Lukah 11
11
Hi Yehu napapeakang lara habayang
(Mat. 6:9-13, 7:7-11)
1Einya hangi laɗɗu hi Yehu anahabayang ta mahangin na padoung. Namengaka pahabayang, einya hatou waling ta ana pahakoalan-Na nama wina‚ ‘‘Moiri, peakagama nyiama habayang toungu hi Yohanih Pembaptih ana peakaja habayang ɗa ana pahakoalana.’’
2Jiayak hi Yehu winaja, ‘‘Nyiami ami habayakanguka, wimi noung,
‘Ama nama eigu ta hurga,
Anakay ngaladukana natou nawuatu-haligunya na ngara-Mu nama ɓiaha-madi.
Anakay kam ʄaʄi Raja nama pareahaya ngaladukana natou ta pinu-tana.
3Woakigama nyiama tutu-reka anguma wehang-malung.
4Jaka poahi-poɗahugamaja ɗa doku-jalama,
touʄellana nyiama ama dengaja ɗahalaɗ ɗa tou hawanguk lahi nyiama;
ʄaka haɗiɗima abi mawoluya nama doku-jala ta rahina a aminya nama pakaka.”
5Manga hi Yehu winaja ɗama keriya‚ ‘‘A eikanguka hatou waling lahi nyiami, nama halaku ta umma oalina ta paɗua kariɗung, ʄaka hi wina, ‘Oale, woaletung tillu kababa, 6kaɗang na oaligu nama tanga halakuna, ɓuhi lina ta ummagu ʄaka nyouwa da eimang pa angu taguna ɗunnaǃ’ 7Manga na oalim nahamaimu, awinakaguka waling ta rongu umman, ‘Abi pahadukaɗiwa nyouwaǃ Na ɓinnagu napatoaɗika. Nyouwa ʄaka ɗa anagu langa maturumak. Daku weakumang pakiɗi ʄaka da eimang pawoagugu.’ ”
8Hi Yehu wina, ‘‘Laka oaliɗimunya dana weakumangu pakiɗi ana woagu. Jiaɗinguka a damu makiiɗing amu karei pangalaya, enga kiɗina ana woagu gananya napawukumu. 9Jiayaka, Nyouwa hiwigugimː Kareikaɗing, nyiami enga woaɗagim; Manyerang, enga mikolling; Kadokukunya na ɓinna, enga wehanagim ɓinna. 10Kaɗang natou nama karei nawoanya; natou nama manyerang nakolling; ʄaka natou nama kadokukung ɓinna, enga wehananya ɓinna. 11Ta joangami nyiami, da eimang hatou maɓokul nama woanya maddu na anan, ana kareikak kabokuǃ 12A da, nama woanya tamihik na anan, ana karei tillu manuǃ 13Laka ami irrakɗingu, mipeaʄellang ami woaja makalung ɗa anami. Pareih-reihing na Amami ta hurgaǃ Enga woanagim Hangahu Harrina hi Alla ɗama karei lahi Ɗunnaǃ’’
Hi Yehu reihi kuahaya waling lahi Beelhebul
(Mat. 12:22-30; Mrk. 3:20-27)
14Einya hangi laɗɗu hi Yehu ana wurutung waddi tana, hina louhung waling ta tou kabangnga. Ana louhunguk na waddi tana, natou nou panewi ɓalinanyaka. Ɗangu natou nama ɓannar, 15ʄiaɗinguka ei ʄellaja ɗama panewi, ‘‘Napiaku ana palouhunya na moritana kaɗang ana wainya na kuahana hi Beelhebul, na raja moritana.”#11.15 Beelhebul nahawiɗang rajaɗanyak ɗa moritana, ʄiayaka nama ɓeija ngaladukaɗa ɗa waddi da kalung.
