Matyu 4
4
Satan nagwamba Jisasa neanda' waf aonai
(Mk 1:12-13; Lu 4:1-13)
1Ambal Bu'unai Godi nofa' Jisas nafe' anona etap fatauguma wafiguma ma Satan nagwambana neanda' waf aonai. 2Jisas nape aon si'inai tu'waninai, ina na' gwa'aimi, owa'. Nolomahana. 3Ea' aman anama Satan nagwamba epesi nafi'i na'ipana na'i, “Ine' na'i ine' Nogalomana Godi, dei' kipa otamba amama ma'oh etapi motaga si'i bret.”
4Ea' Jisas nagwa basef na'ipa Satan, na'i, “Baibel na'i,
‘Bret atona ina nose'asa ambagof namumi epes, owa'. Ape' ukup mopoma basef motaga malogel Godi atom monda'apa meape la'ifipa.’ ”
5Ea' Satan nao'wana nondowasa' Jerusalem nahaponana naitu ipat Godi lu'unai sanda' lotuwanai sanda' lotuwanai ilif. 6Ea' Satan na'ipana na'i, “Ine' na'i ine' Nogalomana Godi, dei' nukupa' newa etap. Dei' main, basef mail Baibeli ma'i na'ama ma'i,
‘God ni'ipa ensel Ananimi mifi'i muhapilina lagof amamumi mumafina ma otamba ina moha bo'wagah ine'imi, owa'.’ ”
7Ea' Jisas nagwamana basef na'i, “Anom basef Godi wapoti' mape na'ama ma'i,
‘Ipe' ina pegwamba dembinai God ipe'inai neanda' waf aonai, owa'.’ ”
8Ea' Satan nao'wana mafe' wapoti' anona halaf launai endilisi nihi'ambana amamaga hiami bu'wami endilisi mape etap hiagoma maloma amam nematawa hiesi. 9Ea' na'ipa Jisas na'i, “I'i ine' nindiwa nembawa netawa neanda' lotu nendanifela ae', ese'ena amamaga amama hiami ine'imi atom.”
10Ea' Jisas nagwamana basef na'i, “Satan, nekwahae fo'o. Dei main, Baibel na'iam na'ama na'i,
‘Ipe' penda' lotuma Dembinai God ipe'inai atona ea' penda' opeh ananimi atom.’ ”
11Ea' Satan nakwahona nafe', dei' ensel Godi mafi'i magiambama Jisas mumafiana.
Jisas nafela maol nanda'ana gani etap hiagoma Galili
(Mk 1:14-15; Lu 4:14-15)
12Jisas name' basefa Jon nanda' kalabus, ea' nehafel nakwaha Nasaret nafe' etap hiagoma Galili. 13Ea' nakwaha wambel ananinai nafe' Kaperneam, nape felefele'ma walemb batupa'manai lu'unai Galili, anona etap agilinama Sebulun naloma Naptali. 14Ea' nafe' nape etap anama si'i basef fowa' anona profet Aisaia na'iam dei' mataga mandawalap endilisi. Anan nanda' basef amama na'i, God na'i,
15“Etap anama Sebuluni Naptali felefele'ma etap anama eaf nafe' nataga naoh. Etap anama wambel Jordan fisanamb, wambel hiagoma agel lu'unai Galili. Esis wambel anama hiagoma ina sogawa basef Ae'ami, owa'. 16Ea' sape si'i epes isima sape owamb atonai, si'i saga'i. Owagama gani sieti owaf lu'unai niluwi sotologon andeande'.”
17Ea' dei' Jisas nafela maol na'ipasa basef la'ela'ef. Nawalipasa basef amama na'i, “Nemaf anama bu'unai felefele' neataga ma ipe' piowis kingdom heveni. Na'ama dei' ipe' pemboma opalef pefe'ma God.”
Jisas nofalai amam biamibiama mailana
(Mk 1:16-20)
18Jisas naila akata nafe' etin walemb batupa'manai lu'unai Galili, nati amam biam Saimon Pita naloma owalomana Andru. Amam mala anemb magi' agof manda' bisnis. 19Anan nati amam biam na'ipam na'i, “Ipe' bipa pifi'i pembalo'a basef ae'ami pila ae'. Fowa' ipe' pagi agof, ea' dei' ihi'ambepa pefe' pi'ipa enis epes sila ae'.”
20Ea' amam mame'ana mohafel mehip makwaha anemb ma'oh mailana mafe'. 21Ea' Jisas na'i nindiki'ah nafo'o felefele' ea' nati anom amam biam wapoti' Jems naloma owalomana Jon maloma ahalomam amamunai Sebedi. Amam matoma bot mape magundisa anemb amamumi. Ea' Jisas nofala amam biam Jemsi Jon. 22Ea' mohafel mehip makwaha bot mafi'i maila Jisas mafe'. Ahalomam amamunai Sebedi makwahona nape bot.
Jisas nawalipasa basef amam nematawa hiesi ea' nanda' enis awes nanda'asi sataga bo'wes
(Lu 6:17-19)
23Ea' Jisas nafe' etap hiagoma Galili, nafe' na'ipasa basef bu'wami Godi amam nematawa hiesi nomon ifagw esis Juda sa'i basef sapeimi. Basef bu'wami anan na'ipasami amama ma'i, “Nemaf anama bu'unai nafi'mai ipe'. Ama ipe' hipei piowis kingdom heveni.”
Ea' nanda' epes hiesi awes naninani nanda'asi sataga bo'wes wapoti'. Awes main naninani nanda'asi, Jisas la'ifina nanda'as sataga bo'wes. 24Basef Jisasi mohafel mafe'agon etap hiagoma Siria ma nanda' awesisi hiesi sataga bo'wes. Ea' esis Siria wapoti' sofa'ai hiesi awesisi sofa'as safi'mai Jisas. Enis ambagof awami manda'as sahaga sagaol, enis ambagof awami mahas maofas nif, enis same' alop nimanimi lu'wami mahas, enis lagof bo'wagah monda'alasi esis sofa'as safi'mai Jisas nanda'as sataga bo'wes hi'alas. 25Na'ama amam nematawa hiesi sailana safe'. Enis sape etap hiagoma Galili saloma enis sape wambel anama 10-peleina Dekapolis saloma enis sape Jerusalem, enis sape etap hiagoma Judia, saloma enis epes sape walemb Jordan fisanamb esis hiesi sailana safe'.
Zvasarudzwa nguva ino
Matyu 4: aojF
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2013, Wycliffe Bible Translators, Inc. All rights reserved.