Luka 13
13
Wu tu'wapp tapp wu ky'em zag
1Sh'i pee mhizeh ni bhi pakk gurum w'u mwopp nhighin kihpee Jesu diy mwopp satt orr m'ee Mhi-Galili w'u gyet Bilatus l'e tihh mhi'lek keeniy mwopp twa mwopp diy. Mhi'lek ni mwopp twa mwopp a p'ar w'u mwopp diy kaah wus'biizhukhum Naan, bhi harr teghem mwopp roob kihh teghem long bii'zhukhum khimwopp ni. 2Bhi Jesu pring mwopp le, “Naah mug'wuh bhi gyet Mhi-Galili mhizeh ni mwopp a mhi-shigbis w'u mett kakhar Mhi-Galili mwopp weett, bhi a nyi a bii w'u l'e tihh wu'mwopp shwaazheell kihhsheh 'y? 3Kooh lee, ih kihh satt wunn, mihh wu tu'wapp mou, bhi wu'wunn zag p'ee p'ar ky'em. 4H'aa kooh a gurum kaghapaad baa'pwoghokunn w'u gyet luhdhengg-bhonggpee w'u Silo'am rumm sam twa mwopp seh, bhi wu kihh ryeeh seh wu le gyet wu'mwopp a m'ee mhi-shigbis w'u mett kakhar gurum w'u Urshalima mwopp weett e'? 5Kooh lee, ih kihh satt wunn, mihh wu tu'wapp mou, bhi wu'wunn zag p'ee p'ar ky'em.”
6Bhi Jesu satt shumpwoo mhize mwopp le, “M'ee gurum gyet kihh m'ee tihng koon w'u kopp dhighin bongg'anab keeniy. Bhi kaarooh gwoh ni dum lyap zhepp koon tihngg koon ni dhangg kad koon ni l'aa maah, 7bhi satt laa'dhakk bongg'anab keeniy ni le, ‘Dheeh munn a byitt w'u kunn se bhi a'n kaah ji lyap zhepp koon tihngg koon ni ih kad mou. Ghi eep tihng koon ni ghi ming seh! Dharr tihh kihh dyaas mwarram'yill diy kr'ong a p'ee mihyeh?’
8“Bhi laa'dhakk bongg'anab ni pring nyi le, ‘Gwoohyon, dyinn ghi yet tihng koon ni diy dhangg p'ee byitt kihmeh, tihh ih sak pee diy mekher kang kug nyi, ih l'e zhug nyi. 9Mihh la zhepp yakhal satse, bhi rett; mihh lengg kihhsheh, dhanggbhi ghi eep lhi'baa kyekk.’ ”
Jesu bar m'ee mat p'ar Puus Nookdyi
10P'ar m'ee Puus Nookdyi bhi Jesu kaah sh'in kamm dhighin m'ee Luh'kang, 11bhi m'ee mat nhighin w'u kihh m'ee riin w'u l'e shw'al mat ni p'ee byitt kaghapaad baah pwoghokunn. Shw'al ni nyig mat ni dhen a w'u ku-kurum harr baah kihh mak eep sat yakhal dharr mou kooh lee. 12Kaarooh Jesu naah nyi, bhi peet nyi, satt nyi le, “Ih fwoon yi pwoo shw'al keeyi.” 13Bhi Jesu l'e sarr niy kih mat ni. Abet bhi mat ni dhepp yakhal dharr, bhi y'aa kwoob Naan.
14Tukhup gu'kihkyeen#13:14 Kooh a m'ee Luh'kang khi Zhepp Yahuda wu'rangg gyet kihh kwed kihh gu'kihkyeen kihmeh, kooh vel. Mhi-kihkyeen ni mwopp gyet a kaa pastor kooh mwoohnan Ekklesiya w'u mwasseh se. A mwopp gyet kihh naah dhakk w'u p'ee sh'in dhighin Luh'kang ni mwopp. khi Luh'kang ni shaan pwetd pee'rooh Jesu sh'in barr p'ar Puus Nookdyi. Bhi gu'kihkyeen khi Luh'kang ni satt gurum ni mwopp le, “Puus peemeh w'u gurum mwopp kihh mak sh'in dhakk diy; wu ja tihh mwopp bar wunn diy m'ee puus mhizeh ni mwopp sihng; baah a kih Puus Nookdyi mou!”#Put 20:9,10; WSW 5:13,14
15Bhi Daah Jesu pring gu'kihkyeen khi Luh'kang ni le, “N'an m'ee mhi-raanaan wu'baan! Kooh a meeh muh wu'rangg kihh shang ron'dong keeniy, kooh zaa'kwiy keeniy kih pee-ku'khul p'ar Puus Nookdyi dum kihh nyi phi am tihh pihh am diy nyi mou aa'? 16Hah, dheeh kan rett tihh mwopp fwoon mat mhize, w'u a reep khi Ibrahim,#13:16 Shiiy khi “reep khi Ibrahim.” A rooh mat ni a mat Isra'ila. Zhepp Isra'ila weett mwopp kihh peet shut a “zhepp khi Ibrahim.” w'u Shetan dyan dhen p'ee byitt kaghapaad baah pwoghokunn, se p'ar Puus Nookdyi mou aa'?”
17Kaarooh Jesu satt bii mihhse, bhi shoopp kihh mhitonn nyi mwopp weett, bhi dw'uu khi gurum ni mwopp weett sh'in rettyit p'ee v'ur bii'aapwoo w'u kihh sh'in.
