Luke 1
1
1Yivuunde Tofile, mbili batu bayelige wuteende maambu mavyoge ve ganegaretu. 2Banyigule mo nave yulu yawu ne bimweenyi bibile ve dibaandu di maambu mene, babamakalugu miloonzi mi maambu ma Nzambi. 3Ve yulu wuditige maambu mene mootsu baande ve dibaandu, ne me gaandi matsetaase re bweedi muteendile yu musamu wene mu mangike mangike Tofile. 4Mure yikeyabe yimwanze gyotsu gi maambu mene.
Diburu di Sa Batise
5Gubile muveegitsi malagu mu dikyesi dikumenge Irode gu tseengi yi Sudé, dine dyandi Sakari, abile gu dikabu di Abya. Mugatsyandi dine dyandi Disabeti, abile ndaandi yi Aron. 6Sakari ne mugatsi babile basuungeme ve wusu Nzambi, bakyelenge migyele myootsu ne birumu bi Fumu guga sumune. 7Te basebile ne mwaane, mumbare Disabeti abile yigumbe. Yawu bootsu babile keke binunu. 8Wisi wumoosi, Sakari adyanzenge yisalu gyandi gi muveegitsi malagu ve wusu Nzambi, mumbare bile re dikyesi di dikabu dyandi mudyanze, ne vane guvyoge dyaambu. 9Bavage yikanugu, navevaga yawu ne kale ne yikanugu gyene gisoole re Sakari mu wunyingene guyoke miyoombu gu Ndagu Nzambi. 10Ve yoka Sakari miyoombu batu bootsu babile gu kane nusaambile. 11Ne vane, kime yi Nzambi asupugile Sakari, nuteleme gu tselu yi mabagele, ve yitsige gi yokungu miyoombu. 12Sakari nulabe yandi, aparemugu, ne agaangu ne wome. 13Te kime yi Nzambi ayambile yandi re: «Sakari yiyalabe wome, mumbare Nzambi atseyulu disaambulu dyagu.» Mugatsyagu Disabeti aguburile yu mwaane dibagele, ne yiguluge yandi re: «Sa.» 14Yigulabe wunyi wu mbili mu yandi ne batu bambili bagusaangile diburu dyandi. 15Ne yandi agubile mutu wungyenze ve wusu Fumu. Asakenu malamu, nisi ma kale ne agubile wubasu ne Dinyunyi Disuungeme baande gu difumu di ngwandi. 16Agugabuse mbili baane ba Israel gu Nzambyawu. 17Agwitse ga kime yi Nzambi ne dinyunyi ne ngudi yi mubigitsi Ili, munoongise batayi ne baane bawu ne mukaluse mirime mi bange manzange, mu yululu batu basuungeme, akegukigile Nzambi dikabu di batu babakaroondi maambu mandi. 18Sakari ayambile kime Nzambi re: «Maguyabe dyaambu dyene nde tsenyi? Mane mugatsi dimanune.» 19Kime Nzambi ayagule yandi re: «Mare Gabryel, makatelimi ve wusu Nzambi, mamasindugu muyambile, nuloonze yu tsaangu yiyinyi. 20Kagu yigubile yibubu, yisakebeyambile kwanga ne mu wisi wukesupugu maambu mene. Mumbare yisane gitu mu maambu mami makelabene mu dikyesi dyene.»
21Batu babile ne kyere mumbare Sakari avure tsiinge gu yirini giyokungu miyoombu. 22Te ve vate yandi, aseberungule wuyambile nawu. Yawu bayulusu re atselabe yimage. Akalugu yibubu, ayambilenge nawu keke ne biliimbe. 23Ve mane Sakari wudyaanze, agabugu gu ndagwandi. 24Ve yulu vane mugatsyandi Disabeti abege dimi, migweli miranu asepulenge gu kane abilenge ke gutsi ndagu. Ataasenge gu murime wandi re:
25«Labe di Nzambi atsevagile me, mabetsya ne tsonyi ve miisu ma batu bami mumbare maseburenge, te Nzambi atselabe me ngyebe muburule me yo.»
