Luka 18
18
Shumpwoo kaah m'ee mat'kaah kihh m'ee gudyeell
1Jesu satt m'ee shumpwoo zheppkamm keeniy mwopp, tihh sh'in kamm diy mwopp le nyi a ching tihh mwopp kihh dhangNaan twass, tapp sarr mwopp diy waam mou. 2Satt mwopp le, “Gyet dhighin m'ee tughuzyill shi, bhi mwopp cham sh'in m'ee gudyeell w'u baah kihh kihkhir Naan, kooh kihh naah yitlwaann khi m'ee gurum mou. 3Dhighin tughuzyill mhizeh ni bhi m'ee mat'kaah gyet nhighin zag. Matkaah ni kihh dy'iin sh'i gudyeell ni, kihh so'kumbokk nyi le, ‘Kum'bokk, Daah, ghi mang'am kaah nah dhighin dyeell w'u naar na kihh shaardyeell keena se.’
4“Sh'ee bhi gudyeell ni oz dh'om mou. Dhangg kaarooh yemm dyi matt bhi satt shin le, ‘Kai, kooh bhalang phirooh baah ih kihh kihkhir Naan, kooh ih kihh naah yitlwaann khi m'ee gurum mou, 5weett kihhsheh bhi pee'rooh mat mhize ni tukhur a'n pwetd, bhi a'n p'ee shandyeell w'u tihh ih mang'am diy kaah nyi dhighin dyeell ni, tapp diy kihh witt yeer a'n kihh ji keera w'u chitt-chi-chitt mhizeh.’ ”
6Bhi Daah Jesu satt zheppkamm keeniy ni mwopp le, “Wu klihng bii w'u gudyeell gushiin-zeenn mhizeh satt. 7Mihh nyi a kihhsheh bhi Naan wu'nyi diy kwat bad khi gurum keeniy w'u blihp, w'u a gurum khinyi w'u mwopp kihh wall kom nyi khipar kihh puus mou aa'? Ai nyi p'ee kwat bad khimwopp, kooh dyinn kihh pann yi-y'aa shin kihh mwopp lee dhangg. 8Ih kihh satt wunn, nyi p'ee chim kihh kwat bad khimwopp mou. Weett kihhsheh ih kihh satt wunn, p'ar mihh L'aa khi Gurum diy baa'ji, bhi kyed diy kad pihhzeenn dhighin yill ni oh?”
Shumpwoo kaah m'ee Farisiiy kihh m'ee gu'lappwapp
9Jesu satt shumpwoo mhize mwooh kihh m'ang le runn a mhi-shigrett pwetd, harr mwopp kihh bheez mwoohzeh. Satt le, 10“M'ee gurum vel gyet mwopp ka duam LuhNaan p'ee dhangNaan; meeh a Farisiiy, wu'zeh a gu'lappwapp. 11Farisiiy ni dharr kihh yibyid shin diy dhangNaan le, ‘Daah Naan, ih plang gha p'ee baah wu'an a kaa kakhar gurum mwopp mou: mwopp a mhi rang'gang, mwopp a mhishiin-zeenn, mwopp a mhigaa; h'aa kooh a kaa gu'lappwapp mhize se mou. 12Ih kihh yaa'pwoo p'ee puus vel dhighin kooh shaptarr wu'rangg, yakhal ih kihh pihh tullkaah gha dhighin koohmeeh w'u ih kihh kad.’
