Mateo 2
2
Magomal Jesús-takapmalad Jesús-otummogal
1Imi Jesús Belén-Provincia-Judeagin mimmilesgu, teun takalgu Errey-Herode pel-kwapa Provincia-Judeagin neg-takmai. Imi Jesús-mimmilejad-cholbal, Magomal tad-nakwed-akar Jerusalénzhe nonimal. 2Tegin Magomal Jerusalénzhe nonimalgu, ekisnonimal:
—¿Judio-errey-imichal-mimmilejaddé pia maidé? Imi anmal tad-nakwedbal e-iskwa-kanonikid takchamal. Tenal anmal tanimalbal Pab Tummadyob we errey-otummogal.
3Tegin Errey-Herode Magomal-chogzhad itosgu, Herode chuli-pinzhe-pes. Tegin tulemal-Jerusaléngin-pukmalad-pel-kwapa ampa chuli-pinzhe-pesmalmo. 4Tenal Herode pel-kwapa tule-irwal-Pabzhe-kolmalad-tummaganzhe tegin tule-Moisés-igalgin-tulemal-oturdamaladzhe kochamalgu, Herode Judio-tummaganzhe ekichialzhun:
—¿Imi Cristo-Pab-akpene-chogzhad-palmidagoed-tuledé, pia mimmilego-ade?
5Tegin Judio-tummagan Errey-Herodega chogalzhun:
—Imi Cristo Belén-Provincia-Judeagin mimmilego. Tenal akpene Pab-kaka-palchoged Pab-kartagin nermasdo:
6Imi we neg-kwebur-Belén, Judea-napkin chii.
Tenal we neg-kwebur pollé-taklegen,
tenal neg-kwebur-pul-chunchogmaladga
pul neg-chunchogedmo.
Imi we neg-kwebur-Belén-akar tule-tummad
nononiko neg-takegal,
Tenal we tule-tummad an-Israel-tulemal-iktuedga kunoniko,
tule-oveja-takedyob.
Mi. 5:2
7Tegin Errey-Herode pidzhi Magomalzhe kochagu, Magomalzhe nuekwa ekichialzhun, iskwade inkwa naigunoni. Tegin Magomal Herodega palchogalmalzhun, emalde untargus takchamal iskwa kanoni.
8Tegin Herode kep Belénzhe Magomal-palmijogalidgin Magomalga chogal:
—Imisgin pe nadmaldo. Tenal pe Belénzhe omojal, pe nuekwa machi-amimalo. Tegin pe machi-onojal, anka pe kannan choge-tagmalbalo, an Pab Tummadyob ne-otummo-negalmo.
9Tegin Magomal Herode-chogzhad itosmalgu, ukin nadmalzhun. Tenal Magomal irmanatapmaladgin, akpene iskwa-tad-nakwedzhik-kajad kannan Magomal-iktumai-kus kanonibal. Tenal we iskwa Magomal-iktu-natap machi-maidzhe omogal. Tegin Magomal-natapidgin arpak iskwa machi-maid-inniki naigunoni. 10Tenal Magomal takchagu iskwa emalga naigus, peyedzhe weligwal-itosmal.
11Tegin Magomal machi-maid-negzhe togzhamalgu, taknonimal machi aga e-nan-María-waglik mai. Tegin Magomal machi-abir chimtinonimalgu, kep Pab Tummadyob machi-otummoalmal. Tegin Magomal kep ulu-egasmal Jesúsga immal-nuegan ukegal. Tegin Magomal Jesucristoga immal-nuegan ukchamal: olo, immal-wawadikid tegin ina-wawad-mirra.
12Tenal Pab Tummad kabdakedgin Magomalga chunmanoni ka chogal: “Pe melle kannan Herodeje pal nemalo.” Tegin Magomal kabdakedgin-ka-choglejadbal Herodeje pal nadzhul-kusmalzhun. Tegin Magomal igal-pidbal kannan aga negzhe nadmalzhun.
José Maríabak machiga Egiptoje wakijad
13Tegin Magomal-naded-cholbal, Pab-angel kabdakedgin Joséga chunmanoni ka chogal: “Kwisgu. Imi pedin machiga-tegin-e-nanga Egiptoje pe wakinenab. Tegin pe Egiptogin pe peio an-pega-chogoedzhe. Imi Herode María-machi-amine tar-mesgal.”
14Tegin José atagalgu, ilgwen machi-tegin-e-nan-ches. Tenal José apka te mutikkin yok naal nadmal Egiptoje. 15Tenal José Herode-purkwijadzhe Egiptogin pesmal. Imi Jesúsgin weob immal-kujad Pab akpene e-kaka-palchogedbal chogzhagujadyob pél kus. Tenal Pab Tummad chogzhado:
Imi antin naga machije kocha
Egiptogin nogal itije megdagal.
Os. 11:1
Herode Beléngin machi-purwigana-mechad
16Tegin Errey-Herode mag-itosgu Magomal e-yardas, Magomal-inik peyedzhe ulual. Tenal Magomal-machigin-chognonikidbal Herode wilub kas. Al Herode aga e-chapinganga chogal: “Imi pemal Beléngin tegin tule-abir-mamimalad pel-kwapa machimal-pirkabo-nikad imis-mimmilejadzhe-pakal pél pe mesmalo.” Tegidgin Herode-e-chapingan pel-kwapa machi-purwigana-mechamalzhun.
17Imi Herode weob machi-purwigana-mechaddin, akpene Pab-kaka-palchoged-Jeremías Pab-kartagin chogzhad-yopí kunoni. Tenal teun Jeremías chogzhado:
18Imi Ramágin tulemal pela-pela
pukib-itogedbal okormananimal.
Tenal we omegan-Raquel-e-wagwagan
e-nuskan-purkwijadbal pela-pela okormananimal.
Tenal tule kwen unnijul we omegan-pukib-itoged ochulogal.
Jr. 31:15
Jesús Nazaretche nonigujad
19Tegin Herode-purkwijad-cholbal, Pab-angel Egiptogin kabdakedgin Joséga chunmanoni ka chogal: 20“Imi pedin Israel-napche aga e-nanbak kannan machi-toto-chedenabbal. Tenal tule-machi-toto-mesbi-kunaid pato purkwis-choggu, al pe akalzhul kannan nebalo.”
21Tegin José Israel-napche machi-toto-cheszhun aga e-nanbak. 22Tenal José wisgusgu Provincia-Judeagin Arquelao e-pab-Herode-anal neg-takmai-pes, José kwakial Provincia-Judeagin meggal. Tegin Pab-angel kabdakedgin Joséga chognoni-choggu Joséde akalzhul Galileagin mego, al José Provincia-Galileaje nadzhun. 23Tegin José tegin María machi-totobak neg-kwebur-Nazaretche megnonimalzhun.
Imi Jesús-Nazaretkin-megwijad akpene Pab-kaka-palchogmalad chogzhad-yopí kusdo. Tenal teun Pab-kaka-palchoged chogzhado: “Imi tulemal we tule-pinonimalo, tule-Nazaretkined.”
Zvasarudzwa nguva ino
Mateo 2: kvn
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2009, Wycliffe Bible Translators, Inc. All rights reserved.