Genesisi 23:1-20
Genesisi 23:1-20 Bhaibheri Dzvene MuChiShona Chanhasi (BDSC)
Sara akararama akasvika makore zana namakumi maviri namanomwe okuberekwa. Akafira paKiriati Abha (ndiro Hebhuroni) munyika yeKenani, uye Abhurahama akandochema Sara akaungudza pamusoro pake. Ipapo Abhurahama akasimuka kubva parutivi pomukadzi wake akanga afa akandotaura navaHiti, akati, “Ndiri mutorwa nomueni pakati penyu. Nditengesereiwo nzvimbo pano yokuviga kuti ndigogona kuviga vakafa vangu.” VaHiti vakapindura Abhurahama vakati, “Ishe, tinzwei. Imi muri muchinda mukuru pakati pedu. Vigai henyu akafa wenyu muguva rakaisvonaka pakati pamakuva edu. Hakuna munhu pakati pedu angakunyimai guva rake kuti muvige akafa wenyu.” Ipapo Abhurahama akasimuka akakotamira pasi pamberi pavanhu venyika, ivo vaHiti. Akati kwavari, “Kana muchida kuti ndivige akafa wangu, zvino chindinzwai uye mundikumbirire kuna Efuroni mwanakomana waZohari pachinzvimbo changu, kuti anditengesere bako raMakapera, raanaro uye riri kumucheto womunda wake. Mukumbirei kuti anditengesere nomutengo uzere ive nzvimbo yangu yokuviga vakafa pakati penyu.” Efuroni muHiti akanga agere pakati pavanhu vake akapindura Abhurahama, vaHiti vose vakanga vauya pasuo reguta vachizvinzwa, akati, “Kwete, ishe wangu. Inzwai; ndinokupai munda, uye ndinokupai bako riri mauri. Ndinoupa kwamuri pamberi pavanhu vangu. Vigai henyu akafa wenyu.” Zvakare Abhurahama akakotamira pasi pamberi pavanhu venyika akati kuna Efuroni vachizvinzwa, “Nditeerere, kana uchida. Ndicharipa mutengo womunda. Ugamuchire hako kubva kwandiri kuti ndigoviga vakafa vangu imomo.” Efuroni akapindura Abhurahama akati, “Nditeererei, ishe wangu, mutengo wenyika unoita mashekeri mazana mana esirivha, asi chingava chiiko pakati pangu nemi? Vigai henyu akafa venyu.” Abhurahama akabvumirana nomutengo waEfuroni akamuyerera mutengo waakanga areva vaHiti vachizvinzwa; mazana mana amashekeri esirivha, maererano nomutengo waivapo pakati pavatengesi. Saka munda waEfuroni muMakapera pedyo neMamure, zvose munda nebako zvaive mauri, nemiti yose yaiva pakati pomuganhu womunda, zvakapiwa kuna Abhurahama zvikava zvake pamberi pavaHiti vakanga vauya pasuo reguta. Shure kwaizvozvo Abhurahama akaviga mukadzi wake Sara mubako mumunda weMakapera pedyo neMamure (iro Hebhuroni) munyika yeKenani. Saka munda nebako raiva mauri zvakapiwa kuna Abhurahama navaHiti senzvimbo yamakuva.
