मत्ती 9
9
हवा भेयड़ा मिनखनै निरोगो करबो।
(मरकुस 2:1–12; लूका 5:17–26)
1ईसु एक न्याव म बेठर दरिआव क परलै नाकै खुदकी नगरी कफरनूम म आग्या। 2जणा लोग एक भाळ भेयड़ा मिनखनै खाटली म घालर बाकन ल्याया। ईसु बाका बिस्वासनै देखर बि हवा भेयड़ा मिनखनै ओडायो, “हिमत राख, तेरा पाप धुपगा!” 3जणा क्युंक सास्तरानै सीखाबाळा यहूदि मिनख आपसरी म बतळाबा लाग्या, “ओ अंय्यां बोलर परमेसर की बुराई करै ह।” 4ईसु बाकी हिया की बातानै जा'णर बाऊँ बोल्यो, “थे थारा हिया म बुरो क्युं सोचो हो? 5सोरो काँई ह? के अंय्यां ओडाबो ‘तेरा पाप धुपगा’ नहिस अंय्यां ओडाबो, ‘खड़्यो होर डोल-फिर?’ 6जिऊँ थे आ जाण सको की इ धरती प पाप धोबा को हक मिनख का बेटा कनै ह।” इकै पाछै ईसु बि हवा भेयड़ा मिनखनै बोल्यो, “खड़्यो होर तेरी खाटलीनै लेर तेरै घरा चल्योजा।” 7बो मिनख खड़्यो होर आपकै घरा चलेगो। 8लोग आ देखर डरग्या। बे परमेसर की जे-जैकार करबा लाग्या क बे मिनखनै ताजूब का काम करबा को हक दिओ ह।
ईसु को मत्तीनै बुलाबो
(मरकुस 2:13–17; लूका 5:27–32)
9जद ईसु बठैऊँ जार्यो हो जणा बे चुंगी चोकी प एक मिनखनै बेठ्या देख्या। बिको नाम मत्ती हो। ईसु बिऊँ बोल्यो, “मेरै गेल होले।” जणा बो खड़्यो होर बाकै गेल होलिओ। 10#लूक 15:1,2अर जद ईसु आपका चेला क सागै मत्ती क घरा रोटी खाबा ताँई बेठ्या जणा बठै बाकै सागै रोटी खाबा ताँई चुंगी लेबाळा अर पापी मिनख बी बेठ्या। 11बानै सागै बेठ्या देखर क्युंक फरिसी ईसु का चेलानै खया, “थारो गरूजी तो चुंगी लेबाळा अर पापी मिनखा क सागै खावै अर उठा-बेठी करै ह?” 12आ सुणर ईसु बाऊँ बोल्यो, “निरोगा मिनखानै बेद की जुर्त कोनी होवै, रोगलानैई बेद की जुर्त पड़ै ह। 13#मत्त 12:7इ ताँई थे जाओ अर सास्तर म मांडेड़ा इ बचन को मतबल काँई ह बिनै समजो, ‘म बलिदान कोनी चाऊँ पण दया चाऊँ हूँ। म धरम्या ताँई कोनी आयो पण पाप्यानै बुलाबा आयो हूँ।’”
बरत क बारां म सुवाल
(मरकुस 2:18–22; लूका 5:33–39)
14इकै पाछै यहून्ना बतिस्मो देबाळा का चेला ईसु कनै गया अर बानै बुजबा लाग्या, “थारा चेला बरत क्युं कोनी करै? जदकी म्हें अर फरिसी बार-बार बरत करां हां।” 15जणा ईसु बानै खेबा लाग्या, “ब्या की टेम जद बिंद आपका भाईला क सागै ह जणा बिका भाईला दुख मनावै ह के? पण बे दिन आसी जद बनड़ो बाऊँ न्यारो कर्यो जासी जणा बे बरत करसी। 16कोईबी पुराणा गाबा प नया सुती गाबा की कारी कोनी लगावै, अर ज कोई लगा बी ले जणा नई कारी भेळी होर बि गाबल्यानै दुणो पाड़ गेरै। 17#मर 2:22अंय्यांई नई अँगूरी पुराणी बखाल#9:17 अँगूरा का रसनै नया बखाल म घालर धर्यो जातो हो क्युं क जंय्यां-जंय्यां अँगूरा को रस पुराणो होतो बिमै हवा बणती। नयो बखाल तो बिकै सागै बढतो जातो पुराणा बखाल को काँई बढतो। अर ओ बखाल चमड़ा को होतो हो। म कोनी भरी जावै क्युं क ज्युँ-ज्युँ बा उठै जणा बा अँगूरी पुराणी बखालनै पाड़गेरै अर अँगूरी अर बखाल दोन्युई खराब हो जावै। इ ताँई लोग नई अँगूरी नई बखाल मई भरीं हीं।”
मरेड़ी छोरीनै जिंदो करबो अर रोगली लूगाईनै निरोगो करबो।
(मरकुस 5:21–43; लूका 8:40–56)
