Yohani 7
7
UYesu navanine avanayuli
1Pisinda pazinizi pʼuYesu ahazyungula mu-Galilayi. Shʼatakasimʼukuzyungula mu-Yudayi, shʼawenyi avaYuda vakuti vamugoje. 2Ilelʼuchaka wa vaYuda uwa mutusansa apalamiye. 3Pʼavamwavo vahayanga nawo vahati: Yepaga panapa, uvale mu-Yudayi, vope navasundikwa vaho ukuti venyelezyajʼimbombo zyaho zyʼukuvomba. 4She numʼumuntu atakuvomba nahamo kukwilu lwʼakuti nkumushe mwonti. Ilelʼinga zyʼukuvomba zinizi pʼuyilolesye nazyo kunsi yonti. 5She nave vanine vope vatahamwitihaga. 6UwenʼuYesu ahavavuzya ahati: Ahavalilizyo hane hashili. Ahavalilizyo hinyu nyene amanda gonti halipo. 7Imwe insi yitamanyilʼukuvapata, nkandʼine yimpasite, she nkuyihomeshezya ukuti imbombo zyakwe zye mbivi. 8Imwe simuzuve muvale kuchaka. Ine ntakuzuva, mukuvala kuchakʼuno, shʼisiku lyanʼine lishilʼukufiha. 9Lwʼavavuzya linili pʼuwene ahasyala mu-Galilayi suti.
10Afinzile lelo avamwavo lwe vasogoye, pe wope ahazuva ukuvala kuchaka. Atahajendʼapazelu, nkandi fwe ngati kukwilu. 11Avene lelo avaYuda vahamwanza pachaka vahati: Ali kwi we wʼula? 12Zihava zye nyinji nkani izya kunongʼonelana avantʼimpuga yonti lwe vakumuyanjila wuyo. Vamo vahati: She mwinza. Avamwavo vahahana vahati: Ha, nkwʼakupuṿwʼavantu. 13Atalipo numo uwa kuziyanjilʼapazelu zinizi, she vahogopagʼavaYuda.
UYesu akusambilizya mu-Yelusalemu ukuti afumile kwa Mulungu
14Afinzile lelo pahati pachaka, pʼuYesu ahazuva ukuvala mwa tempeli, mwʼahasambilizya. 15PʼavaYuda vahasukumila, vahati: Umuntʼuno azimanyile vuli inongwa zya mwa kalata, she numo atamusambilizizye nalumo? 16PʼuYesu ahamula ahavavuzya ahati: Inongwa zye nkuvavuzyʼine zite zyane nene ndali, zya wuyo wʼantumilʼine. 17Uno wengʼakuti mbombe zizyo zyʼakasime Wuyo, wʼakuzimanyʼinongwa zye nkuvavuzyʼine kwe zifumile, ukuti inga zifumile kwa Mulungu, inga nashe zyane nene. 18Uno wengʼakuyanga zye zyakwe zyʼayasite, wʼakuyanzilʼulushindiho lwakwe wuyo akuti vanchindishe. Nkandʼuno wengʼakuti imushindishe wuyo wʼantumile, we wa nalyoli uwene, nuvugombanu vute navumo mumwakwe. 19Amwʼatavapiyʼinkomelezyo uMose? Ilelo shinishi namwe numʼatakusajilʼinkomelezyo zinizi. Shonu mukwanzʼukungoga? 20Pe vahamulʼavantu vahati: Jezile uli nishipena. Unanu wʼakwanzʼukukugogʼiwe? 21AhamulʼuYesu ahati: Mbomvilʼimbombo yoka vwelele, mwenti mukusukumila. 22Yenyi, uMose avapiyʼamiho aga kuvolwa uvuvolwa, —agene gatafumile kwa Mose ndali, gafumile kuvatata va lulwo—, lelo umuntu mukumuvola napisabati. 23Apene lelo umuntu ingʼakuposhelʼuvuvolwa napisabati, she mukuti inkomelezyo zya Mose tutavindule, pe mwatinji mundonje lelʼine shʼimuzuzuvushizizyʼumuntu wonti pisabati? 24Mutalonje mwe zivaliye kuminso ginyu ndali, nkandi simulonje mwe zili.
