሾሳ” ያግስ።
ሄሳ ጋሶን፥ የሱሳ ካለይሳታፐ ዳሮት እያ አግድ ጉየ ስምዶሶና፤ ዛር እያ ካልቦኮና። የሱሲ ባ ታማነ ናምኡ ታማረታኮ፥ “ህንተካ አግድ ባናዉ ኮዬቲ?” ያግድ ኦይችስ።
ስሞን ጰፅሮስ ዛሪድ፥ “ጎዳዉ፥ ኑኒ ኦደኮ ባኔ? ነዉ መርና ደኦ እምያ ቃላይ ደኤስ። ኔኒ ፆሳ ጌሻ ግደይሳ ኑኒ አማኖስነ ኤሮስ” ያግስ።
የሱሲ ኤንታኮ፥ “ታኒ ህንተና ታማነ ናምአታ ዶራብክና? ሽን ህንተፈ እሶይ ፃላሄ” ያግስ። የሱሲ ሄሳ ግዳይ ስሞና ናኣ አስቆሮታ ይሁዳሳ። ይሁድ የሱሳ አድ እማናዉ ደእያ ታማነ ናምኡ ታማረታፐ እሱዋ።

Dëgjoj ዮሃንሳ 6