Tsaangu yi diburu di Sesu
26Mu mugweli wu musamunu, Nzambi asindige kimandi Gabryel gu divule di Galilé gu Nasarete. 27Gu nuumbe mugyetu yiganeneyabe babagale yibaande Susefu muyonge. Yandi abile ndaandi yi maate David, dine dyandi Mari. 28Kimene yinyingene gu mbuge Mari muyambile re: «Bile ne yinyunge! Fumu Nzambi ameritsige yu gyese gyandi giginene, yandi ayi nagu.» 29Mu munoongu nyivwene, Mari ayulu page ne abene wunyigugulu. 30Kime ayambile yandi re: «Mari yiyalabe wome, mumbare yitsedile myule ve wusu Nzambi. 31Ne mapape yigubege dimi, yigubure mwaane dibagele ne yiguluge yandi re Sesu. 32Agutsitsungu re Mwaane Nzambi Puungu. Fumu Nzambi agubyatse yandi nave byatsu kagaandi David. 33Te agukume mubu ne mubu mu yitsuku gi Israel, ne dinyaange dyandi disakevu.»
34Mari ayambile kime Nzambi re: «Ake dyo diguvyogile nde tsenyi mumbare masameyabe babagele?» 35Kime ayagule yandi re: «Dinyunyi Disuungeme digusundigile yu, ne ngudi yi Nzambi Puungu yigufuge yu ne yiluunze gyandi, re dibaandu mwaane wukeburu agubile wuyelimine agutsitsungu re: Mwaane Nzambi. 36Labe, Disabeti kiindagu ne yandi agoneviinge mwaane, ake ne migweli misamunu. 37Mumbare gusaandi dyaambu dikelembugunu ne Nzambi.» 38Vane Mari ayagule re: «Mande musalitsi wu Fumu, dyo divyogi natseyambile yu.» Ne kime Nzambi yigabugu.
Mari anyalise Disabeti
39Ve vyoge batsufu, Mari ayende nyavu guyelabe Disabeti gu divule di mukoongu wu museengi wu Sudé. 40Anyingene gu ndagu Sakari ne ayubule Disabeti. 41Ve siimbule Mari myogu gu Disabeti, mwaane wupupe gu difumu dyandi. Disabeti abasu ne Dinyunyi Disuungeme. 42Ne ayame mundunge wumunene ne ayambile re: «Nzambi atseluunze yu.» Nuvyogilile bagyetu bootsu ne myule myandi miyi ve yulu mwaane wukebure yu! 43Mande nyi mure nguyi Fumwami ayitsi gu mbugami? 44Mumbare yimelabe ve yitseyubule me, mwaane wutsebase ne yinyunge gugare difumu dyami. 45Yine yinyunge mumbare yibile ne gitu re Fumu agudugise mayambile yandi.
Diimbu di Mari
46Kere vane Mari ayambile re:
«Magitse wunene wu Fumwami.
47Malabe wunyi wu mbili mumbare Nzambi atseyobule me.
48Ne atselabe me ngyebe, me musalitsi wandi wugane tsoongu,
labe, baande nemunyi wuwu batu bootsu bagutsitsenge me re wuveegu myule.
49Mumbare Nzambi wuvyogilile ngudi atsevagile me maambu mamanene.
Dine dyandi Wureele. 50Dingyebe dyandi diyi mubu ne mubu
gu bootsu babakagobisi yandi.
51Akavagi maambu mamanene ke ne googu wandi wune ngudi.
Avavise bababile ne mataase mamabi mu mirime.
52Asekule bafumu mu bakwange bawu,
atelige batu babasigeme.
53Aveege mbili manyi gu bababile ne nzale,
ne agabuse bikiti makake mwaasi.
