यहून्ना 10
10
गुवाळ्या की निती-कथा
1ईसु ओज्यु बोल्यो, “म थारूँ सची बोलुँ हूँ, जखो मिनख रेवाड़ा म दरूजा की बजाय डोळी डाकर बड़ै बो मिनख चोर अर डाकू ह। 2अर जखो मिनख दरूजा होर रेवाड़ा म बड़ै, बो लल्ड्या को गुवाळ्यो ह। 3दरूजा प पेरोदेबाळो बि ताँई दरवाजो खोलै ह, बो हरेक लल्डीनै नाम लेर बुलावै अर लल्ड्या बिकी बोली पिछाणै ह। बो बानै बारनै लेज्यावै ह। 4जद बो बानै बारनै लेर आवै, जणा बो बाकै आगै-आगै चालै ह, अर लल्डी बिकै गेल-गेल, क्युं क बे बिकी बोली पिछाणै ह। 5बे कदैई कोई दुसरा क गेल कोनी जावै पण बिऊँ बिदकै ह। क्युं क बे बिकी बोली कोनी पिछाणै।” 6ईसु बाऊँ आ निती-कथा कही, पण बे बिको मतबल कोनी समज सक्या।
ईसु चोखो गुवाळ्यो ह
7जणा ईसु ओज्यु बोल्यो, “म थारूँ सची बोलुँ हूँ, लल्ड्या ताँई बारनो म हूँ। 8अर बे सगळा जखा मेरूँ पेली आया बे चोर अर डाकू हा, पण लल्ड्या बाकै गेल कोनी होई। 9बारनो म हूँ, अर जखो बी मेरै जरिए मांयनै आसी बो बचायो जासी। बो बार-भीतर आई-जाई करसी अर धपायो जासी। 10चोर चोरी करबा, मारबा, अर नास करबानै आवै ह। पण म जीवन देबा आयो हूँ, जखो भर्योपूरो जीवन ह।
11“म चोखो गुवाळ्यो हूँ, चोखो गुवाळ्यो खुदकी लल्ड्या ताँई पिराण देवै। 12पण बो मिनख जखो मजुरी प लल्ड्यानै चरावै ह, जखो बाको असली मालिक कोनी। बो ल्याळीनै कनै आता देखर लल्ड्यानै एकलोई छोडर भाग छुटै ह। अर ल्याळी बापै झपटो मार बानै तीनतेरा कर दे ह। 13बंधाणी प लल्ड्या को गुवाळ्यो भाग छुटै ह, क्युं क बो तो एक मजुर ह। अर बिनै लल्ड्या की कोई परवा कोनी होवै।
14 #
मत्त 11:27; लूक 10:22 “म चोखो गुवाळ्यो हूँ। क्युं क म मेरी लल्ड्यानै जाणू हूँ अर बे मनै। 15ठिक बंय्यांई जंय्यां परम-पिता मनै जाणै ह अर म बिनै, अर म मेरी लल्ड्या ताँई पिराण द्युँ हूँ। 16मेरी ओर बी लल्ड्या हीं, जखी इ रेवड़ की कोनी। मनै बानै बी ल्याणो जरूरी ह, बे मेरी सुणसी अर जणा बाको एक रेवड़ अर एकई गुवाळ्यो होसी। 17परम-पिता मेरूँ प्यार-परेम करै ह क्युं क म मेरी मरजीऊँ पिराण द्युँ हूँ, जिऊँ मेरो पिराण पाछो मिल सकै। 18मेरा पिराणा मेरूँ कोई कोनी ले सकै, पण बिनै म खुदई देऊँ हूँ। मनै ओ हक ह क म इनै दे सकूँ अर इनै पाछो ले सकूँ। अंय्यां करबा को हुकम मनै परम-पिता दिओ ह।”
19इ बात की बजेऊँ ओज्यु यहूदि मिनखा म फूट पड़गी। 20बोळा हा जखा अंय्यां बोलर्या हा, “इमै कोई भूत-पलीत रळेड़ो ह! ओ बावळो ह! थे इकी क्याले सुणो हो?”
