Matius 4
4
Pinonsubaan i Yisus di Kotua do Rogon
(Mar. 1:12-13; Luk. 4:1-13)
1Mantad di nobotisan#4:1 nobotisan: noboptoisan i Yisus, om angataino dii di Tatod do Kinoringan Isido mongoi siri padang do kovotuvan do ponsubaan di kotua do rogon. 2Om apat nopulu tadau om apat nopulu sodop Isido siri padang do kovotuvan do au mangakan. Pongovian nopo dii om nokopuriman Isido do vitilon. 3Om rikotno dii i kotua do rogon do monsuba daa di Yisus om kadisido, “Nong TanakKo do Kinoringan suuopo iti tongovatu sumiliu do taakanon,” kadi rogon.
4Nga jawapno dii i Yisus, “Kivaro nokotulis siri Kitab do, ‘Okoniko bubugol taakanon kovijau do tulun, nga irino kasangkat iri tinangar do Kinoringan,’ ka,” kadi Yisus.#Antangai Gulion 8:3.
5Om angataino dii di kotua do rogon i Yisus do mongoi soi Bandar Yorusalim, i Bandar do Olidang, om angataino dii mindakod, om poingkokotono dii Isido siri soribau do taap di Valai Sasambayangan Tagajo. 6Om pitangarno dii i kotua do rogon di Yisus do, “Nong TanakKo do Kinoringan potuunaipo silo do aui orualanKo sabap nokotulis siri Kitab do,
‘Suuon di Kinoringan i tongomoloikatJo
do mangajaga Dika,’ kadi tinangaran si Kitab,
om
‘Poingkaangi iolo Dika,
supaya au orualan ino takodNu do kootung dilo vatu,’
kadi tinangaran vokon si Kitab,”
kadi kotua do rogon.#Antangai Buuk Sinding 91:11, 12.
7Nga jawapno dii i Yisus, “Kivaro nogi nokotulis siri Kitab do, ‘Adano monsuba do Tuhan, i Kinoringannu,’ kadiri tinangaran si Kitab,” kadi Yisus.#Antangai Gulion 6:16.
8Om angataino dii kavagu di kotua do rogon i Yisus tumakad siri timpak do kulud#4:8 kulud: kotud di asavat marong do pinoimpa di rogon Isido di kasangkat diri kopomorintaan siti vonuvo om i kaandaiojo. 9Om pitangarno kavagu i kotua do rogon do, “Kasangkat diti nga itaakku daa Dika nong tumungubKono do sumamba dogo,” kadi rogon.
10Nga kadi Yisus, “Pogiduno, Soitan! Kivaro nokotulis siri Kitab do,
‘Misti sumambako di Tuhan i Kinoringannu,
om iri noo kouvangan Disido vojoonnu,’
kadiri tinangaran si Kitab,”
kadi Yisus.#Antangai Gulion 6:13.
11Om pogiduaino dii di kotua do rogon om rikotno dii i tongomoloikat do monulung Disido.
Tinumimpuun i Yisus Monuduk soi Vonuvo Golilia
12-13Nga korongou nopo dii i Yisus do pinojiil di raja i Yaya Mamamatis,#4:12 Mamamatis: Momomonsu pakaayai dii silo Bandar Nasarit siri Vonuvo Golilia. Om minimban Isido mijon siri Bandar do Kaparnaum. Kaparnaum nopo nga siri somok do Botung Tagajo do Golilia siri Vonuvo Jobulun om Natali. 14Iri nopo kaangaian Disido siri Kaparnaum dii nga porikot diri tangar di kinomoi di nabi Yasaya, i popolombus di tinangaran do Kinoringan pogulu, do irad diti,
15“Kivaro tulun i mijon silo Vonuvo Jobulun om Natali,
siri vajaan rumuuk silo laut,
siri sondipau di Bavang do Yurdon saralom Vonuvo Golilia,
irino pantok ijonon do oguu tulun di okonko bansa Joudi.
16Iolono iri bansa do monombonuvo do totuvong.
Om maino koontongno dii iolo diri monginavau diolo.
Om iolo nogi monombonuvo siri vonuvo do otuvong iri kapatajon
nga notitian do tanavau,
do nokorikotno dii iri Tuhan mijon sino diolo,”
kadi tinulis di Yasaya.#Antangai Yasaya 9:1, 2.
17Mantad dirino tumimpuunno dii i Yisus do papaabar do, “Rumorogo kouno do duso muju do oruaino i Kinoringan monguasa di tongotulunJo,” kaDisido.
Kinotimpuunon di Yisus Mongoloou di TongotulunJo
(Mar. 1:16-20; Luk. 5:1-11)
18Nga di manau-panau i Yisus siri disan di Botung Tagajo do Golilia, om kaantangaiJo dii i duvo misulod do posiling do rambat siri vaig, do iolo nopo nga i monginginsada. Ngaranjo nopo nga i Simun, i ponguranan do i Pitrus, om iOndorias. 19Om loovo dii di Yisus iolo do, “Kayono vaja kou Dogo, om onuonKu ikovu mogigium do tulun irad do mangarambat kou do sada,” ka. 20Om nokorongou nopo dii iolo diri, om iduai nopo dii diolo i rambatjo om vajano dii iolo di Yisus.
21Om lombusno dii i Yisus mampanau, om naantanganJo dii kavagu i duvo misulod i Yakub om i Yaya minirunggum diamojo,#4:21 diamo: diapa i Jobidi siri talud mamatou mongulit di rambat. Om loovo nogi dii di Yisus i duvo misulod, 22om turus iduai dii diolo iri talud om iamojo#4:22 amo: apa om vajano dii iolo di Yisus.
Minonuduk om Minongolingos i Yisus
(Luk. 6:17-19)
23Om ongoino dii pitongkop-tongkop i Yisus siri Vonuvo Golilia do monuduk Isido si tongovalai sasambayangan do tulun Joudi, om papaabar diolo diri Abar do Aandai nong potingkuro i Kinoringan monguasa di tongotulunJo. Om mongolingos nogi dii Isido kasangkat di moisosondiang toruol do tulun di au kataru. 24Jadi kotongkop nopo dii iri abar di Yisus siri Vonuvo Siria, om pingoovit dii diolo i tongotulun do au kataru si di Yisus, irad do kogidan, i rinosukan do rogon, i tumadan om i tulun kimai om moisosondiangpo toruol vokon. Om kasangkat dino nga liningasan di Yisus. 25Om okonko aalang-alang ginuu di tulun mantad soi Vonuvo Golilia, om mantad soi Opulu Bandar, om mantad soi Bandar Yorusalim, om mantad soi Vonuvo Yudia, om mantad soi sondipau do Yurdon do minaja di Yisus.
Zvasarudzwa nguva ino
Matius 4: LabukPKV
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1995, Wycliffe Bible Translators, Inc. All rights reserved.