13“Gu-lappwapp mhizeh wu'nyi dharr seh zhong-zhong; baah kamm eep w'a eep yit niy phikihtihngg maah mou. Dharr kihh sram phitukhurr niy diy sh'i wadphitukhup, kihh satt le, ‘Daah Naan, ghi sh'in kaahdhoonn a'n, p'ee a'n a gu'shigbis!’ ”
14Jesu satt gurum ni mwopp le, “Ih kihh satt wunn, gu'lappwapp mhizeh ni waa dum tuluh keeniy kihh mihhseh'wurett kihkyeen Naan mett Farisiiy mhizeh. P'ee koohweeh w'u kihh eepkaah niy, bhi mwopp p'ee sam kihh nyi, dhangg gwooh kihh sam kihh kaah niy, bhi mwopp p'ee eep nyi.” #Mat 23:12; Luk 14:11
Jesu le'wurett zhepp wu'dyeen mwopp
Mat 19:13-15; Mar 10:13-16
15Par'meeh shi bhi gurum mwopp kaah ja kihh zhepp wu'dyeen Jesu tihh bwum mwopp, le'wurett diy mwopp. Dhangg kaarooh zheppkamm khinyi mwopp naah kihhsheh, bhi mwopp tepbhelepp gurum ni mwopp. 16Weett kihhsheh bhi Daah Jesu peet zhepp wu'dyeen ni mwopp lhija kihpee niy, bhi satt zheppkamm keeniy ni mwopp le, “Wu yet tihh zhepp wu'dyeen ni mwopp ja kihpee na diy. Tapp wu d'aam mwopp mou, p'ee dhenglong khi Naan a p'ee mwooh kihh m'ang shut kaa zhepp wu'dyeen se. 17Ih kihh satt a zeenn wunn, gwooh baah lapp dhenglong khi Naan kaa l'aa wu'shomm kihh lapp se mou, bhi baah nyi p'ee dhel dhighin mou.”
18Par'meeh shi, bhi m'ee gu'kihkyeen khi Zhepp Yahuda mwopp nang phi Jesu le, “Gukamm Gu-shigrett, a mihyeh a bii w'u a'n p'ee sh'in nyi tihh ih kad seen w'u harr ngaa-ngaa diy?” 19Bhi Jesu lapp nyi le, “A mihyeh l'e bhi ghi peet a'n Gu-shigrett? Ai baah m'ee gurum a ‘Gu-shigrett’ kad baah a Naan kyekk mou. 20Ghi man W'aar khi Naan w'u kihh satt le, ‘Tapp ghi sh'in gaa mou, tapp ghi tu'kaah mou, tapp ghi sh'in watt mou, tapp ghi tupp'pwoo dwungg kaah menguh mou, ghi pihhdhess pag mwopp kihh nhikhin keegha zag.’#Put 20:12-16; WSW 5:16-20 ”
21Bhi gwoh ni satt Jesu le, “Ih y'aa kyeer w'aar mhizeh ni mwopp bhi a'n kudyi a l'aa wu'shomm.”
22Kaarooh Jesu klihng bii w'u gwoh ni satt, bhi satt nyi le, “A bii kihmeh kudyi kihh wonn gha. Dum ghi seett kihh bii w'u gha kihh mwopp weett, ghi shin zhukhum mhipyaah mwopp dyishig. Mihh ghi sh'in kihhsheh bhi gha p'ee kwed kihh long kih dhengNaan, bhi ghi ji dhak ghi langdang na.”
23Kaarooh gwoh ni klihng bii w'u Jesu satt seh, bhi phitukhup nyi wad pwetd, p'ee gyet nyi kihh long a kaa wu'dyikk. 24Jesu naah nyi bhi kaah nyi dhoonn khinyi, bhi satt le, “Kai, mhilong mwopp p'ee sh'in a sh'in dhangg mwopp kihh mak dhel dhighin dhenglong khi Naan! 25Ai nyi p'ee fyeell mett tihh brihngg'tukhus dhel f'ung mulli kad mihh'pee a gulong kihh dhel dhighin dhenglong khi Naan.”
26Mwooh mwopp klihng bii w'u Jesu satt seh, bhi mwopp satt le, “Ai, mihh nyi rah a kihhsheh bhi a wuyeh p'ee mak kad bh'am?” 27Jesu lapp mwopp satt le, “Bii w'u m'aa zhepp gurum sh'in, bhi Naan kihh mak sh'in nyi.”