Genesisi 23:1-20 Shona Bible 1949, revised 2002 (SNA2002)
Zvino Sara wakagara makore ane zana namakumi maviri namanomwe; ndiwo makore oupenyu hwaSara. Sara akafa paKiriyatiabha (rimwe zita ndiHebhuroni) panyika yeKenani; Abhurahamu akauya kuzochema Sara nokumuririra. Zvino Abhurahamu akasimuka panowakafa wake, akataurirana navana vaHeti, akati, “Ndiri mweni nomutorwa pakati penyu, ndipei nzvimbo yokuviga pakati penyu, ive nzvimbo yangu, kuti ndivige wakafa wangu, ndirege kumuona.” Vana vaHeti vakapindura Abhurahamu, vakati kwaari, “Chitinzwai, ishe wedu, imi muri muchinda waMwari pakati pedu; vigai wakafa wenyu pahwiro hwakanaka pakati pamahwiro edu ose; hakuna munhu pakati pedu angakunyimai hwiro hwake, kuti muvige wakafa wenyu.” Ipapo Abhurahamu wakasimuka akakotamira pasi pamberi pavanhu venyika iyo, ivo vana vaHeti, akataurirana navo, akati, “Kana muchitenda kuti ndivige wakafa wangu, ndirege kumuona, chindinzwai, mundikumbirire kuna Efuroni, mwanakomana waZohari, kuti andipe bako reMakapera, raanaro, riri pamagumo emunda wake, andipe iroro, ndiripe mutengo wose, ive nzvimbo yangu yokuviga pakati penyu.” Efuroni zvino wakanga agere pakati pavana vaHeti; Efuroni, muHeti, akapindura Abhurahamu, vana vaHeti, vachizvinzwa, ivo vose vaipinda pasuo reguta rake, akati, “Kwete, ishe wangu, chindinzwai; teererai, ndinokupai munda, nairo bako ririmo, ndinokupai iro; ndinokupai izvozvo pamberi pavana vavanhu vangu; vigai henyu wakafa wenyu.” Abhurahamu akakotama pamberi pavanhu venyika iyo, akataura naEfuroni, vanhu venyika iyo vachizvinzwa, achiti, “Kana uchida, chinditeerera hako, ndichakupa mutengo womunda, uugamuchire kwandiri, kuti ndivige wakafa wangupo.” Efuroni akapindura Abhurahamu, akati kwaari, “Ishe wangu, chinditeererai; munda unotengwa namashekeri esirivha ana mazana mana, chingava chinyiko pakati pangu newe? Vigai henyu wakafa wenyu.” Abhurahamu akateerera Efuroni. Abhurahamu akayerera Efuroni mashekeri esirivha aakareva, vana vaHeti vachizvinzwa, mashekeri esirivha ana mazana mana, avanotenga nawo kuvatengesi. Naizvozvo munda waEfuroni, wakanga uri paMakapera pakatarisana neMamure, munda nebako rakanga ririmo, nemiti yose yakanga iri mumunda neyakanga iri panyika yose yakapoteredza, zvikava zvaAbhurahamu pamberi pavana vaHeti, pamberi pavose vaipinda pasuo reguta rake. Shure kwaizvozvo Abhurahamu akaviga Sara, mukadzi wake, mubako romunda weMakapera, pakatarisana neMamure (rimwe zita ndiHebhuroni), panyika yeKenani. Zvino munda nebako rakanga ririmo zvakasimbisiwa kuna Abhurahamu navana vaHeti, kuti zvive zvake, ikava nzvimbo yake yokuviga.
Genesisi 23:1-20 Bhaibhiri Idzva rechiShona rine Dhuterokanonika (SCLBD)
Sara akagara zana namakumi maviri amakore ana makore manomwe. Iwaya ndiwo makore ose oupenyu hwaSara. Sara akafira kuKiriatiaribha kana kuti Hebhuroni, munyika yeKanani. Abhurahamu akambotora nguva yokuyeuka rufu rwaSara achimuchema. Abhurahamu akasiya chitunha chiri mumba akandotaurirana navaHiti vachiti, “Ini ndinongovawo mutorwa zvangu, muuyi pakati penyu. Ndiwaniseiwo nzvimbo pakati penyu yokuviga hama dzangu dzinenge dzafa.” VaHiti vakapindura Abhurahamu vachiti, “Teererai munzwe, changamire, imi muri muchinda waMwari. Tinokuremekedzai kwazvo pakati pedu. Vigai zvenyu vafi venyu munzvimbo yakanakisisa pakati penzvimbo dzedu dzose dzokuvigira vanhu. Pakati pedu hapana angakunyimei nzvimbo yokuviga vafi venyu munzvimbo dzokuviga vafi.” Abhurahamu akasimuka ndokukotamira pasi achiremekedza vaHiti, varidzi venyika. Akati kwavari, “Kana mabvuma kuti ndivige vakafa vangu, chimbondinzwaiwo, zvino chindisvitsiraiwo chichemo changu kuna Efuroni mwanakomana waZohari, kuti andipe bako rake repaMakipera riri pamucheto womunda wake. Ngaanditengesere nomutengo waro wakakwana imi muchizviona. Ive nzvimbo yangu pachangu yokuviga vanhu.” Efuroni akanga agerepo mukati mevaHiti. Saka Efuroni, muHiti, akapindura Abhurahamu, vaHiti vose