Yohani 4
4
UYesu numwantandʼuMusamaliya
1IlelʼuMwene lwʼavawenyi avaFalisayi ukuti viṿuye ilya kuti: UYesu alusizye nawe Yohani ukuṿuzyʼavasundikwa nukuvozyʼavantu, 2—uwenʼuYesu atahavozyaga ndali, nkandi vahavozyaga ve vasundikwa vakwe—, 3pʼahepa mu-Yudayi, ahavala mu-Galilayi nohavili. 4Uwene we pakuti atushe mu-Samaliya. 5Ilelo ahafiha munkaya yoka mu-Samaliya ye vatili Sihali izina, yʼipalamiye kunsi yʼuYakobu amupiyʼumwana wakwe uYosefu. 6Ilelo pe shali pupo ishifula sha Yakobu. Ayazile lelʼuYesu alisite mwidala, pʼahatendama pashifula pupo, pali pe pahavalilizyo ha mutanda. 7Pe wokʼumwantanda uwa mu-Samaliya ahinzʼukutapʼaminzi. PʼuYesu ahayanga nawo ahati: Nampa gamo, ngʼwele. 8Shʼavasundikwa vakwe vavazile munkaya ukukalʼiṿwa kulya. 9Pʼuwenʼumwantanda umuSamaliya wuyo ahamuvuzya ahati: We muYuda ukulava vulʼaminzi aga kungʼwela kulʼine ne mwantanda umuSamaliya? (ShʼavaYuda vatakwizya navaSamaliya.) 10UwenʼuYesu ahamula ahamuvuzya ahati: Upele washimanyile ishikunjilwa sha Mulungu, upele wamumanyile nuno wʼakuyanga kukwaho shinishi akuti: Nampa gamo, ngʼwele, pe nkandi ulaṿile wenewe kukwakwe, uwene pe nkandi akupiyʼaminzi amalanzi wuyo. 11Pʼahamulʼumwantanda ahati: Mwene, nishitapilo ute nasho iwe, nishifula ishi shiviye. Gakufuma kwi lelo aminzi amalanzi gʼukutaha? 12Ulusizye utata Yakobu uvupiti iwe, wʼatupiyʼishifulʼishi, we wope ahangʼwelaga shinishi, vope navana vakwe, ṿwope niṿwuma vwakwe? 13PʼahamulʼuYesu ahati: Vonti ve vakungʼwelʼaminzi ganaga, vakuvuyizyʼukwumilwa nohavili. 14Nkandʼuno wengʼakungʼwelʼaminzi genga nkumupʼine, wʼataliyumilwa nalumo ndali, aminzi gugo ge nkumupʼine, ge gakuyipelʼukuvʼishiduda sha minzi mumwakwe, ge gakuduvuha gakuvalʼukufiha nakuvulanzi vwa shimashima. 15Pʼumwantanda ahamuvuzya ahati: Mwene, gʼumpanje nane aminzi ganaga, ntavanje nishinyoto havili, nane ukuti ntinzaje panapa ukutapa. 16UwenʼuYesu ahamula ahati: Valaga, umwitʼumulume waho, uyinze panapa. 17Uwenʼumwantanda ahamulʼahati: She nte numwanaṿuli numo. UYesu ahamuvuzya ahati: Ulovosizye, shʼutili nte numwanaṿuli numo. 18She wali navo avalume vaho vasano, wʼuli nawo shinishi wʼate mulume waho. Mwe munumu ulovosizye, uyanzile izya nalyoli. 19Pʼumwantanda ahati: Mwene, shinishi nkumanyile we mukuvwi. 20Avatata iswe vahaputaga pigambʼili, imwe mwe vaYuda mukuti mwe mu-Yelusalemu mwe mwa kuputa mumwo. 21PʼuYesu ahamuvuzya ahati: We mwantanda, unitihaje, hakwinzʼahavalilizyo huho, pe kwa Tata mutaliputa napigamba linili namu-Yelusalemu. 22Imwe muluputo mukushindiha she mutashimanyile, nkandʼiswe muluputo tukushindiha she tushimanyile. Shʼuvwenʼuvuposhi vukufuma muvaYuda. 23Ahenʼahavalilizyo nyene he hakwinza, nashinishi halipo, pe vonti ve vakuputa imputo zya nalyoli ve valiputa kwa Tata namwa Mupepo wa muhati namuzya nalyoli. She wope nuTata akwanza ukuti vavanje vovulo venga vakuputa kukwakwe. 24UwenʼuMulungu Mupepo, vonti lelo ve vakuputa kukwakwe ve pakuti vaputaje namwa Mupepo wa muhati namuzya nalyoli. 25Umwantanda ahamuvuzya ahati: Nane manyile ukutʼakwinzʼuMesiya, we vakuti wʼuChilisiti. Inga lumo ingʼayinzile wuyo, pʼuwene alituvuzya zyonti. 26PʼuYesu ahamuvuzya ahati: Nkwe nene, ne nkuyanga nawe.
