 Nuestros sitios Web:   https://awarnarebbi.net/es/   https://www.abridnarrif.net/es/  AwalnArebbi@gmail.com

Ṯamaziɣṯ n Arrif

سّنِّي اَرُّوْح نِّي ن أَربِّـي يُوْوِي عِيْسَى غَار ڒخْڒَا حمَا اَث يجَرّب إِبْڒِيس. وَامِي يࢲُوْمّ عِيْسَى اَرْبعِين يُوْم جَار دْجِيَاڒِي ذ وُوْسَّان يُوْسَا-ٱس-د جُّوْع. ئِكَّر ونِّي يتْجَرَّابن يقَارّب-د غَار عِيْسَى ينَّا-ٱس: "مڒَا شك ذ مِّيس ن أَربِّـي، إِنِي-يَاسن إِ يزْرَا-يَا اَذ ذوْڒن ذ اَغْرُوْم."
ئِنْدق-د عِيْسَى ينَّا-ٱس: "لَّا، لْكِتَاب يقَّار: <بْنَاذم وَار يتْعِيش شَا س وغْرُوْم وَاهَا، ئِتْعِيش س مْكُڒ اَوَاڒ إِݣ يقَّار أَربِّـي.>"

سّنِّي إِبْڒِيس يُوْوِي عِيْسَى غَار ثنْدِينْت ن لْقُدْس، ئِسِيڒِي-ث خ ثْقِيشَّات ن ثمْزِيذَا ثَمقّْرَانْت. ينَّا-ٱس: "شك مڒَا ذ مِّيس ن أَربِّـي نْݣز سَّانِيتَا غَار ثْمُوْرْث. أَقَا لْكِتَاب يقَّار: <قَا أَربِّـي اَذ يوصَّا بَاش اَش حْضَانْت لْمَلَائِكَاث نّس. أَش يْسِينْت خ يفَاسَّن نْسنْت بَاش وَار ثڒْقِيفذ ؤُڒَا ذ يج وزْرُو س وضَار نّش.>"
ينَّا-ٱس عِيْسَى: "لَّا، لْكِتَاب يقَّار: <وَار تْجَرَّاب شَا سِيذِي أَربِّـي نّش.>"

سّنِّي إِبْڒِيس يُوْوِي عِيْسَى غَار ثْقِيشَّات ن يِجّن ن وذْرَار يُوْعْڒَا اَطَّاس. ئِسْمظْهَار-اَس-د مَارَّا لْممْلَكَاث ن دُّنشْت-أَ ذ ثُوْصُبْحَانت نْسنْت. ينَّا-ٱس: "أَذَاش ؤُشغ مَارَّا ثِيْنَا مڒَا ثوْضِيذ خ يفَادّن نّش ثْسجّْذذ-اَيِي."
ئِنْدق-د عِيْسَى ينَّا-ٱس: "رُوْح، بعّذ-اَيِي آ شِّيطَان. أَقَا لْكِتَاب يقَّار: <سجّذ إِ سِيذِي أَربِّـي نّش، عْبذ-يث نتَّا وَاحْذس.>"

سّنِّي يبعّذ خَاس إِبْڒِيس. ؤُسِينْت-يد لْمَلَائِكَاث بْذَانْت تْسخَّارنْت خ عِيْسَى.