28Bhi Bitrus satt Daah Jesu le, “Ghi naah, wu'munn mu yet bii w'u gyet munn kihh mwopp weett dheeh, tihh mu lang diy dang gha 'y!”
29Jesu satt mwopp le, “Ih kihh satt a zeenn wunn, baah m'ee gwooh yet tuluh keeniy, kooh mat niy, kooh em'nhikhin mwopp, kooh pukhun mwopp kihh nhikhin, kooh zhepp niy mwopp p'ee dhakk dhenglong khi Naan, 30w'u dheng'pee nyi p'ee lapp lebhed w'u mett bii mihhseh ni mwopp dhighin t'ong mhi yill mhize mau. Dhangg dyi zag, dhighin t'ong mhi yillpwooh w'u kihh ji zag, bhi nyi p'ee kad seen w'u harr ngaa-ngaa.”
Jesu waa satt pwookaah muutt keeniy
Mat 20:17-19; Mar 10:32,34
31Bwoon mihhse, bhi Jesu wakharr zheppkamm keeniy w'u kaghapaad baa'vel seh lhipwat m'ee koghob, bhi satt mwopp le, “Wu naah, munn a arr k'aa dum Urshalima se, bhi kapp bii w'u gyet Mhi-wanggshiiy mwopp ran kaah L'aa khi Gurum p'ee gam. 32Mwopp p'ee pihh L'aa khi Gurum sarr Seghen'gurum mwopp, bhi mwopp p'ee nwang'zhung nyi, mwopp kas nyi, yakhal mwopp dyess zool kih nyi. 33Mwopp p'ee fwa gw'am nyi, yakhal mwopp t'u nyi. Weett kihhsheh, bhi nyi p'ee waa yakhal dyi kihh seen kih puus wu'kunn.” 34Dhangg baah zheppkamm ni mwopp manshiiy bii w'u Jesu satt runn seh mou, p'ee shiiy khi pwoo ni a w'u zihzok mwopp; a kihhsheh bhi baah mwopp man bii w'u satt seh mou.
Jesu wangg yit m'ee guvughum
Mat 20:29-34; Mar 10:46-52
35Kaarooh Jesu ji'wull kuss kihh Jeriko, bhi m'ee guvughum kihh tong nhighin pwoo arr phi dhang. 36Kaarooh gwoh ni klihng kihpee dw'uu gurum mwopp kihh tuud ja diy, bhi nang le, “Mwopp'muun, a mihyeh yakhal?” 37Bhi mwopp lapp nyi le, “A Jesu Gu-Nazaret arr ji dhel e'h.”
38Bhi guvughum ni piin dhekheh niy bhall-bhall le, “Daah Jesu, Em khi Dauda -ooiy! Ghi naah chikhirr keena oou!”
39Mwooh kihh dum kihkyeen dw'uu gurum ni mwopp tepbhelepp nyi, mwopp satt nyi le, gw'ar tong dh'ok. Weett kihhsheh bhi guvughum ni kihh sihkhitt shishatt dhekheh niy le, “Em khi Dauda ooiy! Ghi naah zheell keena oou!” 40A nyi seh bhi Jesu b'aa dharr, bhi satt gurum ni mwopp le, nw'aa ji kihh gwoh ni riy. Kaarooh guvughum ni ji'wull, bhi Jesu nang phi nyi le, 41“Ghi kihh t'ang tihh a sh'in a mihyeh gha?” Bhi guvughum ni lapp Jesu le, “Gwoohyon, ih kihh t'ang tihh yit na naahpee diy 'y.” 42Bhi Jesu satt nyi le, “Ghi naahpee dhak, pihhzeenn keegha bar gha.” 43Abet bhi yit gwoh ni y'aa naahpee, bhi lang'dang Jesu, y'aa kwoob Naan. Kaarooh gurum ni mwopp naah bii mihhse, bhi wu'mwopp zag y'aa kwoob Naan.
Zvasarudzwa nguva ino
Luka 18: Chakfem
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
©️2022 Luke Initiative for Scripture Translation