25Pe vamo ava mu-Yelusalemu umu vahayanga vahati: Amwe ate uno we vatili tumugoje wununo? 26Lelo, yenyi akuyangʼapazelu, nkandʼavene vatakuyanga nalimo kukwakwe. Vamumanyile ingavanga shinishi avapiti ukuti we wʼuChilisiti wununo? 27Havili uwene wununo nyene she tumumanyile kwʼafumile. NkandʼuwenʼuChilisiti inga lumo ingʼakwinza pe numo atalimanya kwʼafumile. 28PʼuYesu ahavilishila mwa tempeli lwʼakuvasambilizya ahati: Mumanyile nkanʼine, mumanyile nakwe mfumile. Havili ntinzile nene neka ndali, alipo nyene wʼantumilʼine we wa nalyoli, wuyo imwe mutamumanyile. 29Nkandʼine imumanyile, she mfumile kukwakwe, nukuntuma antumile wuyo. 30Pe vahati tumuleme. Havili ahasova numo uwa kuti agolosyajʼamahono ukumulema, shʼashili wuyo pahavalilizyo hakwe.
31Nkandʼavinji ava mumpugʼumu vahitiha. Ve vakuti: Apene lelo, ingʼuwenʼuChilisiti akwinza, pe amwe alilusyʼumuntʼuno ukupelʼiṿimanyilo iṿwinji? 32PʼavaFalisayi vahiṿwa zye vakumuyeva avantʼimpuga yonti. Pe navashiputʼavapiti navaFalisayi vahatumʼavanyamata vavo ukuti vamuleme. 33PʼuYesu ahati: Shinishi sutʼine pe tukuva swenti hansi namwe, inga pe nkuvala kuli wuyo wʼantumilʼine. 34Mulinanzagʼine, nkandi mutalinaga nakumo. She kwe nkuvalʼine, kwe mutalifiha imwe. 35PʼavaYuda vahavuzilizanya vahati: Akuvala kwi wununo, shʼakuti mutalinaga? Ingavangʼakuti mbale kuvamwitu ve vasavaliye muva-Giliki nukuvasambilizyʼavaGiliki? 36Akutaha shonu shʼakuti: Mulinanzaga, nkandi mutalinaga, nashʼakuti: Kwe nkuvalʼine, kwe mutalifiha imwe?
Aminzi amapelavulanzi
37Apene pisiku lya kuvumalilizyo vwa chaka ipiti, pʼuYesu ahimilila pupo, ahavilishila ahati: Uno wengʼayumilwʼaminzi, wʼayinze kukwane, angʼwele. 38Uno wengʼanitisilʼine, wʼamajenje ga minzʼamalanzi galiduvuha muhati mumwakwe, inza she lilyo ayanzile nukalata. 39LyʼahatahagʼuMupepo we vinze vamuposhelaje ve vamwitisile, shʼuMupepo ashili, shʼuYesu ashili ukwinjila muvupiti uvumwamu. 40Pʼavantu ava mumpuga mumwo, ve viṿuyʼamazwi gʼahayangʼuYesu, vamo vahati: Nalyoli jezile we mukuvwi wununo. 41Vamo vahati: We wʼuChilisiti. Nkandi vamo vahati: Ilelo mwʼakufuma mu-Galilayi lelʼuChilisiti? 42Amwʼuwenʼukalata atakuti: uChilisiti akufuma mumavanda ga Davidi, akuti: Akufuma munkaya ya mu-Betelehemu mwʼahavangʼuDavidi? 43Mwe munumu avantu mwe vavaliye impuga vahatapunkana kuli wuyo. 44Vamo vahati: Tumuleme, havili ahasova numo uwa kugolosyʼamahono ukuti amuleme.
45Pe vahavalʼavanyamata kuvashiputʼavapiti nakuvaFalisayi. Pʼavene vahati: Mutamulesite shonu? 46Vahamulʼavanyamata vahati: Numʼumuntu atayanzile nalumo inza shʼumuntu wununo akuyanga. 47PʼavaFalisayi vahavamula vahati: O, namwe ingavanga mupuṿile? 48Amwe alipo lelo wokʼumupiti, amwe alipo wokʼumuFalisayi wʼamwitisile? 49Ge mantu ganaga gene, ge gatamanyilʼinkomelezyo ge gatifilwe. 50UwenʼuNikodemo wʼavazile kwa Yesu pavusiku, wuyo wope ali wamwavo muvusongo wʼahavavuzya ahati: 51Amwe inkomelezyo zyitu zikulonga nzilʼumuntu lwe mushili ukutejelezya izyakwe zyʼakuyangʼuwene, lwe mushili ukumanya zyʼavomṿile? 52Avene vahamula vahamuvuzya vahati: Ingavanga nawe ufumile mu-Galilayi? Yenyelezyaga nawʼuyenye, shʼumukuvwi atakufuma nalumo mu-Galilayi. 53Pe vahasavalila, vahavala Uno munkaya yakwe, uno munkaya yakwe.
Zvasarudzwa nguva ino
Yohani 7: NYi1965
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Nyiha New Testament © British and Foreign Bible Society, 1965.