54Aruge muyamune Israel, musalitsi wandi:
Aselibene wuritsige diroonde dyandi,
55gu Abaraam ne bandaandi baandi mu yivigu gitabule yandi
ne batayi betu.»
56Mari amane migweli mireru gu mbuge Disabeti, kere vane agabugu gu diimbu dyandi.
Diburu di Sa Mubatisitsi
57Dikyesi di Disabeti mudile mwaanandi, dipule. Abure mwaane dibagele. 58Bambaatsi ne bakiinde baandi bayulu tsaangu yi Fumu aritsige diroonde dyandi mu yandi, ne yawu balabe yinyunge naandi mu tsaangwene. 59Ve vyose mwaane tsufu tsaambu, mu wu poombu, bayende naandi mugyerise, baroonde wuluge yandi nduge yi tayandi Sakari. 60Te ngwandi ayambile re: «Gusaandi, agutsitsungu nde re Sa.» 61Bayubule yandi re: «Nga gugare yitsuku gyagu gusaandi mutu wune dine dyene!» 62Ne yawu bayubule nyivu gu Sakari ne biliimbe muyabe dine di mwaane. 63Sakari avonde yiteendulu, ateende re: «Ndugandi nde Sa.» Batu bootsu bagibeme. 64Mbaangu mbaangu Nzambi asiingise Sakari mu beyambile, abwamugu nuyimbile Nzambi. 65Vane ne vane batu bootsu babatsagelenge ve mbare Disabeti bagaangu ne wome, ne gu museengi wu Sudé batu banyigulenenge yawu ne yawu re maambu mamanene mamalabene. Ne yawu babayulungu mo, bataasenge, nuyambile re: «Ne mwaane wene wu mukyeki, wugubile nde tsenyi?»
Diimbu di Sakari
66Bootsu babayulungu maambu mene bakyela mo mu mirime myawu, nuyambile re: «A wuwu mwaane wugubile nde tsenyi?» Dikake di Fumu dibile mu yandi. 67Kere Sakari tayandi abile wubasu ne Dinyunyi Disuungeme ne abige maambu re:
68«Digitsi Fumu Nzambi yi baane ba Israel,
mumbare atselabe ngyebe, nuyobule yitsuku gyandi.
69Asindigile yetu muyobulitsi wune ngudi
gu dibure di David musalitsi wandi.
70Nane re na yambile yandi dyo kale
mu mine mi babigitsi baandi basuungeme re:
71Maguyobule yenu mu bakolitsi benu,
ne mu ngudi yi babakalabi yenu ngusu.
72Re nane, Nzambi aritsige diroonde dyandi gu batayi betu.
73Ne abangule yivigu gyandi gitabule yandi ne tayetu Abaraam,
74muvage re ve dikemane yobulu mu dikake di bakolitsi betu,
dikesalile yandi guga kyere.
75Nuyende ve wuswandi gugare wuyelimine, ne wusuungeme
bawisi bootsu ba monyu wetu.
76Ne yu mwaane wumukyeki, yigutsitsungu re
mubigitsi wu Nzambi Puungu mumbare yiguyendenge va wusu Fumu mu balile yandi nzile.
77Muveege batu baandi buyedi muyabe re bamadile monyu,
ne musiingulu kokolu mu mabi mawu.
78Nyiinge ke mu dingyebe di Nzambyetu.
Anaritsige yiveele gyandi gigu yulu.
79Mutsoombuse bootsu babamatsagele gutsi diviseme, ne gutsi posi yi difu,
ne wuyendise matage metu gu nzile yi polu.»
Bubangugulu bu Sa
80Te mwaane abangugunge ne dinyunyi dyandi diboonga ngudi, ne atsagelenge ke gu bitsiige bi yigaangi kwanga ne mu wisi wu supugu yandi muloonze batu ba Israel.
Zvasarudzwa nguva ino
Luke 1: SNQ
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES