Génesis 7
7
Kjok ëre piktonge
1E irgo ga Jehová tjl̈ẽ Noé kong ga «No kjl̈araso wl̈ẽnor shäng pjl̈o bek bor bokso l̈i pja. E kjĩshko ga pja opzrës jem kjyong l̈i roy, bop boy, bop wapga, bop pjl̈aydoga tjok. 2-3Öng ber pjl̈ú bor poshrëkkl̈o wl̈o obl̈ë obl̈ë, sënwa obl̈ë obl̈ë, e sös wl̈ënggl̈a dogl̈o kjäk kjäk (7), popga dogl̈o kjäk kjäk (7). L̇l̇amo sös wl̈ënggl̈a kjl̈ara kjl̈ara, popga kjl̈ara kjl̈ara. Shäryos eni, jer kjok ëre kjing go l̇l̇ëm wl̈o. 4Sondë kjwara go ga shunyo ichër shrë dbargwo sak pkëng (40), shkë dbae. Eshko ga l̇l̇ëye shäryoror tek dämärshko l̈öng së l̈i pjiga tjarë ber drete» l̈e.
5Kuya ga l̇l̇ëye l̈ara ba kong l̈i shäryara eni.
6Kjok ëre piktongshko ga Noé l̈u pjl̈ogl̈o sak dbäw pjl̈ogl̈o tjer (600). 7Era eni ga opzrëno jem kjyong l̈i roy, ba boy, ba wapga, ba pjl̈aydoga tjok, shtẽya dirë l̇l̇ëm wl̈o. 8-9Ga öng uako wl̈eniyo, öng uako l̇l̇ëm wl̈eniyo, äya kjl̈oshko so, sënwa, e öötong l̈öng ba shwoy, ga söra jem pjök pjök, wl̈ënggl̈a kjl̈ara kjl̈ara, popga kjl̈ara kjl̈ara, l̈ara Sbörë ba kong sorë l̈i eni.
10Öötong dbargwo kjäk (7) ga shunyo shrono, kjok ëre pir wl̈o. 11-18Mok pjök, dbar sak kjwara kjingsho kjäk (17) dbaryo ga Noé l̈u pjl̈ogl̈o sak dbäw pjl̈ogl̈o tjer (600). E dbaryo ga opzrëno jem kjyong l̈i roy, ba boy, ba wapga, ba pjl̈aydoga tjok. Öng, äya kjl̈oshko so, sënwa, e opzrëno jem l̈ok pjök pjök kjyong l̈i roy ba tjok bakoe. Opzrëno jem wl̈ënggl̈a kjl̈ara kjl̈ara, popga kjl̈ara kjl̈ara. L̈ara Sbörë ba kong sorë l̈i shäryara eni.
E irgo ga u bäng bängzara Jehovárë beno jong tuke. E dbaryo ga dl̈ung kësbang buk kjok dorong l̈i dl̈oktong, tuktong kjone pogo. Kjok dogo ëmdë ga di börgak tjeng l̈i böptuktonge. Shunyo shrono pjang kjok ëre kjing go dbargwo sak pkëng (40), shkë dbae. Eshkoshko ga di jem poyong l̇l̇ögong l̇l̇ögong, ga kjyong l̈i beno buk di kjing wëng erä. 19Di poyono ara, öötong dl̈up l̇l̇ë l̈ok kjok ëre kjing go kjókshko l̈i jnena beno drete. 20E irgo ga dl̈up l̇l̇ë jnena pjirshko ga di l̈i poyono jem, öötong wop orkwo jyãgl̈o pjl̈ogl̈o sak kjwara kjingsho shkëng (15). 21Nopga l̈öng kjok ëre kjing go kës l̈i wol̈ono eni. Öng, äya kjl̈oshko so, sënwa, e l̈öng kjok ëre kjing go kës l̈i kjëtong eni bakoe. 22L̇l̇ëye l̈öng së kjok ëre kjing go, tjwl̈õ shrë wl̈eniyo, e kjëtong drete. 23Gueniyo Noéra beno sök së, l̈öng kjyong l̈i roshko ba tjok bakoe. Epga eröe. L̇l̇amo pjitong dret, nopga, öng, äya kjl̈oshko so, sënwa bakoe. 24Ga kjok ëre piktong beno eni, öötong dbargwo sak dbäw kjingsho sak shkëng (150).
Zvasarudzwa nguva ino
Génesis 7: tfr
Sarudza vhesi
Pakurirana nevamwe
Sarudza zvinyorwa izvi
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fsn.png&w=128&q=75)
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.