16Ei ʄellaja ɗa tou heaka ɗama wolunya aaka hi Yehu, ʄaka ɗakarei-Ya kana woluya na tada napakaɓarraɗengang, tadananya na kuahana nama waling lahi Alla. 17Jiaɗinguka hi Yehu napeaja napakabu atiɗa. Jiayaka hi winaja, ‘‘A eikanguka nama hangina na negara, narakyatuna ɗama pamuhung ha-hangi kaɓuang, na negara nou enga namohu. Jaka nama hangina na rongu umma aɗa pageꞌakanguka enga bearana hiɗa pa iha-ihang. 18Touʄellana na krajaan moritana; nama hangi kaɓuangun aɗa patau ɗengakanguka kaɓuang hawanguk, na krajaan nou natawehar. Nyiami wimi-Ga nawurutung moritana waingu kuahana hi Beelhebul. 19Ana paɗeningkanguka Nyouwa akwurutung moritana waingu kuahana Beelhebul, manga geara kuahananya ɗama keriwu ɗahawaiɗa aɗa wurutung moritana? Kaɗang ɗuɗa ʄella waiɗanya nakuahana hi Allaǃ Ɗama keriwu hou ɗama pateka wikinya gananya napapaɗeitum lahi Nyouwa ama jalaya. 20Kuwurutunya na moritana waingu kuahana hi Alla, ʄaka nou ihinanyaka hi Alla anapakakanya napareahana ta paɗuami.
21Na moritana pahameara nounya na moiri umma nama kullih, nama duku nibbu toada, ana ʄawaya na umma wikina, ngaladukaɗa ɗa ihi ummana da eimang maparimanaja. 22Jiaɗinguka a eikanguka moiri umma hawanguk nama reihi kullih ana geꞌanya ʄaka hina taluya, natou nou nama reihi kullih naparimaja ɗa nibbu toadan ɗapakadawuna na moiri umma nou, manga hina ɓa-ɓarih ngaladukaɗa ɗangawu paparimana.
23Natou dama kaɗabbiwa Nyouwa, ʄiaya nama geꞌa-Ga, ʄaka natou dama gata-Ga ʄia hinguyaka nama nyagaruya napakera-Guǃ’’
Naɓalina na waddi tana
(Mat. 12:43-45)
24Hi Yehu napangalanya napanewina, “Ana louhukanguka na waddi tana waling ta hatou, na waddi tana nou halaku mengatananyaka ta maraɗa korah ana manyerang tou heaka pingi pahangahuna, ʄiaɗinguka dana kollimang. Jiaya hi wina, ‘Nyouwa enga ɓali nouguha ta umma napalanga ɗujakuguǃ’ 25Ana ɓalika, tomananyaka natou nou nama langa warahun, meara nouna na umma napalanga papanyawi ʄaka hina ɗinyak. 26Jiayaka hina halaku ʄaka nakamaikaja pituɗa ɗa waddi tana heaka ɗama reihi irrak waling lahi ɗunna. Tamaɗanyaka ta tou nou manga enga houɗaka. Jaka na morikuna natou nou, reihi maʄirra hinguyaka waling ta kawungana.”
