If you have would like a copy of this version please contact info@davarpartners.org

Text: Bilaspuri New Testament, CC-BY-SA-4.0, The Love Fellowship. Audio: Bilaspuri New Testament Audio Bible, CC-BY-SA-4.0, Davar Partners International, Hosanna/Faith Comes by Hearing), 2021

Bilaspuri New Testament

This work is licensed under Creative Commons Attribution-ShareAlike 4.0 License.

रबिवार रे दिन बड़े भ्यागा इ, सै जनानां तिन्हे जे खुशबुदार चिज़ां त्यार किति रियां थी, तिन्हाजो लेईने कब्रा पर आईयां। कने तिन्हे पत्थरा जो कब्रा परा ते हटिरा देख्या, सै अन्दरा जो गईयां, पर तिन्हाजो तित्थी प्रभु यीशुये री लाश नीं सुझी। ताहली जे सै परेशानिया च पैई गियां, तां देक्खा, दो माहणु लोई साई चमकदे कपड़े पैहनीरे तिन्हाले आईने खड़ीगे। डरा रे मारे सै जनानां अपणे सिर धरतिया खौ झुकाई ने खढ़ी रियां रैईयां। तिन्हे माहणुयें तिन्हाजो गलाया, “तुहें जिऊंदे माहणुये जो मूईरयां रिया जगह च कजो टोल़ी राँईयां? सै येत्थी नींये! सै मूईरयां चा ते जिऊंदा हुईगरा! क्या तुहांजो याद निआं भई तिन्हे गलील च तुहांजो क्या गलाईरा था, भई, माहणुये रे पुत्रा जो यनि मिन्जो पापियां रे हत्थें पकड़वाया जाणा, फेरी सै क्रूसा पर लटकाया जाणा, कने तिज्जे दिन तिस फेरी भीं ते जिऊंदे हुई जाणा, ये सब जरूरी आ?” फेरी तिन्हाजो आद आया भई यीशुये येढ़ा इ बोलीराँ था। कने कब्रा ते वापस आईने तिन्हां ग्याराँ जो कने होरीं सब्बीं जो ये सारी गल्लां दस्सियां। तिन्हें जे प्रेरितां ने ये गल्लां गलाईयां, सै मगदल गाँवां री मरियम कने योअन्ना कने याकूब री माता मरियम कने तिन्हां सौगी होर जनानां बी थिआं। पर तिन्हांरियां गल्लां तिन्हांजो कहाणिया साई लगियां, कने तिन्हें तिन्हांरी ये गल्ल सच्च नीं मन्नी। फेरी पतरस उट्ठीने दौड़दा हुआ कब्रा पर गया, कने झुकीने सिर्फ कपड़े पैईरे देक्खे, कने सै जे किछ हुया था, तिसते सै हैरान हुईने अपणे घरा जो वापस आईग्या।

