Matyu 7
7
Waf pewaloga epes si'i kot
(Lu 6:37-38,41-42)
1Ipe' ina pewaloga enis epes si'i anona jas dembinai nawaloga basef kot lu'unai, owa'. Ama anona nemaf God ina nowalogepa, owa'. 2Waf ipe' panda'ana pawaloga enis epesanai, anona nemaf waf anama atona God nonda'mepana ipe' wapoti'. Ikwaf anama atona ipe' panda'ana pawalogas God nogwamepana ipe'.
3Dei' maina ipe' pati usan sa'unai nape naep sahin owan ipe'isi, ea' ipe' owa' pegawa hapataf lu'unai nape naep ipe'imi? 4Dei' maina ipe' ata' pali' pa'ipa sahin owan ipe'isi pa'i, ‘Owalome, ae' a'i iwafamena usan sa'unai nape naem ine'inai.’ Ea' hapataf lu'unai nape naep ine'imi. Na'ama owa'. 5Ipe' malogof biamipei pambaso'mami. Ipe' ata' pili' pewafam usan hapataf lu'unai nape naep ipe'imi ma piti andeande', pewafamenan usan sa'unai nape naep sahin owan ipe'isi.”
6Ea' Jisas na'ipam anom basef womun etin wapoti' na'i, “Amamaga bu'wami usi'imi, amama ipe' ina pese' nombagw, owa'. Ea' ipe' ina pekwaha awelep amama bu'wami ipe'imi mefe'ma bogof, owa'. Na'ama mofofo'asom awelep amama bu'wami bo'walelef amamumi ea' nombagw mohepa mea'epa.
Ipe' penda' beten pendahali' God la'ela'ef
(Lu 11:9-13)
7Ipe' pihali' God nambimb nese'epa amamaga amama. Amama ipe' pegolopami nambimb pitolom. Ipe' peha uta, nambimb God nusi'amepana uta. 8Dei' main, emi egafis sohali' Godi, nambimb sofa' amamaga. Emi egafis segolopa amamaga, nambimb seatolom. Ea' emi egafis soha uta, nambimb God nusi'amanasa uta. 9I'i enin awani nihali' ahalomana ma anom gwa'aimi, atuwasi ahaloman nefela anom owap nose'anam? Owa'etin. 10I'i anona awani nihali' ahalomana nease'ana anona eol, anan nambimb ina nose'ana anona yul aonai, owa'. 11Ea' ipe' amam nematawa aopei pase'asa amamaga bu'wami atoma awasi ipe'isi. Ea' endilisi Ahalomepa ipe'inai nape heven nikila' ipe' epes. Anan wapoti' nambimb i save nose'asa amamaga bu'wambu'wami amama sahali' anan emi. 12Maina waf ipe' pa'i esis sanda'mepana ipe'i, ipe' penda'masana na'ama etin. Basef amama ofagema ma mi'uli Godi na'ipa Mosesanai naloma basef God fowa' na'ipa amam profet manda'ami.
Basef womun etina utagw biagw sa'unai lu'unai
(Lu 13:24)
13Ipe' pefe' piowis uta sa'unai. Dei' main, anona eaf nafe' nawis wambel aonai hel alihina endilisi uta wapoti' alihina. Ea' amam nematawa hiesi safe' saila eaf anama. 14Ea' uta ma eaf nafe' nawis wambel sape namisagoma ina alihina, owa'etin. Uta wapa'mona. Wambel anama sape bo'wes andeande' la'ela'ef. Eaf anama ahifina endilisi ma seafe'. Amam nematawa atona etin esis ea' amama atom sati eaf anama sailana.