27Ilelo vahafishila lilyo avasundikwa vakwe. Vahasukumila lwe vazile akuyanga numwantanda. Nkandi numo atahamuvuzilizya ukuti: Ukwanzʼishonu? amwe: Wayanganaga shonu nawo? 28Pʼumwantanda ahayileha pupʼinsonta yakwe, ahavala munkaya. Ahavavuzyʼavantu ahati: 29Nzagaji, mwenyʼumuntu wʼambuzizye gonti ge ntazile. Amwe ate wʼuChilisiti wuyo? 30Pe vahafuma munkaya, vahavala kwʼali.
31Pahavalilizyo huho avasundikwa vakwe vahamulambilizya vahati: Labi, lyanga. 32Uwene ahamula ahati: Ine ndi niṿintu ṿwa kulya ṿwe mutaṿimanyilʼimwe. 33Avenʼavasundikwa vakwe vahavuzilizanya vahati: Amwʼumuntu ayinzile ukumupʼiṿwa kulya? 34UwenʼuYesu ahavavuzya ahati: Vwe ṿintʼine ṿwa kulya, inga nkuvomba zizyo zyʼakasime wuyo wʼantumilʼine, inga nkumalilizyʼimbombo yakwe. 35Amwe mutakuyanga namwe ukuti gasyayʼamezi gane imṿunʼukwinza? Yenyi lelo ine nkuvavuzya nkuti: Simwinulʼaminso ginyu, mwenyʼamagunda, she gazelufile, gafisile kumṿuno shinishi. 36Uno wʼakuṿuna akuposhelʼamalipilo, ukuvunganiha insanga, akuziviha kuvulanzi vwa shimashima. Ve vavili ukuti vaseshelaje poka, nawe mupesi nawe muṿuni. 37She munumu mwe likuloleha ukuva lya nalyoli izwi lye likuti: Wamwavo wʼakupesa, havili wamwavo wʼakuṿuna. 38Imwe mbatumile ukuti muṿunaje huho he mutavomṿile. Ukuvomba kwe vavomṿilʼavanji, imwe mwinjiye mumbombo yavo.
39AvaSamaliya va munkaya mumwo vahitiha ve vinji ve vamwitishiye lye lizwi lya mwantanda lyʼatili: Ambuzizye zyonti zye mbomṿile. 40Ilelo avaSamaliya vanava ve vavazile kwʼali vahamulambilizya ukudila kumwavo. Pʼahadila kukwo amanda gavili. 41Pe vahaṿula, vahalusya uvwinji ve vitisile pizwi lyakwe wuyo. 42Pe vahamuvuzyʼumwantanda vahati: Shinishi tutakwitiha shʼutuvuzizye iwe ndali, shinishi pe twiṿuye, pe tuwenyi sweneswe ukuti nalyoli Muposhi wa nsi wununo.
UYesu akumupozya umwanʼumwanaṿuli wa muhombe wa mwene mu-Galilayi
43Lwe gashilinkinʼamanda gavili ganaga, pʼahavuha ukuvala mu-Galilayi. 44She wopʼuYesu ahahomeshezya ukuti umukuvwi numʼumuntu atakumutima kumwavo kwʼakuliye. 45Ilelo lwʼafiha mu-Galilayi, pʼavaGalilayi vahamutanganʼahinza, she vaziwenyi zyonti zyʼapezile mu-Yelusalemu pachaka. She vope vavazile kukwo pachaka. 46Pʼahavuyizyʼukuvala mu-Kana munsi ya mu-Galilayi, mwʼagaluyʼaminzi lihavʼipele lya mampensya. Mwʼalʼumuhombe wa mwene, wʼumwana wakwe umwanaṿuli avinile, mu-Kapelinahumu. 47Wʼahiṿwʼukuti uYesu afumile mu-Yudayi, ayinzile mu-Galilayi umu, pʼahavala kwʼali, ahamulambilizya ukwiha nukumuzuzuvushizya umwana wakwe. Shʼasyaye pansi ukufwa. 48UwenʼuYesu ahamuvuzya ahati: Imwe inga mutakwenya iṿimanyilo namayele pe mutakwitiha. 49Uwenʼumuhombe ahati: Mwene, uyishe lwʼashilʼukufwa umwana wane. 50PʼuYesu ahati: Valaga, umwana waho mupuma. Pʼumuntʼuno ahava nulwitiho mwizwʼili lyʼuYesu ayanzile kukwakwe, ahavala. 51Ilelo lwʼakwiha, pʼavanyamata vakwe vahahomana nawo, vahati: Umwana waho mupuma. 52Uwenʼahavavuzilizya ahati: Ayanzitʼukuzuzuvuha pahavalilizyo vuli? Avene vahamuvuzya vahati: Inzegema yamulesile mavwila pahavalilizyo ha vusano na vuvili. 53Pʼuyise wa mwana ahamanya ukuti pe pahavalilizyo huho hʼuYesu ayanzile kukwakwe atili: Umwana waho mupuma. Pʼahitiha ninyumba yakwe yonti. 54She shimanyilo sha vuvili shʼuYesu apezile lwafumile mu-Yudayi, lwʼavazile mu-Galilayi.
Zvasarudzwa nguva ino
Yohani 4: NYi1965
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Nyiha New Testament © British and Foreign Bible Society, 1965.