Text: © Wycliffe Bible Translators, Inc. Audio: ℗ 2025 Hosanna 

Mixteco, Xochapa WBT (NT) Drama

Saa ku̱u kivi núnu̱ú xaꞌa semana, kivi domingo, naꞌa ni ke̱e ná síꞌi kuaꞌan ná xiꞌin nduta tami xáꞌan si̱kuaꞌa ná, chikaa ná ikin kuñu Jesús. Saa kuaꞌan tu inka ná ñaꞌa va xiꞌin ná. Ñaa ndi̱xaa ná ndi̱koto ná ta köo ka yu̱ú índuꞌu yuꞌu kava nuu xi̱nduꞌu ya, xa ku̱taꞌa ya. Ta ñaa ndi̱kiꞌvi ná ini maa xíto ná ini kava ikán, ta köo ka ikin kuñu ra ndi̱xini ná. Saa ndi̱ndiꞌvi ni ná iin ndi̱kanda ini ná ndíta ná, ni köo xíni ka ná unkua ikan ná. Ñaa iin ku̱u soꞌva ta xi̱ni ná ndíta uvi nda taa nuu ná. Yaa ka vi toto ndíxi nda, ndakua yeꞌe taxan ya. Ñaa ndi̱ndiꞌvi ni ná, saa ndi̱kundita ndee ná nda nuu ñuꞌú. Ta ndi̱kaꞌan nda ikán xiꞌin ná, káchi nda saa:
―¿Nana, ndachu vaxi ndo ndúku ndo ra táku tañu na ndíi? Köo ka ra ndi̱kaa yóꞌó. ¡Xa ndi̱taku va ra! Ndikaꞌán ini ndo ya ndi̱kaꞌan ra xiꞌin ndo tá ndi̱xiyo ra xiꞌin ndo estado Galilea: Ndi̱kaꞌan ra xiꞌin ndo, káchi ra saa: “Nduxa tiin nda taa yeꞌe, Taa ra xa̱a ñuu ivi yóꞌó, ta ndi̱taxi nda yeꞌe ndaꞌa naꞌa na väꞌa, saa chinuu nda yeꞌe nuu cruzin, kuvi i, sundi kivi uni nditaku i”, ka̱chi ra xiꞌin ndo ―káchi tatun Ndioxi ikán xiꞌin ná.
Saa ndi̱kaꞌán ini ná xaꞌa ya ndi̱kaꞌan Jesús. Ñaa ndi̱ko koo ná ndi̱xaa ná ndi̱tuꞌun ndiꞌi ná xiꞌin uxi iin saa nda xi̱taꞌan xiꞌin Jesús tin ndiꞌi ka inka na xi̱ndikun sata ra. Ná síꞌi ná xi̱ni ya ku̱u ikán ku ná ndi̱tuꞌun xiꞌin nda ítaꞌan xiꞌin Jesús ta ná ikan ku ná náni: María yá ñuu Magdala, inka yá náni Juana, inka yá náni María, siꞌí ra Jacobo, xiꞌin inka ka ná síꞌi. Sundi nda xi̱taꞌan xiꞌin Jesús ta köo ndi̱xiin nda kandixa nda ya ndi̱kaꞌan ná xiꞌin nda. Ya si̱tuvi va kua nuu ná káꞌan nda yakan köo ndi̱xiin nda kandixa ñaꞌa nda.
Sundi ra Pedro ta ndikun ke̱ta ra xínu ra kuaꞌan ra koto ra nuu ndi̱nduxin Jesús. Tá ndi̱xaa ra ndi̱koto ra ini kava ta köo ka ikin kuñu Jesús ndi̱xini ra, ndá toto ya ndi̱suvi ra kua ndóo. Ñaa ndi̱ko koo ra kuanuꞌu ra, iin ndi̱kanda ini ra xaꞌa ya xi̱ni ra.


