मत्ती 14
14
बतिस्मो देबाळा यहून्ना की हत्या
(मरकुस 6:14–29; लूका 9:7–9)
1जद राजा हेरोद गलिल को राजा हो जणा बो ईसु क बारां म सुण्यो। 2अर बो आपका दासाऊँ बोल्यो, “के ओ बो बतिस्मो देबाळो यहून्ना ह? ओ मरेड़ाऊँ ओज्यु जिंदो होगो दिखै। इ बजेऊँ बिकै मांयनै चमत्कारी सक्ति काम करै ह।” 3-4#लूक 3:19,20क्युं क हेरोद आपका भाई पिळीपुस क जिंदा होतासोता बिकी लूगाईऊँ ब्या कर लिओ हो इ ताँई यहून्ना हेरोदनै ओळमो दिओ। जणा हेरोदिआस क खया म आर बिनै कोठड़ी म गिरवा दिओ। 5अर बो यहून्नानै मारबो चावै हो, पण बो लोगाऊँ डरतो हो क्युं क बे यहून्नानै परमेसर की खेबाळो मानता हा। 6पण जद हेरोद राजा को जलम दिन आयो जणा हेरोदिआस की बेटी दरबार म नाचर राजा हेरोदनै बोळो राजी कर दिओ। 7अर बो बिऊँ सोगन खार बोल्यो, “माँग जोक्यु बी तू माँगसी बो म तनै देस्युँ।” 8अर बा आपकी माँ का खेबा म आर बोली, “मनै बतिस्मो देबाळा यहून्ना को सीर थाळी म धर दिओ जावै।” 9आ बात सुणर राजा बोळो दुखी होयो पण बो दियड़ी आपकी जबान अर म्हेमाना क सामै बोलेड़ी बात की बजेऊँ बिकी माँगनै पूरी करबा ताँई हुकम दे दिओ। 10बो आपका आदम्यानै काळ-कोठड़ी क मांयनै भेज्यो जिऊँ क बे यहून्ना का सीरनै का'टर ल्यावै। 11अर यहून्ना को सीर का'टर थाळी म धर ल्यायो गयो अर बि छोरीनै दिओ गयो अर बा छोरी आपकी माँनै लेज्यार दे दिनी। 12अर यहून्ना का चेला आर बाकी लासनै लेज्यार गाड दिआ। अर ईसु कनै जार ओ समचार दिओ।
ईसु पाच झार मिनखानै धपायो
(मरकुस 6:30–44; लूका 9:10–17; यहून्ना 6:1–14)
13जद ईसुनै ओ समचार लाग्यो जणा बे न्याव म चढर उजाड़ म चलेग्या। जणा मिनख आपकी नगर्याऊँ निकळर बाकै गेल होलिआ। 14अर जद ईसु न्यावऊँ किनारै प उतर्या जणा बे भीड़नै सामै खड़ी देखी। बानै बि भीड़ प तरस आयो अर बठै जत्ता बी रोगला हा ईसु बानै निरोगो कर्या। 15अर जद दिन ढळगो जणा चेला ईसु कनै आर खेबा लाग्या, “आपा उजाड़ म हां अर बोळो मोड़ो बी होगो ह इ ताँई थे इ भीड़नै बिदा करो जिऊँ क अ कनै का गाँवा म जार खाबा ताँई मोल लेर खा सकीं।” 16पण ईसु बोल्यो, “आनै कठैई जाबा की जुर्त कोनी, थेई आनै खाबा ताँई द्यो।” 17बे खेबा लाग्या, “म्हारै कनै दो मछी अर पाच रोट्या क सिवाय क्युंई कोनी ह।” 18ईसु ओडायो, “बानै मेरै कनै ल्याओ।” 19अर बे भीड़ का मिनखानै ओडाया, “थे घास प बेठ ज्याओ।” बिकै पाछै बे बा पाच रोट्यानै अर दो मछ्यानै लेर ईस्बर नगरी क कानि देख्या अर परमेसरनै धनेवाद देर बा रोट्या का अर मछ्या का टुकड़ा कर आपका चेलानै देता गया अर चेला लोगानै देता गया। 20सगळा मिनख धा'पर खा लिआ। बिकै पाछै बी बे बचेड़ा टुकड़ाऊँ बारा चोल्या भर'र उठाया। 21बठै लूगाया अर टाबरानै छोडर खाबाळा म मोट्यार-मोट्यार की गिणती पाच झार ही।
ईसु को पाणी प चालबो
(मरकुस 6:45–52; यहून्ना 6:15–21)
22बा बाता क पाछै ईसु आपका चेलानै बोल्यो, “थे न्याव म बेठर दरिआव क परलै नाकै चालो म आ मिनखानै बिदा कर आऊँ हूँ।” 23अर बे मिनखानै बिदा कर डूँगर प अरदास करबा ताँई चलेग्या। बो मोड़ै ताँई एकलोई हो। 24अर बाका चेला न्याव म बेठर किनाराऊँ कोसा दूर चलेग्या अर न्याव लेहराऊँ झोला खाबा लागी। क्युं क सामै की भाळ ही। 25भागपाट्या ईसु पाणी प चालतो होयो बाकन गयो। 26चेला बानै पाणी प चालता देख्या जणा डरग्या अर आपसरी म खेबा लाग्या, “ओ तो भूत ह!” अर आ खेर बे सगळा डर क मारै चिलाटी घालबा लाग्या। 27ईसु तावळोसो बाऊँ बोल्यो, “हिमत राखो म हूँ! थे मना डरो।” 28पतरस बाकी इ बातानै सुणर बोल्यो, “परबु ज थे हो तो मनै बी इ पाणी प चालर थारै कनै आबा ताँई हुकम द्यो।” 29ईसु बिनै ओडायो, “आज्या।” अर पतरस न्यावऊँ उतर ईसु कानि चाल पड़्यो। 30पण जद बिको ध्यान लेहरा कानि गयो जणा बो डरगो अर डूबबा लाग्यो। जणा बो जोरऊँ बोल्यो, “परबु मनै बचाओ।” 31ईसु तावळासा हात बढार बिनै पकड़ लिआ अर बिऊँ बोल्या, “हे थोड़ो बिस्वास राखबाळा तू भेम क्युं कर्यो?” 32बिकै पाछै बे न्याव प आगा अर भाळ थमगी। 33अर न्याव म जत्ता बी मिनख हा बे सगळा बाकी जे-जैकार करता होया बानै खेबा लाग्या, “थे सचमई परमेसर का बेटा हो।”
ईसु गनेसरत का रोगलानै निरोगो कर्यो
(मरकुस 6:53–56)
34बे दरिआव पार कर गनेसरत नगरी का किनारा प पुग्या। 35जणा बठै का मिनख ईसुनै पिछाण्गा अर बाकै आबा की खबर आस-पास की झघा म फेला दिनी। जिऊँ लोग सगळा रोगलानै बठै ले आया। 36अर बे ईसुऊँ अरदास करै हा क बो बानै आपका गाबा की कोर क हात अड़ाबा दे अर जत्ता बी बिकै हात अड़ाया बे निरोगा होगा।
Zvasarudzwa nguva ino
मत्ती 14: एस डब्लु वी
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
(c) 2010-2017, New Life Computer Institute. All rights reserved