vakanga vauya kusuo guru vachizvinzwa. Akati, “Kwete, changamire. Ndinzwei ndinokupai munda iwoyo nebako ririmo, hama dzangu dzichizviona kuti muvige vafi venyu.” Abhurahamu akakotamira varidzi venyika achivaremekedza. Akataura kuna Efuroni dare rose ravanhu venyika iyoyo richizvinzwa achiti, “Ndichakupai mari yokutenga munda iwoyo, igamuchirei kuti ndivige vafi vangu.” Efuroni akapindura Abhurahamu achiti, “Changamire wangu, teererai munzwe. Kamutengo kenzvimbo yacho kanongova mazana mana chete emari yamashekeri yesirivha. Zvino munoti imari iyoyo here yatingatemeserane musoro nayo? Endai zvenyu mundoviga munhu wenyu.” Abhurahamu akabvumirana naEfuroni, ndokubva Abhurahamu aerera Efuroni mari yesirivha iya yavakataura vaHiti vachizvinzwa. Mari yacho yaikwana mazana mana esirivha maererano nomwero wouremo waishandiswa pakutengeserana. Ndokusaka nzvimbo yaEfuroni yokuMakipera iri kumabvazuva kweMamure yakanzi yava yaAbhurahamu. Nzvimbo iyoyo yaisanganisira munda wacho, kwouya bako raivemo, nemiti yose yaivemo kusvikira kumucheto wawo kuitenderedza. Yakapiwa Abhurahamu kuti ive yake, vaHiti navamwe vose vedare vakanga vauya kusuo guru reguta vachizvinzwa. Abhurahamu akaviga Sara mudzimai wake mubako riri kuMakipera, pakatarisana neMamure kuHebhuroni munyika yeKanani. Saka vaHiti vakapa Abhurahamu nzvimbo iyoyo nebako ririmo zvikabva zvava nzvimbo yake yokuviga vanhu vake.
Genesisi 23:1-20 Baiberi Magwaro Matȿene aMŋari 1949 (Doke) (SUB1949)
Ɀino Sara wakagara makore anezana namakumi maʋiri namanomŋe; ndiwo makore oʋupenyu bgaSara. Sara akafa paKiriyati‐arba (rimŋe zita ndiHebroni) panyika yeKanani; Abrahama akaʋuya kuzocema Sara nokumuririra. Ɀino Abrahama akasimuka panowakafa wake, akataurirana naʋana ʋaHeti, akati: Ndiri mŋeni nomutorwa pakati penyu; ndipei nɀimbo yokuʋiga pakati penyu, iʋe nɀimbo yaŋgu, kuti ndiʋige wakafa waŋgu, ndirege kumuʋona. Ʋana ʋaHeti ʋakapindura Abrahama, ʋakati kwaari: Citinzwai, ishe weɗu, imi muri mucinda waMŋari pakati peɗu; ʋigai wakafa wenyu pabgiro bgakanaka pakati pamabgiro eɗu ose; hakunomunhu pakati peɗu uŋgakunyimai bgiro bgake, kuti muʋige wakafa wenyu. Ipapo Abrahama wakasimuka akakotamira pasi pamberi paʋanhu ʋenyika iyo, iʋo ʋana ʋaHeti, akataurirana naʋo, akati: Kana mucitenda kuti ndiʋige wakafa waŋgu, ndirege kumuʋona, cindinzwai, mundikumbirire kunaEfroni, mŋanakomana waZohari, kuti andipe ɓako reMakpera, raanaro, riri pamugumo womunda wake; andipe iro, ndiripe muteŋgo wose, iʋe nɀimbo yaŋgu yokuʋiga pakati penyu. Efroni ɀino wakaŋga agere pakati paʋana ʋaHeti; Efroni, muHeti, akapindura Abrahama, ʋana ʋaHeti ʋaciɀinzwa, iʋo ʋose ʋaipinda pasuʋo reguta rake, akati: Kwete, ishe waŋgu, cindinzwai; tererai, ndinokupai munda, nairo ɓako riri’mo, ndinokupai iro; ndinokupai iɀoɀo pamberi paʋana ʋaʋanhu ʋaŋgu; ʋigai henyu wakafa wenyu. Abrahama akakotama pamberi paʋanhu ʋenyika iyo, akataura naEfroni, ʋanhu ʋenyika iyo ʋaciɀinzwa, aciti: Kana uciɗa, cinditerera hako, ndicakupa muteŋgo womunda, uugamucire kwandiri, kuti ndiʋige wakafa waŋgu’po. Efroni akapindura Abrahama, akati kwaari: Ishe waŋgu, cinditererai; munda unoteŋgwa namashekeri esirveri anamazana manna, ciŋgaʋa cinyiko pakati paŋgu newe — Ʋigai henyu wakafa wenyu. Abrahama akaterera Efroni: Abrahama akayerera Efroni mashekeri esirveri aakareʋa, ʋana ʋaHeti ʋaciɀinzwa, mashekeri esirveri anamazana manna, aʋanoteŋga nawo kuʋateŋgesi. Naiɀoɀo munda waEfroni, wakaŋga uri paMakpera pakatarisana neMamre, munda neɓako rakaŋga riri’mo, nemiti yose yakaŋga iri mumunda neyakaŋga iri panyika yose yakapoteredza, ɀikaʋa ɀaAbrahama pamberi paʋana ʋaHeti, pamberi paʋose ʋaipinda pasuʋo reguta rake. Shure kwaiɀoɀo Abrahama akaʋiga Sara, mukadzi wake, muɓako romunda weMakpera, pakatarisana neMamre (rimŋe zita ndiHebroni), panyika yeKanani. Ɀino munda neɓako rakaŋga riri’mo ɀakasimbisiwa kunaAbrahama naʋana ʋaHeti, kuti ɀiʋe ɀake, ikaʋa nɀimbo yake yokuʋiga.