Saa ku̱u suvi mií kivi domingo ikán ke̱e uvi nda ítaꞌan xiꞌin Jesús kuaꞌan nda chí ñuu Emaús, ta iin kuꞌva uxi iin kilómetro kua saa xaa na ñuu Jerusalén. Ta ndítuꞌun nda xiꞌin taꞌan nda xaꞌa ndiꞌi ya ndo̱ꞌo Jesús kuaꞌan nda. Ndee ni ndítuꞌun nda, saa ndi̱xaa Jesús xíka ra kuaꞌan ra xiꞌin nda. Vani xíni nda ra kuaꞌan ra xiꞌin nda, ta köo ndíkuni ñaꞌa nda, saa chi mií Ndioxi i̱kan saa ya köo ndi̱kuni nda ra. Saa ndi̱ndakan tuꞌun ñaꞌa ra, káchi ra saa:
―¿Unkua ndítuꞌun ni ndo xaꞌa vaxi ndo? ¿Ndachu ndi̱kava ni ini ndo? ―káchi ra xiꞌin nda.
Saa iin ku̱taxin yuꞌu nda, ñaa ndi̱kuiin iin ra náni Cleofas káꞌan ra:
―¿Án iindaa yóꞌo̱ ku ra inka ñuu, ra köo ndi̱xini unkua ku̱u ñuu Jerusalén semana ya ndi̱yaꞌa yóꞌó? ―káchi ra xiꞌin Jesús.
Saa ndi̱kaꞌan ra xiꞌin nda káchi ra saa:
―¿Ta unkua ku̱u kua? ―káchi ra xiꞌin nda.
Saa ndi̱kuiin nda, káꞌan nda:
―Xaꞌa ra Jesús, ra ñuu Nazaret va kua káꞌan nde. Ra ndi̱kaꞌan ndoso tuꞌun yuꞌu Ndioxi ndi̱xiyo ra, ta ndee ni ndee taa ku̱u mií ra, kuaꞌa ni ya vaꞌa i̱kan ra, vaꞌa ni si̱naꞌa ra. Ta vaꞌa ni káꞌan Ndioxi xaꞌa ra tin ndiꞌi naꞌa. Ta nda sutu ñuu yo xiꞌin na chiñu, ti̱in na ra ta̱xi na kuachi xaꞌa ra ndaꞌa na chiñu naꞌnu, ta na ikán xa̱ꞌni ra nuu itun cruzin. Ta ndeꞌe ndi̱kani ini nde ra vaxi chindee ndeꞌe saña nde ndaꞌa na ñuu Roma ku ra káꞌán nde. Ta vitin xa ndi̱xinu uni vi kivi kua ndi̱xiꞌi ra. Ta suvi xitaan ndiveꞌe ndi̱xaꞌan sava ná taꞌan nde nuu ndi̱nduxin ra, ta si̱ꞌvi ni ná ndeꞌe, saa chi köo ka ikin kuñu ra ndi̱xini ná, káchi ná. Ta káꞌan ná xi̱ni ná uvi tatun Ndioxi ta ndi̱kaꞌan na xiꞌin ná “Ndi̱taku va Jesús”, káchi ná xiꞌin nde. Saa ni sava nda taꞌan nde ndi̱xaꞌan nda xíto nda nuu ndi̱nduxin ra. Tá íyo ya xi̱ni ná síꞌi ikán, saa íyo tu ya xi̱ni nda ikán va. Sundi köo Jesús ndi̱xini nda, káchi nda xiꞌin nde ―káchi nda ikán xiꞌin Jesús.
Saa ndi̱kaꞌan ra xiꞌin nda, káchi ra saa:
―¿Ndachu kíꞌvi ni ndo, ta uꞌvi ni kúndaa ini ndo xiꞌin ndiꞌi ya ta̱a nda ndi̱kaꞌan ndoso tuꞌun yuꞌu Ndioxi xinaꞌa! Taa ra ti̱ꞌvi Ndioxi vaxi sikaku na ñuu ivi yóꞌó ta xíniñuꞌu ra ndoꞌo ni ra, ta saa vaxi kivi saa ndiko koo tuku ra ndikunduꞌu ra kaꞌnda chiñu ra xiꞌin Ndioxi nuu ndi̱xiyo ra ―káchi Jesús xiꞌin nda.