Natou nama egi ati
27Ana mengaka hi Yehu papanewi tounouna, hatou na mawinni nama waling ta joanga tou ɗangu nakawulang, wina-Nya, ‘‘Namarii-malalangu namawinni nama pa ana-Gu, ʄaka nama pahuhu-Wuǃ’’
28Jiaɗinguka hi Yehu nagapiya, ‘‘Reihi marii-malalanguya natou nama ranguya napatikina hi Alla ʄaka nama pahalakuyaǃ’’
Ɗa tou ɗakareiya hi Yehu kana woluya natada napakaɓarraɗengang
(Mat. 12:38-42)
29Tangirun ɗa tou aɗa korrunya hi Yehu, napangalanya napanewina, wina, ‘‘Reihi irrakuyaka natou dalaru ya. Ɗuɗa ɗakarei-Wa tada napakaɓarraɗengang kapiku manni-Gu, awiɗa, ʄiaɗinguka da mali hangimangu tada napakaɓarraɗengang pawoaɗaja, ʄiapaya na tada napakaɓarraɗengang lahi nabi Yunuh. 30Tonounaka hi nabi Yunuh, anaʄaʄi tada ta tou Niniwe, touʄellana na Ana Tourara enga ʄaʄina tada napakaɓarraɗengang ta tou dalar ya. 31Ta laɗɗu rahi puɗananya na pinu-tana, na raja mawinni waling ta Halatan nakiɗi ʄaka hina paɗeitugimi jala lahi nyiami tou dalar ya. Kaɗang ɗunna aminya walina ta hupuduka tana, kapiku ranguya na manyakatuna hi raja Halomo, awina. Ta rahi ya, einya nama reihi ɓakul waling lahi raja Halomo, ʄiaɗinguka dami ranguma-Ya. 32Ta laɗɗu rahi puɗananya na pinu-tana, ɗa tou Niniwe enga ɗa kiɗi ʄaka ɗapaɗeitugimi jala lahi nyiami tou dalar ya. Langa hariaɗaka ɗa tou Niniwe waling ta doku-jala, kaɗang ɗaranguyak napanunga-papeakanguna hi nabi Yunuh. Ya einya ta paɗuami, nama reihi ɓakul waling lahi nabi Yunuh, ʄiaɗinguka dami hariamangǃ’’
Napapeakanguna hi Alla napawahadanya na morikuda
(Mat. 5:15, 6:22-23)
33Napangalanya na patikina hi Yehu, wina, ‘‘Da eimang tou nama kaɗekang api-wei manga hina kaɓuninya, a da hina toaɗi wainya pajalu. Jiaɗinguka natauya ta padouna nama ʄaga, natou nama tama kana itaya nama wahang awina. 34Ɗa wuamatam ʄiayaka na api-wei ta ihim, aɗa hingarɗing ɗa wuamatam, ngaladukana na ihim nawaha kalung. Jiaɗinguka aɗa kalulatkak ɗa wuamatam, ngaladukana na ihim nakapetang. 35Atonoukanaka, pa atikingu, a langa einyaka nama wahang lahi ou abi nahilu kapetang. 36Ngaladukana na ihim ana wahakanguka da hilu eimanguha makapetang, toungu na api-wei nama wahang ana pawahagu.”
Hi Yehu napajalaha ɗa tou waling ta kaɓuangu Parihi ʄaka ɗa gurr agama tou Yahudi
(Mat. 23:1-36; Mrk. 12:38-40)
37Namengaka hi Yehu papanewi, einya hatou waling ta kaɓuangu Parihi nama wadda-Ya angu ta umman. Manga hi Yehu halakunanyaka ana a noungu. 38Natou waling ta kaɓuangu Parihi nou hangotarnanyak ana itaya hi Yehu ana angu, ɗalimma-Na dana ɓaha moulumah, keriya napata agama tou Yahudi. 39Jaka hi Moiri winaja, ‘‘Tonoim nyiami tou waling ta kaɓuangu Parihi tidi pawarahmija ɗa kaɗeangaɗ ɗa kaꞌa ʄaka ɗa taꞌungumi, ʄiaɗinguka na taroangami nabinunya mamarihak ʄaka mimimir parei-reihing. 40Nyiami makatoꞌamiǃ Da hi Allaɗing nama woluya na kaɗeangan nou ʄaka nawolu ʄellaya na taroangan? 41Jiaɗinguka, muwoa wali atiɗinya natou milla gananya nama eingu lahi ou, ʄiayaka nama paɗening ta hagana hi Alla. Wainyah na pata nou, ngaladukana hina warah na tagumu.
42Mohuyay nyiami, tou waling ta kaɓuangu Parihiǃ Nyiami miwoanya hangi waling ta habulu, waling ta ihi parawimi lahi Alla, touɗaː ɗa roudangu, ɗa lahoana ʄaka ɗa kunyi, ʄiaɗinguka nyiami dami pallimanya napa awi-panamunguna hi Alla ʄaka napawolu nama paɗening. Ɓakalang ʄiayaha napapahalakumi, ʄaka abi mimatamanya hawanguk na pareahana hi Alla.