तिस दिन यीशुये रे चेलयां चा ते दो माहणु इम्माऊस नौआं रे गाँवां जो जाईराँ थे, सै जे यरूशलेम नगरा ते तकरीवन ग्यारा किलोमीटर दूर था। बाटा च चलदे हुये, सै जे किछ हुया तिन्हां सारियां गल्लां जो गलांदे हुये जाईराँ थे। ताहली जे सै अप्पूँ चियें गल्ल बात कने सोच विचार करी कराँ थे, ताहली इकदम यीशु ऊथी अपणे आप आईग्या, कने तिन्हाने सौगी-सौगी चलने लगया। पर सै चेले तिन्हाजो पछयाणी नीं पाये, काँह्भई परमेशरे सै पछयाणने नीं दित्ते। यीशुये तिन्हाने गलाया, “येढ़ा लगां भई तुहें किसी गल्ला पर बड़ा सोच विचार करी रायें?” सै तिसा इ जगह पर खड़ीगे, कने उदासी तिन्हारे चेहरे पर साफ सुझया राँ थी। तिन्हां चते किलयूपास नौआं रे इक्की माहणुये तिसने गलाया, “यरूशलेम च रैहणे औल़ा तू कल्हा इ येढ़ा माहणु हुंगा, सै जे नीं जाणदा भई किछ दिन पहले येत्थी क्या-क्या गल्लां हुईयां।” यीशुये तिन्हाते पुच्छया, “केढ़ियां गल्लां?” फेरी तिन्हे तिसजो गलाया, “ये गल्लां त नासरत गाँवां रे यीशुये रे बारे च हुईयां। सै इक येढ़ा माहणु था तिने सै जे कित्या कने गलाया तिने परमेशर कने सारयां लोकां च ये दस्सीत्या भई सै इक महान भविष्यवक्ता था। कने अहें इस बारे च गल्लां करीराँ थे भई अहांरे मुखियायाजकां कने धर्म शास्त्रियें तिन्हाजो मौता रा हुक्म दुआई ने क्रूसा पर लटकाईत्या। पर अहांजो आशा थी भई सैई मसीह आ सै जे इस्राएल जो रोमी लोकां ते छुड़ाणे खातर आईरा, इन्हां सारियां गल्लां रे सिवाय इसा घटना जो हुई रिया जो आज्ज तिज्जा दिन आ। अहां रिया टोलिया रियां किछ जनानें अहांजो चम्भे च पाईत्या, आज्ज दोत्तां इ सै कब्रा पर गईयां। सै बोलणे लगियां भई यीशुये री लाश ऊत्थी नीं, कने तिन्हे स्वर्गदूतां जो देख्या, तिन्हाजो स्वर्गदूतें दस्या भई यीशु जिऊंदा हुईगरा! अहांरे साथियां चा ते किछ दौड़दे हुए कब्रा पर गये, कने तेढ़ा जे तिन्हे जनाने बोल्लीरा था तिन्हाजो बी यीशुये रा शव नीं मिलया।” यीशुये तिन्हां दुईं माहणुआं ने गलाया, “तुहें कितणे मूर्ख लोक ये! पवित्रशास्त्रा च भविष्यवक्तयां सै जे लिखिरा, तिस पर तुहांजो विश्वास करना कितना मुश्कल हुआं? क्या मसीह रे खातर ये जरूरी नीं था भई इसते पैहले सै इन्हां पीड़ां जो भुगते फेरी स्वर्गा च जाईने अपणे अधिकारा रिया गद्दिया पर बैट्ठो?” फेरी यीशुये मूसा ते कने सारे भविष्यवक्तयां ते शुरु करीने सारे पवित्रशास्त्रा चते अपणे बारे च लिखी रियां गल्लां रा मतलब, तिन्हांजो समझाईत्या।
ताहली जे सै तिस गाँवां ले पुज्जीगे, तित्थी जो जे सै जाईराँ थे, यीशुये येढ़ा बर्ताव कित्या, तियां जे भई तिस्सो अग्गे जाणा हो। पर तिन्हे ये बोल्लीने विनती किति भई, “आज्ज अहां ले रुका, काँह्भई दिन घरी गरा था, कने रात हुईगरी थी!” इस खातर यीशु रैहणे जो तिन्हारे घरा जो गया। तां जे सै रोटी खाणे बैट्ठे, तां यीशुये रोटी लेईने परमेशरा रा धन्यवाद कित्या, फेरी सै तोड़ीने ताहली जे तिन्हाजो देणे लगया। तां इकदम तिन्हांरियां आक्खीं खुली गियां, कने तिन्हे यीशुये जो पछयाणील्या। तिस इ पल सै छपन हुईग्या! फेरी सै चेले अप्पूँ चियें बोलणे लगे, “तां जे सै रस्ते च अहांने गल्लां कराँ था; कने पवित्रशास्त्रा रा मतलब समझां था, तां क्या अहांरे दिला च आग्ग जेई नीं भड़की जान्दी थी?” फेरी सै इकदम खड़ीगे कने वापस यरूशलेम जो चलीपे। तित्थी जे ग्यारा चेले कने होर लोक कट्ठे हुईरे थे। ताहली जे सै ऊथी पुज्जे ताहली तिन्हारे किछ बोलणे ते पैहले इ तिन्हारा इसा खबरा ने स्वागत कित्या भई “प्रभु सच्ची जोई जिऊंदा हुईग्या! तिने शमौन पतरसा जो दर्शण दित्या!” फेरी इम्माऊस रे तिन्हें दुईं माहणुयें बी अपणी कहाणी सुणाई भई कियां बाटा जान्दे बगत यीशु परगट हुये, कने जिस वगत सै रोटी तोड़ीरां थे, ताहली कियां तिन्हे यीशुये जो पछयाणया था।