Saa xa̱á ra sínaꞌa ra nda, xiꞌna ya ta̱a ra Moisés kua xa̱á ra ndíkani ra nuu nda, saa sínaꞌa ndiꞌi ka ra nda unkua káchi ndiꞌi tuꞌun Ndioxi ya ta̱a nda ndi̱kaꞌan ndoso tuꞌun yuꞌu Ndioxi xinaꞌa, nuu káꞌan ndiꞌi ya xaꞌa mií ra.
Ñaa ku̱yati nda ndi̱xaa nda ñuu Emaús, ta tá íkan ra kúni ndikunuu kuꞌun xíka, saa i̱kan ra xiꞌin nda. Ta saa xa̱ku ndaꞌvi nda nuu ra káchi nda saa:
―Yóꞌó ndoo un xiꞌin nde, saa chi xa xikuaa ni kua, ta xa kama ni va kuñuu ―káchi nda xiꞌin ra.
Saa ndi̱ndoo ra xiꞌin nda. Tá ndi̱kundoo nda kuxi nda nuu mesa, ta ti̱in Jesús xita vaꞌa, xa̱á ra táxi ra tixaꞌvi ndaꞌa Ndioxi xaꞌa ya. Tá si̱ndiꞌi ra ta̱xi ra tixaꞌvi ndaꞌa Ndioxi, ta saa ta̱ꞌvi ra ya ta̱xi ra ndaꞌa nda kuxi nda. Saa ndi̱xuna nuu nda ndi̱kuni ñaꞌa nda. Ñaa iin ku̱u soꞌva ta nda̱ñuꞌu ra nuu nda. Saa xa̱á nda káꞌan nda xiꞌin taꞌan nda, káchi nda saa:
―¡A su tá ndítuꞌun ra xiꞌin yo vaxi yo ichí ta kúsini ka vi yo, ndakua káni ya nima yo vaxi yo tá ndíkani ra nuu yo unkua káꞌan tuꞌun Ndioxi! ―káchi nda xiꞌin taꞌan nda.
Saa ra ni köo ndi̱xindatun ka nda, ndikun ndiko koo tuku nda kuaꞌan nda ñuu Jerusalén. Tá ndi̱xaa nda, ta iin ndi̱kitaꞌan ndiꞌi nda xi̱taꞌan xiꞌin Jesús ndóo nda xiꞌin inka na xi̱ndikun sata ra. Ñaa ndi̱kaꞌan na ndóo ikán xiꞌin nda, káchi na saa:
―Ya ndaa ni ndixa kua ndi̱taku Tata yo Jesús, saa chi ndi̱tuvi ra nuu ra Simón Pedro ―káchi na.
Saa ndi̱kuiin uvi saa nda, xa̱á nda ndítuꞌun nda ya ndo̱ꞌo nda tá kuaꞌan nda ñuu Emaús. Ndítuꞌun nda ndá kuꞌva ndi̱kuni nda Jesús tá ta̱ꞌvi ra xita vaꞌa ta̱xi ra ndaꞌa nda.


Saa káꞌan ka nda xiꞌin na ya ndo̱ꞌo nda, ta iin ku̱u soꞌva ndi̱tuvi Jesús ndi̱kundichi sava ra maꞌñu na, káchi ra saa:
―Ná koo vaꞌa ni ini ndo ―káchi ra xiꞌin na.
Ñaa ndi̱ndiꞌvi ni na, chi ¡án sana nima va ra kua káꞌán na. Ta saa ndi̱kaꞌan ra xiꞌin na, káchi ra saa:
―¿Ndachu íꞌvi ni ndo, ta ndíkani ini ndo tuꞌun ñaa? Naꞌa ndo koto ndo ndaꞌa i tin xaꞌa i, ta saa kundaa ini ndo yeꞌe ku i. Tiin ndaa ndo yeꞌe saa kuni ndo, chi nima ta köo kuñu ya ni leke ya köo, ta yeꞌe ra íyo kuñu i tin leke i ―káchi ra xiꞌin na.