43Mohuyay nyiami, tou waling ta kaɓuangu Parihi! Mibuhang padoungu papa-akang ta rongu umma pingi pakaɓuang tou Yahudi ʄaka mibuhang kapa-akagam ta paregang awim. 44Mohuyay nyiamiǃ Nyiami mearang rati dama eingu watuna. Jiayak ɗa tou ɗama letiya na pinun daɗa peꞌamanya a ratiya. Touʄellana nyiamiː nahawolumi nama irrak dapa itaɗa ɗa tou hawanguk ɗama kerimi, dahapeaɗa langa keriɗagiminyaka na tanogum nama marihak ta hagana hi Alla.’’
45Hatou na gurr agama tou Yahudi wina lahi Yehu, ‘‘To Gurr, nahilukaɗimuka nou, katuku ʄellamugamak nyiamaǃ’’
46Hi Yehu napagaping, ‘‘Mawilla ʄella nyiami gurr agama tou Yahudiǃ Nyiami miwoaya na lii-pareaha nama buatu ʄaka nama haruwi ta oali tou Yahudim kaɗa pahalakuya. Jiaɗinguka nyiami wiki da hakuɗukmangu ami gatang kaɗa haleala aɗa pahalakuya awim. 47-48Mawillaminya nyiamiǃ Kaɗang ɗa apu-ɓokumi ɗama hamatiha ɗa nabi.#11.47 Ta huratuna hi Lukah waingu hilu ʄawa nabi na nabi ʄiayak natou nama patomanya napatikina hi Alla. Jaka nyiami wiki mi oꞌanyaka gananya napawoluɗa ɗa apu-ɓokumi, paliinya ami woluja rati mamanadang ɗa nabi. Na hukung napawoanagimi hi Moiri enga reihi buatuya kaɗang nahawolumi nou! 49Nou ʄiayaka na manyakatuna hi Alla wina memaka, ‘Nyouwa enga pangidiguja ɗa nabi ʄaka ɗa papaleawa-Gu lahi ɗuɗa tou Ihrael. Jiaɗinguka eija ɗapahamatiɗ ei ʄellaja ɗapapamawillaɗǃ’ 50Waling ta kawungana hi Alla ana woluya na pinu-tana, ɗa tou langa hamatiɗaka nabi. Jiayaka hi Alla hina hukugimi tou dalar ya, kaɗang ɗahawoluɗ ɗa apu-ɓokumi. 51Ɗuɗa ɗahamati pangalang nabi waling aɗa hamatiya hi Habel lapakung ɗahamatiya hi imam Hakaria. Hi imam Hakaria napahamatiɗa ta joanga pingi pamanuatung ʄaka ta korung maharri ta ɓei Umma Pingi Pahabayangu tou Yahudi. Miwainyaː Tou dalar ya enga hukuɗaja witina ngaladukaɗa nahawoluɗa.
52Mawillaminya nyiami gurr agama tou Yahudiǃ Na kuhi napaweha waingu ɓinna peangu larana nahawukuna hi Alla einya aɓijaluya lahi nyiami. Jiaɗinguka nyiami wiki dami tamamangu ta rongun kaem manyerany na peangu nou. Parei-reihing nyiami, miheiruja ɗa tou nama buhang papeanya nahawukuna hi Allaǃ’’
53Hi Yehu ana ɗujakunyaka na padoungu nou, ɗa gurr agama tou Yahudi ʄaka ɗa tou waling ta kaɓuangu Parihi ɗakajikkuya hi Yehu. Ɗuɗa pakakangɗanyak aɗa leaku-Ya kana panewi paɗangu, awiɗa. 54Jaka patada pakaluɗanyaka, ka apaya na jala patiki-Na, awiɗa.
Zvasarudzwa nguva ino
Lukah 11: wnk
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Wycliffe Bible Translators, Inc. All rights reserved.