Genesisi 23:1-20 Bhaibhiri Idzva rechiShona (SCLB)
Sara akagara zana namakumi maviri amakore ana makore manomwe. Iwaya ndiwo makore ose oupenyu hwaSara. Sara akafira kuKiriatiaribha kana kuti Hebhuroni, munyika yeKanani. Abhurahamu akambotora nguva yokuyeuka rufu rwaSara achimuchema. Abhurahamu akasiya chitunha chiri mumba akandotaurirana navaHiti vachiti, “Ini ndinongovawo mutorwa zvangu, muuyi pakati penyu. Ndiwaniseiwo nzvimbo pakati penyu yokuviga hama dzangu dzinenge dzafa.” VaHiti vakapindura Abhurahamu vachiti, “Teererai munzwe, changamire, imi muri muchinda waMwari. Tinokuremekedzai kwazvo pakati pedu. Vigai zvenyu vafi venyu munzvimbo yakanakisisa pakati penzvimbo dzedu dzose dzokuvigira vanhu. Pakati pedu hapana angakunyimei nzvimbo yokuviga vafi venyu munzvimbo dzokuviga vafi.” Abhurahamu akasimuka ndokukotamira pasi achiremekedza vaHiti, varidzi venyika. Akati kwavari, “Kana mabvuma kuti ndivige vakafa vangu, chimbondinzwaiwo, zvino chindisvitsiraiwo chichemo changu kuna Efuroni mwanakomana waZohari, kuti andipe bako rake repaMakipera riri pamucheto womunda wake. Ngaanditengesere nomutengo waro wakakwana imi muchizviona. Ive nzvimbo yangu pachangu yokuviga vanhu.” Efuroni akanga agerepo mukati mevaHiti. Saka Efuroni, muHiti, akapindura Abhurahamu, vaHiti vose vakanga vauya kusuo guru vachizvinzwa. Akati, “Kwete, changamire. Ndinzwei ndinokupai munda iwoyo nebako ririmo, hama dzangu dzichizviona kuti muvige vafi venyu.” Abhurahamu akakotamira varidzi venyika achivaremekedza. Akataura kuna Efuroni dare rose ravanhu venyika iyoyo richizvinzwa achiti, “Ndichakupai mari yokutenga munda iwoyo, igamuchirei kuti ndivige vafi vangu.” Efuroni akapindura Abhurahamu achiti, “Changamire wangu, teererai munzwe. Kamutengo kenzvimbo yacho kanongova mazana mana chete emari yamashekeri yesirivha. Zvino munoti imari iyoyo here yatingatemeserane musoro nayo? Endai zvenyu mundoviga munhu wenyu.” Abhurahamu akabvumirana naEfuroni, ndokubva Abhurahamu aerera Efuroni mari yesirivha iya yavakataura vaHiti vachizvinzwa. Mari yacho yaikwana mazana mana esirivha maererano nomwero wouremo waishandiswa pakutengeserana. Ndokusaka nzvimbo yaEfuroni yokuMakipera iri kumabvazuva kweMamure yakanzi yava yaAbhurahamu. Nzvimbo iyoyo yaisanganisira munda wacho, kwouya bako raivemo, nemiti yose yaivemo kusvikira kumucheto wawo kuitenderedza. Yakapiwa Abhurahamu kuti ive yake, vaHiti navamwe vose vedare vakanga vauya kusuo guru reguta vachizvinzwa. Abhurahamu akaviga Sara mudzimai wake mubako riri kuMakipera, pakatarisana neMamure kuHebhuroni munyika yeKanani. Saka vaHiti vakapa Abhurahamu nzvimbo iyoyo nebako ririmo zvikabva zvava nzvimbo yake yokuviga vanhu vake.