21पण दुसरा बोलर्या हा, “भूत-पलीत रळेड़ो मिनख इकी जंय्यां कोनी बोल सकै! अर भूत-पलीत आँदा मिनखनै आँख्या कंय्यां दे सकै ह?”
ईसु प यहूदि मिनख बिस्वास कोनी कर्या
22ओ स्याळा को टेम हो, अर बि टेम यरूसलेम म मनदर की जेनती मनाई जारी ही। 23ईसु मनदर म सुलेमान का बरामदा म घूमर्यो हो। 24जणा यहूदि मिनख बिकै च्यारूमेर भेळा होगा। अर बिऊँ बुज्या, “तू कद ताँई म्हानै दो मता म राखसी? म्हानै साप-साप बता दे। तू मसी ह के?”
25ईसु बोल्यो, “म थानै पेलीई खे दिओ हो, पण थे मेरो बिस्वास कोनी कर्या। जखा काम म परम-पिता का नाम का हकऊँ करूं हूँ, बे मेरै पक्ष म गुवाई देवीं हीं। 26थे बिस्वास कोनी करो क्युं क थे मेरी लल्ड्या कोनी हो। 27मेरी लल्ड्या मेरी बोली पिछाणै ह, म बानै जाणू हूँ, अर बे मेरै गेल-गेल चालै ह। 28म बानै अजर-अमर जीवन द्युँ हूँ, अर बे कदैई कोनी मरसी। बानै मेरूँ कोई कोनी खोस सकै। 29मेरो परम-पिता जखो बानै मनै दिओ ह, बो सगळी चिजाऊँ बढर ह। अर कोईबी बानै बिका हाताऊँ कोनी खोस सकै। 30म अर मेरो परम-पिता एकई हां।”
31जणा ओज्यु यहूदि नेता बिपै बगाबा ताँई भाठा उठाया। 32ईसु बाऊँ बोल्यो, “म थारै बिचमै बोळा चोखा काम कर्यो, जखा परम-पिता मनै करबा ताँई दिओ हो। बामैऊँ कूणसा ताँई थे मेर प भाठा बगाबो चाओ हो?”
33बे बोल्या, “म्हें तेरा चोखा कामा ताँई तेर प भाठा कोनी बगावां, पण तू मिनख होर खुदनै परमेसर बतार परमेसर की बुराई करै ह।”
34ईसु बोल्यो, “ओ थारा पबितर सास्तर म मंडर्यो ह जंय्यां परमेसर बोलै ह, ‘थे परमेसर जंय्यां का हो।’ 35परमेसर बा मिनखानै परमेसर जंय्यां का खयो, जानै बिको बचन दिओ गयो अर आपा जाणा हां क पबितर सास्तर म मंडेड़ी बात कदैई झूठी कोनी होवै। 36जद म अंय्यां खयो क म परमेसर को बेटो हूँ, जणा थे क्युं खया म परमेसर की बुराई करूं हूँ। मनै टाळर इ जगत म भेजबाळो परम-पिताई तो ह। 37ज म मेरा परम-पिता का काम जखा बो मेरूँ चावै ह बानै कोनी करूं, जणा थे मेर प बिस्वास मना करो। 38ज म बे करूं, इकै बावजुद बी थे मेर प बिस्वास कोनी करो, पण कमऊँ कम मेरा कामा प तो बिस्वास करो। जिऊँ थे जाण सको क परम-पिता मेर म ह, अर म परम-पिता म।” 39एक बार ओज्यु बे ईसुनै पकड़बा की कोसिस करी पण बो बाका हाताऊँ बच निकळ्यो।
40 #
यह 1:28
जणा ईसु ओज्यु यरदन नदि पार चलेगो, जठै यहून्ना पाणी को बतिस्मो दिआ करतो। अर ईसु बठै क्युं क टेम ताँई रिह्यो। 41बोळा मिनख बिकै कनै आर खेता हा, “यहून्ना कोई चमत्कार कोनी दिखायो, पण जखी बी बात यहून्ना इ मिनख क बारां म खई ह, बे सगळी सच ह।” 42अर बठै बोळा मिनख बिपै बिस्वास कर्या।
Zvasarudzwa nguva ino
यहून्ना 10: एस डब्लु वी
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
(c) 2010-2017, New Life Computer Institute. All rights reserved