Smnlean 12
12
Mlawa Abram ka Utux Baro
1Rmengo Abram ka Utux Tmninun: “Htii malix ka alang su, dseediq su ma, sapah tama su, osa dxeral tniyu mu sunan. 2Pdngusun misu paru qnlhangan, mpbleyaq ku isu, ngayan su we maha paru riyung. Isu we mpbleyaq su seediq icil. 3Smbleyaq sunan we sblequn mu ka heya uri. Smiyus sunan we syusun mu ka heya uri. Ririh isu maha mangal smbleqan kana ka klegan seediq bobo dxeral.”
4Abram de muyu kari Utux Tmninun wada da. Msuupu heya mosa ka Lot uri. Mlatac Xaran ciida ka Abram we 75 knkawas na ciida. 5Abram we madis mqedil na Saray, Lot laqi mtswai na, kana sneli daha qyqeya meniq Xaran ma, seediq nangal daha mquri Kenaan mosa kana ka dheya. Dehuk dxeral Kenaan ka dheya. 6Moda dxeral hiya ka Abram, betaq Moreh ga niqan qhuni raus dxeral Sekem hiya. Meniq hiya ka seediq Kenaan ciida. 7Mtqita Abram ka Utux Tmninun, rmengo: “Bege mu laqi ltlutuc su ka dxeral nii.” Kiya de spharac na 1 spuhan ka Utux Tmninun mtqita heya ka Abram. 8Peeyah hiya theruy quri ddgiyaq Beytel quri nklaan hido dungal. Kiya de smalu kobu. Quri pryaxan hido we Beytel. Ga nklaan hido we Ay. Heya we spharac na 1 spuhan dungal ka Utux Tmninun, dmurun ngayan Utux Tmninun. 9Bobo na de, dmudul theruy mqquri Negeb ka Abram.
Mosa Micrayim ka Abram
10Dxeral hiya we ga daan krayan. Ririh sgcuqi bale krayan ka dxeral Abram de mquri Micrayim ka dheya, mtnooda meniq hiya. 11Daling Micrayim de, rmengo mqedil na Saray, rmengo: “Tai, klaun mu isu we mqedil su mbtunux. 12Qmita sunan ka seediq Micrayim de mprengo: ‘Mqedil na ka nii’ mesa de, mphuqil kenan ka dheya ma isu ka pkdusun daha. 13Maanu so kiya de, braho su rengo mesa, isu we mtswai mu. So ku ririh isu de maangal ku msbleyaq, knuudus mu uri we ririh isu maha muudus.” 14Dehuk Micrayim ka Abram ciida, seediq Micrayim de mita knbtunux taan ka mqedil kiya. 15Mnita heya ka dtnqliyan Paroh de, stndahu daha berah Paroh ka heya. Mqedil kiya de wada daha desun sapah qbsuran da. 16Ririh heya Paroh de smbleyaq ba Abram. Sbege na Abram ka egu bale dapa, miric, dapa balas roba, tnqliyan rseno, tnqliyan mqedil, dapa gipu roba ma dapa bukung.
17Utux Tmninun we ririh Saray mqedil Abram nii, paha paru bale snliqan smeeliq Paroh ma tnsapah na. 18Splawa Paroh ka Abram, rmengo: “Noda maanu ka wada su spquri yaku? Ma su ini rengo yaku, heya we mqedil su? 19Ma su rmengo: ‘Mtswai mu ka heya’, kiya ka desan mu hini mpqedil mu da ho? Saya, tai, nii hini ka mqedil su, desi ka heya!” 20Kiya de Paroh we smkagul seediq, wada na sbege Abram ma mqedil na kana ani maanu da.
Zvasarudzwa nguva ino
Smnlean 12: Stgdaya
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
The Bible Society in Taiwan, 2020
© 台灣聖經公會版權所有，2020