وَامِي يسْڒَا عِيْسَى بلِّي يَحْيَى اَقَا يتْوَاحبّس، ئِعْقب غَار نَاصِرَا غَار ثْمُوْرْث ن لْجَلِيل. وَلَكِن وَار يقِّيم شَا ذِي نَاصِرَا، ئِرُوْح اَذ يزْذغ ذݣ يِجّن ن وبِيلَاج قَّارن-اَس كَفرْنَاحُوْم إِݣ يدْجَان خ طَّارْف ن ڒبْحَر ن لْجَلِيل، جِّهث ن ثْمُوْرْث ن زَفُلُوْن ذ نَفْتَالِي. أَمنِّي يكمّڒ وَاوَاڒ نِّي إِي ينَّا سِيذِي أَربِّـي إِ نَّبِي ؤُمِي قَّارن إِشَعْيَا ذݣ يِجّن ن زْمَان:
<ثَمُوْرْث ن زَفُلُوُن ذ ثْمُوْرْث ن نَفْتَالِي،
ثِنِّي ؤُمِي قَّارن ثَمُوْرْث ن لْجَلِيل،
خ وبْرِيذ ن ڒبْحَر ذِي شَّرْق ن يِغْزَار ن لْأُرْدُن،
مَانِي إِي زدّْغن ؤُڒَا ذ يِنِّي وَار يدْجِين زِي أَيث-إِسْرَائِيل.
شَّعْب-أَ إِي يزدّْغن ذِي ثَادْجسْت،
أَذ يࢲر ثْفَاوْث ذ ثَمقّْرَانْت.
يِيْنَا يزدّْغن ذِي ثَادْجسْت ن ڒْموْث
أَذَاسن د يمظْهَار نُّوْر.>

زِي سّنِّي يبْذَا عِيْسَى يتْبشَّر يقَّار-اَسن: "تُوْبث، أَقَا يُوْذس-د ڒْمُلْك ن وجنَّا."
يݣُّوْر عِيْسَى خ شّطّ ن ڒبْحَر ن لْجَلِيل، يُوْفَا ذِنِّي ثْنَاين ن يحدْجَاقن ن يسڒْمَان نِثْنِي ذ اَوْمَاثن. ئِجّن قَّارن-اَس سِمْعَان تْڒَاغَان-اَس س بُطْرُس، اَكذس ؤُمَاس قَّارن-اَس أَنْدْرُس. نطَّرن ثْرَاشَّا ذِي ڒبْحَر. ينَّا-ٱسن عِيْسَى: "ذْفَارم-اَيِي-د، أَقَا ڒخُّو إِي كنِّيو غَا اَرّغ ذ يحدْجَاقن ن يِوْذَان." ڒخْدّنِّي سمْحن ذِي ثْرَاشِّيوِين نْسن ذْفَارن-ث.
ئِعْذُو اَغِيڒِين، يُوْفَا ثْنَاين ن وَاوْمَاثن نّغْنِي، ئِجّن قَّارن-اَس يَعْقُوْب ئِجّن قَّارن-اَس يُوْحَنَّا. نِثْنِي ذ ثَارْوَا ن يِجّن ن ورْيَاز ؤُمِي قَّارن زَبَادِي. أَقَاثن ذِي ثْغَرَّابُوْت اَك بَابَاثْسن عدّْڒن ثِڒَاشِّيوِين نْسن. ئِڒَاغَا-يَاسن-د عِيْسَى، ذݣ ومْشَان سمْحن ذِي ثْغَرَّابُوْت نْسن ذ بَابَاثْسن ذْفَارن عِيْسَى.

ئِݣُّوْر عِيْسَى ذِي لْإِقْلِيم ن لْجَلِيل مَارَّا، ئِسڒْمَاذ ذِي ثمْزِيذَاوِين ن أَيث-إِسْرَائِيل يتْبشَّر-يثن س لْإِنْجِيل ن ڒْمُلْك ن أَربِّـي يسْݣنْفَا مَارَّا ڒهْڒَاشَاث ذ دِّعَان ن دَّات ذݣ يِوْذَان. ئِفّغ ڒخْبَار نّس ذِي سُوْرْيَا اَمن-ثكْمَاڒ. تَّاوْين-د غَارس مَارَّا يِنِّي يهڒْشن تْعدَّابن س لْأَنْوَاع ن ڒهْڒَاشَاث ذ ڒحْڒِيقَاث، مْكُڒ يمَرْيَاحن ذ يمجْنُوْنن ذ ينشْرُوْفن نتَّا يسْݣنْفَا-ثن. ذْفَارن عِيْسَى اَطَّاس ن ڒْغَاشِي زِي لْجَلِيل ذ لْإِقْلِيم ؤُمِي قَّارن دِيكَاپْـلِس ذ ثنْدِينْت ن لْقُدْس ذ يَهُوْذِيَا ذ جِّهث ن شَّرْق ن يِغْزَار ن لْأُرْدُن.

Dëgjoj متى 4