Tá ndi̱kaꞌan ra saa, ta ndikun si̱naꞌa ra ndaꞌa ra tin xaꞌa ra, nuu ndi̱xani clavo. Ñaa ta ni köo ndi̱kandixa yachi ñaꞌa na xaꞌa ya kúsini ni na, iin ndi̱kanda ini na ndóo na. Ñaa ndi̱kaꞌan Jesús xiꞌin na, káchi ra saa:
―¿Án íyo loꞌo ñaꞌa kuxi yo? ―káchi ra xiꞌin na.
Saa ta̱xi na iin ñaꞌñu loꞌo tiaka ya̱tan xiꞌin iin yo̱ko̱ ta̱xi na ndaꞌa ra. Saa ndi̱kiꞌin ra yo̱ko̱ tin tiaka ndaꞌa na. Nuu na saa xi̱xi ra. Tá ndi̱ꞌi, saa ndi̱kaꞌan ra xiꞌin na, káchi ra saa:
―Ndiꞌi ya ndo̱ꞌo i, tá íyo ndiꞌi ya ndi̱kaꞌan i xiꞌin ndo yachi saa ndi̱xiyo ya. Saa chi ndi̱kaꞌan i xiꞌin ndo: Nduxa sixinu ndiꞌi i ya ta̱a ra Moisés tin ya ta̱a nda ndi̱kaꞌan ndoso tuꞌun yuꞌu Ndioxi xiꞌin ya íyo nuu tutu salmos, soꞌva íyo ya ndi̱kaꞌan i xiꞌin ndo yachi ―káchi ra xiꞌin na.
Saa ta̱xi ra ndi̱xuna ya xínituni na, ya kuchiñu kundaa ini na xaꞌa tuꞌun Ndioxi. Ta ndi̱kaꞌan ra xiꞌin na, káchi ra saa:
―Soꞌva káꞌan tuꞌun Ndioxi ya ta̱a na xinaꞌa: “Ra Cristo, ra ndi̱kaxin Ndioxi sikaku na ñuu ivi yóꞌó ta xíniñuꞌu ra ndoꞌo ni ra ta kuvi ra, sundi kivi uni nditaku ra. Ta naꞌa na ndíkun sata ra tixin kivi ra taxi ra ndee ndaꞌa na kuꞌun na ndituꞌun na xiꞌin ndiꞌi kúu na ñuu ivi. Xiꞌna ñuu Jerusalén xáa na kaꞌan na xiꞌin naꞌa, ya ná ndiko koo ini na xaꞌa kuachi na, saa xaa kaꞌnu ini Ndioxi xaꞌa kuachi na”, káchi ya ta̱a na. Ta ndóꞌo̱ ku ndo kúu testigo xaꞌa ndiꞌi ya yóꞌó, chi xi̱ni ndiꞌi ndo ya i̱kan i tin xi̱ni soꞌo ndo ya ndi̱kaꞌan i xiꞌin ndo. Ta vaxi kivi tiꞌvi i ya ki̱ndoo Iva i Ndioxi kixi ya ndaꞌa ndo. Yakan këe yachi ndo ñuu Jerusalén yóꞌó, nda ná ndikiꞌin ndo ndee ya kee nuu ndivi, saa kee ndo ―káchi Jesús xiꞌin na.


Saa ta̱va Jesús nda kuaꞌan nda yati nuu ndíkaa ñuu Betania ta saa nda̱niꞌi ndaꞌa ra nuu ndivi, chi̱kaa ra ya vaꞌa na. Tá chíkaa ra ya vaꞌa na, ta saa nda̱niꞌi Ndioxi ra nda̱a ra kuaꞌan ra nuu ndivi. Saa xa̱a toꞌo na Jesús ta ndi̱ko koo na kuaꞌan na ñuu Jerusalén. Kúsini ni na ndi̱ko na koo na. Ta ndiꞌi saa kivi kuaꞌan na veꞌe ñuꞌu kaꞌnu ñuu Jerusalén xáa toꞌo na Ndioxi. Saa íyo ya.

Dëgjoj San Lucas 24