Shumpwoo kaah mostad kihh pin'shaan
Mat 13:31,32; Mar 4:30-32
18Jesu satt le, “Dhenglong khi Naan ni a kaa mihyeh shi se? An p'ee kammshiiy nyi a sh'i mihyeh shi se? 19Nyi a kaah reb y'ee sherem mostad w'u m'ee gurum kopp bongg keeniy, bhi yon put tihngsheep, harr bul-shaapp mwopp ja l'e liz kih songgsheep ni mwopp.”
20Jesu waa nang diy le, “An p'ee kammshiiy dhenglong khi Naan ni a sh'i mihyeh shi se? 21Nyi a kaa pin'shaan w'u m'ee mat roob kihh loonfiin w'u kamm zhangg kunn; bhi t'en loonfiin ni dhen, harr pin'shaan ni shaan loonfiin ni dumkang.”
Wu dhel pwooluh w'u wuh-weell
Mat 7:13,14; 21-23
22Jesu sokihkyeen kihh mwaan keeniy p'ee k'aa dum Urshalima, bhi kihh waa arr v'ur tughuzyill kihh kwangpee mwopp tihh kihh sh'in kamm diy dhighin mwopp. 23Bhi m'ee gurum nang phi nyi le, “Gwoohyon, a gurum lee kyekk mwopp p'ee kad bh'am aa'?”
Bhi Jesu satt gurum ni mwopp le, 24“Wu g'ung tihh wu dhel diy pwooluh w'u wuh-weell; p'ee ih kihh satt wunn, gurum dhess p'ee p'ar t'ang dhel dhighin, dhangg mwopp p'ee kad dh'el mou. 25Mihh pee wull w'u guluh ni yakhal dharr, harr y'aa pwooluh ni shakhat, bhi wunn p'ee dheeh dyarrang kihtekhell wu kihh bwappee diy, wu kihh dhang wu le, ‘Gwoohyon, Gwoohyon, kum'bokk, ghi wanggpee munn.’
“Bhi nyi p'ee pring nyi wunn satt le, ‘Ih man wunn mou; kooh pee w'u wu pwat diy mou.’
26“Dheeh wunn p'ee dhekhem satt nyi nyi wu le, ‘Hah, gyet mu kihh so mu shwaa kihshag kihh gha 'y, yakhal gyet ghi kihh sh'in kamm naarluh keemu mwopp weett e'h.’
27“Dhangg nyi p'ee pring nyi wunn satt le, ‘Ih kihh satt wunn, baah ih man wunn mou, kooh pee w'u wu pwat diy mou; dwam wu reen pwoo na, v'ur mhi-dhakk'wubis wu'baan!’ #KN 6:9
28“Kai, wunn p'ee p'ar nwang wall, wu shum aghaz wuh pwetd, p'ar w'u wu naah Ibrahim kihh Ishaku kihh Yakub, kihh kakhar Mhi-wanggshiiy mwopp weett dhighin dhenglong khi Naan, dhangg mwopp pwoorr wu'wunn shen lhidhel.#Mat 22:13; 25:30 29Gurum mwopp p'ee tong koghob Puus'kaa, kihh koghob Puus'ru, kihh Pwoo Wu'tihngg, kihh Pwoo Wu'bhakk mwopp ja dh'eer dhighin dhenglong khi Naan p'ee so soh rettyit.#Mat 8:11,12 30Dhangg wu naah, pakk gurum w'u gurum kihh bheez mwopp le nw'aa a wu'baan, bhi a mwopp mhizeh ni p'ee p'ar kwed a mwooh kihkyeen; dhangg pakk gurum w'u gurum mwopp kihh tihghin mwopp dhen kihkyeen mwasseh, bhi a mwopp mhizeh ni p'ee p'ar kwed pwenn kihbwoon.”#Mat 19:30; 20:16; Mar 10:31
Zheell w'u kihkyeen Urshalima
Mat 23:37-39
31Sh'i pee mhizeh ni bhi m'ee Farisiiy mwopp ja satt Jesu le, “Ghi yet pee mhize ghi dum m'ee pee wu'dyikk, p'ee Hiridus kihh t'ang t'u gha.”
32Bhi Jesu pring mwopp le, “Dum wu dyangg gu'raa'soon kaa wekherr mhizeh wu le a'n satt le, ‘Shinn kihh dhaarr bhi a'n p'ee pwat kihh mumullung mwopp, yakhal ih bar mhi'shwal mwopp; byittseh bhi a'n p'ee sihkhitt dhakk keena ih khibhid.’ 33Weett kihhsheh nyi a ching tihh ih sokihkyeen kihh mwaan keena shinn, kihh dhaarr, kihh byittseh zag, p'ee nyi p'ee cham sh'in tihh m'ee gu'wanggshiiy m'uut mee'pee wu'zeh dheng'pee a Urshalima mihngg shi!
34“Ai, Urshalima! Urshalima! Yi nhi twa Mhi-wanggshiiy yakhal yi kihh vat mwooh Naan lop lhija yi. A yit k'ong bhi ih kihh t'ang chakk zhepp yi ih le kihshag kaa nhikhin'koo kihh chakk zhepp rah l'e der shaapp rah se, dhangg baah wu dh'om mou! 35Wu naah, a'n ih yet luh keewu dheeh wunn koppee kyekk e'h. Ih kihh satt a zeenn wunn, wunn p'ee cham naah a'n diy mou, seeh p'ar puus w'u wu satt diy wu le, ‘Naan le'wurett gha, gha w'u ghi ji dhighin shumm khi Puup mu Naan!’#KN 118:26; Irm 22:5 ”
Zvasarudzwa nguva ino
Luka 13: Chakfem
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
©️2022 Luke Initiative for Scripture Translation