18ईसु जद अ बाता बानै बतार्याई हा क अत्ता मई एक यहूदि सभा को एक परधान बाकन आयो अर बाकै धोक खार बाऊँ अरदास करतो बोल्यो, “इबी-इबी मेरी छोरी मरी ह। ज थे चालर बिकै उपर हात धरद्यो जणा बा ओज्यु जी ज्यासी।” 19बिकी बाता सुणर ईसु खड़्यो होर आपका चेलानै सागै लेर बिकै सागै चालबा लाग्यो। 20बठै एक लूगाई ही जिकै बारा बरसाऊँ न्याह्णी को रोग हो। बा ईसु क गेलनै आर बाका कुर्ता की कोर क हात अड़ा दिनी। 21क्युं क बा सोच्या करती ही क, “ज म ईसु का कुर्ता की कोर क हात अड़ा देस्युँ जणा म निरोगी होज्यास्युं।” 22गेलनै मुड़र ईसु बिनै देखर बोल्यो, “बेटी हिमत राख। तू तेरा बिस्वास की बजेऊँ निरोगी करी गई ह।” अर बा लूगाई जदकी जद निरोगी होगी। 23जद ईसु बि यहूदि परधान क घरा पुग्या जणा बे देख्या क लोग बि छोरी क मरबा की बजेऊँ रोइ पिटी#9:23 यहूदि मिनखा म जद कोईकी मोत होवै चाए बो छोटो हो नहिस बडो हो जणा बे रोइ पिटी क सागै बंसरी बी बजावीं हीं पण राजस्थान म अंय्यां कोनी होवै इ ताँई आ बंसरी हाळी बात इ आयत म कोनी मांडी। पण यूनानी पोथ्या म आ बात बी मंडरी ह क बे बंसरी बजार्या हा। करबा लागर्या हीं। 24जणा ईसु बा मिनखाऊँ बोल्या, “थे अठैऊँ बारनै चल्या जाओ आ छोरी मरी कोनी पण सोवै ह।” आ सुणर लोग बाको मजाक उडाबा लाग्या। 25अर जद लोगानै बठैऊँ बारनै काड दिओ गयो जणा ईसु मांयनै जार बि छोरी को हात पकड़्यो जिऊँ बा छोरी जीगी। 26इ बात की चरचा च्यारूमेर फेलगी।
ईसु आँदानै आँख्या दिनी
27अर जद ईसु बठैऊँ जार्या हा जणा दो आँदा मिनख बाकै गेल होलिआ अर हेलो देर खेबा लाग्या, “हे दाऊद का बेटा, म्हारै प दया कर।” 28अर जद ईसु घर क मांयनै बड़गा जणा बे मिनख बी बाकन गया। बानै देखर ईसु बाऊँ बुज्यो, “के थानै बिस्वास ह क म थानै ओज्यु आँख्या दे सकूँ हूँ?” बे बोल्या, “हाँ म्हराज!” 29जणा ईसु बाकी आँख्या क हात अड़ार खयो, “जंय्यां थारो बिस्वास ह बंय्यांई थारै सागै होवै।” 30अर बे आँदा देखबा लाग्या। अर ईसु बानै अंय्यां चेतायो क, “इकै बारां म खिनई मना खिज्यो।” 31पण बे बठैऊँ जार बि झघा म बा बाता को ढींढोरो पिट दिओ।
गुँगा मिनखनै निरोगो करबो
32जद ईसु बठैऊँ जार्या हा जणा लोग एक गुँगानै जिकै फेंट होईड़ी ही बिनै ईसु कनै लेर आया। 33अर जद बिकै मांयनैऊँ बी ओपरी बलायनै काड दिनी जणा बो मिनख बोलबा लाग्यो, जणा बठै भीड़ ही जखी ताजूब कर खेबा लागी, “म्हें इजरायल म अंय्यां को काम पेली कदैई कोनी देख्यो।” 34#मत्त 10:25; 12:24; मर 3:22; लूक 11:15पण बठै खड़्या फरिसी खेबा लाग्या, “क ओ भूता का नाथ की सक्तिऊँ ओपरी बलायानै काडै ह।”
ईसुनै लोगा प दया आई
35 #
मत्त 4:23; मर 1:39; लूक 4:44 ईसु नगरी-नगरी गाँव-गाँव जार अरदास करबाळी झघा म सीखातो हो अर परमेसर क राज क बारां म चोखा समचार को हेलो पाड़तो, लोगा का रोगनै दूर करतो होयो फिर्या करतो हो। 36#मर 6:34अर ईसु जद बी भीड़नै देखतो बानै बापै तरस आतो क्युं क बे बि लल्डी की जंय्यां हा जिको गुवाळ्यो कोनी होवै ह जिकै बजेऊँ बा अठिनै-बठिनै रूळती फिरै ह। 37#लूक 10:2जणा ईसु आपका चेलानै खेबा लाग्यो, “लावणी आएड़ा खेत तो बोळा हीं पण ध्यानग्या थोड़ा हीं। 38इ ताँई थे खेत का धणी परमेसरऊँ अरदास करो जिऊँ बे लावणी करबा ताँई ध्यानग्यानै भेजै।”
Zvasarudzwa nguva ino
मत्ती 9: एस डब्लु वी
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
(c) 2010-2017, New Life Computer Institute. All rights reserved