कने जिस वगत जे सै ये गल्लां करी रां थे तां यीशु इकदम तिन्हारे विच दिखया; कने तिन्हाने गलाया, “परमेशर तुहांजो शान्ति देओ।” तिन्हौं हुण तक यीशुये रे जिऊंदा हुणे री गल्ल समझा च नीं आई थी, इस खातर सै सब बुरे हाल्लें डरीगे कने बड़े घवराईगे भई अहें किसी भूता जो देखी राँये। तिने तिन्हांने गलाया, “तुहें मता डरदे, हऊँ कुण आ, इसा गल्ला रा तुहें अपणे मनां च बैहम काँह करी रायें? मेरे हत्थां कने पैराँ खा देक्खा, तुहें देक्खी सक्कां ये भई हऊँ सैई हाया। मेरने छोईने देक्खा भई हऊँ कोई भूत नींआ, काँह्भई भूतां रा कोई शरीर नीं हुन्दा। पर तियां जे तुहें देखी रायें भई मेरा शरीर आ, तिसच जे हड्डी कने मांस आ!”
ये बोल्लीने यीशुये अपणे हत्थ तिन्हाजो दसणे खातर अग्गे कित्ते, कने तिन्हे अपणे पैर बी दस्से। सै खुशिया कने हैरानिया ने भरीगे, पर तिन्हाजो तां बी विश्वास नीं हुई करदा था। फेरी यीशुये तिन्हाते पुच्छया, “क्या तुहांले खाणे जो किछ हाया?” तिन्हे यीशुये जो भुन्नी रिया मच्छीया रा इक टुकड़ा दित्या, कने तिने सै टुकड़ा लेईने तिन्हारे सामणे खाद्दया। फेरी यीशुये गलाया, “ताहली जे हऊँ तुहांजो इ था, तिस वगत मैं तुहांजो गलाया था भई मूसा री व्यवस्था कने भविष्यवक्तयां रियां कतावां च कने भजन संहिता च मेरे बारे च सै जे लिखिरा, सै सारी गल्लां पूरियां हुणियां।” फेरी यीशुये तिन्हाजो समझाणे रे खातर तिन्हांरी मदद कित्ती, तिसते जे सै पवित्रशास्त्रा री गल्लां जो समझी सक्को। कने तिने तिन्हांने बोल्या, “पवित्रशास्त्रा च ये लिखिरा; भई मसीहे दुख सैहणा कने तिज्जे दिन मूईरयां चते जिऊंदे हूणा, कने यरूशलेम ते लेईने सारियां जातियां च मन फिराणे रा कने पापां रिया माफिया रा प्रचार, तिसरे इ नौआं ते कित्या जाणा। तुहें इन्हां सारियां गल्लां रे गवाह ये। कने तिसरा वायदा जे मेरे पिता माहने कित्तिरा, तियां इ मांह बी तुहांरे खातर पवित्र आत्मा भेजणा, पर तदुआं तक जे परमेशर तुहांजो पवित्र आत्मा रिया सामर्था ने भरी नीं दो, तदुआं तक तुहें यरूशलेम ची रैयों।”

फेरी यीशु तिन्हाजो यरूशलेम नगरा ते बाहर बैतनिय्याह तक लैईया, कने अपणे हत्थां जो स्वर्गा खौ चक्की ने, चेलयां जो आशीष दित्ति। तिन्हाजो आशीष देन्दे हुये, सै तिन्हाते लग हुईग्या, कने परमेशर तिस्सो स्वर्गा जो लेईग्या। फेरी चेलयां प्रभुये री गोडयां रे भार अराधना किति कने बौहत खुश हुईने यरूशलेम जो मुड़ीने वापस आईगे। तिसते बाद सै परमेशरा री स्तुति करदे हुये, अपणा सारा बगत मन्दरा च बिताणे लगे।

Dëgjoj लूका 24