Ape' mundumafuma andeande' ma amam profet mambaso'mami ma'i mowalipasa basef Godi endilisi
(Lu 6:43-44, 13:25-27)
15Ipe' pindumafuma andeande'ma amam profet mambaso'mami ma'i mawalipasa basef Godi. Amam mafi'i mambaso'mepa manda' ufunufeni mataga patolom ande' atogon mape bo'om sa'umbilim si'i sipsip. Ea' ukup amamumi nomon aom endilisi ma ipe' ma'i mohambombagepa mohepa si'i nombagw wandafumi. Ea' ipe' ina peme'am, owa'. 16Ipe' piti waf amamunai netaga nendawalap si'i su'utip pail lawah ea' pegawa waf amamunai bo'ona o aona. Epes ina sola su'utip wainim mandelef amama higatagumi, owa'. Ea' esis ina sola su'utip fik si'i ahip anona mandof higatagunai, amama wapoti' owa'. Ea' waf aonai amamunai nataga nandawalap aona si'i su'utip awami. 17Ea' na'ama etin lawah hiami anom bu'wami mola su'utip bu'wami gwa'aimi, ea' lawah awami mail mola su'utip awami numbutimi. 18Lawah bu'wami ina mail mola su'utip awami ea' lawah awami ina mail mola su'utip bu'wami, owa'. 19Lawah hiami owa' mieil mola su'utip bu'wami, amama esis salam saofam nif. 20Na'ama ipe' nambimb piti waf amam profeti netaga nendawalap si'i su'utip mail lawah, ea' pegawa waf amamunai bo'ona o aona.
21Ipe' ina pi'i amam nematawa hiesi hi'alas sofala ae' sa'i Dembinai, pi'i anona nemaf seafe' siowis kingdom heveni, owa'etin. Emi egafis sila okom Ahalomei nape heven ma sielana, esis etis anona nemaf sefe' suwis kingdom heveni. Enis lamasa owa'. 22Nemaf anama amam nematawa hiesi sifi'i si'ipa ae' si'i, ‘Dembinai, Dembinai, ape' mawalipasa basef Godi si'i profet amama mawalipas ea' ma'i agel ine'inai matofa ambagof awami mape epesi! Ape' ma'i agel ine'inai manda' ikwaf naninani la'ifinai si'i God nanda'anai!’
23Nemaf anama ae' iwalipas i'ipas alihis na'ama i'i, ‘Fowa' gani pafi'i pafi'i pataga dei' Ae' ina egawa ipe', owa'. Ipe' epes panda' waf aonai, ipe' si'amae, ipe' fo'o.’
Waf biefina sala' ifagw
(Lu 6:47-49)
24Emi egafis seme' basef ae'ami ma sielami, esis si'i epen gawainai nala' ipat ananinai netawa etap anama otambaiguma la'ifiguma. 25Anom nimeguf mafe' ea', asaf lu'unai nalai, walemb nawisi lu'una embel kolo'walami mafe', uf la'ifinai naluwi, amama makoto'ma ipat anama ea' ina nato, owa'. Epen inima nala otamba lu'wami mosahapana netawa. 26Ea' emi egafis seme' basef ae'ami owa' silam, esis si'i anona aman nahaga nagaoli. Anan nala' ipat ananinai natoma ilifa wesan atona. 27Anom nimeguf mafe' ea' asaf lu'unai nalai, embel mataga, ea' uf naluwi la'ifina, amama maola ipat anama nondokwaef nowa. Ipat anama nato na'oh kwapete' endilisi aona.”
28Nogota anama Jisas na'i basef amama laumi ma hi'alam, esis same' basef ananimi ea' gegelalasis kwapete'as endilisi. 29Dei' main, anan ina nawalipas si'i amam falafumi ma'ipas, owa'. Anan na'ipasa basef la'ifimi naloma pepel na'ama etin si'i amam agufumi ma'ipas. Amam dambami mawalipasa mi'uli Godi ina mawalipas na'ama si'i anan, owa'. Anan la'ifina endilisi nikila'am.
Zvasarudzwa nguva ino
Matyu 7: aojF
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2013, Wycliffe Bible Translators, Inc. All rights reserved.